Te Mātahi o te Tau Matariki Ahunga Nui
Ka tohu te huhua o ngāi Māori i te tau hou i te kitenga o Matariki i mua i te ata hāpara me tōna rewanga tahitanga ki ētahi atu whetū i ngā pō Tangaroa, i te marama o Pipiri. Hei ētahi atu rohe, ko Puanga te tohu o te tau hou. Ka whakanui, ka kōrero te Māori i te hia kē nei whetū, kāhui hoki i te roanga o te tau, ā, he kōrero tā ia rohe mō ēnei whetū.
Ka mutu, kua rongo pea koe i ētahi kōrero, e iwa ngā whetū i te kāhui Matariki, i ētahi atu, e whitu kē. I ēnei kōrero katoa, ka rangona te whakakotahitanga ki te tangata, ki te taiao hoki.
Mānawatia ngā tikanga o Matariki
Matariki Hunga Nui
E toru ngā mātāpono matua o Matariki me te Tau Hou Māori:
- Te Whakamaharatanga - Te whakanui i ngā mate kua riro, mai i tērā rewanga o Matariki, ki tēnei.
- Te Whakanui i te wātū – Te hui tahi ki te whakanui i te oranga
- Te Aro ki ngā pae tata – Te Aro ki te makuru o te tau hou
I te rewanga o Matariki, e akiakitia ana ngā tāngata kia hoki ki te kāinga, ki ō rātou whānau, hoa hoki, ki te kai tahi, ki te noho tahi, ki te whakanui tahi i te Tau Hou, kia whakaarohia te onamata, kia whakanuia te ināianei, kia whakaarohia hoki te āpōpō.
He herenga taketake tō Matariki ki te taiao, ā, e hāngai ana ngā whetū o te kāhui nei ki ngā ātea rerekē o te ao māori, inarā, ki te whenua, ki te ngahere, ki te wai Māori, ki te wai moana, ki te hau me te ua.
He wā pea te Rā o Matariki ki te akiaki i ngā mahi whakaora taiao, pēnei i te whakatō rākau, te whakawātea i ngā arawai, te manaaki rānei i tētahi pāmu noke. He aronga pea ēnei hei whakanui, hei mahi rānei māu i te wā o Matariki.
Ngā whetū o Matariki
Matariki
Ko Matariki te whetū ariki o tōna whānau whetū. I ngā wā o mua he tohu a Matariki kia maumahara tātou ki a rātou kua ngaro ki te pō. He wā tēnei kia tukuna te aroha ki ērā e mokemoke nei koe.
Waitī
Ko Waitī te kaitiaki o ngā wai o te whenua. Ko te waitī te reo rōreka hoki.
Waitā
Mai i te wā o ngā tūpuna tae noa mai ki tēnei wā, ko Waitā te kaitiaki o te moana, o te marae o Tangaroa. Kei tōna ingoa te tikanga kia ngāwari te mau ki ō mahara, nā te mea e ahu mai ana te tā o Waitā, i te kupu tōtā, arā he kupu anō mō te tote. I ngā wā o nehe, he kupu anō a Tangaroa mō te Tuna.
Ururangi
Ko Ururangi te pōtiki o te whānau o Matariki. Ko Ururangi te kaitiaki o ngā hau katoa. Ko tētahi o ōna painga ko te hauora, he mea whakarauora, hāpai anō hoki i te iwi.
Tupuānuku
Ko Tupuānuku te kaitiaki o te otaota, o te aruhe, me te kai kua whakatipuria e te tangata. Arā, ko ngā kai nā Tāne, nā Rongo, nā Haumietiketike.
Tupuārangi
Ko Tupuārangi te kaitiaki o ngā kai o runga ake, arā, ngā huarākau nō te rākau, te ngahere, ngā manu, ngā hua, arā atu, arā atu.
Waipunarangi
Nā Waipunarangi ngā momo ua, ngā momo marangai katoa, tae atu ki ngā wai nō te puna o Ranginui.
Ka kitea anake e tētahi hunga motuhake e taunga ana ki te ao wairua, ā, ko rātou anake ka kite i ēnei wai o Rangi. Ko ēnei wai, he rongoā, he wai tapu mō ngā ritenga tapu.
Ki a tāua te Māori, ko te mana nui o te wai hei mea
whakaora, pēnā i ētahi atu iwi puta noa te ao. Nā reira,
he kawe rongoā, tae atu ki te tangi o te ua.Hiwa-i-te-rangi
E hono ana a Hiwa-i-te-rangi ki te tohu o te tau humi. Ka tukuna atu e te Māori ōna wawata, ōna tūmanako, ōna awhero o te tau ki a Hiwa-i-te-rangi me kore noa e tūpono ka whakatinanahia.
Pōhutukawa
Ko Pōhutukawa te whetū e hono ana i a Matariki ki te hunga mate, ā, ko ia hoki te take ka karangahia e te iwi ngā ingoa o ngā mate, ka tangi hoki inā kitea a Matariki e rewa ana i te atapō.
Puanga
Ko Puanga te whetū kawe i ngā tohu o te tau ki te tahatū o te rangi. E mea ana ētahi iwi o te rāwhiti he nui ake te mana o Puanga i te mana o Matariki nā te mea kāore e kitea ana te whānau o Matariki ki taha whakarua o te rangi. Ināianei, rapua he whetū nui anō i taua
wāhi o te rangi, ka kitea ko Puanga, e kōrekoreko mai ana, te whetū nui rawa o te rangi.
Ko Tautoru
Ko te “Tokotoru a Tautoru” ko Tāne, ko Tangaroa, ko Rongo-mā-Tāne, ko tā rātou he tohu i ngā mahinga kai.Ko Pūtara
Ka haruru te Pūtātara e pāoho atu ana ki te iwi kua eke ki te wā o te hauhake kai, nō reira, kia rite!Te Waka o Rangi
He kāhui whetū a Te Waka o Rangi. Tīmata mai ana i a Matariki kei te ihu o te waka, mutu mai ana i a Puanga kei tōna kei. Ko Taramainuku te tangata i runga i tēnei waka. Ka mahi ngātahi rāua e karahui ana i te hunga mate kia haria ki tua o te ārai.
Urutengāngana, Hine Te Āhuru, Hine Tū-Rama Genealogy
Ka moe a Rangi i a Papa ka puta ko Urutengāngana. Ka moe a Urutengāngana i a Hine Te Āhuru ka puta ko Te Rā-kura rāua ko Te Marama-i-whanake. Ka moe a Urutengāngana i a Hine Tū-rama ka puta ko Ngā Whetū.
Arā, ko te Whānau Mārama tēnei.
Mānawatia ngā rauemi ako
Kei te akiaki mātou i tō tūhura i te Tau Hou Māori mā ēnei rauemi ako, i waihanga mai ai i tā te Tāhūhū o te Mātauranga tautoko i te Rā o Matariki mā roto mai i te whakamōhio me te whakamānawa i a Matariki. Ka tautoko ngā rauemi nei i ngā mahi a Ngā Pou Whakaruruhau o Matariki, i whakatūhia ai kia tohu mai āhea, me pēhea hoki a Aotearoa e whakanui tahi ai i te Rā o Matariki mai i te tau 2022. Whakamahia ēnei i ō akomanga, hapori, i te kāinga hoki.
