Toi Ihiihi - Te Iho

Ngā Toi Mokopuna

He hinengaro pākiki tō te mokopuna. 

Ka poua ngā mahi auaha a te mokopuna ki te tuakiri ahurea. 

He ngākau ihiihi tō te mokopuna ki te reo whai mana o Auahatanga. 

Ka maioha te mokopuna ki tāna mahi, otirā, ki ngā mahi a tangata kē. 

Te Tūārere 1

Ka tūhura te mokopuna i runga i te ngākau koa me te mahara pohewa. 

Ka whai whakaaro te mokopuna ki tōna tuakiri whaiaro me tōna tuakiri ahurea. 

Ka tūhura te mokopuna i ngā tukanga auahatanga. 

Ka whai whakaaro te mokopuna ki ngā mahi nō tōna ahurea, nō ahurea kē hoki.

I te Tūārere 1, ka ākina te hinengaro pākiki me te ngākau tahi mā te ako ringapā me te whakaaro pohewa. Ka tūhura te mokopuna i te toiorooro, te toinekeneke me te toiataata, ā, ka whakamātau ia i ngā ​​āhuatanga māmā pēnei me ngā rawa, ngā tuone me ngā reo, ka ahatia hoki ēnei āhuatanga ina whakawhenumihia ai. Ka waia haere ia ki ngā tauira manawataki, ngā āhua me te mokowā, ā, ka mārama ki a ia, ko te mahi auaha he waka kawe whakaaro, kare ā-roto, tuakiri hoki. Ko te nuinga o ngā putanga toi kei tēnei Tūārere he mahi tūhura ka tautokohia e te kaiako — arā, he raupapa oro poto, he raupapa nekehanga māmā, he waihanga ata māmā. Mā te kaiako anō te reo, ngā tikanga me ngā mahi auaha e whakatauira atu, e akiaki hoki kia haumaru ai ngā mahi ako mā tēnā mokopuna, mā tēnā mokopuna. 

Te Tūārere 2

Ka whai tukanga te mokopuna ki te tūhura i ngā mahi me ngā rawatoi. 

Ka whai te mokopuna i ngā āhua ā-mahi huhua hei whakapuaki whakaaro. 

Ka whakapakari te mokopuna i tōna reo toi. 

Ka tūhura te mokopuna i ngā mahinga toi nō iwi kē atu, nō tirohanga kē atu. 

I te Tūārere 2, ka huri te aronga ki ngā mahi e whai tikanga ana me te rere o te reo toi māmā. Ka āta tūhura te mokopuna i ngā tūmatatoi me ngā rawa toi, kia whai pūkenga ia ki te toiorooro, te toinekeneke me te toiataata. Ka timata te whakamahere, te whakapakari me te whakaatu i āna mahi, ā, ka whai whakataunga auaha ia mō ngā āhuatanga toi, pēnei me ngā manawataki, ngā tohu, ngā tae, ngā rarangi me ngā tūone. Ka tipu haere te reo ariā, te reo ā-horopaki me ngā pūkenga ā-tinana mā tā te mokopuna matapaki i ngā kare ā-roto, ngā kōrero me ​​te hunga mātakitaki, me tāna tūhura i ngā mahinga toi nō Aotearoa, nō te ao whānui hoki.  

Te Tūārere 3

Ka whakamātau te mokopuna i ngā āhua ā-mahi, ka whanake hoki ōna ake hiahia. 

Ka whakapakari te mokopuna i ōna pukenga, ka tūhura hoki i ngā tūmatatoi huhua.  

Ka whai māramatanga te mokopuna ki ngā huānga toi. 

Ka whakapuaki whakaaro te mokopuna mō ngā mahinga toi e hāngai ana ki ngā tuakiri tangata, tuakiri pāpori, tuakiri ahurea hoki. 

I te Tūārere 3, ka urupū haere ngā mahi a te mokopuna, ā, ka āta whakaaroaro ia ki tāna mahi. Ka whakamātau te mokopuna i ngā āhua ā-mahi, ngā tātaitanga me ngā tūmomo toi, ā, ka whanake ōna ake hiahia me ōna ake pūkenga ki ngā tūmatatoi pēnei me te Te Ao Haka, Te Ao Puoro, Te Ao Whakairo, Te Whare Pora, Te Haka Tapere me Te Ao Tū Taua. Mā te whakaharatau, te whakahokinga kōrero whaihua me te mahi whakatika, ka whakapakari te mokopuna i āna mahi, ā, ka whakamahi ia i te reo ariā hei whakamārama atu ka pēhea ngā āhuatanga toi e whai take, e whakaaweawe hoki i te pānga o te mahi. Ka noho pū ngā horopaki me ngā kaupapa ako kei te mahi auaha, ā, ka tūhura te mokopuna i te pānga o te whakapapa, ngā tikanga me ngā tāhuhu kōrero ki ngā mahinga toi, ka pēhea hoki ngā whakataunga auaha e hāpai ake, e wero rānei i ngā kōrero, ngā aronga, ngā ​​pōhēhētanga me ngā uara. 

Te Tūārere 4

Ka tūhura te mokopuna i ngā ariā tuatini. 

Ka whakawhānui te mokopuna i tōna māramatanga ki ngā ariā e hāngai ana ki te ahurea me ngā wheako whaiaro. 

Ka whakamāori te mokopuna i ngā ariā i runga i te mārama. 

Ka tātari te mokopuna i te mahinga toi hei waka kawe whakaaro. 

I te Tūārere 4, ka aro ki ngā mahi arohaehae, ngā ako tautauāmoa me te anamata. Ka tūhura te mokopuna i ngā ariā me ngā whakaaro tuatini, te tuakiri, te whakaaweawe, ​​te horopaki ā-wāhi, te panoni tōrangapū, pāpori, toronaha hoki kei tēnā rohe, kei tēnā whenua. Ka hoahoa, ka tito, ka waihanga i ngā mahinga toi tūroa, ka āta whai whakataunga mō ngā āhua ā-mahi me ngā tūmatatoi, ā, ka whakaarohia ka pēhea ngā tāngata, ngā wāhi, ngā taputapu me ngā aronga e ahu i te mahinga toi, me tōna pānga ki te ao. Ka kōtuituia ngā mōhiotanga ā-hinengaro me ngā mōhiotanga ā-tinana i tā te mokopuna matapaki, arohaehae, whakamāori hoki i tāna mahi me te mahi a tētahi atu, kia poua ia ki tōna ahurea, nāwai rā ka tū māia hei Pūkenga Toi e whai wāhi atu ki tōna ao.