Te kawa o Ngāti Porou 

Nā Hōhepa Green 

Me tīmata ake ēnei kōrero i te kawa tangihanga ki te riu o Waiapū. 

Ngā mahi a te tangata whenua 

Ka mate ana he tūpāpaku, ka tae atu te whakaatu ki te wā kaenga. Ka tangi atu te waea ki ngā whanaunga tata, ā, ka haere ake rātou ki te marae ki te whakareri i te wharenui, te mahi kai, te patu mīti, te tiki wahia. Ko ngā mahi ēnei e pā ana ki te manaaki tangata. 

 

Ka whakareri hoki i te wāhi takoto o te tūpāpaku. Ko te roro tonu o te wharenui, raro iho o te wini tōna wāhi takoto. Ka tohaina he whāriki, ā, he taonga hei whakarewa ake i te upoko o te kāwhena, he moenga ki te taha matau hei nohonga mō te pouaru, ngā mātua, me tōna whānau. Kia tae mai ai te tūpāpaku, kua reri ngā mea katoa. 

 

Ka tū mai te waka hari tūpāpaku i te kēti, ki mua rānei i te wharenui, kua karanga ake tētahi o ngā kuia o te iwi kaenga. Hei konei ka hikina mai te tūpāpaku ki runga i te parani o te wharenui. He nui tonu ngā tāngata ka haere mai i tōna taha, ā, ka whakautua mai te karanga e tētahi o ngā kuia o te ope whakaeke. Ka tau mai te tūpāpaku ki te roro o te wharenui, ka tangohia te taupoki. Ka nohonoho te pouaru, ngā mātua, te whānau, me ngā kuia ki ngā taha o te kāwhena (ko ēnei te whānau pani). Ka whakatūtūria he whakaahua o ōna mātua tīpuna kua mate, ki mua, ki runga ake o te kāwhena, kia mōhiotia ai ko wai ia. Ko ngā putiputi anō hoki ka whakatakotoria ki mua o te kāwhena. Kei te haere tonu te tangi me ngā roimata i tēnei wā. Kia tae ki te wā e whakaaro ai te iwi kaenga, ka tū ake tētahi o ngā koroua ki te whakatau i te tira mau mai i te tūpāpaku. Ka mutu tana kōrero, ka waiata. Ā, ka whakautu mai tētahi o te tira i ana kōrero, ā, ka waiata mai anō. Hei konei, ka ringaringa, ā, kia mutu te whakanoa, kua haere ki te kai. Ko te tangata whenua ka mau tonu ki te whanga mō ngā manuhiri whakaeke. 

Te kawa o te Whānau a Apanui 

Te kawa o te Whānau a Apanui – pāeke 

Nā Roka Paora
Nā Gus Hunter ngā pikitia

Ko Whanokao te maunga, 

Ko Mōtū te awa. 

Ko Apanui te tangata. 

 

Ki te hunga māna ēnei kōrero, tēnā koutou, tēnā koutou katoa. Ko ngā kōrero o tēnei putanga o Te Wharekura e pā ana ki te kawa o ētahi o ngā iwi o Aotearoa. Ko tāku ko te kawa o Te Whānau a Apanui. 

 

Tekau mā toru ngā hapū o tēnei rohe, mai i Pōtaka i te tairāwhiti, ki Hāwai i te taihauāuru. Tekau mā toru o ēnei hapū noho ai i te takutai kei mua, ko ngā maunga kei muri, ā, anga katoa ai ngā wharenui ki te moana. Kotahi anake te hapū kei te tuawhenua. He whāiti te whenua e nōhia nei e Te Whānau a Apanui. I ingoa katoatia ngā hapū o tēnei iwi ki ngā tīpuna me ngā uri o Apanui. Kei Pōtaka ko te Whānau a Tapaeururangi, kei Whangaparāoa ko te Whānau a Kauaetangohia, kei Raukōkore ko te Whānau a Pararaki me te Whānau a Maru, kei Pāhāoa ko te Whānau a Kāhu, kei Maungaroa ko te Whānau a Kaiaio, kei Te Kaha ko te Whānau a Te Ehutu, kei Waiōrore ko te Whanau a Hinetekahu, kei Ōtūwhare ko te Whānau a Rūtāia, kei Omāio ko te Whānau a Nuku, kei Whitianga ko te Whānau a Tūwāhiawa, kei Maraenui ko te Whānau a Hikarukutai, kei Hāwai ko te Whānau a Haraawaka. Mai i te tau kotahi mano e iwa rau, i karangatia ai te hapū o Omāio ko Ngāti Horowai, ko tō Whitianga ko Ngāti Paeakau, ko to Maraenui ko Ngāti Horomoana, nōtemea tekau mā ono ngā tamariki, tokorua ngā pakeke i toromi i te awa o Mōtū i taua tau. 

Engari, i ētahi wā, ka whakahuahua tonu ēnei hapū ki ngā ingoa tīpuna. Ko ētahi o ngā kawa o Te Whānau a Apanui he ōrite, ā, he āhua rerekē anō tā ētahi o ngā hapū. 

Te kawa o Tainui

Te kawa o Tainui – tau whakautuutu 

Nā Tamati Wharekura

He tangi aroha atu tēnei ki a Tamati Wharekura. Haere rā e Koro ki roto i ngā ringa o te Kaihanga. Moe mai rā. I roto i tō māuiui ka puta tēnei, tō tuhinga whakamutunga ki ngā mokopuna. 

 

Ko te kawa o Tainui he tau whakautuutu, tū atu tū mai, me ō rātou wai i te awhi atu i ō rātau mihi. Tētahi wāhanga o te kawa o Tainui, mehemea e nui ake ngā manuwhiri i ngā tāngata whenua, mā te tangata whenua hei tūwhera ngā mihi, ka tukuna atu te tokotoko ki ngā manuwhiri kia mutu ai rātou, mā te tangata whenua hei kapi, kia hoki mai ai te mana. E ngā hui katoa i roto o Tainui ko tēnei te whakahaerenga o te kawa. Mā te kawa ka mōhiotia te hapū o tēnā iwi, me ō rātou whakapapa. Ko tēnei te tīmatanga o te kawa o Tainui, i roto i ō rātou mihi. 

 

Tuatahi: Ko Ihoa te Kaihanga o te rangi me te whenua. 

Tuarua: Te Arikinui me te whare kāhui ariki nui tonu. 

Tuatoru: Ko ngā tini mate o te motu puta mai rā ki a tātou te pito ora. 

Tuawhā: Ngā mihi ki ngā whare me Papatūānuku, me kīia, ko ngā taonga whakamahuetanga a rātou mā. Ko te tīmatanga tēnei o ngā kupu whakahaere o te kawa o Tainui. Muri mai i te kawa, ko te kaupapa o te rā. 

Te kawa tapu o te Arawa 

Te kawa tapu o te Arawa – he takina

Nā Joe Malcolm
Nā Gus Hunter ngā pikitia

Tihē Mauri Ora! 

Takina te Kawa. 

Mai i te Kawa tuatahi 

Ki te Kawa tuangahuru 

Ka takina anō te Kawa. 

 

Ko tētehi kōrero e tika ana ki runga i tēnei kaupapa, ko te whakamārama pēnei ana nā, ahakoa he aha te mea, ahakoa kei hea, ko te whakatakoto ture tētehi mea nui. Kārekau he mea kotahi o te ao, e kore e whakatakotoria he tikanga mōna. Kia kōrero mō te whakatupu kai, ka whakaritehia he tikanga, kōrero mō te toumou wahine, tērā anō ōna tikanga, kōrero mō te hī ika, he tikanga anō hoki to tērā, kōrero mō te hanga whare, koirā anō, he tikanga anō hoki tona. Ka pērā haere tonu. Kia noho kau tātau ki runga i te marae, kei reira ka kitea te huhua o tēnei mea te tikanga. 

 

He tikanga tō ngā mea katoa – te manaaki manuhiri, te whāngai i a rātau ki te kai, te pōhiri tangata, ngā wāhi nohanga mo te wahine me te tāne, te hora whāriki, aha noa, aha noa. Kei a Te Arawa ōna tikanga ki runga i te marae me ōna āhuatanga katoa. He pērā anō te kawa. Ka pā te kawa me ōna ritenga ki ngā mea katoa - mō te whakawhānau tamariki, mo te hanga whare, mō te whakaora tūroro, mō te tuku tangata kua mate, mō te whakairiiri kōhungahunga, otirā mō nga āhuatanga huhua noa atu. E mau haeretia ana ōna tikanga i roto i ngā karakia kei roto i nga mahara o ngā tohunga e noho ana. Kia tae ki nga wā e tika ana, kua rukerukena, mea rawa ake, kua rongohia e te ao. Kāti, he tikanga anō te tikanga, he kawa anō te kawa. Ko te pātai kē, e pēhea ana te rerekē o tētehi i tētehi? Kia waiho mai māku anō taku pātai e whakahoki. Ko tēnei mea te tikanga, nā tāua noa iho i hanga, arā, nā tāua, nā te tangata. 

 

Engari anō te kawa – he mea i ahu kē mai i Te Atua. Ko tōku nā kawa tō Te Arawa, nā Te Atua. I ahu mai ia mā roto mai i ngā karakia. Ka kiia ko tēnei mea te kawa, he tapu – e kore e taea e te tangata te takahuri, te whakarerekē rānei. He taonga i waihangatia mai i te pō rā anō. Tērā e kīia, ko te tūturutanga o te kawa, mō te tomo whare. Ko te take e whakahuahuatia ana mō te whakatuwhera whare, kei te wā e karakia haeretia ana a waho o te whare, a roto hoki, ka tikina e ngā tohunga ki te rākau kawakawa, ka taia ki ngā pakitara. Koia ka huaina ki te kōrero rā, ko te tainga o te kawa, arā, ko te tainga o te whare tūpuna ki te kawakawa. He wā e rongohia e karangatia ana, ko te whare tūpuna a Tamatekapua kua kawaina kētia. Ka mōhio ai, ko te whare i kōrerotia rā, kua taia ōna pakitara ki te kawakawa. Arā nō te pātai, nōnahea te kawanga o te whare rā? 

 

He whakamōhio tēnei ki ngā momo whakahuahua mō te kupu nei mō te kawa. Hei tirohanga atu mā tātau, e hua ake ana te kōrero nei, i roto kē mai i te rākau. Kia noho ki runga i te marae, ka taka katoa ōna āhuatanga ki raro i te kawa tuahokotahi mā rua, ko te kawa tēnei mō te marae. Kei raro i tēnei o ngā kaupapa, e rārangi ana ngā tikanga mō te tū a te wahine, me te tū a te tāne. Kei tua atu ko ngā tikanga mō te whaikōrero, mō te hari waiata, mō te tū ki te haka, mō te whakapapa, mō te pupuri i te tapu o runga i te marae, me ērā atu āhuatanga katoa. Ka mahara te iwi i te wā e haere ana ngā mihimihi i runga i te marae, kua kotiti ngā kōrero. 

 

Mā ngā rangatira whaikōrero tonu hei whakatika i taua kotititanga, otirā, mā ngā taketake o te marae, kia hoki mai ki te wāhi tika, kia whai anō i te kawa. Ki te tika mai i runga i ngā tohutohu, ko te painga rawa atu tērā. Kua noho ngā iwi i runga i te aroha me te rangimārie Ki te kore, heoi anō, kua taukumekume, kua taupāngutu, kua mārō atu, kua mārō mai. 

 

Kei konei kua haere ngā kōrero hahani, ngā hamumu taumaha, taunu hoki i te tangata. Nā wai i taunu ai tētehi ki tētehi, kua whakaaria ngā taonga o neherā anō, arā, te kaioraora, te pōkeka, me ērā atu mahi a rātau i tuku whakarere iho. Mā tēnei āhuatanga, kua kore e tau te noho; mea rawa ake kua tū pōrangi ki te haka. Irā te nui o ngā waha ki te hāmama. Ka kitea ai tēnei mea te pōkeka e mahia ana e te wāhine, e te tāne; e tū rārangi ai te tangata i tō rātau matua. Hūpeke rawa ai ngā tāne, me te whiu o ngā ringa, whētero ai ngā arero i te kaha whakatakariri. Ko ngā reo arā kē kei nga kapua o te rangi e tīwaha ana; me te whatatiri te āhua. Ko te tū ko te torotika tonu, e piko ai ngā waewae, me te whekene anō o ngā niho ki te whakahīhī atu ki te tauhou. Kāore, kua tītakataka te tū a te wāhine me te auē haere o ngā waha. Ko te māramatanga tērā o ngā kuia matatau ki ērā mahi, ki te whakaiti tangata, ki te whakatūtūā. Kitea rawa ake, kua puta ki mua rawa o te matua, ki reira hīhī ai i ngā panekoti, ki te whakaatu atu i ngā hūhā. Ko te ikeiketanga tēnei o te tapu o te whakatīkai i te tangata pokanoa. E mahi pea e kui mā, e koro mā, i ā koutou mahi. 

 

Tikina atu i tērā o ngā kawa, arā, i te kawa tuangahuru mā whitu  — mō te tangata tēnei. 

 

E tatakungia ai ngā whakahekenga mai i te pō. Tērā e kitea ai nga waka huhua o te motu me nga honohononga. Ka puta i roto i te tini o te kōrero a Te Arawa me ōna kārangarangatanga. Mā te tapu o ngā hamumu, me te manawapā o ngā tataki, ka mau ngā kōrero hei taonga mō ngā whakatupuranga. Ko te mea nui, kia kimihia ngā tikanga mō tēnā āhuatanga, mō tēnā āhuatanga, kia noho pai te kōrero. Ka kore, ka mahi kuāre noa iho, kei tōna takiwā kua papahoro. 

 

I kī ake i te tīmatanga rā, huhua ngā kawa. Ko te kawa mō te wānanga ko te kawa tuangahuru mā tahi. Ka puta tēnei mō ngā hunga ka tohia mō ngā mahi wānanga. Ehara kau i te mea ka tohia katoatia. Kao. He mea ka tohia, he mea e kore e arongia. Ka takoto rawa nga wāhanga mahi me nga whakaritenga e noho tauira ki te ako, pō ao, pō ao, a, mutu noa. Koira anō mō te tū taua: ko te tuangahuru mā ono tēnei. Ka puta ōna whakarite mō te rui. Kei reira ngā karakia hei kawe atu i nga tikanga mō te mau rākau, mo te karo patu, mō te whakararau i nga mahara, me ērā atu āhuatanga. 

 

Waiho ki konei tēnei kōrero mutu noa iho ai, tātemea, e kore e taea kia kapi katoa ngā kōrero mō ō tātau kawa. Hei aha i ēnei hamumu torutoru noa iho nei. Waiho atu ērā o ngā kawa. Arā atu, arā atu, te roanga atu o ngā whakamārama: ka roa e whakatakoto kōrero ana. Engari, kei tēnā waka, kei tēnā waka ōna kawa, me ōna tikanga; mā rātau e piki mai, mā rātau e kake mai. 

 

Tērā ka eke, ka poupoua. 

Haumi e! Hui e! Taiki e! 

Te taonga nei o te tikanga

Nā Morvin Simon
Nā David Burke ngā pikitia

Kāti! E ngā iwi, e ngā reo, tēnā koutou katoa. Tēnā mai koutou me te tini o ngā mate kua karangahia e te Ringa Kaha o Aituā, te āhuatanga e kore e taea e tāua te tangata te karo te wero. Nā koutou i tangi, nā tātou katoa. Ko ēnei i wahatia mai e ahau, nā mātou i whakatau, me kī, na tātou anō rā. Otia te pō, nau mai te ao. Taiāwhio te motu, ka nui te mihi atu, tēnā koutou, kia ora mai tātou katoa. Kua kite mai koutou i runga ake nei, kua huaina ake e ahau, te kaupapa o te kōrero nei, i raro i te āhua nei, o te tikanga. Ki ētehi, ka kīia ake ko te kawa, ki ētehi atu, ko te āhua marae. Ehara i te mea, mā mātou o Whanganui nei, e whakaatu atu, kia whēnei, kia whēnā. Otirā pea, mā konei hei kī ake, anei te āhua tikanga kua pūmautia atu i runga i ō mātou ake marae o roto o Te Ātihaunui a Pāpārangi. Nō reira, tēnā koutou katoa. 

Te kawa o te whare roimata

Nā Te Ari Kuti Whaanga
Nā Miranda Witford ngā pikitia

E pā ana ēnei kōrero ki te Rohe o Ngāti Te Tarawa ki Motatau, Maromākū, Matawaia, Tāikirau, me Pokapū. 

 

Kāti me pēnei pea he whakamārama māku mō tēnei kupu, te kawa – ko ngā tikanga i mahia i roto o tēnei rohe i te wā kāhore ō mātou marae mō ngā tangihanga. Hoianō ka takoto tonu ngā tūpāpaku i roto i ngā whare noho, kāhore i waho. He aha nei ētahi atu tikanga mō te taha ki nga ringawera me ērā atu nekeneke? Ka hangaia ki waho me ōna atu whakahaere, mai i te timatanga tae noa ki te mutunga. Ko ā muri i te hui, ka turakina ngā whare ruruhau, tēneti rānei, mō te iwi nui tonu. Ka waiho atu ngā whakahaere mō te manuhiri whakaeke ki roto o te whare roimata, ngā mihimihi, me ngā moe moenga. 

 

I ērā wā, ina mate he tangata, ka haere he karere ki te whakamōhio ki ngā whanaunga. Kāhore he tono inoi, erangi kua rongo ia whānau, ka haere mai tēnā me ngā whakaaro aroha takoha. Kāhore te ture e haere mai mō ngā whakatikatika mō te tūpāpaku. Ko te whānau tonu, ko tētahi o ō mātou mātua he tangata tino mātau ki te kāmura whare aha noa. Nā, ko ia te kaihanga i te kāwhena, me tōna whānau ki te āwhina i a ia. Kāhore he utu whakarite, erangi koia tēnā ko tana koha ki te whānau pani. Kāhore i rerekē atu te āhua i te otinga mai i ngā mea i haere mai i te Pākehā mo te moni nui tonu. Koia nei ētahi o ngā tikanga tino whakamīharo ātaahua i mahia e rātou mā, ā, kua ngaro i a tātou i tēnei wā whakatupuranga hoki. 

 

Kāti mō te wahanga, he akoranga katoa ēnei i a mātou e tupu ake ana. Ka mate he tangata, ko ngā kākahu ake o tēnā, me ētahi atu taonga e tika ana kia tanumia, ko ēnei āhuatanga i a mātou e tamariki ana, tino nui te wehi ki a mātou, me te āwangawanga ki ngā mahuetanga iho, mō te ngākau kūare. Erangi, iāianei, tino nui rawa atu te māmā o ngā tirohanga i roto i ēnei āhuatanga. 

 

Ko ngā tohutohu a te kuia whaea, ko tēnei mea te hongi i te tūpāpaku, ehara i te mea mō te katoa. Erangi mehemea kei te mārama tō hinengaro ki tāu i hiahia ai, me mahi i runga i te māramatanga me tōna rangimārie. Ko ngā whakatūpato a te kuia he whakakite ki tētahi o tōna whakatupuranga, nā reira ka homai e ia ki a mātou ēnei hei mātauranga ki tēnā, ki tēnā. Koia nei ahau ka hoatu i ēnei tohutohu mō ngā whakatupuranga e tupu ake nei. Nōtemea ka hongi koe te kūare i te tūpāpaku, tērā nga rerekētanga o te tangata kua mate kē, ka tae mai te wehi, ka oho koe, ka ngautuarā, kōrero kino rānei. Kāhore tēnā e tika ana. Koia nei ngā whakakitenga mehemea tētahi kāhore i kōrero i ēnei āhuatanga, hei mātauranga anō mō wai nei, ka noho kūare tonu koe. I te mārama o ngā tohutohu a te kuia, kāhore e ruarua te hinengaro. He tino akoranga. He pai tēnei mea te whakawhitiwhiti kōrero, whakaaro hoki, me te pātai ki ngā kuia pakeke, hei painga anō mō tātou katoa me ngā tamariki. 

 

Tēnei anō tētahi ka haere koutou ki ngā tangihanga, ka tata atu ki te marae, ka tū koutou katoa i te tahataha o te rori ki te tiki ētahi rau whiro, rau kākāriki hei taua mō ō koutou mātenga. Ka oti katoa te hanga i ō koutou taua pēnei i te karauna nei, kua tae ki te wā mō koutou ki te whakaeke, kua rārangi mai hoki nga wāhine karanga pōwhiri ki te manuhiri whakaeke ki runga i te marae. Nā, ko te tikanga, ko ngā wāhine ki mua, ko ngā tāne ki muri me te poroporoaki haere tonu atu i muri i nga kaikaranga tae noa atu ki raro mai i ngā waewae o te tūpāpaku. Ko ngā tāne ka tango i ō rātou taua ka waiho ki raro tonu iho, kātahi ka haere atu ki te hongi, harirū, tangi ki ngā tūpoupou. Ko ngā wāhine ka mau tonu i ō rātou i te wā e tangi, hongi ana.  

 

Erangi, inā mariri iho ngā reo tangi o rātou, kua tika te tangata o te whare ki te tū ake ki te mihimihi ki ngā manuhiri whakaeke poroporoaki. Mehemea kotahi anō te kaikōrero, kua whakapuare mai ki te manuhiri, ā, ina mutu te manuhiri, kātahi ka hoki atu anō ki a ia te mutunga. Mō ngā whakamārama mō te tangi, te nehu ko hea hoki. Ka mutu ēnā pānui ka whakaatu te kaikōrero ki ngā whare horoi, me te whakaratarata tuatahi. Tērā te reo karanga o te kāuta wharekai. Ā muri o tēnā, mehemea i muri o te kai ahiahi, kua hokihoki te nuinga ki te whare roimata ki reira tautoko ai i ngā whaikōrero tae noa atu ki muri o ngā mahi ringawera i muri. Kia tae ki te wā mō te karakia, ka tangi te pere. Ka whakahaerengia tēnā wāhanga. Ka mutu, ka haere ngā ringawera ki a rātou mahi i te kāuta mō te hākari i muri i te nehu. 

 

Kāti i tēnei wā e takoto ana te tūpāpaku, he whakaakoranga tino hōhonu tēnei mo te ngaro. Ina tīmata te honohono o te rērere i roto i te whare takotoranga o te tūpāpaku, he kupu whakatūpato - kaua e patua, ā, kia māmā tō reo. Ko ia te karere nā te Matua nui i te Rangi ki ā tātou te hunga ora. Ko te reo aroha tōna kua tae mai ki te whakaatu kua tae ki te wā hei hokinga atu mōna ki a ia i runga i te rangimārie me tōna ātaahuatanga i te tirohanga kanohi. 

Nō reira kia aroha ki te karere. Ka timata ngā whaikōrero mihimihi me te whakamārama ko tēnei pō mutunga i mua atu o te nehu, kāhore e moemoe ana te tangata ao atu te pō. He kōrero, he waiata, whakangahau te mahi. Te rā o te nehu, kua rite kē te taima mō tēnā me te karakia mutunga i te kāinga. I konei, ka taupokitia te kāwhena i ētahi whānau. Ka whakawhāititia ngā putiputi me ērā mea katoa. Ka tae ki te taima o te karakia e tae ai ki te wā o te hāpaitanga atu o te tūpāpaku ki te waka tari ki te urupā, ka mahue mai te takotoranga o te tūpāpaku ki te kaumātua, minita rānei, ki te whakanoa whakawātea i tēnā wāhanga. 

 

Ka haere ki te urupā, ka mutu tērā wāhanga, ka haere te whānau pani ki te takahi i te kāinga i mua atu i te hākari. Ko te nuinga o te iwi kua tae noa atu ki te tatari ki te whānau pani. Ko rātou ki mua tonu ina karangatia mai tae noa ki ngā tēpu me ngā tūru. Ka karakia te minita, me te whakawhetai i ngā kai. Ka kai katoa, ka āhua tau te mauri, ka tū te kaiwhakapuare mō ngā whikōrero ngā mea e hoki ana ki ngā takiwā tawhiti ki te poroporoaki me te whakawātea i a rātou. 

 

He pito i mahue. I te kaikōrero tuatahi nō te marae, he whakamārama kei te wātea tonu ki te moe iho anō ā tēnei pō, nōtemea tēnei pō, te tikanga he pō whakamoemoe tomo, he tāne ki te wāhine. Mehemea ka whakaae te tokorua nei, kua whakamoengia rāua i moenga i runga i te paparahi i waenganui o te rūma. Ā muri kē atu, kātahi anō ka kōrero mārena mehemea koia nā te kaupapa. Ko ōku nei tuākana me te tungāne i mārenatia rāua i te rā kotahi, i ngā tau i puta te penihana mō ngā tamariki. Kāti me mutu i kōnei ēnei kohikohinga. Kia ora. 

A – K

H

hākari pae maumahara feast in memory of those who have passed on 

hamumu mutter 

hanake move on to 

hīhī, hikihiki lift up 

hūhā, kūhā thighs 

huhua plenty, many 

 

 

I

ikeiketanga highest 

irā te nui extra loud, big, or large 

 

  

K

kaenga, kāinga homestead, village 

ka puta te pito a saying to indicate one has eaten well 

kaioraora threaten, curse 

Kaiwhāiki Marae 19 kilometres upstream from Wanganui 

kawa protocol 

kīnaki relish 

kōrero hahani speak ill of 

M – P 

M

mako voice heard returning a call from a distance 

manawapā apprehensive 

manu tau, manuwhiri, manuhiri visitor 

matua main row, or line, father 

moe moenga sleeping places 

 

 

P

pāeke marae procedure where all the local speakers speak first, followed by the visitors 

Paerangi ancestor after whom subtribe named 

papahoro lost 

parani verandah 

pīkarikari shuffle (of feet) 

pōkeka chant of abuse or defiance 

pūkana grimace (of face) 

R – WH 

R

rau whiro willow leaves 

ruarua, kārangirangi doubtful (of mind) 

rukerukena bring forth, throw forth 

  

T 

taia to be struck 

taiāwhio go round about, encircle 

Tamatekapua ancestral house standing at Ohinemutu, Rotorua 

tanunga burial 

tataki arrange in order 

tatakungia uttered deliberately, recited 

taua headwear of mourning 

taunu jeer 

taupāngutu obstruct, abuse (with mouth) 

Te Ātihaunui a Pāpārangi sub tribe of Wanganui 

tekihana section 

te manu tau visitors 

tikanga procedure 

tira company of travellers 

tīrara wide apart 

tītakataka movement of body in defiance 

toumou betrothal 

tuangahuru tenth 

tuku whakarere handed down 

tūpoupou, kirimate the bereaved 

 

 

W

waha carry, convey 

 

 

WH

whāiti gather together, group close together 

whakahīhī express contempt 

whakahuahuatia mentioned frequently 

whakairiiri to baptise 

whakamahuatanga handed down, passed on to younger generation 

whakanoa cleanse, lift the tapu 

whakakapo to complete, to finish 

whakaputa go forth (into the world of light) 

whakararau embedded (in mind) 

whakatīkai to insult 

whakatūtūā to belittle 

whare roimata house where tangi is held 

whekene grit (of teeth) 

whēneihia, pēneitia done this way