He whakaurunga ki a Matariki

Whakapuakitanga

Ko wai a Matariki?

Kua roa nei a Matariki e whakanuia ana i ngā hapori Māori, i ngā whakapono Māori, me ngā whakahaerenga a te Māori. Heoi, pēnei i ētehi atu tikanga Māori, i kaha mimiti tō te iwi Māori mārama ki a Matariki, i tata mate hoki tā te Māori whakanui i te kaupapa nei i te kaha whakapākehātia ōna i ngā rau tau.

Ā mohoa noa nei, e kaha ana tātau ki te whakaoho anō i ngā kōrero me ngā whakahaerenga mō Matariki e mōhio pū ai tātau ki ngā kōrero o nehe. Ahakoa te hīkaka o te iwi ki te ako, me pōhiri tonu e tātau te rangirua i te maha o ngā mōhiotanga me muku kia whakakapia kēhia ki ngā mātauranga tika.

Ahakoa tā tātau taumanu i te mātauranga, ehara i te mea e whakahēngia ana ētehi atu kōrero, heoi ko tā tātau noa he kimi, he rapu i ngā kōrero e hāngai pū ana ki tā tātau e whakapono ana kei te tika.

E waru wiki te roa o tēnei kaupapa mō ngā āhuatanga, mō ngā whakamāramatanga, me ngā kōrero mō te kāhui rongonui e kīia nei ko Matariki.

Ko te whakapapa o Matariki te akoranga tuatahi o tēnei kaupapa.

I a tātau e ruku nei ki te hōhonutanga o tēnei kaupapa, kei wareware i a tātau he rerekē ngā kōrero a tēnā iwi, a tēnā iwi.

Mātakina ngā whakaaturanga nei i mua i te whakamātautanga o ngā ākonga ki te kēmu Kahoot:

• Living By The Stars Season 1 - Episode 5 Te Tikanga o Matariki

• Living By The Stars Season 1 - Episode 11 Matariki me āna Tamariki

Hei Mahi: Kahoot - 'Te Whakapapa o Matariki'

• Nā wai te wehenga o Ranginui rāua ko Papatūānuku i whakahē?
  • Tāwhirimatea
  • Tāne-mahuta
  • Rongo-mā-Tane
  • Hineahuone
     
• Hei tā Te Kōkau, ko te ingoa o Matariki ko:
  • Ngā mata o te ariki Tāwhirimātea
  • Ngā mata o te ariki Tāne-mahuta
  • Matariki ahunga nui
     
• Ko wai te mātāmua o ngā whetū?
  • Tupu-ā-nuku
  • Waitī
  • Waipunarangi
  • Pōhutukawa
     
• Ko wai ngā whetū heri kai? (He whiringa)
  • Waitī
  • Waitā
  • Tupu-ā-nuku
  • Tupu-ā-rangi
  • Pōhutukawa
  • Ururangi
    ​​​​​​​
• Ko wai te atua manaaki wawata?
  • Hiwa-i-te-rangi
  • Pipiri
  • Ururangi
  • Waipunarangi
     
• Kitea pēneihia ai a Matariki ki Aotearoa nei?
  • Āe
  • Kāo
     
• Kei runga ake a Waitā i a Waitī?
  • Āe
  • Kāo
    ​​​​​​​
• He tohu pēhea nei te kaha pīata o Tupu-ā-nuku i te kāhui o Matariki?
  • Ka tino nui ngā huawhenua,
  • Ka tupu matomato ngā kūmara
  • Kāore e tupu matomato ngā kūmara
     
• Ka rerekē te rā o Matariki i ia tau, i ia tau?
  • Āe
  • Kao

Mahi: 'Te Whakapapa o Matariki'

“Te Whakapapa o Matariki"

Ka whakarōpūhia koutou ki ētehi rōpū, kia whā ngā ākonga ki ia rōpū. Waihangahia mai tētehi ataata e toru miniti te roa mō te whakapapa o Matariki.

Kaiako: Whiria kia toru ngā kīanga kua whakaakona, ā, āpitihia hei waehanga o te kaupapa nei.

Hei tauira: ‘Manohi anō’, ‘nōna e….ana’, ‘waihoki’, ‘nā wai rā’.

Me whai wāhi ngā waehanga e whai iho nei ki te ataata:

• Kia auaha
• Me whai wāhi ngā mema katoa o te rōpū ki te ataata
• Whakamāramahia ko wai e whakatinana ana i ngā whetū i te ataata me te tikanga o ia whetū
• Me whai wāhi ngā mahi o nāianei
• Me kanikani, me waiata, me pao rānei
• Whakahuaina te kīanga kua whiria e te kaiako