He Aromatawai

Ko tā te whakamātautau nei he ine i te iti, i te nui rānei o tā ngā ākonga i ako ai i ngā wiki e waru kua mahue nei. Tōna 90 ki te 120 miniti te roanga o te whakamātautau nei. E whakaaehia ana te whakamahinga o ngā pukapuka mahi hei āwhina, heoi, kei tēnā, kei tēnā te tikanga. Ki te kore e pīrangi ki te mahi i ētehi wāhanga o te whakamātautau, e pai ana kia waiho noa.

He mahi whakarongo te wāhanga tuatahi. Kia rua ngā mātakinga o te ataata o Living By The Stars i raro iho nei kātahi ngā ākonga ka whakautu i ngā pātai i te pukapuka mahi.

Kia pau te 90 miniti ka tukua ngā kaupapa kōrero ki ngā ākonga. Ka rima miniti noa iho te roanga hei whakarite mā ngā ākonga i ā rātau kōrero e rua miniti te roa kātahi ka whakapuakina i roto i te rūma whakamātautau.

He Mahi Whakarongo

Living By The Stars Season 1 - Episode 2 Matariki, He Tohu Mate

Whakamāramahia te hāngaitanga o te kōrero ‘kua whetūrangihia koe’ ki a Matariki.

• Ko wai te ingoa o ngā kāhui whetū e rite nei tōna āhua ki tētehi waka?
• Ko wai te rangatira o taua waka?
• Ko tēhea kāhui whetū kei te kei o te waka?
• Ko tēhea te marama e tō ai te waka i te uru?
• Whakamāramahia mai te kōrero “Matariki whanaungakore, Matariki tohu mate”.

He Mahi Tuhituhi

Ngā Tohutohu:

Kotahi te tuhinga hei whakaoti māu i te reo Māori e pā ana ki TĒTAHI o ngā kaupapa e whai nei.

• Me tuhi koe kia 250 kupu neke atu rānei.
• Whakamahia te mahere whakaaro kei te whārangi 4.
• Kia maha tonu, ā, kia whānui anō hoki ngā momo kupu me ngā momo hanga kōrero.
• Whakaurua atu ōu ake whakaaro, āu ake kaupapa kōrero, kaupapa taunaki rānei.

Kaupapa

• Hautapu: Kua riro māu te hautapu tuatahi a tō whānau e whakahaere. Whakamāramahia te hiranga o te hautapu me te āhua o āu whakamāramatanga ki tō whānau.
• Te Rangi Motuhake o Matariki: Kua tau i tō kura kia kaua e whakanui i a Matariki. Tuhia tētehi reta ki tō tumuaki e whakamārama ana i te take me whakanui a Matariki.
• Matariki: Kōrerohia mai tētehi kōrero rongonui mō Matariki, me waihanga rānei i tāu ake kōrero.

Whakataukī:
Kia rua ngā whakataukī i raro iho nei hei tuhi anō māu i āu ake kupu. Whakamāramahia te tikanga o ngā kupu rerekē i whiri ai koe.

• Matariki Hunga Nui
• Hauhake tū, ka tō Matariki
• Matariki whanaunga kore; Matariki tohu mate
• Matariki kāinga kore
• Kua haehae ngā hihi o Matariki
• Ka rere a Matariki, ka wera te hinu.

NCEA Resource Exam Document

He Mahi Pānui

Ka pānui ngā ākonga i ngā kōrero a Hōhepa Tuahine ka whakautua ai ngā pātai e whai iho nei.

Kupu Hou

Whetē - stare intently, staring fixedly
Mātai - observe, examine, note
Ririki - small
Tīhokahoka - temporary shelter (made with branches stuck in the ground)
Tautauhea - low status person, undignified
Whāereere - mother (of one’s children), wife
Maninohea - disappointment, dissatisfaction
Orokotīmatanga - beginning, starting point, commencement
Kauwaka - vehicle, medium, human medium of a deity or spirit

He aha te tikanga o tā te tohunga whakamahi i ōna mātauranga e hāngai ana ki ngā whetū, ki te rā, ki te marama, me te taiao?

He aha ētehi pēhitanga i tau ai ki te āhua o te noho a te Māori, ki ngā tikanga Māori, me te reo Māori?

Whakamāramahia mai te tikanga o tēnei whakataukī:

• He whare kōkōrangi tīhokahoka, he iwi tautauhea
• He whare kōkōrangi motuhake, he iwi rangatira.

Tuhia ētehi tauira o te reo o te whare kōkōrangi e hāngai ana ki te:

• Whakanui i te whaimana
• Whakamihi i te tūpāpaku
• Whakaipo i te whāereere.

Tauira

Whakanui i te whaimana: Me ko Atutahi kei waho i te Mangōroa.
Whakamihi i te tūpāpaku: Koutou ngā mate, kua whetūrangihia koutou.
Whakaipo i te whāereere: Me he ōturu ngā karu.

He Mahi Kōrero

Tuarihia ētehi kaupapa ki ngā ākonga hei whiri mā rātau i tētehi ka tuhia ai e rātau tētehi kōrero tene. Kia tau rā anō i tēnā, i tēnā ā rātau ake kaupapa kōrero, ka rima miniti noa iho te roanga ki ia ākonga hei whakarite mā rātau i ā rātau kōrero tene e rua miniti te roa.

Ngā Kaupapa

• Ngā whetū heri kai o Matariki
• Āe, kāo rānei, tekau mā toru ngā marama o te tau Māori
• He iti pou kapua, ka ngaro, ka huna tini whetū i te rangi
• He aha te wāhi o te karakia i te Hautapu
• Ka rere ngā purapura a Matariki.