Pūtaiao - Te Iho

Te Pūtake

Ko tā te Pūtaiao he tuku i te mōhiotanga, i ngā pūkenga, i ngā āhua hoki ki te mokopuna e tūhura ai, e mārama ai, e whakahāngai ai hoki ia i ngā ariā mō te ao mataora me te ao ā-tinana, mā roto i ngā kaupapa e noho kōtuitui nei. Mā te Pūtaiao e whakakahangia ai te mokopuna ki te whiriwhiri i runga i te whakaaro scientific, ki te mahi i runga i te haepapa, ki te tūhura i ngā āhuatanga, ki te āhukahuka ki ngā tauira, ki te whakahāngai hoki i ngā māramatanga ki ngā horopaki o te ao tūturu nei.

Ka ākona e te mokopuna te āhua o te pāhekoheko a ngā pūnaha mataora me ngā pūnaha ā-tinana, te wāhi ki aua pūnaha hei whakatuarā i te ora, te āhua hoki o te urupare a aua pūnaha ki te panonitanga. Ka tūhura te mokopuna i te tipuranga, i te tukunga iho, i te kuneroa, ā, ka tūhura anō i te tipu, i te whakaputa uri, i te urutau hoki a ngā rauropi. Ka tūhura i te āki a te rerenga kētanga ā-ira i te kanorau, i te manawaroa hoki. Ka tūhura te mokopuna i ngā whakawhitinga o te matū, o te pūngao, ka whakaahua i ngā panonitanga ā-tinana, ā-matū hoki, i ngā rerenga pūngao, i ngā mātāpono hoki o te pūmautanga i roto i ngā pūnaha mataora me ngā pūnaha ā-tinana. Ka mātai te mokopuna i ngā tōpana, i te neke, i ngā ngaru, ā, ka mārama ki ngā pāhekoheko ka auaha nei i te nekehanga, i te tūwhena, i ngā āhuatanga hoki o ngā ngaru i ngā horopaki māori, horopaki hangarau hoki. Ka mōhio te mokopuna ki te wāhi e tū nei te Ao i te ao tukupū, ā, ka tūhura i ngā tauira ā-rangi, i ngā tukanga o te aorangi, i ngā pūnaha tainekeneke anō hoki o te Ao. Ka tātari te mokopuna i ngā pānga o te tangata, i te toitūtanga, ā, ka arotake i te pānga o te mahi a te tangata ki ngā pūnaha hauropi, ki te āhuarangi, ki te whakamahinga hoki o ngā rawa, me te marohi anō i ngā rautaki e manawaroa ai. Puta noa i ēnei akoranga, whakahāngaihia ai e te mokopuna ngā pūnaha mōhiotanga takirua, me te whakauruuru i te ao Māori, i ngā tikanga Māori, i ngā tauira anō hoki o te Science hei whakamāori i ngā tauira, hei ārahi hoki i te koringa.  

 Kua tāmaua ētahi tikanga matua, puta noa i a Pūtaiao, e taea ai e te mokopuna: 

• Te tūhura me te uiui: Ko te tāpae i ngā pātai whai take, ko te hoahoa i ngā tūhuratanga, ko te kohi, ko te tātari hoki i ngā taunakitanga i runga i ngā aronga e tau ana taha ahurea nei, e pakari ana taha Science nei. 
• Te whakatauira me te whakamāori: Ko te whakamahi i ngā hoahoa, i ngā tauira, i ngā taputapu matihiko hei whakaatu i ngā tukanga, hei whakamātau i ngā ariā, hei whakamārama hoki i ngā āhuatanga. 
• Te whakawhiti kōrero kia whai hua: Ko te tiri i ngā kitenga i runga i te mārama, i te whakaute, mā roto i ngā kōrero ā-waha, i ngā whakamārama ā-tuhi, i ngā whakaaturanga ā-ataata, i ngā pae matihiko anō hoki. 
• Te whakahāngai te mōhiotanga ki te horopaki: Ko te tūhono i ngā tirohanga taha Science me ngā tirohanga Māori hei rapu rongoā, hei auaha, hei urupare hoki ki ngā wero o te ao tūturu nei pērā i te kanorau koiora, i te whakamahinga pūngao, i te manawaroa āhuarangi anō hoki. 
• Te tū hei kaitiaki o te Pūtaiao: Ko te whakatau take, i runga i te mātau, e tiakina ai te kanorau koiora, e whakahokia mai ai te taurite, e whakatuarātia ai te oranga o te tangata, o ngā wāhi, o ngā rawa anō hoki. 

He whāngai tonu ngā akoranga Pūtaiao i te pākiki, i te whakaaro haehae, i ngā ariā ā-ahurea e whiria ai ngā tirohanga Māori me ngā tirohanga taha Science. Ako ai te mokopuna ki te tūhura, ki te whakamāori, ki te mahi hoki i runga i ngā tikanga e hāpaingia ai te manawaroa, te toitūtanga, te oranga kiritōpū anō hoki — ēnei āhuatanga e whakarite nei i a rātou kia puāwai hei kaitiaki o te Pūtaiao i te ao hurihuri nei. 

Te Hanga

Ngā Toi Mokopuna

Tautuhia tahitia ai e Ngā Toi Mokopuna me ngā pou e whā o Te Marautanga o Aotearoa ngā āhua whānakenake o te mokopuna kua uru mai ki te ako i te Pūtaiao, i ōna tau i te kura. 

He Tirohanga Whānui

Ka koke haere ana te mokopuna i ngā Tūārere 1–4, ka whanake mai te Pūtaiao i te mātakitakinga ā-tūhura, i te whakaahuaranga hoki o te ao mataora me te ao ā-tinana, nāwai ā, ka nui haere te aro pū, te mātau i runga i te haehae, te pakari hoki taha ahurea nei i roto i ngā tikanga scientific. Ākona ai e te mokopuna te mahi ngātahi a te mātauranga Pūtaiao me te Science hei pūnaha mōhiotanga, me te wāhi ki āna ake kōrero, ki ōna ake whakapapa, ki ōna ake taiao hoki hei tuku mārama ki te uiui me te koringa matatika.  

E whiria ana ngā akoranga puta noa i ngā whenu e whā — Ngā Pūnaha Mataora, Ngā Matū me te Pūngao, Ngā pūnaha o te ao me te Rangi, te Toitūtanga me te Auahatanga hoki — ā, e mārama ana te kite o Ngā Toi Mokopuna kia whai take tonu ai ngā akoranga taha Science nei, kia whakaūngia tonutia ai te tuakiri, ā, kia mau tonu ai te hono ki te ao Māori, ki ngā tikanga Māori, ki te horopaki huriao anō hoki.  

Mā tēnei haerenga te mokopuna e whanake ai hei kaitiaki e mātau ana ki te Science, hei hinengaro arohaehae, hei kairapu rongoā auaha, kua whai pūkenga hoki ki te whakatau take, i runga anō i te mātau, e hāpaingia ake ai te ora o te tangata, o te wāhi, o te ao hoki. Mā te Pūtaiao e whai pūkenga ai te mokopuna mō ngā ara matua ki te Mātai Koiora, ki te Mātai Matū, ki te Mātai Ahupūngao, ki te Pūtaiao ā-Nuku, ā-Tuarangi hoki, ki te Mātai Ahuwhenua, Ahumāra hoki, tae atu ki ngā Ahumahi Mātāmua.