Te Wharekura 39

Te koha me ōna tikanga

Nā Roka Paora nō Te Whānau-a-Apanui
Nā David Burke ngā pikitia

He nui tonu ngā whakamāramatanga mō te koha. He aroha, he whakaaro, he roimata, he āwhina, he taonga, he kai. He āhua ōrite tonu ngā koha aroha, whakaaro, roimata me te āwhina. Mā te kaituku tonu e pānui he aha tana koha. Ko ēnei momo koha ināianei he moni, ā, tukua ai ki runga i te marae ahakoa he aha te hui, he tangihanga, he rā whānau, he mārena, he hura kōhatu, he whakatuwhera whare, he aha, he aha. 

Ko ngā koha o neherā he kai, he taonga. Ka haere ana ngā tāngata o te tuawhenua ki te takutai, ka mauria ā rātau nā kai, te huahua, te tuna, te huarākau, te rauaruhe; pērā anō o te takutai, te kūmara, te kaimoana. 

Ka mate ana he tangata rongonui ka tukua e tana whānau me ana whanaunga ngā taonga pēnei i te heitiki, i te patu pounamu, i te korowai. Nā reira, i tēnei wā kua kore kē he taonga Māori o tēnei takiwā, kua tukua katoatia ki a rātau mā. 

E whitu tau taku pakeke ka mate to mātau koroua, ka tapahia e taku kuia me āna tamāhine pakeke o rātou makawe. Koia nei a rātau taonga ki tō mātau koroua. I taua wā, tukuna ai e ngā wāhine anake o rātau makawe kia tipu hei taonga mō ō rātau tūpāpaku. Kua kore noa tēnei momo tikanga ināianei. 

Ko te koha e tukuna ana ki runga i te marae, mō te marae ake, arā, mō ngā raruraru o te marae. Ko ngā koha e hoatu ā tinana ana ki te tangata nāna te hui, ka haere hei āwhina i ngā raruraru o taua hui. Tuhia rawatia ai ngā ingoa o ngā kaituku o ēnei momo koha. Ina taka ngā kaituku ki te raruraru, ka whakatō hui rānei, ka whakahokia atu aua koha. 

Pērā anō ngā hui nunui, te whakatuwhera wharenui, wharekai rānei. Ka tukua he koha, ā, a tōna wā ka whakahokia, ahakoa e hia tau ki muri. I aua hui nunui ka whakatakotoria e te tangata whenua tā rātau tahua. Karangatia ai tēnei tahua, "Ko te papa o te pereti." Ka taetae mai ngā manuhiri ki te hui, ka rongo e hia te tahua a te tangata whenua, anā ka tuku i a rātau koha kia ōrite, kia nui ake rānei i te papa o te pereti. Ko te pereti nei, he kupu Pākehā, he paepae. Tuhia katoatia ai ngā koha o te hui, a, ka pānuitia ki te whakaminenga i taua rā tonu pēhea te kaute o te tahua. Ko ētahi o ngā koroua tuku koha i aua hui, makamaka ai i ngā moni pepa kia puhia haeretia e te hau ki runga i te marae. He mahi whakangahau tāngata tēnei. Ka pōnānā katoa te tangata whenua ki te kohikohi i nga moni e rērere ana i runga i te marae. 

I ēnei rā, he moni anake te nuinga o ngā koha. Kohikohi ai te manuhiri i mua i te whakaeketanga i te marae, ka whakaemi i te koha ki rō kōpaki, ka hoatu mā tētahi o ngā kaikōrero e tuku. Engari, mehemea i pōhiritia e te tangata whenua tētahi manuhiri tūārangi, ka tukua he taonga, he kete whakairo, he tautau, he pū putiputi mehemea he wahine, ā, he tautau, he tokotoko, mehemea he tāne. 

Ko te koha tino whakahirahira i homai ki a tātau, ko te reo Māori. Na te Atua i hōmai hei koha māna ki a tātau. Nō reira kia kaha tonu tātau ki te ako, ki te pupuri mō ake tonu atu. 

Koha

Nā Te Uri o Te Houtaewa nō Te Aupōuri

Ko te ingoa tūturu o tēnei mea te koha, arā ki ngā tāngata o Te Aupōuri, he takoha. He maha ngā kōrero mō tēnei āhua me tuku mai e ngā mātua ki a tātou mō nāianei. 

I ngā rā o mua, e hoatungia ana tētahi takoha ki tētahi atu, hei tohu aroha, hei maumahara rānei mō tērā tangata. Ko te nuinga o aua takoha rā, he pounamu, he patu, he taiaha, me ērā atu momo matatunga whawhai. 

Ko ngā tūpuna nei o Te Aupōuri, ko Te Ihupango me Te Houtaewa. Te kaumātua nei a Te Ihupango, he tangata haere i runga i ngā waka o te Pākehā. I tētahi rā, ka hoki mai Te Ihupango ki te wā kāinga mai i Rānana. I a ia i Rānana ka whai ia ki tētahi pū me tētahi toki. Ka tūtaki Te Ihupango ki a Te Houtaewa ka mea atu, "Anei taku takoha māu." Ka hoatungia e Te Ihupango te pū nei mā Te Houtaewa. 

Ka mea atu a Te Houtaewa, "E te matua, he aha tēnei momo taiaha?" Nā te mea, kihai anō Te Houtaewa i kite pū noa. 

Ka whakahokia atu e Te Ihupango, "Titiro mai." Ka kapo ake Te Ihupango i te pū, ka tohu atu ki ētahi manu, e noho mai ana i tāwāhi tonu. Ka whakatikatika Te Ihupango i tana pū ka pūhia e ia ngā manu rā. Hinga mate mai ana te katoa o ngā manu. 

Ka mea atu anō a Te Ihupango, "E tama, anei rā te takoha māu." 

Ka mea atu a Te Houtaewa, "Kao, engari homai tō toki, he ao te takoha tika ma te toa o te iwi. Nātemea, i mua atu i taku patunga i te hoariri, pai anō ki a au kia tata atu au ki a rātou kia rongo ai au i te haunga o te mataku." 

Nā, ko tēnei toki e takoto ana ināianei i Te Whare Tiaki Taonga i Tāmaki Makaurau. Ko te ingoa o te toki nei ko Tunuiarangi. Nā tētahi kaumātua o Te Aupōuri i hoatu hei takoha nā te iwi mā te katoa. Engari, kua āhua rerekē hoki ināianei. 

Ināianei tēnā mea te takoha, hei takoha tika anō mō te rā. Pēnei te huritau o te tāne, o te wahine rānei, me te tāne e moe ana i tana whaiāipo. He maha ngā takoha e mōhio ana tātau, hei takoha tika mō ēnei momo āhua. 

Ko te takoha e mōhiongia ana e te katoa pea, ko te takoha mō te marae. Arā, ko te takoha e whakatakotongia ana e te manuhiri i runga i te marae mā te iwi kāinga. Ināianei hoki he moni, engari, e huangia ana he āwhina, he roimata rānei, hei whakangāwari i ngā mahi a te marae. Tēnei takoha mā te tāne e tuku ki raro, ā, mā te tāne anō o te iwi kāinga e hiki ake. 

E mahara ana au, i a au e tamaiti ana i tō mātou ake marae a Potahi. Ka tae mai tētahi rōpū nō Tainui. He poaka, he kau, me ētahi hipi ta rātou koha mō te kainga. E ora tonu ana ēnei kararehe. E rongo atu ana mātou i ngā kararehe e tangitangi ana. Ka mutu i ta mātou kaumātua te kōrero me ta rātou waiata hoki, ka mauria mai e ngā tāne ngā kararehe nei. Ka tōia mai ki waenganui te marae, me ngā taura here e rapa tonu ana ki ngā kakī o te poaka me te kau, ka tukua ki raro. Ka titiro atu to mātou kaumātua me te mōhio e kore ngā kararehe nei e ū i a ia. Na mātou nga tamariki nga kararehe nei i hopu, hei kai hoki ma te katoa. I ērā tau kāore he pouaka hei whakamakariri kai. 

Ko ngā waiata mihi mo te takoha ki te iwi kāinga mā te wāhine anō e waiata. Engari ehara i ngā waiata e mōhio anei tātou. He āhua pēnei i te auē nei. 

Nā, ko ēnei ngā takoha tūturu Māori e mōhio ana au, he kai. Ngā iwi e noho tata ana ki te ngahere, ma rātou e mau mai ngā kai o reira, arā ngā manu me ngā hua o ngā rākau. Ngā iwi e noho tata ana ki te moana, mā rātou e mau mai ngā kai o reira, arā ngā kina, ngā pāua, aha atu, aha atu. 

Nā, ki a ētahi anō, me to rātou mōhio, torutoru ngā wahia hei tahu mō te hāngi, nā, kua tōia atu he kahikatoa me te manuka, hei mahi te ahi hei whakamāoa i ngā kai. Ko tēnei tā rātou takoha mā te iwi kāinga. Mōhio ana au, he rerekē te titiro a tēnei iwi ki tērā iwi mō tēnei āhuatanga. 

Engari, ko tētahi āhuatanga rite anō ki te katoa, ko tēnei: kaua e waihongia tētahi mea taumaha i runga i te pepa i roto nei ngā moni, pēnei te pounamu, te patu, te tokotoko rānei, me te whakaaro kei riro te pepa i te hau. Nā te take, ngā mea katoa e whakatakotongia ana i runga te marae mā te iwi kāinga. Ka nui te whakamā e pā mai ki te manuhiri kia mahia tēnei mahi te tuku atu i tētahi aha rānei i runga i ngā moni e mauria katoa hoki, ngā moni, me te patu katoa. 

He whiti – Te Koha 

Ko ēnei ngā roimata a te manuhiri 
Mō te iwi kāinga – kei pukuriri 
Mauria atu i roto i te aroha me te pai 
Kia ora ai tātou i te maha o ngā kai 
Te whare tupuna - te wehi, te mana 
Hei whakamahana i ō tātou tinana 
Ko tēnei te tikanga o ēnei mea 
Engari nō nāianei ko rerekē pea 
Ka mutu ngā mihi, wero, te taki 
Ko waihongia e rātau te koha – he haki 
Ka hikingia e te iwi kāinga, auē te hari 
Ka hoki mai ki te noho, me te whakaaro, engari 
Ahakoa te haki mō tōna ake taina 
Pēhea pēnā kia kore te tangata i haina 
Ko āhua ngaro haere te koa – pēnei te tititi me te moa 
Tiki ai, toru nga mea ko penei ne 
Kei katangia tātou i ēnei mahi hē. 

Te koha, te takoha

Nā Pou Temara nō Tūhoe
Nā David Burke te pikita

Ko tēnei kupu ko te koha i puta ake i te takoha. Koinei te kupu matua, ko te takoha. Ko te whakapototanga o taua kupu ko te koha. E ai ki a Tame Winitana o Waikaremoana, i ahu mai te takoha i "taku ha". Kia pai ai te tangi ki te taringa, ka whānau mai te takoha. Ki te whāia te kōrero a Tame, ka whai pakiaka te āwangawanga a tōna iwi ki te kupu nei ki te koha, notemea ko to hā, he tapu. 

Kua roa a Tūhoe e riri ana ki tēnei kupu ki te koha. I roto i nga wānanga a Tūhoe mai i te tau 1963, ka tohutohu rātau i te hē o te kawe haere i tēnei kupu. Ahakoa nga whakamārama a Te Wiremu, e ai ki a Tūhoe, he tapu te koha natemea he whakahere tōna āhua. 

Ko tau i wawata ai ki Te Atua, ka herea e koe ki te koha. Ko taua koha, he pounamu, he tangata tonu rānei i ngā wā o mua. Taka iho ki te wā o Te Kooti Rikirangi, ka whakakorea te whakahere i te tangata me te pounamu, ā, ka whānau mai ko te kapa me te hiriwa. Mēna he wawata tāu ki Te Atua, hoatu ana koe i to koha ki te tohunga hei whakahere mo tāu i wawata ai. Ka herea to koha e te tohunga ki tōna wai karakia i tōna tuāhu, kātahi ka "mahia", ērā, ka tukua ki Te Atua. Ka whakahua te tohunga i o wawata me o hiahia, kātahi ka tuku i to koha hei whakahere i o wawata. Muri atu ka tahuna to koha ki te ahi. Ka oti tēnei kua whakaputua ngā moni rā. 

Ko te kupu i herea nuitia e Tūhoe mo ngā moni whakatakoto ki runga o te marae, ko te whakaaro, ko te kohi rānei. Kei te mau tonu ngā pākeke ki tēnei kupu, engari na te kaha mai o waho i a Tūhoe, ka UTU haere mai te koha. Kia whakatumeketia tonutia e nga pākeke, kātahi anō ka mahara ake ki te āhua o te koha. E ai ki a Hohepa Kereopa i te hui a te rangatahi o Tūhoe i Waikaremoana i te mārama o Ākuhata o te tau 1990: 

"Mēna koina ta koutou kupu mo te whakaaro, kua kore au e kai i a koutou kai, tatemea he tapu. Ko tāku hoki i whakatakoto ki te marae, he whakaaro aroha nāku ki te tangata whenua, hei whakamāmā i ngā pīkaunga utu kai mo te hui. Na koutou kua whakatapua te kai, he noa kē nei tōna āhua. Whakahokia atu ta koutou kupu koha ki o koutou whare wānanga, ka waiho atu ki reira. Kaua e heria mai ki konei, ka tapu matau." 

I ngā wā hoki i mua atu o te whiwhinga o Tūhoe i te moni, ko āna i tuku ai ki te marae hei āwhina i ngā whakararu, he kai. I waho atu o ngā marae o Tūhoe e tū ana nga wāhi whakaui i nga kai i heria mai e nga ope. Kāore hoki e taea te whakairi atu i te ingoa koha ki runga i te kai. 

Noho nei, ka mate haere tērā āhua, ā, ka pihi ake ko te moni. He māmā ake tērā i te tuku i te kai. No reira anō hoki i pihi ake ai te koha hei ingoa mo aua moni e tukua rā ki te marae. I tēnei wā kua whai pakiaka taua kupu. Ahakoa ki Toto o Tūhoe, kei te kaha haere te kōrerohia o te koha. 

Ko te koha hoki, na to ngākau i whakaaro i runga i te aroha. Te tikanga, mēna i tukua e koe i runga i to aroha, ka pai katoa o whakaaro. 

I ētahi wa, kāore koe e puta ki tētahi hui, tangihanga rānei. Hei reira kua nanao iho koe ki tāu i mahara ai, ā, koinei to whakaaro aroha ki taua tangata, wahine kua mate rā. 

Te whakatakoto, te tuku rānei 

E rua ngā wāhi whakatakotoranga i te whakaaro a Tūhoe. Tuatahi ko te marae, tuarua ko muri, arā ko te āronga ki nga ringa wera. Mo te wāhi ki te marae, na te kaikōrero whakamutunga te mahi ki te whakatakoto i te whakaaro. He here kei runga i tēnei koha. A tōna wā, kua whai wāhi te tangata whenua ki te utu i taua koha. 

Mo te tuku ki muri. Ko taua tuku kāore e whakatakotoria ki runga i te marae, engari ka heria ki muri. Kua mōhio tonu mai te tangata whenua kāore he here o taua koha. Me mate atu taua whakaaro i reira. Kāore te kaituku i te hiahia kia whakahokia a tōna wā. 

Otirā, ko te tino tikanga o te tuku ki muri, he tuku huna. I ētahi wā kua heria hunatia atu te whakaaro ki te wharemate. Ko tērā whakaaro ma te kirimate. Kāore he whaipānga atu o te marae ki tērā whakaaro. I ētahi wā kua kokuhutia atu te whakaaro ki roto i te ringa o te rangatira o te tangata whenua i te wā e ohaoha ana, e rūrū ana rānei. 

Koinei te whakarāpopototanga o te koha e ai ki ngā tikanga a Tūhoe. 

Te koha

Nā Tamati Wharekura nō Tainui waka
Nā Gus Hunter ngā pikitia

Ko tēnei mea e kīia nei ko te koha, i tīmata mai noatu i te wā i a kui mā, koro mā. Ko te ingoa i tērā wā e kiia nei, ko te aroha o te tangata i te tangata. Ko tērā wā, te koha a tēnā iwi, me ngā rohe katoa, he rīwai, he mīti, ngā kai o ngā kāri, ngā kai o ngā moana, me ngā awa, me ētahi atu. Ko ngā hui katoa, e tika ana me horahia he koha hei awhi atu te kaupapa o te rā. 

Tēnei mea a te koha, he taonga nui, kei ae anōa tōna wāirua, me tōna mahi. Te koha e kōrerotia nei, kei te tangata e whai muri nei ngā mihi a ngā manuwhiri, ā, ko tēnei wā, ko mōhio ai ngā tāngata whenua, a te pae tapu rānei, kua mutu ngā mihi a ngā manuwhiri. 

I te horonga o te koha, ka tū ngā manuwhiri ki te waiata hei tautoko i tā rātou koha. Ko nga koha o ērā wā hoki, ko ngā kai e māmā ana ki te rapua mai o tēnā rohe, ā, ope rānei. Ko te koha he manaakitanga ki ngā tāngata whenua. I tērā wā kāore pātai i te nui, i te iti, nōtemea e kitea ana e te tangata. 

Ko te pātai nāianei, he aha te rerekē mai i te tīmatatanga tae noa ki tēnei wā? Ko te whakautu atu ko tēnei, ko te wairua, me te aroha, kei te mau tonu; ko ngā taonga, he rerekē. 

Ko tēnei taonga, he taonga tino nui i waenganui o tātou iwi. Ētahi o ngā koha kāore e ea ana i ngā nama o te marae. Ko te mea nui hoki, ko te kai, mehemea e tangohia ana i te toa. Ko te mea tuarua, ko te pire hiko, muri mai o tērā, ko ngā hīti ki te whare horoi. 

Kua tae nāianei ki te wā e hiahia ana i te tari tāke i te ngaungau haere i te koha e horahia nei i runga i ō tātou marae. Tētahi mahi o te koha, he awhi atu i te pani, te pouaru, me te rawakore. Ka uru mai te wāhanga mō te poukai. Ko te kaupapa tūturu i te awhi atu i te pani, te pouaru, me te rawakore. I roto o Tainui, kāore whakahē nā te ope e hiahia ana i te whakatakoto i tā rātou koha. Ko ngā koha mō ngā poukai mā te tangata anō hei hora tāna nei koha i roto i te kete aroha i mua i te urunga atu ki te hākari o te rā. 

Ko ngā tangihanga ka kitea te nui o ngā koha mai tēnā hapū, ā, huri noa i te motu. Mehemea he tangata rongonui o te motu, ka nui atu te koha. 

He aha te nui o te koha o ia tangata? Mā te kaumātua kāore kau ana he raruraru, notemea kei te mōhio ia te wairua me te hōhonutanga o tēnei mea a te aroha. Kei ngā rangatahi, ka whakaaro, ka titiro, ka pātai, ka kaute. Mehemea ka tae katoa mai o tamariki, mokopuna, ko te koha e hake mōu anake, engari mō koutou katoa. 

Ko ngā whakataukī ēnei hei tautoko atu i tēnei kaupapa: 

Mehemea kāore tika ana o muri, kāore tika ana o mua. 
Mā te huruhuru ka rere te manu. 

Kia whakahokia mai ki a tātou i te rangi nei, tātou te rangatahi, e kitea ana ō tātou karu, engari kāore e tino mārama ana i te hōhonutanga o te kaupapa e tuhia nei. 

He aha te tikanga o te koha? 

Nā Matehaere Green nō Ngāti Porou ēnei pātai ki ngā kaumātua a Petuere Awatere Raroa rāua ko Hāpuku Karaka nō Rangitukia

Ko ngā pātai tuatahi ki a Petuere Awatere Raroa. 

KAIPĀTAI: He aha te tikanga o te koha? 

KAIWHAKAUTU: Te tīmatatanga o te koha ko ngā whakaaro e kohitia ana i nga karakia hei āwhina i ngā mahi ki Te Atua. Ko ngā minita, arā, ngā kaikarakia o Te Hāhi Mihinare, kāhore ō rātou utu. Ko ngā moni koha, ohaoha rānei, ka mahia hei āwhina utu i aua minita. 

KAIPĀTAI: He aha te tikanga o te takoha?

KAIWHAKAUTU: I roto i te karakia, ka oti te kohi i ngā koha, ohaoha rānei, ka hoatu ki te minita kia whakatapuhia hei āwhina ngā mahi o te hāhi. Te whakawhaititanga o ngā koha katoa nei, ka karangahia he takoha. 

KAIPĀTAI: Utu koha noa ētahi o ngā hāhi? 

KAIWHAKAUTU: Te Hāhi Ringatū utu koha ai hei āwhina i te hāhi. Utu koha anō ai rātou hei āwhina i ngā tāngata kei te pāngia i te mate, hei para rānei i te aituā. Ka rapa āwhina te tangata, ka hoatu he kapa ki te tohunga. Mā te tohunga e karakia kia āwhinatia taua tangata. Ka karangahia te kapa rā, he koha. Ngā koha nei purua ai ki roto i tētahi whare iti. Te nuinga o ēnei whare iti, whakatūngia i runga maunga. 

KAIPĀTAI: Pēhea koe i te whakatakoto koha i te marae?

KAIWHAKAUTU: Me tīmata au i te kōrero mō te whakatakoto koha i ngā tangihanga. Ka haere he ope ki te tangihanga, ka tū i te kēti kia karangahia mai rātou e te kaipōhiri. Ka karangahia, ka whakaeke te manuhiri ki mua i te marae, ka tangi ki te tūpāpaku, ka mutu te tangi ka noho ki runga i nga tūru mo te manuhiri. Ka whaikōrero mai te tangata o te paepae- kotahi, e rua, e toru rānei. Ka mutu nga kōrero o te paepae, ka pāhi mai rātou. Ka tū atu nga kaikōrero o te manuhiri, kotahi, e rua, neke noa atu rānei. Ka mutu te whaikōrero o ia ope whakaeke, ka whakatakoto i tana koha i mua o te marae; ka waiata i tana waiata, ka noho i runga i tōna tūru. Ka haere mai te tangata pupuri koha i roto i te paepae ka mau i taua koha. 

Ngā koha katoa nei hei āwhina i te utu i ngā raruraru o te paemate, te kāwhena, ngā kai, me ērā atu raruraru. Kia mutu te tangihanga ka whakaaro te whānau nā rātou nei te tangihanga he koha ki te marae hei āwhina i te utu i ngā raruraru o te marae, arā, i te hiko, ngā taputapu rānei o te marae. 

KAIPĀTAI: Pēhea ngā koha mō ngā kawe mate? 

KAIWHAKAUTU: I te whakatakoto koha mō te kawe mate, pērā anō i te tangihanga. Ngā koha katoa o te kawe mate hei āwhina i te utu i ngā kai, tae atu ki te whakaaro ki te marae. 

KAIPĀTAI: Pēhea ngā koha mō te hura pōhatu? 

KAIWHAKAUTU: Te whakatakoto i te koha mō te hura pōhatu pērā anō mō te kawe mate. Ngā koha katoa hei āwhina i te utu i ngā kai me te whakaaro anō ki te marae. 

Nō te pātaitanga ki te kaumātua ki a Hāpuku Karaka mō te tikanga o te koha ki a ia, ka rere ōna whakaaro mō tēnei tikanga. Anei e whai ake nei āna kōrero. 

Te kaupapa o te koha he whakaaro āwhina. He maha ngā tikanga whakatakoto koha ki Ngāti Porou. 

• Tuatahi, he āwhina i te kirimate i ngā tangihanga. 
• Tuarua, i ngā tangihanga, ka whakatakoto tētahi tangata i tana koha ka taunaha i tana koha ma ngā kiriwera, nā ka haere taua koha hei āwhina i ngā kiriwera; hei hoko wai whakahari pea. 
• Tuatoru, ko te koha mō ngā kawe mate. Āhua rite anō i te whakatakoto koha i ngā tangihanga. 
• Tuawhā, ko te koha e kī ana he niho tōna - he tamana. He koha whakahoki tēnei. Ka whakatakoto te koha me ōna tikanga. Meana he hui tāhau, he mārena rānei, ka haere mai he rōpū, iwi rānei, ka whakatakoto i tā rātou koha, me kī e rima rau tāra, ka tamana i a koe, to whānau, iwi rānei, kia haere ake ki tā rātou whakararu, hui, mārena rānei; ka haere koe, to whānau, iwi rānei, ki taua whakararu, hui, mārena rānei, ka whakahoki koe taua koha kua āhua nui atu i te rima rau tāra. 
• Tuarima, i ētahi wā, ka haere koe ki te marae ki tētahi hui, ka hiahia koe i te hoatu he koha ki te rōpū nā rātou te hui, kāhore koe e hiahia i te whakatakoto i tō koha i mua i te marae, kei riro kē tō koha i te marae; kia tae i te wā o te kai pea, ka karanga i te hunga e hiahia ana koe, ka hoatu to koha. 
• Tuaono, ko ō tātou mātua tīpuna, i tuku whenua ai hei koha hei tūnga wharekura marae, hōhipera rānei me ērā atu mahi a iwi. 
• Tuawhitu, i whakamauria i Te Reo Irirangi o Ngāti Porou ētahi o aku waiata, kōrero, i runga i ta rātou mihini whakamau waiata, ka kī mai rātou ki aua, ma rātou pea au e whakaaro i tētahi utu. Nō muri mai ka rongo au nāku i koha aku kōrero, waiata, mō Te Reo Irirangi o Ngāti Porou. Kei te pai noa iho ki aua tērā koha. 
• Tuawaru, i Te Hāhi Ringatū, ka utu koha te tangata he kapa ki te tohunga hei tiaki i a koe, i te haere koe i waho i tō iwi, kia kaua te raruraru e pā ki a koe. Ngā mate tūroro ka hoatu he koha ki te tohunga hei āwhina i te whakaora i te tūroro. Te Hāhi Rōpū, whakaaro koha anō ai ratou pērā i te Ringatū. 

He aha te koha, te takoha rānei? 

Nā Joe Malcolm nō Te Arawa

He nui ngā momo koha kei a tātau te iwi Māori. Ko te koha e tino mōhio nuitia ana e tātau i te rā nei, ko te whakaaro moni ka whiua, ka kōkuhutia rānei ki te marae i nga wā e hui ai te tangata ki reira. Ka kohikohia he hereni e te hunga whakaeke ki te papa marae, kātahi ka tukuna ki te tangata whakahaere o te marae, ki tētahi rānei o te wharemate pēnā he tangihanga. Ko ngā kohi nei nā, ka kīia he koha. Kāti, kei a au kei a Te Arawa, he kohi anō te kohi, he koha anō te koha. 

Ko ēnei ka whiua ki te marae he kohi kē; ka kore, he whakaaro, he maungaringa rānei. I runga i te tikanga, ka whiua he moni ki te marae, me whakahokia anō a tōna wā. Nā reira, e toru ngā kōrero mō te moni whiu ki te marae: ko te kohi ka tahi, ko te whakaaro ka rua, ko te maungaringa ka toru; ehara kau i te koha, ki a Te Arawa rā tēnei. 

Ko te kaupapatanga mai o te kohi, he aroha nā te manuhiri ki ngā raruraru o te marae. I mua hoki, he tōtō kai kē te maunga atu: he rīwai, he ika, he kūmara, he tuna, he pipi, he kiore, he mātaitai, he manu huahua, he aha ake, he aha ake. Ka mauria atu ki runga i te marae, ki mua tonu i te aroaro o te tangata, ka waiho. 

Nō te rā nei, kua kore ērā āhuatanga. Ka tuku kē ko te moni a te Pākehā hei patu i ngā taumahatanga o te marae. Koira, ka kohikohia he moni hei whakarite atu, ka kīia he kohi. 

Waiho ko te pūtake ake o te koha, he aroha. He aroha ki te tangata. Kāre he tikanga o te take e whakahuatia ai te koha. Nā reira, ka hua ake i roto i ngā āhuatanga huhua noa atu. Kei pēnei tātau ko tātau anake ko te iwi Māori kei te whai i tēnei tikanga i te koha. Ahakoa Māori, ahakoa Pākehā, Hainamana atu, aha ake rānei, he pā katoa ki tēnei tikanga. 

Kāti, me tīmata tonu rā ki te iwi Māori me āna koha ki te motu. E takoto mai rā ngā whenua i tukuna ai ki te Kāwanatanga hei taonga mo katoa, kāore mo te iwi kotahi. Kei a Ngāti Tūwharetoa tāna kōrero mō te tukunga o ōna whenua me ngā maunga o Tongariro, o Ruapehu, o Ngauruhoe. I tukuna ai aua taonga rā, he koha mō ngā iwi katoa o te motu o Aotearoa, kāore he kōwaetanga. Nā te aha koia i tukuna ai? Nā te aroha o Te Heuheu Horonuku ki te motu. Kua tukuna, kāore he hokinga mai. Ko te koha tēnei. He nui ngā kōrero a ō tatau tūpuna mō ngā hunga kua tata ki te mate, nā te māuiui, he mea āki rānei ki te parāoa, he aha rānei. Kua mōhio kua tata ki te hemo kua hanga waiata taua hunga hei takoha māna ki te iwi, e waiatangia tonutia i te rā nei. Nō te rau tau mahue ake nei, ka mōhio a Te Manihera, he mihingare nō Ngāti Ruanui, kua tata ia ki te mate, he mea ākina ki te patu, ka hangaia e ia tana waiata. 

Kei a koe anō te tinana i mau ai 
Ka tae te wairua, ka hoki au ki te iwi e -i. 

He koha anō rā tēnei. Arā noa atu, arā noa atu ngā momo koha a tātau a te Māori. Tikina ki hea, ki hea, ka kitea. 

Kātahi ka rewa te ope a Tūmatauenga i Te Pakanga Tuarua o te Ao i te 1939 ki 1945 i pakanga ai ki ngā iwi o Tiamani i tāwāhi; hāunga ērā o nga pakanga o te ao. Te haerenga atu, kore tonu i mōhio ae rānei ka hoki mai ki te hau kāinga, ka pēhea rānei. Engari me te kaha mahara anō kua taka atu ki raro i ngā mana o Tūmatauenga mō te oti tonu atu tērā. Heoi, ka whakamomori ō tātau karanga maha ki te mau i ngā rākau riri a te Pākehā me kore e waimarie te puta; te mutunga iho, ko ngā mea i ora ake, ko ngā mea i mate i te mura o te ahi. Koirā anō rā te whakarite mō rātau i aituā atu ki reira: i tukuna rātau i ō rātau tinana i runga i te aroha, hei takoha ki te ao, ā, ki a ngāi tātau te hunga ora, e ora nei tātau. 

Kia whakarāpopotongia ēnei kōrero, kei a au kei a Te Arawa, ko te tikanga o te kohi, he whakaaro ki ngā taumahatanga o te hui; engari, he wā tōna kua hoki mai aua whakaaro rā. Arā, he moni ka tukuna mō te wā noa iho. Ka āhua rite ki te tiki moni i te pēke, heoi anō te rerekētanga, kāre he utu o te itareti. 

Waiho rā ko te koha, he taonga ka tukuna mō ake tonu atu; kāre he hokinga mai o te mea i tukuna atu rā. Ka mutu, e whai ana tēnei tikanga i tā te Māori, mai iho, me tana kaupapa mō te aroha. Tāpirihia atu ki tā Te Paipera i tohutohungia ai, mō ngā taonga e toru rā – ko te whakapono, ko te tūmanako, me te aroha; engari ko te mea nui o rātau ko te aroha. Mā konei rā e pupū ake ai te koha, mā te aroha. 

Te koha

Nā Morvin Simon nō Ngā Paerangi o Te Ātihau-nui-a-Pāpārangi
Nā David Burke ngā pikitia

Tērā pea e tika ana kia whakamōhiotia atu, he tauira tikanga tā tēnā, he tauira tikanga tā tēnā o ngā waka tini, o ngā piringa mano huri noa te motu. 

I runga i tēnā, e kore e taea te whakaturetia e te tōpito kotahi noa iho, te kī atu, anei te āhua mō tēnei tū mahi nei, te whakatakoto koha. Kāore! Kei tēnā rohe tāna, kei tēnā rohe tāna. He whakaaro noa iho ēnei hei kōrerorerotanga i waenganui i a tātou, nō reira, tēnā koutou. 

I te wā i tīmata ai tēnei āhuatanga, he tikanga tō tāua tō te iwi Māori, kia āwhina tātou i a tātou anō, kia tautokotia te katoa o ngā tautamatanga whānau, arā, ngā reanga whakatupuranga, tētahi ki tētahi. Ka tū te hui, ka haramai tēnā me ana tuna, tērā me ana tāwhara, Ngāti Wai me ā rātou kararehe hei patu, Ngāti Raki me te pūhā, Ngāti Rāwhiti me tētehi tokotoko hei hoatu ki te rangatira nōna te marae, Ngāti Uru me tētehi korowai mo te kuia whakaruruhau o te marae, a, ka mutu mai i a Ngāti Tonga me to rātou "pare whakairo" hei tohu aroha i waenganui i nga iwi kua hui atu i runga i te reo karanga o te rā! 

Ka hoki ngā mahara ki te wā e tamariki ana, ka hoe waka mai ētehi o ngā piringa whānau o uta me te kānga, ētehi atu anō i tai, me te pikopiko, me te aha ake rānei, ka haria mai ki te tēpu ka whiua atu i raro i te marunga o Rongo kia oti ātaahua atu ai i te aroaro o te ope "manu tau"! I ngā rā o mua hoki, he pounamu, he korowai, he waka, he pare, he tamāhine, he hua whenua, he mīti, he hua rākau, tae atu ki te "whare" hei nohoanga mokopuna! Kei tēnā tāna tauira, kei tēnā tāna tauira. 

Ināianei, kua rerekē tēnei āhua nei. I mua, he maha ngā mara nui i karia e tēnā whānau, e tērā piringa. I ēnei rā, kua haere tāua ki ngā toa hokokai i te "Utu Tika". I konei hoki a Tangaroa e noho ana me ana momo ahua kīnaki hoki! Nō reira, mai i konei, ka huri mai te koha ki te "upoko o te Kuini" ki te moni pepa a tauiwi. Hei aha? Hei whakautu atu i nga taimahatanga, ka pīkaungia mai i runga i te marae nōna te hui. Taea te pēhea, e kore e ngaro atu i a tātou, i te iwi Māori, tēnei āhuatanga nei, o te koha. 

Ehara i te mea ko tēnei āhua nei ko te koha i te moni noa iho, kāore! He mea tēnei ka pupū mai i te puna o te ngākau, ā, nā reira pea te tohu wairua, he tipua. Koina rā i ngākau nuitia atu tēnei tikanga tīpuna i waenganui i ō tāua mātua. E kore e taea e tātou te whakahē atu i tētahi ōhākī i tukua iho, i tukua iho! 

Kei te mōhio ake ahau he āhua tō tēnā, tō tēnā tonu, otirā pea mō tēnei wā poto nei, me kī, ka nui tēnei! 

A – K 

A

ae anōa, a ia anō   it has 
āki  beat, dash, hit 

H

hā   breath 
Hāhi Rōpū   sect of the Ringitū religion 
haki   cheque 
herehi, hereni   shilling, money 
hiriwa   silver 
huangia   to say, it is said 

I

ihiranga   contents 
itareti   interest 

K

kapa   copper, penny 
ki aua, ki ahau   to me 
koha tamana   gift with obligation to return favour 
koha taunaha   designated gift 
kohi   collect, collection 
kōkuhu   to give secretly, without publicity 
kōpaki   envelope 
kōwaetanga   division, separation, distinction 

M – P 

M

makamaka   toss or throw about 
manuwhiri, manuhiri, manutau   visitors 
matatunga whawhai   weapons of war 
mihingare   missionary, Anglican 
moni tuku   grants 

N

niho   effective, force 
noatu, noa atu   long ago 

O

ōhākī   promise (still to be realised) 

P

paepae   container, threshold where tangata whenua sit to welcome guests 
pakeke   of age, elder 
parāoa   whalebone weapon 
pare whakairo   carved lintel 
pēnā mehemea   if 
pōnānā   in a hurry, flurried 
poukai   feast in support of the poor, the needy, and the widowed 
pupū   bring forth, spring up 

R – WH 

R

rapa   to look for, search 
rauaruhe   fern root 
Rongo   God of food 

T

tahua, pūtea   collection (of money) 
taku hā   my breath 
tautau   pendant for neck 
tāwhara   fruit of the kiekie 
Te Wiremu   H.W. Williams (dictionary) 
tōtō kai   collection or basket of food 
tuawhenua   mainland 
tuhi   point out, write 

U

ū   to fulfil, carry out 
Utu Tika   Write Price (shop) 

WH 

whakahere   sacrifice 
whakaputua   left in a heap 
whakatō   arrange, cause to happen 
whakatumeke   take to task