Te Wharekura 35

Taonga Māori

Nā Walton Walker rāua ko Miria Simpson ngā kōrero
Nā Karen Angus ngā whakaahua
Nā Miria Simson i whakamāori

He patapatai mō ngā mahi a Arapata, te Kaitiaki i ngā taonga a te iwi i Te Whare Taonga o Aotearoa i Te Whanganui a Tara. 

"Ko tōku kāinga tūturu kei Omāhu e whā maero nei pea ki waho o Heretaunga. Ko āku karangatanga iwi, ko Ngāti Kahungunu, ko Rongowhakaata. Ko āku hapū ko Ngati ūpokoiri, ko Ngāti Hinemanu." 

KAIPĀTAI: Tēnā, he aha o mahi i konei? 

ARAPATA: Ko taku tūranga i nāianei, e huaina ana he Pou Kaitiaki mō ngā taonga a te iwi. I te tīmatanga ko taku mahi he whakaemi i ngā kōrero e pā ana ki te iwi Māori, ki o tātou hītori. Ka pahemo ngā tau e toru, ka meatia mai kia whakaaro ahau ki te whakauru ki te rōpū whakakao i ngā Taonga Māori hei whakaata ki te ao. 

KAIPĀTAI: Tēnā, whakamāramahia mai te whakaataranga "Ngā Taonga Māori". 

ARAPATA: Me hoki nga mahara ki te haerenga o Te Māori ki Amerika. I te hokinga mai ki te kāinga i te tau 1986, ka īnoi mai Te Whare Pupuri Taonga o Poihākena kia tukuna atu Te Māori kia huri haere i Ahitereiria. Heoi, ko te whakatau a te komiti whakahaere i Te Māori, i te mea kua roa rawa e haere ana ērā taonga i te ao, me hoki noa mai ki te kāinga. Nā reira, ka tupu te whakaaro me whakakao ētahi atu o ā tātou taonga hei tuku, hei whakarite i te inoi a Ahitereiria. Me kī, hei whaimuri atu i Te Māori. 

KAIPĀTAI: Nā wai i tohu ngā taonga hei tuku?

ARAPATA: He maha tonu mātou, ētahi ko Māui Pōmare, ko Hirini Mead, ko Bill Cooper, ko ngā hunga wānanga i ngā āhuatanga e pā ana ki ngā iwi Māori ake o ngā whenua kē, me to rātou whanaungatanga ki ētahi atu iwi. E rua rau, tekau ma tahi ngā taonga i tohungia. Nunui atu ētahi i ngā mea o Te Māori. Ka oti te whakarite, ka riro māku hei whakaemi katoa ngā kōrero mō aua taonga, me ngā iwi nā rātou. 

Ka haere mātou ki te īnoi ki aua iwi kia tukuna ngā taonga hei mātakitaki mā ngā iwi o Ahitereiria. Kore rawa i aro i a au, ka taiāwhio taku haere i te motu ki ngā Poari o Tūwharetoa, o Te Arawa, ki Te Rūnanga o Ngāti Kahungunu, ki a Rangitāne, ki a wai ake! Ā, i haere rawa hoki mātou ki te whakamārama i te kaupapa o "Ngā Taonga Māori". 

I āwangawanga tonu ētahi o ngā iwi. Ki a rātou nei, kāore kē ngā Whare Taonga i aro atu ki a rātou i ngā tau ka pahure. Tētahi, he hao ērā whare ki ngā taonga, nō reira hei aha mā rātou i aro mai ai ki ēnei tono? Kāti, i te mea kua whaiwhakaaro rawa rātou i tēnei wā ki te kawe mai i te take ki te iwi, tērā pea kua mōhio ake ratou i nāianei! Nō reira, he pai tonu pea kia tukuna ngā taonga. Tekau mā waru ngā marama i whiriwhiria ai te take nei, ā, ka whakaaengia. 

KAIPĀTAI:  He aha te pūtake ake o tēnei whakaataranga?

ARAPATA:  He whakaatu ki te ao, haere tonu ai ngā Māori i te taha o ā rātou taonga. Kāore e haere mokemoke ana ko te taonga anake. Engari ia, ka haere te taonga me tana iwi anō hei awhi. Nā reira, i whakatauria ai me haere mārika he Māori ki ngā takiwā e whakaataria ana ngā taonga. Mā te iwi anō e tuku, ā, mā rātou anō e hiki te kaupapa. He mahi nui rawa atu te whakatakoto tikanga me te tohe ki ngā kaiwhakahaere o Te Whare Taonga o Ahitereiria i Poihākena, ā, ka tau. Tekau mā ono ngā kaumātua hei reo, hei kanohi mō ngā iwi huri noa te motu. Me haere he rōpū ki ia takiwā, ki te tuku i ngā taonga. 

KAIPĀTAI:  Ā, na wai i tohu ngā kaumātua? 

ARAPATA:  I tukuna atu te kupu ki ngā rūnanga a iwi, "Mā koutou anō e whiriwhiri ō koutou kaumātua hei haere i tēnei haere. Ko tā koutou i whakatau ai, koia nā.” 

Ki te whakaataranga i Poihākena, nō Te Taitokerau, nō Tainui, nō Whanganui, nō Horowhenua, nō Te Whanganui a Tara nga kaumātua i taki haere. 

Ka nuku ki Melbourne, ka haere ko ngā kaumātua o Ngāti Porou, o Te Aitanga a Hauiti, o Tūranganui a Kiwa, o Ngāti Kahungunu mai i Te Wairoa ki Wairarapa, me Ngāi Tahu o Te Wai Pounamu. 

I ahu mai i a Te Arawa, i a Tūwharetoa, i a Ngāti Awa, i a Tūhoe, i a Te Whānau a Apanui, i a Te Whakatōhea, i a Ngāi Tai me Ngāi Te Rangi ngā kaumātua i haere ki Brisbane. Āpiti atu hoki ko ngā hunga i haere ki te tautoko i te kaupapa, nā rātou anō rātou i kawe. 

KAIPĀTAI: Ko te rongo kōrero i nohotahi koutou ko te Tangata Whenua o Ahitereiria. ki te whakarite i ngā āhuatanga o te mahi nei?

ARAPATA:  Āe. I mua anō o te maunutanga atu o ngā taonga, ka haere a tinana mai tō rātou tira ki te kawe mai i tā rātou pōwhiri ki te iwi Māori kia mauria atu ngā taonga ki to rātou whenua. 

I te whakatuwheratanga i tēnā Whare Taonga, i tēnā Whare Taonga, i a rātou anō te wāhi tuatahi, ki ō rātou nei tikanga. Me pērā anō rā hoki. Nā wai i kī kia haere noa atu tātou ki te whakaara i ā tātou taonga i tō rātou whenua? Kia takatakahia e tātou ō rātou nei mana? 

Nā te mema o Te Kaunihera o te Tangata Whenua o New South Wales, nā Tiger Bayles i tuku mai a rātou mihi, ā rātou whakanui ki te ope o Aotearoa. Me te kī mai hoki ko te tukunga tuatahi tēnei ki ā rātou o nga whakahaere. Hanga aroha rawa atu, titi ana ki te whatumanawa. Ko te mea nui, nō konei ka puta ngā pōuri o taua iwi, me ngā pēhitanga i a rātou. Kātahi rawa anō ka āta kitea atu rātou, ngā Tāngata Whenua o Ahitereiria. 

KAIPĀTAI: Nā, pēhea te āhua o ngā taonga nei ki ngā iwi mātakitaki? 

ARAPATA:  Nā ngā taonga nei i whakakotahi ngā Māori o Poihākena, o Melbourne me Brisbane. I whakaritea atu i konei me ako ngā Māori o ērā takiwā ki ngā kōrero mō ngā taonga, ki ngā tikanga Māori, ka waiho mā rātou e ārahi ngā hunga mātakitaki. Ko ngā pakeke i haere atu i konei. Ko ā rātou tamariki, mokopuna i whānau ki reira. Ahakoa kāore te nuinga o ngā Māori i mene mai, ko ngā mea i tū mai hei kaiārahi, tū tangata ana, tū whakahīhī ana i te koa ki tō rātou waimarie ki te tiaki i ngā taonga. He tānga manawa, he whakaohonga wairua, he taunga nō te mauri. 

Ko Te Kāwana Tianara, ko Tā Pāora Reeves rāua ko tōna hoa rangatira i haere atu i konei ki te whakatuwheratanga i Poihākena. Nā te Minita mō ngā Take Māori, nā Koro Wetere rātou ko āna āpiha o Te Manatū Māori me Te Tira Ahu Iwi i whakatuwhera i Brisbane. I te katinga, ka hoki anō Te Manatū Māori me Te Tira Ahu Iwi ki te hiki i ngā taonga. 

KAIPĀTAI: I pēheatia ngā taonga i muri mai? 

ARAPATA:  I whakahokia mai ki Te Whare Taonga o Aotearoa i Te Whanganui a Tara nei hei mātakitaki mā te katoa, ā, pau noa tēnei tau, 1991. Ko wai ka hua? Tērā e mauria ki ētahi whenua anō, ā, ka waiho rānei kia tū tonu hei whakaata mō ngā tau maha noa atu. 

KAIPĀTAI: He aha te hua o tēnei whakaataranga ki ngā tamariki? 

ARAPATA:  I taku haerenga tuatahi mai ki konei mahi ai, ka rongo au i tētahi tamaiti itiiti nei e pātai ana, "Nō nāwhea ngā Māori i matemate ai?" Ka whakaaro au, he aha rā i puta ai tērā pātai? Nātemea pea nō tauiwi kē ia? He kore rānei e tōtika ana te whakaata i ā tātou taonga? He kore rānei no tātou, nō te tangata whenua, e whai wāhi ana ki ngā whakaataranga, ki ngā whakahaere? Ki a au nei, nui atu ngā hua kei ngā whare taonga e putu ana hei painga mō ngā tamariki katoa. Hei ako i ā rātou, hei whakawhānui atu i ō rātou hinengaro. Kia kite ai rātou i ngā taonga whakahirahira a ō tātou tīpuna, ki ngā āhuatanga o mua, ā, tae noa mai ki tēnei rā. Kei konei ngā taonga hei mātakitaki, hei mīharotanga ma te katoa. 

Nā, mō tauiwi, mehemea tātou ngā uri o ngā tipuna Māori e uru ana ki ngā whakahaere, ka kitea mai ngā kākano i mia mai i Rangiātea, kāore anō kē kia ngaro! Ka maumahara tonu hoki te tamariki ki ngā taonga i kite ai rātou. 

KAIPĀTAI: Ka pēhea ngā Māori e haere mai ana ki te mātakitaki? 

ARAPATA: I mua, i wehi ngā Māori ki te tomo ki ēnei momo whare – he mātaotao! Nā, i te mea kua mahea ake ngā whakahaere, kua mahana ake, kua ngāwari ake hoki tō rātou tomo mai. Kua mōhio iho, āe mārika, nōku tēnei ao, e whai wāhi ana ahau ki konei. Ka koa rawa atu au ka haere mai ana ngā tamariki Māori ki konei kia kite, kia mōhio ai rātou ki ngā taonga o mua, hei hoa haere mō rātou i tō rātou nei ao. Pērā anō ki ngā tamariki a ngā iwi kē, kia kite, kia mōhio anō ai hoki rātou ki ngā taonga o tō rātou whenua tupu, o tō rātou kāinga hou, rānei. 

KAIPĀTAI: He whakairo tawhito noa hoki pea "Ngā Taonga Māori" nei? 

ARAPATA: A kāo. Nō ēnei wā anō ētahi o ngā taonga. E kōrerohia tonu ana ngā tāngata i te taha o ā rātou taonga mai o mua ki nāianei. He wāhanga anō e whakaata ana i ngā mahi a ngā wāhine, arā, te whatu, te raranga. Kia mārama ai ki te katoa kei te ora tonu, kei te mahia tonu ngā mahi whakairo, whakapaipai katoa. 

KAIPĀTAI: Me pēhea e taea ai te whai o ngā mahi a te Pou Kaitiaki, pēnā i a koe nā? 

ARAPATA: I haere rawa ahau ki te Whare Wānanga, ka pōtaetia au mō aku whakamātautau mō te reo Māori, me aku wānangatanga i te āhua o te noho a ngā tāngata Māori o ētahi whenua kē atu. Heoi, kei konei anō e akona ana ētahi ki te tiaki i ngā taonga Māori. Ko te mea nui kia pakari, kia māia te tū, kia ngākaunui ki ngā tikanga a te iwi, kia manawanui, kia ū te kawe i aua āhuatanga. Nā, kia mōhio mai koe, ka kōrero ana ahau mō āku mahi i te Whare Taonga, kua wehi aku whanaunga. Ki a rātou, he tapu ngā taonga a ngā tīpuna, na reira kāore rātou e hiahia ki te whāwhā atu. E tika ana. He tapu ēnei taonga, engari ehara i te tapu rawa nei kia kauaka e pā atu to ringa. Ko tāku e whai ana, ko te tūpato o te whāwhā, me te whakaaro pai ki te atawhai i ngā taonga. Ka pai te whāwhā atu, ka ngāwari mai hoki ngā wairua o ngā tīpuna. Kei ngā whakaaro kē o te tangata te whakataputapu e pā mai ai te aituā. 

He kōrero tāpiri  

E noho ana ngā tuhinga me ngā whakaahua nō Ngā Taonga Māori ki Te Papa Tongarewa ināianei. 

A te wiriwiri

Nā Peti Nohotima
Nā Miranda Witford ngā pikitia

Kei te maumahara tonu au i taku eke tuatahitanga i a Te Wiriwiri. Ko te hōiho hoki tēnei o Hare. He tino hoa a Hare rāua ko taku tungāne ko Te Kauru. Tekau mā tahi tau taku pakeke i taua wā. 

Ki au, he mea tino mīharo tēnei, nātemea e mate kanehe ana au ki a Hare. Ahakoa, kāre a Hare e aro mai ki au. Hei aha atu hoki. Ki ōku whakaaro, nātemea nōna tēnei hōiho a Te Wiriwiri, mā te aha i tēnei. 

"E piki e Rui," te kī mai a taku tungāne.  

"Kāre koe e ngaua e Te Wiriwiri." Eke atu ana au ki runga i a Te Wiriwiri kua tīmata tonu te hōiho nei ki te wiwiri.  

"Kei te pai e Rui, kaua e mataku. Heoi anō tāu mahi, he ketekete atu, ka kōrero atu. Kia mau tonu te pupuri i ngā reina, engari, ahakoa pēhea, kaua rawa e kikia e koe," te ki mai a Te Kauru. 

Ehara, kua tauna haere ahau ki te eke i a Te Wiriwiri. Nāwai, nāwai, e, kua toitoi tōku hōiho. Harakoa ana au i taku mōhio kei te mātaki mai a Hare. Uru mai ana tētahi whakaaro whakaparana ki au. Wareware katoa ngā tohutohu mai a Te Kauru ki au. Papaki ana ōku waewae i a Te Wiriwiri. 

"Auē e hika e!" Tata tonu au ka taka i te ohorere o te tū o tōku hōiho. Mahue te haere whakamua ka hoki whakamuri haere kē. I konā au kipakipa ai mā ōku waewae, ka tere kē atu te haere whakamuri a Te Wiriwiri. 

"Kaua e kipakipatia," te tīwaha mai a Hare. Ko taku tungāne kei reira kē e pakaru mai ana te kata, me te papaki i tōna waewae. Whakamā katoa ahau i te mahi a Te Wiriwiri. 

Wōū e Wi! Kāti! E tū!" te kī mai a Hare. Mau tonu te tū o Te Wiriwiri. Nō taku hekenga mai i te hōiho nanakia nei, ka kī mai taku tungāne. 

"He pēnā tonu ngā hōiho o te whānau nei. Me āta ako anō e rātou kia mahi hanariki o rātou hoiho. Ētahi o ō rātou hōiho ka paoa ana ki te rākau, kua noho. Ētahi ka kipainga ana, kua hoki whakamuri," me te kata anō a taku tungāne. 

Ka titiro atu au ki a Te Wiriwiri pēnei tonu i te mea nei kei te kata hoki tēnā hoiho nanakia. Otirā, nātemea nō Hare tēnei hōiho ka whakaaro ahau ahakoa pēhea, ka whakaratarata atu au ki te hōiho o taku manawa. 

I taua wā, kua tae mai ō mātou uri mai i Pamutana, ki tō mātou kāinga i Ruatoki mō ngā hararei o te Akuhata. Ko taku kōkā ko Kōhine me āna tamariki, ko Mātiria, ko Te Kapua me Raiha. E rua tau te pakeke ake o Mātiria i au. He rite tonu ō māua pakeke ko Te Kapua. Ko Raiha te pekepoho o te whānau. I reira tonu ahau e mirimiri ana i a Te Wiriwiri, ka kite atu au i ōku karanga tuatahi e hīkoi mai ana. 

"Haramai ki konei, kia tūtaki kōrua ki taku tino hoa," te kī atu a Te Kauru.  

"E hoa, e Hare, anei ō mātou uri mai Pamutana. Ko taku tuahine tēnei ko Mātiria me taku taina ko Te Kapua. Ko Hare tēnei." 

"Tēnā kōrua," te mihi atu a Hare. 

"Hi," te whakautu a Mātiria. Ko Te Kapua kāre i kōrero, ko te hiki noa iho o ōna tukemata. Maumau ana i au a Hare e kōiraira ana ki a Mātiria. Ka tipu te hae i roto i tōku puku. 

"Hi Rui,"  te kī mai a Mātiria ki au. "What's wrong? Don't you know how to ride that nag?"

"He mōhio tonu au ki te eke i a Te Wiriwiri," taku whakahoki me taku pukuriri anō. Nāwai ia i kī kia whakaparahako ki a Te Wiriwiri. Tūtū ana ngā taringa o Te Wiriwiri. 

"Here, I'll show you how to ride," te kīmai a Mātiria.  

"Mati, I don't think you should," te kī atu a Te Kapua ki tōna tuahine. 

"You know what Mum said."

"Oh don't worry. This is just a farm-horse and you know I've ridden better-looking horses than this."

Aroha atu ana au ki a Hare. Pōuri mai ana te āhua o Hare i ēnei kōrero. 

"Kai te pai e hoa," te kī atu a Te Kauru ki a Te Kapua. "Waiho tō tuahine kia eke i a Te Wiriwiri. He pono tana kōrero. He hōiho pāmu noa iho a Te Wiriwiri." 

Kei runga a Mātiria i a Te Wiriwiri. Ka tau kē hoki. 

Torotika tonu atu te noho a Mātiria. Nāna tana mahi. Pai ana hoki te tarahati haere o Te Wiriwiri engari, kei te tūtūtonu ōna taringa. 

"Give me a stick Kapu, I want to see how fast he can go,"  te kī atu a Mātiria ki tana tungāne. 

"Better not sis, you don't know this horse."

"Anei e Mati," te kī atu a taku tungāne, a Te Kauru.  

"Kia kaha tonu te kiki. He māngere hōnia te hōiho nei." 

Tata tonu au ki te huaki i taku waha ki te whakatūpato atu ī a Mātiria, ka keko mai taku tungāne me Hare. Auē! Mōhio ana ahau he raruraru kei te haere. Kua uru te whakaaro hanariki ki ngā tokorua nei. 

Kātahi a Mātiria ka ketekete me te kiki i a Te Wiriwiri. Ana nā! Hoki whakamuri kē ana a Te Wiriwiri. I te kaha ohorere o Mātiria, tata tonu ka whiua. 

"Kikia! Kia kaha te kiki," te whakahau atu a Te Kauru. 

Pakepakē ana ngā waewae o Mātiria ki a Te Wiriwiri. Hukehuke ana te hoki whakamuri a Te Wiriwiri. Kua kore e taea e māua ko taku uri. Pakepakē ana tā māua kata me tā māua awhi anō i a māua. Kei reira anō hoki a Hare e kata ana engari paku noa iho tana kata. Putē tonu ngā karu o Mātiria i tōna kore mōhio me pēhea e ia a Te Wiriwiri. I taku mōhio, kātahi anō ia ka eke i tētahi hōiho pērā. Ka oma atu taku tungāne ki te whakatū i a Te Wiriwiri. 

"E tū! Wōū! E tū!" 

No te hekenga mai o Mātiria, kua tata kē te auē. Rahua katoa a Mātiria. 

"Stupid horse!" te whiu atu a Mātiria ki a Te Wiriwiri. Engari ki au, koinei te tino hōiho i te ao. 

Te whānau Mārama o Matariki

He kōrero nō Tūhoe
Nā Kaa Williams i tuhi
Nā Donna McKenna te pikitia

Tērā tētahi whānau mārama e noho mai ana i te uma o Ranginui. I heke mai tēnei whānau i a Tangotango rāua ko Wainui. Ko ngā whetū o Matariki tēnei whānau. 

Tokowhitu ēnei whetū, he uwha katoa. I runga i tēnei āhua, kāore i tau i a Tangotango he mahi tōtika mā rātau. 

Ia pō, whewheo ana te rere ki ngā kokona katoa o te rangi, ki reira tauhunahuna ai i waenganui i ngā whetū maha o Te Māngōroa. 

Ka tukia atu a Kōpū. Ka kukume i te whiore o Whānui. Ka whakapōrearea i a Tawera rāua ko Rerekura. Ka tārere i runga i a Autahi. Tino kino te pōrearea o te tokowhitu nei. 

Ka amuamu, ka kohete atu ngā whetū i tukinohia e ngā nanakia nei. Kore kore ana ngā tokowhitu e aro atu. 

Ka tae te rongo o ngā mahi hanariki a ngā whetū nei ki a Tangotango. Ka whakaaro ia, kua tae ki te wā hai whakatau tikanga ki runga i te tokowhitu nei, me tana mōhio anō, me whaimana tonu ēnei tikanga. I te kore, ka korara tonu, ka takatū tonu te Whānau o Matariki. 

Nō reira, ko te mana tuatahi i tau ki runga i a rātau, ko te ture "Matahi i te Maramataka". Ko te wā o Piripi, ka noho pū, ka noho kotahi rātau. I runga i tēnei āhua, ka mahana te ao, ka piri te noho tētahi ki tētahi. 

I tua atu, ka whakatauhia te mana mō te "Kati i te Maramataka". Ko te wā tēnei o Haratua. Ko te wā ka whakangā te ao me te whenua. 

Ko te mana tuarua i tau ki runga i te Whānau o Matariki ko tērā e pā ana ki te tūnga kaitiaki, kaiāwhina i te tangata ki te taha whakatō kai. Ka puta mai i te whānau te "Paki o Matariki". Ko ngā hau marino ēnei hai awhi i te tipu o ngā kai i runga i te whenua. 

Tua atu i ēnei ka puta mai ko ngā "Tātai a Matariki", hai awhi i ngā kai e pihipihi ake ana. Ka kaha te maringi o ngā wai o "Te Matariki Tāpuapua", hai whakamākūkū, hai waiwai i ngā kākano, i ngā tiputipu, kia makuru te kai. 

Ko "Matariki Huna Nui", te tohu āwhina ki te taha wairua. Ko te wā o Mahuru tēnei, te wā ka ū te wairua hiahia ki te whakatō kai ki roto i te hinengaro o te tangata. 

I te taunga o ēnei ture ki runga i Te Whānau o Matariki, ka tau tā rātau noho. Ka kore hoki e marara haere i te rangi. 

Ka titiro atu te tangata ki a rātau e noho pātata ana, noho kākano ana, e pīataata ana te pīrakorako mai, ka mōhio rātau, he wā huamata kei te haere. He wā mōmona te kai. 

I te noho huaki, i te pūkohukohu mai te āhua, he pūhore te āhua o te tipu me te hua o te kai. 

Nā ēnei ture, nā ēnei tikanga, ka pūtahi te noho a te tokowhitu nei. Ka mihi nui atu te tangata ki a rātau. 

Anei tētahi waiata whakamihi atu, whakahōnore atu a te tangata ki Te Whānau o Matariki. 
Ka tahi ti 
Ka rua ti 
Ka haramai te Patitore 
Ka rauna 
Ka rauna 
Ka noho te Kiwi Kiwi 
He Pō 
He Wai 
Takitaki nō Pīnopā 
Ka huia mai 
Kai ana te Whetū 
Kai ana te Mārama 
Ko te Tio e rere rā 
Runga pekapeka 
Kotore wīwī wāwā 
Te Manu ki o tau 
Tihē Mauri Ora! 

E Koro

Nā Cassidy Tangaere i whakamāori ngā tuhi pākehā a Rosa Tamepo
Nā Caroline Campbell ngā pikitia

E noho mai ana a Koro i mua i te wharenui. Kua kaumātuatia a ia, ā, ko tōna kanohi kurehe e kitea atu ana i raro i ōna makawe mā. Ko ōna whatu, kua kore nei e kaha te kite, e titiro atu ana ki a Hikurangi Maunga, te maunga tuatahi ki te hopu i ngā hihi o te rā, ā, ko te karere kōrero atu ki tana iwi, kua tīmata te rā hou. Te Kaitiaki o tana iwi, tō rātou maunga, he rite ki tō rātou awa ki a Waiapu, e rere marino, e rere waipuke nei, i waenga i ngā maunga kākāriki o Ngāti Porou. 

Mai rānō ēnei tokotoru i kōnei, te maunga, te awa, me te iwi. He tika, haere ai ngā tāngata i ētahi wā, heoi anō, hoki tonu mai ai rātou. Ka matemate ngā kaumātua, ka whānau ake ngā uri hou, he āhuatanga nō mai rānō. E ora tonu nei a Ngāti Porou, e kaha nei, e maia nei, e noho tonu nei i raro i te maru o Hikurangi. 

E āta noho tonu ana a Koro, ko ōna ringaringa e takoto ana i runga i ōna pona kua hauātia nei. Kua tīmata te kaumātuatanga ki te ngau i tōna tinana. Waru tekau ngā raumati kua taha ināianei, ā, kua mimiti te kaha o roto i tōna puku. 

Kua kore e taea e ia te tū ki te whaikōrero i runga i te marae mehemea kāore i a ia tana tokotoko. I ētahi wa ka whakaaro ia kei te koa nga rangatahi kua kore e taea e ia te tū, ā, ka whaikōrero mō neke atu i te haora, pērā i ngā wā o mua rā. Kāore e whakahoki anō ana i āna kōrero, kāore e titiro ana ki te pepa pēnei i te Pākehā, ahakoa e rima miniti noa iho te roa o ana kōrero. I ētahi wā anō, ka whakaaro anō ia, he koroua kore kiko noa iho nei a ia ki ngā rangatahi, he pēnei i te peka rākau e tere nei i runga i ngā tai o te ao, ā, e tika kē ana me ngaro atu i te ao tūroa. 

Heoi anō, i ētahi wā, ka hiahia mai rātou ki a ia, pēnei i tēnei rā, ā, me ngā rā ruarua e tū mai nei i mua i a rātou. Ko ia tō rātou reo, tō rātou kaumatua. Ko tōna te reo matua hei pōwhiri i ngā manuhiri ki runga i te marae, ko rātou e haere mai ana ki te whakahōnore, ā, ki te poroporoaki ki tōna hoa ki a Tipene. 

He maha ngā manuhiri ka haere mai, he Māori, he Pākehā. Ko ngā Māori kua waia kē ki te kite i te tinana o te tūpāpaku. Ko tauiwi, e tū noa iho ana, kāore e mōhio ana me titiro ki hea, e tauhou ana ki te whakarongo ki nga kaikōrero hāngai atu ana ki te tūpāpaku. E kore mōhio ana ki te kaupapa o ngā whakaahua e tū mai ana i mua i te kāwhena, i waenga i ngā putiputi, te hoa wahine kua roa noa atu te matenga, ngā tamariki kua mate, ā, me nga kui e noho ana rānei kei roto i ō rātou kākahu pango o neherā, metemea nei e rongo tonutia atu ana te kakara o ā rātou tupeka me ā rātou rongoā patu pūrerehua. 

Ki tā te Pākehā, kāore e tika ana ngā whakahaere a te Māori e pā ana ki te tūpāpaku, ā, ko te moe a te Māori i te taha o te tūpāpaku, tētahi mahi kūare rawa atu. 

Ka kata puku a koro. E mōhio ana ia ki ngā whakaaro o ngā Pākehā. Heoi anō, e mīharo ana ia ki a rātou i haere mai nei. I mōhio tonu hoki ia ka haere mai rātou ki te tangi ki tōna hoa kua mate nei. Ka titiro iho a Koro ki te tinana o tōna hoa a Tipene ka whakaaro, ehara te mate i te mea ataahua, he rite tonu koe ki ngā tūpāpaku o Īhipa o neherā, kua whakamaroketia, ā, kua rāpakitia nei. 

Kua nohonoho ngā kuia ki ia taha o te kāwhena e noho tuwhera tonu nei, e mirimiri ana i te kanohi, e whakapai ana i te pera e takoto nei te upoko o te tūpāpaku i runga. Ka titiro atu a Koro ki a rātou, me te mīharo anō ki a rātou e mau tonu nei ki a rātou tikanga. Ka pai anō te mate a te Māori, kāore e pēnei i tā te Pākehā e takoto nei i roto i ō rātou whare mātaotao, e karangatia nei e rātou he whare o Te Ariki. 

He nui ngā roimata ka ruia, he nui anō hoki te rongona o te katakata. Ko tēnei tā te Māori tū āhua. E kore tōna hoa e noho mokemoke, mai i tōna matenga, ā, tae rawa atu ki tōna nehunga, he wā tapu tēnei ki te Māori. 

"He aha he kōrero māku mōu, e taku hoa?" Tērā ngā rangatahi e kore e āta noho mehemea ka roa rawa au e kōrero ana. Heoi anō, ka whakarongo rātou. 

Ka whakarongo ano hoki āna tama e titiro ana, e ako ana, i runga i te mōhio kia mate ia, ka noho ko rātou hei mau i tana tūranga, me te mōhio anō e kore rātou e rite ki a ia. 

"Tipene, e taku hoa, te nui o ngā mahara mō ngā rā kua taha. Te nui o ngā kata i kataina e tāua, āe, me ngā roimata hoki i ruia. Engari, me tīmata mai ahau i hea? I tīmata mai tēnei hoahoatanga, me tēnei mōhio o tāua, tētahi ki tētahi, i hea? Ā, kei hea tōna mutunga? Ko tōna mutunga tēnei i roto i te mate? Tērā pea mō tētahi wā poto nei. Ākuanei hoki ko ahau ka takahi atu i te ara roa ki Hawaiki." 

Ka heke mai te kuia ki te taha o Koro tū ai, ka rewa tana karanga, 

"Haere mai, haere mai, haere mai, 
Mauria mai ngā roimata 
Ki tēnei tōtara 
Kua hinga i waenganui i a mātou 
Haere mai, haere mai, haere mai." 

Ka titiro atu ia ki te tuatahi o ngā manuhiri e whakaeke mai ana, e āta haere mai ana ki te wharenui, ki te tinana o Tipene. Ka tū ake ia ki runga, ā, ka tatari. Kua tīmata te tangihanga. 

Ko te rā tuarua tēnei. Ātaahua te tū mai o te marae i te pūtake o ngā maunga. Mehemea ka tū ia ki runga ka kite atu a Koro i ngā ngaru o te Moananui a Kiwa e whati ngāwari mai ana i te one. Te Moananui a Kiwa, te moana a te tangata rongonui nei, a Kiwa. 

"Kua e hia kē nei ngā wā kua haere tāua Tipene, ki te hī i runga i tēnei moana, o ngā moana katoa? Ki te ruku kina, ruku kuku, ki te haere noa iho rānei kia pūrea e ngā hau o te moana?" 

Kāore a Koro i tū. Kua tino matatau kē hoki ia ki te one me te moana. Heoi anō ko tāna, he whakarongo, ā, ka mōhio ia he pēhea te āhua o te moana. I tēnei rā e āta tau ana te moana. He tohu pai tēnei, ka noho tonu a Tipene ki te mahau o te whare takoto ai. 

Kāore te ngēngētanga i te pā mai ki a Koro. Ko ngā rangatahi hoki e haere mai ana ki te mau i a ia ki te kai. Ko āna tama i haere mai ki te whakahoki i a ia ki te kāinga ki te whakangā. I mōhio tonu rātou kāore ia e whakaae, engari e hari ana a Koro ki tō rātou aroha. 

Ka āta tomo atu ia ki roto i te wharenui e noho tahanga ana ināianei. Ko ngā moenga anake e noho rārangi ana mō ngā tāngata ka noho a taua pō. Ka āta huri haere ia. Ka tū i ētahi wā ki te titiro ki ngā tauira o ngā tukutuku. Ko ngā ringaringa na rātou nei i hanga ēnei, kua mate katoa. He tino tahito te whare nei. He tahito tonu i te wā taitamariki ana rāua ko Tipene. 

Ka titiro ia ki ngā whakaahua e iri ana i runga i ngā pakitara. Ko ngā kanohi o te ao tahito e titiro mai ana. Ko ō rātou tinana i roto i ngā kākahu o te Pākehā o taua wā. "Te pōhēhē o ō tātou āhua i roto i ngā kākahu o tauiwi, Tipene. He ātaahua kē atu tātou i roto i ō tātou korowai, i o tātou kahu huia, me ā tātou pounamu e tāhaetia nei e tauiwi, mai i ō tātou urupā tahito." 

I konei anō hoki ngā kanohi o ngā tama o Ngāti Porou i mate i roto i ngā pakanga e rua o te ao. I haere rāua ko Tipene ki te pakanga i roto i Te Rōpū Māori Rua Tekau Mā Waru a Tūmatauenga. Ā, i waimarie i haere ngātahi rāua ki Airana ki te whakatā. He aha rāua i haere ai ki Airana? Kāore tonu rāua i mōhio. I kaha hoki tā rāua kata ki ngā tamariki o Airana katahi anō nei rātou ka kite i te tangata kiri parauri. Ahakoa haere rāua ki hea, ko ngā tamariki nei kei muri i a rāua e whai haere ana. Nā tā rāua hakatanga, kātahi anō ngā tamariki nei ka marara. 

I roa a Koro e tū ana i mua i te whakaahua o Apirana Ngata, te tama tino rongonui a Ngāti Porou. E mōhio ngātahi ana rāua ko Tipene ki a Apirana, ā, he nui hoki ō rāua aroha mōna. He maha ngā haora i noho ai rāua, kāore i roto i tēnei wharenui anake, engari, i roto i ngā wharenui puta noa i te rohe o Ngāti Porou, ki te whakarongo, ki te mātakitaki, ki te ako hoki, mai i tēnei tohunga, tētahi o ngā kaikōrero rongonui o te ao Māori. 

Ka noho iho a Koro ki runga i tētahi o ngā moenga. Kāore he wehi o tēnei wharenui ki a ia. He mea kaingākau ki a ia ngā tukutuku, ngā kōwhaiwhai, me ngā whakairo. He mōhio katoa ia ki ngā kōrero mō ngā tīpuna e whakairo nei, e whakamataku nei i ngā Pākehā. Nōna ēnei. Tētahi wāhi o tōna ao e kore e riro i te Pākehā, e kore hoki rātou e mōhio hōhonu. 

Kua rongo anō ia i ngā karanga a ngā kuia, ā, ka āta tū ake ia ki runga, ā, ka puta atu ki waho ki te tatari. Ko te rā tuatoru tēnei. Ākuanei ka katia te taupoki o te kāwhena, ka whakahaeretia te karakia, ā, ka whakatakotoria a Tipene ki tana moe mutunga kore. 

Kua tae mai te minita. Kua mihi ki a Koro, kua hongi, ā, ka haere ki te mihi ki ngā wāhine, ki te titiro hoki mehemea kua reri katoa ngā mea e tika ana. 

Kua tau mai te ngenge ki a Koro. Te tino ngenge. E māuiui ana te katoa o tōna tinana. Heoi anō, ka noho tonu ia i runga i te nohanga pāpaku i te taha o te wharenui. He huri noa iho tāna i tōna mahuna, ka kite atu ia i a Tipene, engari i tēnei wā, kua uaua tēnei. Ka hoki whakamuri ōna whakaaro ki ngā rā kua taha ake nei. Te maha o ngā manuhiri i haere mai. Te maha o ngā wā i tū ia ki te whaikōrero me te whakaaro anō, tērā e kore e taea e ōna waewae te hāpai tōna tinana kua kaumātuatia nei. E ānini ana tōna māhuna i te turituri, heoi anō, i pai katoa ngā whakahaere. I whāngaitia ngā mānuhiri Te nui o ngā kai i haria mai, ā, na tana iwi i ruku ngā kina me ngā kuku. 

"Tērā koe e harikoa ki tēnei poroporoaki, Tipene." 

I haere mai anō āna tamariki ki te whakahoki i a ia ki te kāinga, kua kite hoki rātou i te māuiui i runga i tōna kanohi. Engari he pai kē atu ki a ia te takoto i runga i tōna moenga, whakarongo ai ki te hā o te moana, me ngā kōrerorero a ngā tāngata e takoto ana i runga i ō rātou moenga. 

E whakaeke mai ana ngā manuhiri whakamutunga. Ko rātou ngā manuhiri whakamutunga i mua i te tīmatatanga o te karakia. Pērā i mua atu rā, ko Koro hei kaikōrero whakamutunga, ā, ko tēnei tana poroporoaki whakamutunga ki tōna hoa. 

Ka āta noho ia, ka tatari, ā, ka tae mai ki te wā mō āna kōrero. Ahakoa tana māuiui, ka āta tū ia ki runga, ā, ka tīmata ki te kōrero. Ka whakarewa ake ia i tana tokotoko whakairo mō te wā whakamutunga, ā, ko tōna reo kua hōhonu haere i a ia e kōrero ana. Ahakoa te kaumātua o tōna tinana e tū nei i runga i te marae, ko āna kupu e puta hāngai mai ana, e puta pakari mai ana. 

Ka kōrero ia mō Tipene, i te wā i a ia e taitamariki ana, ā, i roto hoki i tōna pakeketanga. Ka whakahekea iho mai e ia te whakapapa o Tipene, pērā tonu i roto i āna kōrero i roto i ngā rā e toru kua taha ake nei. Ka whakaaturia mai e ia ngā honohononga o Tipene ki ngā manuhiri. Kore rawa tōna reo i whati. Ka kōrero ia mō tōna aroha mō Tipene, ā, mō tō rāua piri pono hoki. Ka titiro atu ia ki te rangatahi, me te kōrero atu, " Kia pai tā koutou tiaki i ō koutou kaumātua." Ka whakamārama atu ia ki ngā Pākehā mō tēnei tikanga a te Māori, arā, te tiaki, te atawhai i ā rātou tūpāpaku, mai i te wā e mate ai, tae rawa atu ki te wā e tukua atu ai ki te kōpū o te whenua. 

Ko āna kōrero whakamutunga ko ngā kōrero mō te mate. " Ehara tēnei i te mutunga, engari, he tīmatanga. Mehemea te tangata e hiahia ana ki te haere i waenga i ngā whetū, me kimi kē atu rātou, i tua atu i ēnei, mehemea e hiahia ana rātou ki te tūtaki ki tō rātou Kaihanga." 

Kua mutu ngā kōrero a Koro, kua hoki mai anō te māuiui. Ka āta huri haere ia, kore rawa atu he ngaehe e rongona i runga i te marae. Ko ngā tāngata e wahangū ana, e titiro ana, e aroha ana ki a ia. E heke ana ngā roimata i ōna pāpāringa, kāore e ūkui ana, kāore hoki te Māori e whakamā ki te tangi. Ka titiro atu ngā tāngata ki a ia e tū ana kāore e oreore. Ka mōhio atu rātou ko tēnei tāna ake poroporoaki, nō reira, ka āta tatari rātou kia mutu rawa ia. 

"Haere i runga i te rangimārie e te tuakana. Haere e taku hoa moemoeā o taku taitamarikitanga. Haere e taku hoa piri pono. Haere ki ō tāua tipuna. Haere ki te huihuinga o te Kahurangi. Haere mā Te Reinga ki Hawaiki. Kua kōrerotia e au aku kōrero e taku hoa, e kore pea e ea. Haere, haere, haere." 

I tawhiti, e anga atu ana a Hikurangi ki te rangi, ā, ko ngā wai āta rere o Waiapu e rere atu ana i waenga i ngā maunga kākāriki o Ngāti Porou. 

A – K

A 

Ahitereiria   Australia 
Airana   Ireland 
Akuhata Here Turi Kōkā   August 
amuamu   grumble 
ana na!   well, well! 
anga   to face 
ao tūroa   the world of the living 
āpiha   officer 
āpiti atu   in addition 
aro atu   pay attention, attentive greatly 
atawhai   kind, friendly 
Autahi   Canopus 
āwangawanga   worry, concern 

 

H 

hae   jealous 
hakatanga   doing the haka 
hanariki   mischief, naughty 
hāngai   direct 
hao   grasp greedily 
Haratua   May 
hauātia   become crippled 
he aha te hua?   what good can be obtained 
hei aha atu hoki   well no matter 
Heretaunga   Hastings 
hihi   ray (of sun) 
hiki i ngā taonga   to close the exhibition 
hītori   history 
hoahoatanga   friendship 
honohononga   connections 
hua   fruit, fruitfulness 
huaki   open, uncover 
huamata   fruitful, good harvest 
hukehuke   fast 
hunga wānanga   scholars 

 

I 

i ngā āhuatanga   the ways, customs, etc 
ia pō   each night 
Īhipa   Egypt 
iwi māori ake   indigenous people 
iwi mātakitaki   viewers 

 

K 

kahu huia huia   feather cloak 
kaingākau   deep regard, value, prize 
kaiārahi   guide 
kāinga tūturu   original or permanent home 
kākano   seed, collective of seedlings 
kakara   aroma 
kanehe   fond, infatuation 
karanga tuatahi   first cousin, relations 
karangatanga iwi   tribal affiliation 
karere   messenger 
karu, kanohi,   whatu eye 
kata puku   smile secretly 
kataina   to laugh at 
katia   to close 
kaumātuatanga   state of reaching old age 
kaumātuatia   become old, aged 
kāwhena   coffin, casket 
keko, kemo   wink 
ketekete   clicking sound made with the tongue 
kikia   kick 
kipakipatia   to spur 
kiri parauri   brown skin 
ko wai ka hua?   who is to say?, who knows? 
kohete   quarrel, scold 
kōiraira   stare 
kōkā   aunt 
kokona, kokonga   corner 
Kōpū   Venus 
kōpū   belly, womb 
korara   scatter, disperse 
kore kiko   withered 
kore rawa i aro i a au   it never occured to me 
kua kore e taea e māua ko taku uri   we couldn't contain ourselves any longer 
kuare rawa atu   most ignorant 
kurehe   wrinkled 

M – P

M 

maero   mile 
mahau   porch 
mahea   free from obstruction 
mahi tōtika   suitable task 
Mahuru   September 
mai rānō   from time long since 
maia   brave, bold, courageous 
makuru   abound, multiply 
manawanui   stout hearted 
māngere hōnia   extremely lazy 
maramataka   calender year 
marara   scatter 
mārika   quite, deliberately 
maringi   spill, rain 
maru   shadow, shelter 
Mātahi   first month of the Maori year 
mātakitaki   look at, inspect, gaze upon 
mātaotao   cold 
Matariki Huna Nui   spiritual realm 
Matatiki   Pleiades (a cluster of seven stars) 
Matatiki Tāpuapua   rainy season 
matatau   knowledgeable 
matua   first, main 
mau tonu   prompt 
maumahara   remember 
maumau   waste (of time) 
maunutanga atu   the lift off, the departure 
mene   be assembled 
mīharotanga   admiration 
mimiti   dried up, disappeared 
minita   minister 
mirimiri   stroke, caress to soothe, pat, 
moe mutunga kore   sleep without end 
mōhio hohonu   deep knowledge 
mōmona   appetising, rich, fat 

  

N  

nāna tana mahi   she know's what she's doing 
nanakia   mischief, crafty 
nāwai   after awhile 
nāwai ia   who does she think she is 
nehunga   burial 
neke atu i te haora   more than an hour 
nohonga pāpaku   low chair 

  

NG  

ngaehe   murmur 
ngākaunui   empathy 
ngātahi   together 
ngau bite,   afflict 
ngawari   gentle, easy 
ngēngētanga   weariness 

 

O  

o ngā whenua kē   of other lands 
ohorere   suddenly 
Omāhu   Fernhill, Hawkes Bay 
one   beach 
oreore   shake, quiver 

  

P 

Pahemo, pahure   pass by 
pakanga   war 
pakari   stout-hearted, firm, solid 
pakeketanga   growing up, aging 
pakepakē   grate, spur, crackle 
Paki o Matariki   calm warm winds of Matariki 
pāmu   farm 
Pamutana   Palmerston North 
paoa   to be hit 
papaki   slap 
pāpāringa   cheek 
patapatai   to ask questions, interview 
patata   close, nearby 
pekepoho, pōtiki   last born 
pēhitanga   oppression, troubles 
pērā, urungā   pillow 
pīataata   shining 
pihipihi   sprout, begin to grow 
Pipiri   June 
pīrakorako   twinkling 
piri pono   closeness, friendship 
Poihākena   Port Jackson or Sydney 
pona   knee inward 
pōrearea   tiresome, nuisance 
pōtaetia   capped or graduated 
pū   bunch, bundle 
pūhore   scarce 
pukapuka taki kupu a Wiremu   Williams dictionary 
pūkohukohu   indistinct, misty 
pūtahi   join settle 
pūtake   base 
pūtake ake   the real reason for, the root of 
putē   stare wide-eyed 

R – WH 

R  

rahua   made to feel small, ashamed 
Ranginui   sky father 
rāpakitia   wrap up, dress up 
raumati   summer 
reina   reins 
Rerekura   Antares 
reri   ready 
rongo tonutia   continue to smell 
rongoa patu pūrerehua   mothball 
ruarua   few 
Ruatoki he kainga kei roto o Tuhoe 
ruia   to shed 
runanga a iwi   tribal council 

 

T  

tāhaetia   to steal 
tahanga   empty 
tai o te ao   tides of the world 
taiāwhio   go all round 
taitamariki   young person 
taitamarikitanga   childhood 
takatakahia o rātou mana   ignore their mana 
takatū   bustle, hurry 
tana ake   his alone, hers alone 
tānga   manawa breath easily or calm 
Tangotango   father of the sun, moon and stars 
tarahati   brisk 
tārere   swing 
Tātai o Matariki   constellation of Matariki or Pleiades 
tau   proper, comely, look the part, 
tauhou   strance 
tauhunahuna   hide and seek 
tauira   example 
tauna, taunga   used to, familiar with 
taunga   beset 
taunga no te mauri   settling or calming of one's innermost being 
taupoki   lid 
Tāwera  morning star of Venus 
Te Māori   the exhibition that toured the USA, 1984-86 
Te Māngōroa   Milky Way 
Te Whare Pupuri Taonga o Poihākena   The Australian Museum at Sydney 
Te Whare Taonga o Aotearoa   National Museum 
tere   float 
Tio   a bird 
tiputipu   sprout 
titi ana ki te   deep into the seat of affections 
tīwaha   shout 
tohu   to select, to point out 
tohungia   to be selected 
tohutohu   instruction 
toitoi   trot, trotting 
tono   request 
torotika   upright 
tōtika   correct, proper 
tū āhua   feature 
tū tangata   stand tall 
tū whakahīhī   stand proudly 
tuatahitanga   first, first time 
tukemata   eyebrow 
tuki  undertake 
tukia   crash into 
tukinohia   to distress 
tukuna   permit, let go, send 
tūnga   position 
tūpāpaku   corpse 
tūpāpaku o Ihipa   mummy 
tupeka   tobacco 
tūranga   position at work, occupation 
tūwhera   open 

  

U  

ū   be fixed, firm, committed 
ūkui   wipe, rub 
uru   enter 
uwha   female

  

W  

waenga, waenganui   middle, between, among 
wahangū   silent 
Wainui   mother of the whānau marama 
waipuke   flood, turbulent 
wanangatanga   in depth studies 
waiwai   to water 
wareware   forget 
wiwi wawa   neither here nor there, of no fixed abode 
wiwiri   shiver, tremble, shake 

  

WH 

whatumanawa   strikes 
whaimana   to have authority 
whaimuri atu   to follow after 
whaiwhakaaro   to have consideration 
whakaaengia   to agree, to give consent 
whakaara   to raise up or install 
whakaata   to exhibit, to show 
whakaataranga   exhibition 
whakaatatia   to be shown or exhibited 
whakaaturia   to explain 
whakaemi   to gather, collect 
whakahau   to urge 
whakahekea iho   to trace down 
whakahirahira   magnificent 
whakahōnore   to honour 
whakakao to   collect, gather 
whakamākūkū   moisten 
whakamārōtia   to embalm, to harden 
whakamatautau   examination, test, trial 
whakangā   to catch one's breath, to rest 
whakaparahako   to belittle 
whakaparana   show off, conceited 
whakapōrearea   to annoy 
whakaratarata   friendly 
whakaritea   decide 
whakatā   to rest 
whakataputapu   superstitious 
Whānui   Vega restriction 
whare o Te Ariki   chapel 
whakatau, whakatauhia   to bestow upon, decision 
whatumanawa   seat of affection 
whāwhā   touch, handling 
whakatō   to plant 
whewheo   flash 
whakatūpato   warn, caution 
whiore   tail 
whakatuwheratanga   opening 
whiriwhiria   discuss 
whakauru   join in (a group) 
whakautu   reply 
whakawhānui   to broaden 
whānau marama   the children of light (sun, moon, and stars) 
wou   whoa, stop