Te Wharekura 18

Ka haere a Hata mā ki te hī moki

Nā Roka Paora o Te Whānau-a-Apanui.
Nā Clifford Whiting ngā whakaahua.
 

Ko te Hātarei tēnei rā, te toru tekau mā tahi o Mei. He rā tino pai tēnei. Tino marino te moana.

KO HATA: Tamahae, Mārama, e Pani, ka haere tātau ki te ruku kuku i Toka-a-kuku.
KO MARAMA: Hei aha ngā kuku, Pāpā?
KO HATA: Hei mōunu, Mārama. Kua tata ki te wā hī moki, nō reira me whakareri ngā kuku i te wā e marino ana te moana. He pai hoki kāore he kura āpōpō, ka wātea kōrua ko Tamahae ki te kōwhiti i ngā kuku. Tamahae, tīkina he pēke me ō tātau diving glasses. E Pani, mauria mai he kai mā tātau ki tātahi he parāoa, he tī hoki ki rō flask.

He mahi pai tēnei ki te whānau a Hata. Kāore i roa ka reri katoa rātau. Ka eke a Tamahae rāua ko Hata ki runga i te tarakihana. Ko Pani rāua ko Mārama kei roto i te poti kei runga i te trailer. Tekau mā rima meneti e rere atu ana i te awa poti o Hata mā, ka tae ki Toka-a-kuku. He toka nui a Toka-a-kuku. He tokomaha ngā tāngata i reira e ruku kuku ana hei mōunu hī moki. Ko Pani i te pupuri i te poti. Ko Mārama, ko Hata, ko Tamahae i te ruku. He toa rātau ki te ruku. Kāore i roa ka kī ngā pēke e rua. Kāore hoki i roa ka kī ngā pēke a ētahi atu o ngā tāngata. Nā te whiti o te rā ka mahana noa ngā tāngata. Ka hoki mai a Hata mā ki te awa poti.

KO HATA: E Pani, haere kōrua ko Mārama ki te tahu ahi hei tunutunu kuku. Tamahae, pēketia mai te tarakihana hei tō atu i te poti ki uta.

Ka kā te ahi. Ka ūhia te ahi ki te tīni, ka whakatakotoria ngā kuku ki runga i te tini. Ka inu tī a Hata mā i a rātou e tatari ana kia maoa ngā kuku. Ka maoa ngā kuku, kātahi a Hata rātau ko tōna whānau ka kai.

KO HATA: Te mōmona hoki o ngā kuku nei! Ka reka hoki!
KO PANI: Āe! Moumou hei mōunu.
KO HATA: E Pani, kaua e korero pēnā! He reka anō rā te moki. He kai kuku tonu tā tātau nei mahi. Ēngari te moki, nō ngā marama anake o Hune me Hūrae tēnei kai.

Ka mutu te kai a te whānau, kua whakakaotia ngā taputapu. Ko Tamahae kei te whakakao i ngā anga kuku me ngā para, ka uta ki runga i te ahi. Kua akona e Hata a Tamahae mā ki te kohikohi i ngā para o tātahi kia waiho mā ai mō ngā tāngata haere ki tātahi.

Ko te Rātapu tēnei rā, te tahi o Hune. Kei te noho te whānau a Haia i waho; kei te kōwhiti kuku.

KO TAMAHAE: Mārama, tīkina atu tā tātau waerehe ki konei. He pai tonu te whakarongo ki ngā pop songs i a tātau e kōwhiti kuku ana.
KO MĀRAMA: Āe, Tamahae. He pai ake tēnā mahi i te kōwhiti kuku.
KO PANI: Mauria mai hoki ngā plastic bags me ngā rubber bands kei roto i te kāpata hei paepae i ngā kuku.
KO HATA: Ka pai hoki tā tātau mahi! Te mahana hoki!

Kāore a Tamahae e kōrero. Kāore ia e tino pīrangi ana ki tēnei mahi, ki te kōwhiti kuku. Kotahi hāora pea rātau e kōwhiti ana, ka oti ngā pēke e rua. E iwa ngā plastic bags i kī i te kuku.

KO HATA: Purua ngā kuku nei ki roto i te deep freeze, Tamahae.

Ko te waru o Hune tēnei rā. Rima karaka te tāima.

KO HATA: Kua tū te pahi o Ōpōtiki. Tamahae, haere ki te mātaki he aha tā te taraiwa mā tātau.
KO TAMAHAE: Pāpā, he pēke pipi. Nō hea rā?
KO HATA: Nā tō matua kēkē, nā Hare, i tuku mai i Ōpōtiki hei mōunu. He pipi ano tētahi kai pai ki te moki. E Pani, me kōwhiti e tāua ngā pipi nei āpōpō, ka waiho ai pērā i ngā kuku. Kua waimarie koe Tamahae, me koe Mārama, kāore kōrua e kōwhiti pipi; kei te kura kē hoki kōrua.
KO MARAMA: Kaitoa!
KO TAMAHAE: Pāpā, kei te hiakai pipi au.
KO MARAMA: Me au.
KO PANI: Me au hoki.
KO HATA: Kāti rā, tīkina he kōhua.

Kāore he pipi o Te Kaha, nō reira he kai tauhou tēnei ki te whānau a Hata.

Ko te Paraire tēnei rā, te tekau mā toru o Hune.

KO HATA: E Pani, me haere tātau ko ā tāua tamariki ki te rama pāpaka a te pō nei.
KO MĀRAMA: Hei aha ngā pāpaka?
KO HATA: Hei mōunu anō mā te moki.
KO MĀRAMA: He mahi pai ki a au te rama pāpaka.
KO TAMAHAE: He pai anō hoki ki a au. Māmā, kei hea te rama? Me haere au ki te toa ki te hoko batteries hou. Kua flat kē ngā batteries o tā tātau rama.
KO HATA: Āe, Tamahae. Me hoko mai anō tētahi rama ki a kōrua ko Māmā. Ki a māua ko Mārama tētahi, ki a korua ko Māmā tētahi. Mārama, mauria ngā pēre e rua ki runga i te taraka.
KO MARAMA: E haere ana tātau ki hea rama pāpaka ai?
KO HATA: Ki Hāmama.
KO MARAMA: Ka pai hoki! He pai ki a au te haere ki Hāmama.
KO PANI: Me moata te hapa kia horoia ai ngā pereti i mua i te haerenga.

I te whitu karaka i te pō ka haere te whānau nei mā runga i tō rātau taraka ki te rama pāpaka i Hāmama. He pō pai tenei mō te rama pāpaka. Kua waia kē te whānau a Hata ki tenei mahi. Kei te pari haere mai te tai.

KO TAMAHAE: Māmā, anei tā tāua rama. Māu e rama, māku e hopu ngā pāpaka.
KO PANI: Kia tūpato, Tamahae. Kaua e pōnānā, kei taka koe ki roto i te wai.

Ko tēnei mahi ko te rama pāpaka ehara i te mahi ngāwari. Tuatahi, kia mahana tonu ngā kākahu, he makariri hoki. Tuarua, kia pai tonu te takahi haere kei tūtuki nga waewae ki ngā toka, ka hinga. Tuatoru, kaua e hopua ko mua o te pāpaka, kei ngaua ō ringaringa; me hopu ko muri, a, kia tere tonu te maka ki roto i te pēre. Tuawhā, kaua e hāparangi, e turituri ranei, kei mataku hoki ngā pāpaka. Ko te pāpaka te tino kai a te moki, ēngari he pai tonu te kuku, te pipi me te kōura.
Ka kī nga pēre e rua, ka hoki a Hata mā ki te kāinga. Ka tukua nga pāpaka ki rō wai māori kia matemate ai.
Ko te Hātarei tenei rā, te tekau mā whā o Hune. Kei te whakareri a Hata i tana poti, i te penehīni me nga taputapu katoa mō te haere ki Whangaparāoa ki te hī moki. Ko te tekau mā rima o Hune te rā tīmata ki te hī moki, nō reira me whakareri ngā mea katoa.
Kātahi tonu a Tamahae ka hoki mai i te kainga o Rewi.

KO TAMAHAE: Pāpā!
KO HATA: He aha. Tamahae?
KO TAMAHAE: Kei te pīrangi haere au ki te hī moki i Whangaparāoa. Kāore anō koe kia mau i a au ki te hī moki.
KO HATA: E tama! Ehara tērā mahi mā te tamariki. Kia āhua pakeke koe ka haere ai tāua.
KO TAMAHAE: Kua tekau mā rima kē ōku tau. Kei te haere a Rewi rāua ko tōna pāpā ko Rua. Haere ai kōrua ko Rua ia tau ia tau. E mauria ana e Rua a Rewi. Tekau mā whā noa iho ōna tau.

Kua rongo atu a Pani i ngā korero a Tamahae.

KO PANI: E Hata! Kei te tika tā Tamahae. Me ako ia ināianei ki tēnei momo mahi. Koroua rawa ake koe, kua waia a Tamahae ki te haere ki te hī moki. E rua tau noa iho kei muri ka haere tā tāua tama ki te mahi i Ākarana. Kāore tēnei mahi e mahia ana i te tāone, nō reira mauria i te wā e hihiri ana te tamaiti nei.
KO HATA: Ēngari he tika hoki tēnā kōrero. Ki a au nei, kei te kura tuatahi tonu a Tamahae. Āe, e tama. ka mauria koe e au. Kei te tika tā Māmā. Koroua rawa ake au, kua mōhio koe ki te haere ki Whangaparāoa
KO TAMAHAE: Tēnā koe, Pāpā! Mehemea koe he wahine ka kihia koe e ahau. E oma ana au ki te whakaatu ki a Rewi kei te haere au.
KO HATA: Taihoa! Me āwhina koe i a au ki te whakareri i ā tāua taputapu. Kia mutu tā tāua mahi kātahi koe ka haere ai. Tēnā, me āta! tirotiro koe mehemea kei roto katoa ā tāua taputapu i te pouaka nā.
KO TAMAHAE: Āe Papa! Anei ngā taputapu o te pouaka nei. E whā ngā aho, e rua tekau ngā pīhuka, tekau ngā swivels, tekau ngā sinkers, e rua ngā miro mā, e rua ngā scalers.

KO HATA: Tīkina ngā oka e rua, he harakeke, he tuaina hoki, ka kuhu ai ki roto i te pouaka nā. Ka mutu tēnā, ka titiro ai ki roto i tēnei pouaka.
KO TAMAHAE: He aha kei roto i tēnei pouaka?
KO HATA: Ko ngā taputapu mō te mīhini o te poti.
KO TAMAHAE: E rua ngā spark plugs, he spanner, he screwdriver, he pounamu hinu. he starting cord.
KO HATA: Ka pai! Tēnā. hikia nga pouaka nā ki roto i te poti. Tīkina kia whā ngā pēke kuku, kia rua ngā pēke pipi kei te deep freeze, ka kuhu ai ki roto i te pēre kia ngāwari ai. Haria mai hoki ngā pāpaka. Kua māro katoa ngā kuku me ngā pipi i roto i te freezer.

Ka whakamauria e Hata te trailer ki te taraka, ka pēketia ki roto i te whare motoka. Ko te taraka kei waho, ko te trailer o te poti kei roto i te whare motokā.

KO PANI: E Hata, Tamahae, haere mai ki te hapa!
KO TAMAHAE: Kua kore au e tae ki te whakaatu ki a Rewi e haere ana au ki Whangaparāoa. Kua pōuri.
KO HATA: E tama, me waea atu.
KO TAMAHAE: Āe! Kāore au i mahara ake ki te waea. Hei aha! Kei hea a Mārama?
KO MĀRAMA: Anei ahau.
KO TAMAHAE: Mārama, kei te haere au ki te hī moki.
KO MĀRAMA: Ka waimarie hoki koe. Mehemea au he tamaiti tāne ka inoi hoki au ki a Pāpā kia mauria au.
KO TAMAHAE: Mama, ka pai hoki te hapa.
KO PANI: E tika hoki, Tamahae. Ka mutu tō hapa ka whakareri ai koe i ō kākahu mō te haere ki Whangaparāoa; he poraka mahana, he tarau roa, he hingareti mahana, he tōkena, he pōtae, he kāmeta, he karapu mahana, he hū hoki. Mārama, mā tāua e horoi ngā pēreti kia wātea ai a Tamahae ki te whakareri i ōna kākahu.
KO HATA: E Pani! Kua reri ōku kaka?
KO PANI: Āe. Kua reri anō hoki ā kōrua kai.
KO HATA: I tunua e koe he bacon and egg pie?
KO PANI: Āe, haere mai kia kite i tā kōrua pouaka kai.
KO HATA: Ka pai hoki, e Pani! Mō te ata noa ka mahi ai he tī ki rō flask.

I te pai o ngā kai a Pani mā Hata rāua ko Tamahae, ka kihia e Hata a Pani.

KO HATA: E Pani! Kei hea taku wēhike?
KO PANI: Tō aha?
KO HATA: Taku pounamu wēhike.
KO PANI: Kei roto i te kāpata. E mauria ana e koe tō pounamu?
KO HATA: Āe. Hei whakamahana i a au.
KO PANI: Me atu inu koe. Mōhio tonu koe ka nui ana tō inu wēhike ka pōrangi koe. Tētahi, kei tahuri i a koe te taraka ka mate a Tamahae.
KO HATA: E Pani!

Ko te tekau mā rima o Hune tēnei rā. Whā karaka i te ata te tāima.

KO HATA: E Pani! E oho!
KO PANI: He aha tēnā, e Hata? Mōhio tonu koe kāore au e pai kia whakaohotia au i tēnei hāora o te ata. E moe!
KO HATA: Kua haruru kē te mīhini. Kua maranga kē a Tamahae.
KO PANI: Inei! Kei te koa rā a Tamahae, nō reira ka moata ia.

Kāore he hiko o Te Kaha. He mīhini tā te whānau a Hata hei huri hiko.

KO PANI: E maranga ana au ināianei ki te mahi parakuihi mā kōrua ko Tamahae. He aha tāu e takoto nā, e Hata? Maranga! Mehemea ko au tēnā e haere ana ki Whangaparāoa kua maranga noa atu au.
KO TAMAHAE: Morena Māmā! Tō moata hoki!
KO PANI: Ki te mahue mā kōrua ko Pāpā e mahi he parakuihi, ka paruparu katoa te kīhihi.

Toru tekau meneti pāhi i te rima karaka te tāima. Kua wehe atu a Hata rāua ko Tamahae.

KO TAMAHAE: Kua oho kē a Rewi mā. Arā tō rātau raiti e kā mai rā!

Kua tū te taraka i waho i te kāinga o Rewi mā. Kua tae kē mai a Rewi rāua ko Rua ki te rori me ā raua taputapu.

Kotahi hāora e haere atu ana i Te Kaha, ka tae ki Whangaparāoa. Nō te toru tekau meneti pāhi i te ono karaka ka tae a Hata mā. Kei te āhua pōuri tonu. Ka heke a Hata rāua ko Rua, ka noho tonu a Tamahae rāua ko Rewi.

KO REWI: Ko tātau tonu ngā mea tuatahi ki te tae mai.
KO TAMAHAE: Kātahi hoki te kāinga makariri ko tēnei!
KO REWI: Kei te pupuhi tonu te hau whenua, nā reira ka tino makariri rawa atu.
KO TAMAHAE: Kaua tāua e mea atu ki ō tāua pāpā kei te makariri tāua, kei kī mai me noho tāua ki uta. Me manawanui tonu tāua.

Kei te haere a Hata rāua ko Rua ki te mātaki i te ngutu awa.

KO HATA: He waimarie tātau kāore ano te tai i āta timu.
KO RUA: Āe! Ka pai noa te pei mai i te poti ki konei. Kāore noa e pōrearea ki te haere rawa ki tātahi tuku ai i te poti. Ka puta mai a Tamahae rāua ko Rewi.
KO TAMAHAE: Papa, ehara tenei i te moana ko te awa kē.
KO HATA: Āe, e tama, ko te ngutu tēnei o te awa o Whangaparāoa. Nā te āhua timu tonu o te tai ka pai noa te tuku atu i te poti i konei, ka rere atu ai ki te moana.
KO RUA: Kāore tātau e taumaha ki te pei atu i te poti ki tātahi.
KO REWI: Kāti tonu, Tamahae. Ko te taumaha o te poti o tō pāpā!

Kua taetae mai ētahi atu tāngata ki te ngutu awa. Kei te mihi a Hata rāua ko Rua ki ngā tāngata nei. Nō Whangaparāoa ētahi, nō Ngāti Porou, nō Ōpōtiki, nō Raukōkore, nō Te Kaha hoki. E ono ngā motokā, e whā ngā taraka, e rua ngā tarakihana i reira. Kua tino mārama ināianei.

KO TAMAHAE: Te tokomaha hoki o ngā tāngata! Ākuanei kāore he rūma i ngā taunga moki mō ngā poti katoa.
KO HATA: Haere mai, e hoa mā. Ko tātau kei mua, nō reira me whakawātea tātau i tō tātau poti, kia wātea ai te huarahi mō ētahi atu.
KO RUA: E Rewi, haria ō tātau kākahu maroke ki roto i te taraka.

Ka peia te poti ki te awa, ka peke atu a Rewi rāua ko Tamahae ki te pupuri i te poti; ko Hata rāua ko Rua i te whakahoki i te trailer ki te taraka.

KO RUA: E Hata, kei hea te haika o te poti?
KO HATA: Aue, taukiri e! Kua wareware atu kei te kāinga.
KO RUA: Tēnā, karanga atu ki tētahi o ngā tāngata rā mehemea he haika tā rātau ki a tatau.
KO HATA: E hoa mā, kei te raruraru mātau! Kua wareware atu te haika o tō mātau poti ki te kāinga. Kāore he haika a tētahi o koutou ki a mātau?
KO TŌTAHI TANGATA NŌ ŌPŌTIKI: Anei tētahi haika ki a koutou. He waimarie e rua aku haika.
KO RUA: Tēnā, me āta titiro anō tātau mehemea kei konei katoa ā tātau taputapu. I tērā tau i wareware ngā mōunu ki uta. Kua tau kē māua ki te taunga moki ka kitea i wareware ngā mōunu.
KO TAMAHAE: Kei konei katoa ngā mea.
KO HATA: Tēnā rawa atu koe, e hoa, mō te haika nei. Koia nei te mate o te pōnānā. Kia hoki mai mātau ka waiho ai ki runga i tō taraka.
KO HURI [he whanaunga nō Hata]: E Hata, i tērā tau i wareware i a koe te haika o tō poti, i tenei tau kua wareware anō. Kāore noa pea he haika o tō poti!
KO HATA: Ka pōhēhē tonu te tangata kāore aku haika.

Ko Hata i te kei o te poti, ko Rua i te ihu, ko Tamahae rāua ko Rewi i waenganui. Kua haruru te mīhini o te poti.

KO RUA: Ka pai hoki tō mīhini, e Hata! Kāore e roa ka tae tātau ki te taunga.
KO HATA: Āe! Nāku i tuku ki Ōptiki ki te tangata mahi mīhini kia mahia mai.
KO TAMAHAE: Tino rerekē tēnei awa poti i tō tātau awa poti i Te Kaha.
KO REWI: Te teitei o te maunga nei! He aha te ingoa o tēnei maunga?
KO HATA: Ko Tihirau.

Nā te haruru o te mīhini kāore noa a Hata mā i kōrero, ā, ka tae te poti ki te taunga moki tuatahi.

KO TAMAHAE: Kei hea ngā tohu o tēnei taunga ika?
KO RUA: Arā!
KO REWI: He aha te ingoa o te taunga nei?
KO HATA: Ko Pakaru.

Ka āta kitea ngā tohu, ka tukua te haika e Rua.

KO REWI: He tino hōhonu tēnei taunga. Te roa hoki o te taura kei roto i te wai! Tamahae, kāore anō koe kia kōrero. Kei te hia ruaki koe?
KO TAMAHAE: Āe! Nā taku kainga hēki i te ata nei i hia ruaki ai au.

Ka ruaki a Tamahae.

KO HATA: Tamahae ka pai tēnā hei tāruru mō te moki. Me moe koe.
KO TAMAHAE: Kāore au e moe. Kua pai au ināianei.

Waru karaka te tāima; kua whiti te rā. Kua tau ngā aho ki raro. Kei te rere mai ngā poti o ngā tāngata ki ngā taunga ika. Ko ētahi o ngā taunga kei waho noa atu i Pakaru.

KO HATA: Ka pai hoki te marino! Tino waimarie tātau. Kātahi anō te tau i pai ai te moana i te rā tuatahi. Tamahae, e Rewi, kei te mōhio anō kōrua ki ngā kōrero ake o te moki?
KO REWI: Āe, nā to mātau māhita ako i te reo Māori, nā Mr Te Moana, i kōrero mai ki a mātau.
KO TAMAHAE: Pāpā, ko tēhea puke a Puketapu?
KO HATA: Arā, ko tērā!
KO TAMAHAE: I wehe atu te tipuna nei a Ruamoengārara i taua puke mā runga i ana taniwha, ko Tūtehihi, ko Tūtewawa, ko Tūtakawerangi.
KO REWI: I hoki ia ki Hawaiki ki te tiki i tō tātau tipuna, i a Pou, ā, nā Pou i tono ki a Rehua kia hōmai te ika nei, te moki.
KO TAMAHAE: He aha rā i meatia ai mō te tekau mā rima o Hune ka tīmata ai te hī moki?
KO HATA: Kāore tonu au e mōhio. Kei te mōhio koe, e Rua?
KO RUA: E kiia ana koianei te rā e puta ai te whetū ko Whānui te ingoa. I te tekau mā rima o Hune ka puta taua whetū, ka mōhio ngā tāngata kua tae mai te moki ki Whangaparāoa.
KO TAMAHAE: Pāpā, kei te kūmea taku aho!
KO HATA: Kia mau, Tamahae! Hutia ake!
KO REWI: He aha tēnā e kanapa mai nā ki tō tātau poti? Me te mea nei he taniwha!
KO RUA: He makō!
KO REWI: Ka wehi hoki! Mataku ana ki te titiro atu. Kia tūpato, Tamahae, kei peke mai te makō nā ka ngaua tō ringa!

Kua tae ake te ika a Tamahae ēngari kua tae anō te mangō ki taua ika, kua ngaua. Ko te māhunga anake i mau ake i a Tamahae; kua riro kē i te makō te nuinga o tana ika.

KO TAMAHAE: Moumou taku ika! Mehemea he pū tā tātau, ka pūhia e au te makō rā,
KO RUA: Hei aha, Tamahae. Kua mōhio tātau he moki kei konei.

He nui te mangō ki tēnei moana.

KO HATA: Titiro, e hika ma, e ma rawa ēnei moki!
KO RUA: Anei anō tētahi!
KO REWI: Kāore anō ngā moki nei i kai mai ki taku nei mōunu.
KO TAMAHAE: Me ruaki koe pēnei i a au nei, hei tāruru.
KO REWI: Kāore kē au e mate ana i runga poti.
KO TAMAHAE: Kāti rā, me hoatu tētahi wāhi o tā tātau bacon and egg pie! Kua mau anō i a Pāpā tētahi moki. Te nunui hoki o ngā ika nei!
KO REWI: Kātahi anō ngā ika nei ka ngau mai. E koe! Tēnā anō! Titiro, Tamahae!
KO TAMAHAE: E tama, he pōrae kē tēnā! Mā te puihi kē tēnā momo ika.
KO HATA: Hei aha, e Rewi! Kia manawanui. Kei te mōhio anō kōrua ki ngā ture o te moki?
KO TAMAHAE: I kiia mai e Mr Te Moana ki a mātau, e whā ngā ture o te moki. Tuatahi, kaua e haua ki te rākau; tuarua, kaua e kai otatia; tuatoru, kaua e tunutunutia i tātahi; tuawhā, me hoatu te ika tuatahi ki u Pou.
KO REWI: Kua mau i a au tētahi ika!
KO TAMAHAE: Kua mau anō hoki i a au tētahi!

He moki ngā ika a Tamahae rāua ko Rewi. Kua tino ngahau ngā tokorua nei.

KO RUA: E Hata! Me neke atu tātau ki tētahi atu taunga.
KO REWI: Taihoa Pāpā! Me kore e mau mai i a au ētahi atu moki.
KO TAMAHAE: Arā! Kua mau anō i a Pāpā tētahi ika. Anei anō tētahi moki kua mau i a au!
KO HATA: E Rua, kia āhua roa ake ka neke atu ai tātau ki waho.
KO REWI: Kei hea a Ōtamaroa? I kī mai a Mr Te Moana he tauranga ika anō tērā.
KO TAMAHAE: Me Tuapapa, me Kokohura.
KO RUA: E hoa mā, kāore anō au i kite i a Mr Te Moana e hī moki ana, engari he tino mōhio ia ki ngā taunga moki.
KO HATA: He tika hoki!
KO TAMAHAE: Kei roto ngā kōrero mō ngā taunga moki o konei i tētahi pukapuka kei te wharekura, ko te Treasury of Māori Folklore te ingoa.
KO REWI: Kei roto i taua pukapuka ngā kōrero a te Māori mō ngā ika, mō te tohorā, mō te mangō, mō te moki me ētahi atu kai moana.
KO TAMAHAE: Nā tētahi tangata, nā John R. Waititi o Te Whānau-a-Apanui i tuhi ngā kōrero o te moki, nāna anō hoki i whakaae kia tuhia aua kōrero ki roto i te Treasury of Māori Folklore.
KO HATA: Kei te mōhio māua ko Rua ki tēnā tangata.
KO RUA: Āe! He tino tangata ia nō tēnei rohe.
KO TAMAHAE: I ki mai anō a Mr Te Moana he tino tangata ia.
KO HATA: E Rua, he mōhio ake ā rāua tama i a tāua ki ngā kōrero o te moki.
KO RUA: Kāore anō hoki tō tāua nei whakatipuranga i whakaakotia ki ēnei kōrero. He pai tonu nō tēnei mahi, nō te hī moki, i hihiri ai tāua ki tēnei mahi. Kāore noa tāua i āro ki ngā kōrero o neherā mō tēnei ika.
KO REWI: Pāpā, titiro ki taku aho! Kāore e mau i a au te pupuri.
KO RUA: He mangō, e Rewi! Tapahia tō aho, kei takeke ki ā mātau aho.

Ka tapahia e Rewi te aho, ka tīkina atu e ia he aho anō, kua poto rawa hoki tana aho.

KO TAMAHAE: Ahakoa he pai te hī moki, mataku ana nga mangō nei. Te nunui o ētahi!
KO REWI: He aha te tāima?
KO TAMAHAE: Kei a pāpā te wati.
KO HATA: Tekau karaka te tāima.
KO REWI: E kai ana au, Tamahae. Kei te matekai koe?
KO TAMAHAE: Kaua e kōrero kai mai ki a au! Kia hoki tātau ki uta kātahi anō au ka kai.
KO RUA: E Hata! E hutia ana e au te haika. Ka haere tātau ki waho.
KO TAMAHAE: Kua mau mai anō i a au tētahi ika.

Kāore a Rua e āro ake ki te ika a Tamahae. Kua hutia ake e ia te haika. Kua haruru te mīhini. Kua rere rātau ki tētahi taunga ika kei waho atu. Kotahi hāora a Hata mā i te taunga ika nei ka hutia ake anō te haika, ka hoki rātau ki uta.

Toru karaka i te ahiahi te tāima. Kua hokihoki mai ngā poti ki uta. Kei te timu te tai. Kāore ngā poti e uru mai mā te ngutu awa. Kua tīkina e nga tāngata o Whangaparāoa ā rātau tarakihana hei tōtō i nga poti ki uta. Kua tīkina e ngā tāngata hī ika ā rātau trailers kia māmā ai te tō i ngā poti ki uta.

KO HATA: E Rua, ka haere tāua ki te tiki i tā tāua trailer. Tamahae, mā kōrua ko Rewi e pupuri tō tātau poti.
KO TAMAHAE: E Rewi, ka pai kē tēnei mahi. E hoki mai ana anō au ā tērā tau.
KO REWI: He mahi tino pai tēnei. He maha tonu ā tātau ika. Pēhea rā ētahi atu o ngā poti? E haere ana au ki te mātaki.
KO TAMAHAE: Kaua e haere! E noho tāua ki konei. Kāore e mau i a au te pupuri te poti.

Kua tae katoa nga poti, kua whakamaua ngā trailers ki ngā waka. kua heria ngā pēke ika ki te awa kia unahitia. Kāore tēnei ika e tuakina ana.

KO HAIA: Anei, e hoa mā, he inu hei whakamahana.

Kāore i roa ka pau te pounamu wēhike a Hata; engari he pounamu atu a ētahi o ngā tāne.

KO REWI: Tamahae, ākuanei hoki rawa ake tātau, kua haurangi kē ō tāua pāpā.
KO TAMAHAE: Āe, he tere haurangi noa tōku pāpā.

Kua mutu te unahi i ngā ika. E toru tekau nga ika a Hata mā. Kua haere katoa ngā tāngata ki te kai mā rātau.

KO TAMAHAE: Katahi anō au ka kai. Ka pau katoa i a au ā tātau kai, i taku matekai.

Ono karaka te taima. Kua wehe mai te waka o Hata mā i Whangaparāoa.

KO TAMAHAE: He aha tātau i tū ai?
KO HATA: Ki te hoatu ika mā tō matua kēkē wahine.

E rima rawa ngā kāinga i tū a Hata ki te hoatu ika mā ngā whanaunga.

KO TAMAHAE: Tae rawa ake tātau ki te kāinga, kua pau ā tatau ika.

KO HATA: E tama, rite tonu koe ki tō tipuna te matapiko, Pēneitia ai tēnei ika hoatu ai ma nga whanaunga.
KO RUA: Koianei nga whanaunga hōmai mea mā tatau, nō reira koianei hei utu. He kai tauhou tēnei, me hoatu mā te tangata.

Waru karaka te tāima. Kua tae a Hata rāua ko Tamahae ki te kāinga. Kua puta mai a Pani rāua ko Mārama.

KO MĀRAMA: Pēhea tā kōrua haere, Pāpā?
KO HATA: Tino pai!
KO PANI: Me te mea nei, kei te āhua piapia koe, e Hata.
KO HATA: Koianei tonu ngā mahi ina hoki mai i te hī moki.
KO PANI: Kāti rā, whakairia ā kōrua ika. Mō te ata ka tuku ai i tētahi ki Kawerau mā tō tuahine me āna tamariki, ā, me tuku tētahi ki Ākarana mā tērā o tuāhine, ā, ko tētahi ki Te Kao mā ō tīpuna. He roa tonu a Tamahae rāua ko Hata e whakairi ana i ā rāua ika. e whakahokihoki ana i ā rāua taputapu, kātahi anō rāua ka haere ki te kaukau, ki te kai, ki te kōrero hoki ki a Pani rāua ko Mārama mō te hī moki i Whangaparāoa.

Ka pai te kai hikareti

Nā Kāterina Mataira.
Nā Conrad Frieboe ngā whakaahua.
 

E takoto ana a Maha i runga i tōna tuarā, e tatari ana ki ōna hoa, ki a Rupe rāua ko Hēnare. Ko tēnei tō rātou tino wāhi pai mō ā rātou mahi, mō ā rātou korero me ērā atu mahi a te taitama. Kāhore ētahi atu i mōhio ki tēnei wāhi, he wāhi whakapeke. I runga puke taua wāhi, kei roto i te ngahere, tata tonu ki tētahi awa.

Kātahi ka whakatika a Maha ki te whakarongo, e whiowhio mai ana hoki ōna hoa. Kāre tonu i roa kua puta mai, kua mea atu, "E Maha, kei te aha?"

"Kei te pai. Pēhea kōrua? Tō kōrua roa ki te puta mai!"

"Kua tae noa mai māua, engari i tonoa māua ki ngā toa ki te tiki parāoa me ētahi atu mea mā taku māmā."

"I mauria mai e kōrua he kai mā tātou?"

"Āe. Nāku i tāhae ngā tōtiti i roto i te kāpata, me ētahi parareka." Ko Rupe tēnei.

Ka whakahua a Hēnare, "Ka pai, ka pai! Nāku i mau mai te parai a taku māmā, me ētahi riki. Pēhea koe, e Maha? He aha ngā mea i mauria mai e koe?"

Ka kata a Maha, ka rere tōna ringa ki tōna pākete. Nō te putanga mai, he pākete hikareti i roto, me te pākete māti, ka kī a ia, "E tama, kei a au te kīnaki mō ā tātou kai. Anei he paipa mā tātou."

"E ta, nā wai ō paipa?" Ko Rupe tēnei.

"Nā taku kuia."

"Kei te mōhio ia kei a koe?"

"Kāhore. Engari, kāre ia e mōhio. Ākuni kua pōhēhē i ngaro noa iho i a ia."

Ka mutu tana kōrero, kua tangohia tētahi o ngā hikareti, kei roto i tōna waha e tautau ana. Ka tīhaea te māti, ka tahuna. Ka pai te kai paipa me te puhipuhi kauruki.

Ka mea a Rupe, "Hōmai tētahi māku."

"Āe, me tētahi māku." Ko Hēnare tēnei.

Ka kai paipa katoa te hunga nei, ēngari kāre e tino mōhio me pēhea te kai. Pai noa iho ki a Maha, ēngari a Rupe rāua ko Hēnare, ko ēnei tokorua kei te pāngia e te rewharewha, kei te whakarāoa i a rāua. Ahakoa e heke ana te wai i ngā whatu, ka kai tonu, ā, pau atu ēnā paipa.

Ka ki a Maha, "He kai reka tēnei, nē?"

Ka kōrero atu a Hēnare rāua ko Rupe, ahakoa te mamae o ngā korokoro, "Āe, he pai, he pai! Hōmai anō tētahi."

Kua whakahoki atu a Maha, "Kia mutu tā tātou kai, ka kai anō ai tātou i tētahi."

Ka pai te haere ināianei. Pakakē ana te kohikohi peka mō tā rātou ahi. Kāore i roa kua kā, kei runga hoki te parai, me ngā tōtiti e hihī mai ana. Ka tapatapahia e Hēnare ngā riki me ngā parareka ki roto. Kāre i roa kua maoka ngā kai, kāre hoki i roa kua pau i ngā korokē nei te kai. Reka tonu ērā kai. Ka kī ngā puku, kua puta mai anō ngā hikareti. Ka kai paipa anō rātou.

Nō te ahiahi ka hoki ngā korokē nei ki te kāinga o Rupe rāua ko Hēnare. Nō te taenga atu, e nohonoho ana ngā mātua o ngā tokorua nei, rātou ko te kuia o Maha i te kīhini. Ko te kuia i kōrero i te tuatahi, "E Maha, i whea koutou e porohīanga ana?"

"I te ngahere."

"Nē! He aha tā koutou mahi i reira?"

"Kāre noa iho. Heoi anō, i te hīanga.""Āe, koinā! Ka pai te hīanga kai paipa, nē rā?"

Tumeke ana ngā korokē nei, kua kōrero hoki te māmā o Rupe mā, "Āe. Ki te kai paipa, ki te tāhae tōtiti, ki te aha atu rānei?"

Ka tū whakamā ngā taitama nei. Kua kī atu te pāpā o Rupe mā, "E tā! Ka kino tēnei mahi. I mauria e koutou ngā paipa a te kuia, i mauria ngā tōtiti e tika ana mō te hapa o tēnei pō, me te parai a tō kōrua māmā.

Kei whea inaianei te parai, me ngā paipa? Kua pau?"

Ka tūngou mai ngā māhuna o ngā korokē rā. Ka haere atu a Hēnare ki ngā pū rākau, ka makaia atu hoki e ia te parai ki reira. Ka mutu te pukuriri o tōna māmā!
"Auē! Tiro atu! Nāku i horoi te parai nei kia mā tonu. Tiro atu ināianei.

Pangopango katoa i a koutou te tahu. Auē! Me haere koutou ināianei ki te horoi kia uiraira tonu!"

"Ka mutu tēnā, ka hoki mai ki a au!" Ko te pāpā tēnei.

Ēngari te kuia o Maha, i tōna tino pukuriri ka rarau atu ia ki te kōwiri i te taringa o Maha. Pau tonu te hāora i ngā korokē nei e rapirapi ana, e horoi ana i te parai. Nō te mutunga ka hoki atu ki ngā mātua, e nohonoho ana ināianei i te tēpu. He paipa i runga i te tēpu ngā paipa a te pāpā o Rupe mā. Ka kī mai ia, "Haere mai. E noho! Anei he paipa mā koutou. Me kai koutou i ēnā paipa kia pau tonu."

Ka titiro ngā tokotoru nei ki a rātou anō he aha hoki tēnei mahi? Ka noho ki raro ki te kai pai. Pai noa iho te kai i te hikareti tuatahi, ēngari ka mutu tēnā kua whakamahia rātou ki te kai anō i tētahi, i tētahi, i tētahi. E hoa, kua mate haere ngā taitama nei, kua ānini ngā māhunga, kua mamae ngā korokoro.

Kāhore e aha, ka puta mai anō tētahi pākete hikareti, ka whakamahia mātou kia kai anō i ēnei kia pau rawa. Ka mutu ēnei, kua hoatu anō te kuia o Maha i ētahi. Ka kī atu a Maha, "E kui kāti, ka mate au i tēnei kai. Kāre e taea e au te kai anō i tētahi."

"Me au, e Pā. Kāre e taea!" Ko Rupe tēnei. Ko Hēnare hoki e maremare ana me te tangi hoki, me te kī, "E Pā, kei te mate au, kāre au e kai anō i tēnei kai, ka mutu, ka mutu!" Kua oma tērā ki waho ki te ruaki, me ōna hoa hoki e whai atu ana i muri. Ko rātou katoa e tautau ana i te taiapa e ruaki ana.

Nā reira, kore rawa ēnei taitama e kai paipa anō.

Te riri o Tane-māhuta

I tērā raumati, ka hararei haere māua ko taku tāne, ko Rāhara, i te Tai Tokerau. Ka haere māua mā runga motokā, he Volkswagen, ā, ka pō rawa, ka haere māua ki tētahi hōtēra kai ai, moe ai. Ka pai anō tēnei tū hararei; kāore he mahi tiaki, mahi whakapai whare, kāore hoki he māharahara mō te tao kai.

Nā, i tētahi ata tino paki ka tae atu māua ko Rāhara ki te ngahere rongonui o Waipōua. He tokomaha ngā tāngata haere mai ai ia tau, ia tau, kia kite i taua wāhi ātaahua. E kīia ana ko te kauri te rākau tino nui o Niu Tīreni nei, ā, kāore e kore, e tika ana tēnei kōrero. Ko te roroa hoki o ērā rākau!

Taro ake, ka kitea e māua tētahi pānui, e pēnei ana ngā kupu o runga: "Me haere ngā manuhiri mā te huarahi nei ki te mātakitaki i a Tāne-mahuta te kauri tino nui o te ngahere nei." Kāti, ka heke māua i tō māua motokā, ka haere tonu mā raro. Koata hāora pea māua e kōpikopiko haere ana i taua huarahi, kātahi anō ka tae ki tētahi wāhi mārakerake i tū ai a Tāne-mahuta.

Ka whakamīharo māua ki te tōtika, ki te teitei hoki o taua rākau. Rite tonu te whānui o tōna tinana ki tō te whare. Ki a māua, ehara tēnei i te rākau noa iho, he kingi kē. Āe! Ko Tāne-mahuta te Kingi tūturu o te ngahere nei. I ngā pō, tākaro ai ngā whetū i waenganui i ōna peka; i ngā rā, takoto ai ngā kapua i runga i tōna upoko.

Heoi anō, kāore he kapua i te rangi i a māua e mihi ana ki a ia; kua kaha te whiti o te rā. He rangi tino ātaahua tonu. Ka āwhio haere māua i te Kingi rā, e whakamīharo ana, e whakapai ana i a ia, e mātakitaki ake ana i a ia. Ka roa rawa, ka whakatauria me hoki atu māua ki tō māua motokā, nō te mea e hiahiatia ana me tae atu māua ki Rāwene i mua o te torengitanga o te rā.

"Mā Tāne koe e manaaki, e tiaki," taku kōhumuhumu ki a Tāne-mahuta.

Kātahi a Rāhara ka kata. "Me whakapaipai kē a Tāne i tana tamaiti, i te rākau nei. Titiro iho! He kiri kau ōna take. Kāore ōna hū. Kua hē tāua, e kui. Ehara tēnei i te kingi, he rawakore kē!"

"Kaua koe e kōrero pēnā mō Tāne-mahuta," ko taku karanga ki a ia. "He tangata rorokore koe! Kia tere tō mihi ki a ia, kei pukuriri ia ki a koe!"

"Kaua e pōrangi! Ahakoa rā he kingi tēnei nō te ngahere, he rākau anō. Ka haere tāua!"

"Kāo!" Kāore ahau i whakaae ki te wehe atu. "Ki te kore a Tāne-mahuta e mārie, ka pā te aituā ki a koe."

Ka puta mai te hēmanawa ki a Rāhara. "Kāti te hoihoi! Rite tonu koe ki te tamaiti ki te kōrero. Ehara au i te pēpi e mataku ana i te kēhua!

"Koia nā te mate o te kūware, kāore e mōhio he aha te aha. Ko te mea nui tō hara ki te Kīngi nei. E hoa, kia mōhio ināianei, kei pōuri ākuanei!"

Kāhore taku tāne i whakarongo mai, ēngari ka huri atu. "E wehe ana au ināianei," hei tā tāna. "Kia tere te haere mai, kei mahue koe i a au. E rua tekau mā ono māero pea te tawhiti o Rāwene i konei, ā, ki te haere koe mā raro ki tērā tāone, ka mamae ō waewae āpōpō."

I te kōrero tonu ia, ka titiro ake ahau ki te rangi. Ai! Kei hea te rā? Kupi tonu te rangi i te pōkēao. Kua pōuri kē. Kāore anō ahau kia kōrero i tētahi kupu kotahi mō tēnei mea rerekē, ka tīmata te heke o te ua. Tērā e pōhēhētia kua rere ake a Tangaroa, ā, kei te riringi iho ia i ngā wai katoa o te Moana-nui-a-Kiwa ki raro. Kua tata māua te toremi!

Rerekē ana te āhua o Rāhara i a ia e kanakana ana ki a Tāne-mahuta. Mehemea kua kitea e ia te kēhua, pēnei tōna āhua.

"Kore rawa au i whakapono," ko tēnei tana hāmeme, "i āhei te rākau nei te whiu i te tangata whakatenetene ki a ia, ahakoa he kingi. He mākutu pea!"

Ahakoa rā te ua, ka kata ahau ki ahau anō. E ako ana pea ia ko te arero hangahanga te hoariri nui o te tangata. Engari, kāhore ahau i whakapuaki i ōku whakaaro; ko te arero hangahanga te hoariri hoki o te wahine. Kore rawa te wahine mōhio e kōrero mō ngā hē o te hoa tāne.

Ka karanga kē ahau, "Kāti, me haere tāua!" Ā, ka tīmata māua ki te hoki ki te motokā. I te tino kaha o te ua, ka mania te huarahi, ā, kāore i roa ka hinga a Rāhara. Nō tōna tūnga ake, paruparu katoa ōna kākahu. Ka haere tonu māua. Rē! Taro kau iho, kua hinga anō. Whero tonu tōna kanohi i te riri, ēngari ka haere tonu. Ai! Kāhore anō kia ono putu tō māua hīkoinga whakahuatanga, kua hinga anō taku tāne. Ka puta mai te māharahara ki ahau. He pai atu a Rāhara i te nanenane ki te piki, ki te peke, ahakoa rā, ko te hinga anō, ko te hinga anō!

I te takoto tonu ia i roto i te panipani, ka kōwhetewhete ake ia, "Ki a au nei, nā tētahi mea hīanga ōku waewae i hīrau ai. He aha te mea nei? Kei hea . . .?" Ka ngaro haere tōna reo, ā, ka whakahāhaki ki tōna ringa ki tētahi mea e tū ana i te taha o te huarahi.

He tangata tēnei? Kāo! Āe pea. Kātahi anō māua ka kite i tēnei tū tangata. Tino rerekē te āhua o te tangata nei! Ko tōna roa, tekau mā rua inihi pea; he piupiu noa iho tōna kākahu; kāore ōna koti, kāore ōna hū, kāore ōna pōtae. He pango ōna makawe, he mea heru, tikitiki rawa. He parauri te kiri. Kī tonu ōna karu pango i te mauāhara. Nō tōna katanga, e rite ana tōna reo ki te tangi a te pere, ahakoa kāhore e pai ana ki a māua. I te tū tonu ahau me te whētētē ana ōku karu, ā, i te takoto tonu a Rāhara, e whētētē ana hoki ōna.

Ka roa rawa, ka hāmama te waha o te tauhou. "E tū!" Ko tana whakahau tēnei ki taku tāne. Kāhore a Rāhara i koni. Ka muramura ngā karu o te tauhou i te whakatakariri, ka totoro tōna ringa, ā, ka auē a Rāhara.
Ka peke ake ia, e auē ana, "Kua wera au. Au! Nā te taurekareka nei au i wera." Ka rure ringaringa ia ki te tauhou, ka karanga, "Ka patua ia e au ākuanei!" Aue! Ka totoro anō te ringaringa o taua tangata paku, ka wera anō a Rāhara.

"Ko Māia ahau," ko te kī mai a te tauhou.

"Ko ahau te tino toa o te Tai Tokerau. He kaha kē atu ahau i ngā tāngata katoa, he tere kē atu ahau i ngā tāngata katoa, he mūrere kē atu ahau i ngā tāngata katoa o te whenua nei. Ka whakakoa kōrua e haere ana ahau i a kōrua ki tō kōrua kāinga noho ai."

"E kī rā!" ka ngunguru a Rāhara. "Au!" Kua wera anō.

"Nā tō mahi heahea i pēnei ai! Nōu tonu te hē! Nā tō hara ki te Kīngi o te ngahere nei, ki a Tāne-mahuta, ahau i panaia ai i tōku kāinga.

Nō reira, e tika ana kia hōmai e koe he kāinga hou mōku."

"Nōku te hē? He teka tēnā! He teka au!"

Ko taku pātai ki a Māia, "Kāhore ahau i te mōhio i te take nei. Ki a koe, nōna te hē. He aha ai? He aha koe i kōrero pēnā ai?"

Tino wawana te āhua o Māia. "Nāna te kōrero mō Tāne-mahuta he rawakore noa iho, nē? Noho ai mātou ko ōku whanaunga i waenganui o ngā take o te Kīngi, ā, ka rongo mātou i ana kupu hara mō te Kingi. Aue, ka kata ahau. E! I te tino whakatakariri o Tāne-mahuta kua whiua atu ahau i tōku kāinga tupu. Kāti, ka haere tātou. Kei hea tō kōrua kāinga?".

Ka whakahoki ahau, "Kei Hāmutana." Tere tonu te huri haere o ōku whakaaro. Ka whetewhete ahau ki a Rāhara, "Me haere tātou. Me haere! Ākuanei kitea ai tētahi kaupapa e mahue ai te taurekareka nei."

Taihoa, taihoa!" ko Rāhara i mea mai i te reo nui. "Mātua me hoki au ko au anake ki te motokā whakawātea ai i te nohoanga mō Māia. Me tatari kōrua ki konei kia tīkina atu e ahau tētahi hamarara, kei mākū kōrua."

Kātahi te pōrangi! Kua mākū kē mātou katoa, ēngari he waimarie kāore a Māia i mōhio ki te pōrangi o tā Rāhara kōrero, ā. i taku tāne e oma atu ana, ka ui mai ia, "He rākau nui a Hāmutana?"

Ka whakamārama ahau ki a ia ehara a Hāmutana i te rākau, ā, ka whakaatu i te āhua o te tāone. Kāore i roa ka hoki mai a Rāhara me tōna hamarara nui, he mea pango.

Ko te pātai a Māia, "Ko tō motokā tēnā?"

"Ko te hamarara kē," ka whakamārama a Rāhara.

"Ko te mahi a te hamarara nei he whakaruru i te tangata kei uaina ia. Titiro mai! Tuatahi, whakatūwheratia! Tuarua, puritia ki runga ake i te upoko! Tuatoru, whakakopia ia anō! E pēnei ana ngā mahi."

I te kōrerotanga pēneitanga o Rāhara, ka nui tōku mīharo. Ehara i te tika tēnei! Heoi anō, ka wehe a Māia i te rekareka, ka hoatu ki a ia te hamarara. Ka whakatuwheratia e ia, ka pupuri ki runga ake i tōna upoko, ā, kātahi anō ka puta mai te mōhiotanga ki ahau. Whakakopia ana ia e te hamarara, ka ngaro kau!

Ngaro kau ana a Māia, ka oma atu māua ko Rāhara. Te tere hoki o tā māua oma! Kāhore anō māua kia tae ki tō māua motokā kua pau katoa tōku hau, ā, kua tōia ahau e Rāhara, eke ana māua kī runga i te motokā ka haere atu i taua wāhi. Ē! Kāhore anō a Māia kia puta mai. Tino koa ō māua ngākau, ā, ka kata haere, ka waiata haere.

Ka roa rawa ka whakaaro ahau, "Ahakoa rā, ka āhua pōuri ahau mō Māia. Ehara tana raruraru i te hanga noa iho. Kāore kē he kāinga mōna."

"Te heahea hoki! Pehea tāna mahi kino ki a au? Mehemea kua mauria ia e tāua ki tō tāua kāinga, he maha ngā raruraru hua pā mai."

"Āe, āe, He whakaarokore kē nōku i kōrero pēnei ai ahau. Hei aha, kua mutu. Kore rawa a Māia e kitea anō e tāua. Kāore e kore ka hoki anō ia ki a Tāne-mahuta, ā, kāore e kore ka aroha a Tāne-mahuta ki a ia." Ka haere anō māua ki te ngahere e tū nei a Tāne-mahuta? E kore te pātiki e hoki anō ki tōna puehu!