Te Paerangi Kaiako 4
Te Paerangi Kaiako 4
Nau mai ki Te Paerangi Kaiako 4, he pae mā ngā kaiako, mō ngā kaiako.
Kei te Paerangi Kaiako 4 ngā mōhiohio, ngā rauemi me ngā ngohe hei tautoko i ngā kaiako me:
Te Reo Rangatira me te Pāngarau Wāhanga Ako
- Kei konei te hononga ki ngā kōrero mō ngā Tau 0-6 mō te wāhanga ako Te Reo Rangatira: Te Reo Rangatira wāhanga ako (Years 0-6)
- Kei konei te hononga ki ngā kōrero mō ngā Tau 0-8 mō te wāhanga ako Pāngarau:Pāngarau wāhanga ako (Years 0-8)
He rauemi atu anō mō Te Reo Rangatira Wāhanga Ako me te Pāngarau Wāhanga Ako i tua atu i ngā ngohe:
- e toru ngā pānui A3 e whakamārama ana i ngā waehanga o te whakahoutanga o Te Marautanga o Aotearoa me te hanga o ngā wāhanga ako.
- he patapatai hei tautoko i ngā wānanga kaiako ki te wherawhera i ngā waehanga o ngā wāhanga ako.
Rangaranga Reo ā-Tā
Ko te Rangaranga Reo ā-Tā te rerenga kua whakaritea mō tēnei momo huarahi mō te pānui me te tuhituhi. I tēnei ngohe, ka kitea te whārangi mōhiohio mō te hōtaka, me pēhea hoki te uru atu ki ngā mahi PLD me ngā pātai auau hoki. He ngohe anō mō ngā tikanga whakaata hoki.
Hihira Weteoro (Phonics Check)
He kohinga mahinga aromatawai i whakahoahoatia i te taha o ngā kōrero whakaako, akoako hoki mō te Rangaranga Reo ā-Tā mō ngā ākonga Tau 0-3. E whakamātauhia ana ēnei mahinga mō ngā take whakamātautau aromatawai, hinengaro hoki (psychometric), ā, ka wātea mai ki ngā kaiako hei whakamahi mō te Wāhanga 1 o te kura, 2025.
Mātaki mai ki tēnei paku tirohanga o te tirohanga weteoro mō te 20-wiki, arā, ko Te Mōhiohio Oro.
Rangaranga Pāngarau
Kei te hoahoatia tonutia te hōtaka Rangaranga Pāngarau mō ngā ākonga Tau 0–8, ka wātea mai ki ngā kaiako hei te Wāhanga 1 o te kura, 2025. Hei whakaritenga kē, mā tēnei ngohe koe e tautoko ki te uru atu ki ngā rauemi ipurangi Pāngarau me te tono kape o ngā rauemi mai i Down the Back of the Chair (DTBOTC).
Aromatawai
E hāngai ana ngā ngohe nei ki te tautoko i ngā kaiako me ngā huarahi me ngā tikanga aromatawai hei whakamahi ki te akomanga.
Anei ngā momo rauemi aromatawai:
- Te Puāwaitanga Harakeke: Te Tuhinga Takunetanga Aromatawai me Mā te Kaiako
- He Whakaaturanga Aromatawai
- E waru ngā pānui whakamārama Aromatawai
Katoa ngā rauemi nei e hāngai pū ana ki te whakamāramatanga o te aromatawai e ai ki ngā kōrero o Te Puāwaitanga Harakeke: Te Tuhinga Takunetanga Aromatawai (2023).
Ngā rauemi whakamahere
He mahere paetara me te rārangi arowhai hei āwhina pea i āu mahi whakamahere mō te tau 2025.
- Wāhanga Ako
- Rangaranga Reo ā-Tā
- Hihira Weteoro
- Rangaranga Pāngarau
- Aromatawai
Ko te weteoro he hononga i waenga i ngā pūreta me ngā oro. He mea nui tēnei i roto i ngā mahi pānui, tuhituhi hoki.
E hāngai ana te tirohanga weteoro me ngā āhuatanga o ngā waehanga tuatahi e toru o Rangaranga reo ā-Tā:
- Te aroā weteoro me te aroā oromotu
- Te oro arapū ā-tā
- Ngā kūoro me te tautohu kupu
Mātakihia tēnei kiriata o tētahi kaiako (Taniora) e whakahaere ana i te tirohanga weteoro mō te 20-wiki, e kīia nei ko Te Mōhiohio Oro mai i te kohinga aromatawai o Hihira Weteoro. Ko te ākonga (Danni-Aroha) e whā tau ki te kōhanga reo, e rua ngā wāhanga ki te kura.
Tēnei rā te mihi nui atu ki a Taniora Robinson me Danni-Aroha Peta, i whakaae mai rāua kia whakamahia tēnei kiriata mō Te Paerangi Kaiako 4.
Te Mōhiohio Oro
- Me whakawhiti kōrero mō ngā mea e aromatawaitia ana, he aha ngā whakahaerenga, ka pēhea hoki te kohi i ngā raraunga.
- He aha ngā tino ngohe whakaako ka whakaratoa e koe hei akoranga ngaio mā ngā ākonga i ngā 20 wiki e tau ana ki te kura? He aha ngā momo ngohe me kaha ake te whakaako?
- Whakawhiti kōrero mō te take e hira ai tēnei momo aromatawai i roto i ngā kokenga a te ākonga e ako ana ki te pānui me te tuhituhi.
Mā te tirohanga weteoro (hihira weteoro) e āwhina ngā kaiako kia hāngai ki ngā hiahia tonu o te ākonga e tū kaha, e tū maia ai hei kaipānui.
- Ko tā te tirohanga mō te 20-wiki he aromatawai i te āheinga ki te rongo i ngā oro. Kei te hoahoatia he Auditory Phonological Assessment Tool (APAT) hei tautoko i te kohinga raraunga me te pūrongo mō ngā tirohanga weteoro mō te 20-wiki. He mea hou hoki te APAT me te aromatawai.
- Ko tā te tirohanga mō te 40-wiki he aromatawai i te āheinga ki te tautohu i ngā pūreta. E rua ngā whāinga:
- Me mātua hāngai te aro ki ngā ākonga me whai tautoko e koke whakamua ai rātou i roto i ngā mahi weteoro.
- Me whakarato raraunga mō ngā mahi Aroturuki ā-Motu te take.
- Ko tā te tirohanga mō te 55-wiki, kua tohua he kohinga aromatawai atu anō ki te tūhura mēnā i ea ngā mahi whakaako atu i te tirohanga mō te 40-wiki, ā, e pai ana te koke whakamua a ngā ākonga me ō rātou pūkenga weteoro mō ngā mahi pānui, tuhituhi hoki. Mā tēnei e whakarato ai ngā whakaaturanga mōhiohio, e whatutoto ai, e tuatini ake ai ngā whanaketanga weteoro e aromatawaitia ana i tēnei wā whakawhanake.
Katoa ngā aromatawai o Hihira Weteoro e whakamātauhia ana mō ngā take whakamātautau aromatawai, hinengaro hoki. Ka wātea mai ngā taputapu me ngā mahinga hei whakamahi hei te Wāhanga 1 o te kura, 2025 me ngā mahi PLD.
