Te Wharekura 14
Te Wharekura 14
Nā Wiremu T. Ngata rāua ko Apirana T. Ngata. ngā kōrero
Nā Internal Affairs Department rātou ko Te Whare Pukapuka o Alexander Turnbull, ko Dominion Museum, ko Cliff Whiting ngā whakaahua.
Ko Wiremu T. Ngata te kaiwhakamāori.
Ko ngā kōrero o roto mō Te Moana-nui-a-Kiwa Ngārimu o Ngāti Porou me tana whiwhi ki te Rīpeka a Kuini Wikitōria. Kei roto hoki he tuhinga nā ētahi tamariki i toa ki ngā whakataetae kōrero mō te tau 1966.
Te Wharekura 14
Kua whakakorea tēnei rauemi tā. Ka kitea pea te rauemi nei ki te ruma rauemi o tō kura.
Ngā pūrākau kei roto i te puka nei:
- He wāhanga hou mō Te Wharekura
- Te whakataetae kōrero mō te tau 1966
- "Ko tāku, ko tā te Māori"
- He kōrero whakataki
- He wāhanga hou mō Te Wharekura
- Te whakataetae kōrero mō te tau 1966
- "Ko tāku, ko tā te Māori"
- He kōrero whakataki
He wāhanga hou mō Te Wharekura
Te Wāhanga Tuatahi me Te Wāhanga Tuarua nā Wiremu T. Ngata i whakamāori.
Te Wāhanga Tuatoru nā Wiremu T. Ngata.
He nui ngā rerekētanga o te reo Māori i roto i ngā wehewehenga-ā-iwi. Nā ēnei rerekētanga-ā-reo i pārekareka ai te reo Māori, ā i waiho ai hei taonga whawhainga mā te tokomaha noa iho.
Nā te mea ko te hunga e tuhi kōrero nei mō Te Wharekura e tuhi ana anō tēnā i tōna reo, tēnā i tōna reo, ka kite iho ētahi o koutou, o te hunga kōrero, i ētahi kupu e āhua rerekē ana anō ki a koutou. Ināhoki, ko te reo Māori o tēnei o ā tātou pukapuka nō Ngāti Porou o te Tai Rāwhiti, ā, tērā pea e āhua uaua ētahi wāhanga ki a koutou o te Tai Tokerau, o Waikato-Maniapoto, o Taranaki, me ērā atu roherohenga-ā-iwi. Hei whakamātautau i a koutou ki ngā rerekētanga-ā-reo o ētahi atu iwi, ā, kia āhua ngāwari ai pea te kōrero i Te Wharekura, timata atu i tēnei pukapuka ka tuhia ki muri he rārangi kupu me ō rātou nā aronga.
Ki ngā kaiwhakaako mā, koutou e tiro iho te rārangi kupu nei, ka tuhi mai ai ki te etita i ō koutou nā whakaaro mō ngā kupu i āta wehea nei, kei te tika rānei, kei te aha rānei, ā, me ētahi whakaaro hoki hei hiki ake i tēnei wāhanga hou o tā tātou pukapuka. Kia ora mai anō koutou!
KO TE KARAHIPI WHAKAMAUMAHARA
KI A TE MOANA-NUI-A-KIWA NGĀRIMU
ME TE OPE TAUA MĀORI
Nō te tau 1945, ka whakataua e te Kāwanatanga he ture hei whakatinana i tētahi tahua hei Karahipi Whakamaumahara ki a Te Moana-nui-a-Kiwa Ngārimu, he āpiha nō Te Taua Māori o te Whawhai Nui Tuarua a te Ao ki a Tiamana, i whakawhiwhia rā ia ki te tohu toa, ki te Ripeka a Kuini Wikitōria, ā, hei tohu whakamoemiti hoki ki te katoa o Te Ope Taua Māori me te iwi Māori nui tonu.
I raro i ngā whakataunga a taua ture, āpiti atu ki te Whakataetae Tuhi Kōrero ia tau, inā ngā āwhina e whakawhiwhia ki te hunga e toa i raro i ngā ture whakataetae:
Mō te hunga e āhei ana ki te haere ki ngā kura tuarua, kua pāhi i te whakamātautau mō te Kura Tiwhikete, ēngari me noho he wāhi kē i ō rātou ake kāinga kia tae ai ki ngā kura e whakawhiwhia ai ki te tohu mō te whakauru ki ngā Whare Wānanga hāunga mā te whakamātautau: Ko te wāriu o te āwhina, $120 i te tau mō te rua tau anake.
Ko ngā tamariki kua pāhi i te whakamātautau mō te haere ki ngā Whare Wānanga ki te whai i ngā tohu mātauranga teitei o ērā tū kura: Ko te wāriu o te āwhina e $200 i te tau āpiti atu ki tētahi $200 atu anō mō te noho mehemea e āhei ana tērā. Ko ēnei āwhina mō te whā tau, ā, mehemea e akona ana mō ngā mahi Unuunu Niho, mahi Tākuta, mahi pērā me te Hanga Piriti, Hanga Rori rānei, ā, mō ngā mahi pera me te Tauira Whare, ka nekehia atu te roa o te āwhina ki te rima tau.
Ko te hunga e whiwhi ki ngā tohu mātauranga o ngā Whare Wānanga (he pai kē hoki mehemea he tohu pērā me te M.A.), ā, e pīrangi ana ki te whakawhiti ki ngā Whare Wānanga o tāwāhi ki te whai i ngā tohu mātauranga kei kō atu, ā, he mea kē atu rānei e pā ana ki te hōhonutanga atu o te mātauranga, e āhei ana ki tētahi āwhina $1300 i te tau āpiti atu ki te utua o te haerenga atu mā runga tīma i Niu Tīreni nei ki tāwāhi me te hoki mai. Mehemea he moe wahine, he moe tāne rānei, he tamariki ā rātou, ka utua tētahi e $200 atu anō. Ko te roa o te wā mō tēnei āwhina he rua tau.
Inā ētahi kōrero mō ētahi o te hunga i whakawhiwhia ki ngā Karahipi o te Tahua Moni hei whakamaumahara ki a Te Moana Ngārimu rātou ko ōna hoa whanaunga o Te Ope Taua Māori.
He tokomaha taua hunga i whiwhi ki aua Karahipi, ā, ko ētahi kua whakaputaputa me ō rātou nā tohu mātauranga o ngā Whare Wānanga o Niu Tireni nei, ā, ko ētahi anō nō ngā Whare Wānanga o Āmerika me Ingarangi.
He pai kē pea kaua noa e whakahuahuatia ngā ingoa, kei pātai ētahi he aha hoki i whakaingoatia ai a Mea me ōna tohu mātauranga, ka mahue ko au me ōku tohu; nā reira, me tuku atu he mihi huihui ki a koutou katoa, ki te hunga i whiwhi ki ngā Karahipi nei i roto o ngā tau. Kia ora koutou katoa. Kia kaha ki ngā mahi hei hāpai i tō koutou iwi Māori. Kei te whakaputaputa i roto o te hunga karahipi nei te kaihautū mō ō tātou waka. Ko te tūmanako rā hoki tēnei i te wā i whiriwhiria ai e ngā iwi o te motu me pēnei, me kohi he moni hei karahipi whakamaumahara ki te hunga i hinga ki te pae o te pakanga, me kore noa e puta he kaihautū, mō ngāitāua mō te iwi Māori.
Inā ngā tuhituhinga a ngā tamariki i whakawhiwhia ki ngā hōnore mō te Whakataetae Tuhi Kōrero, arā, Ngārimu V.C. Essay Competition, o te tau 1966.
Te whakataetae kōrero mō te tau 1966
FORM THREE
Sophie Kelly
Queen Victoria School,
Auckland.
I te tīmatanga o tēnei tau, ka haere mai ahau ki te kura o Wikitōria i Ākarana.
I tētahi Paraire, ka haere ngā kōtiro o tēnei kura ki Waiwera, i te putanga atu i Ākarana, ki te pikiniki. Kotahi rau, tekau mā ono ngā kōtiro o Wikitōria i haere. Me āta tiki e rua mārika pahi hei mau i ēnei kōtiro tini.
I tō mātou taenga atu, ka kōrero mai ō mātou māhita, "Kōtiro mā, kia tūpato te wāwake i ēnei wāhi kei aituā."
Ka haere mātou ki te kai; he kānga, he rīwai, he kina me ngā āporo ā mātou kai i taua rā. I te mutunga o tā mātou kai, ka haere mātou ki te kauhoe i te moana o Waiwera. I haere mai ētahi o ngā kōtiro me ā rātou kete hei kohi pipi. Nō te kitenga atu o te nuinga o ngā kōtiro, ka tae mai te whakaaro ki a rātou he mahi tino pai tērā, ā, ka haere katoa rātou ki te kohi pipi.
I te takiwā o te tekau mā rua karaka, ka haere ētahi o ngā kōtiro me ngā māhita ki te nanao kina i raro o ngā toka, e rua māero pea te tawhiti atu i ngā mea e kohi pipi ana. Kīhai i roa, ka rongona tētahi o ngā kōtiro e pararē ana, "E hoa mā, kia horo! E toromi ana ahau!"
Nō te titirotanga atu o ētahi o ngā kōtiro, ka kite atu i tō rātou hoa e toromi ana, ka oma atu ki te āwhina. Kua tata tonu atu tētahi o ngā kōtiro nei ki te tō ake i tō rātau hoa, ka ngaro atu te kōtiro nei ki raro o te wai.
Ka kite atu wētahi o ngā kōtiro, ka mataku. Heke tonu iho tētahi o ngā kōtiro nei, ā, nō tōna taenga iho, kua ngaro kē te kōtiro e toromi nei. E haere ana te kōtiro nei i te taha o te wai, ka kite atu ia i tana hoa e putaputa mai ana i raro o tētahi toka. Ka tōngia mai e ia ki waho, ā, nō te putanga mai o te kōtiro nei, kāore noa iho ia e toromi ana - e tākaro kē ana ia.
Ka haere mai rāua ki kō i ētahi o ngā kōtiro i runga o tētahi toka e tatari mai ana i a rāua. Kite atu ngā hoa e haere mai ana tērā o rātou, ka oma atu ki te tūtaki. I tēnei tāima, kua tae ki te tāima hei haerenga mō mātou ki kō i ō mātou māhita rā. Hari ana ērā o mātou ki te kite mai i ēnei e haere atu ana.
I tēnei tāima, kua hanga tini kē wāku kina kei roto i tāku kete. Kātahi mātou ka hoki mai anō ki te kauhoe i roto i te moana o Waiwera. Koia tērā ko tētahi wāhi pai mō te tamariki. I kō tata mai i te moana, he toa hoko rare me ngā aihikirīmi. Ka haere māua ko taku hoa ki reira; kotahi hereni anō tā māua moni i te mea kotahi, ā, he nui tērā moni ki a māua. Ka hoko mai au i te aihikirīmi he hikipene te utu mō tērā. Ko taku hoa e hoko rare kē ana, kua hōhā haere ahau i te tataringa, ā, kua pukuriri haere ahau. Ka karanga atu ahau ki taku hoa, "Kia tere, kei mahue koe i a au!"
"Taihoa, e kore au e roa. Ko te hoko pīnati ahau."
E toru pea meneti kua pahure, kei reira tonu anō taku hoa. Kua haere au ki waho rawa, ā, i roa kua kite atu au i taku hoa e oma mai ana me te toru pākete rare, e rua aihikirīmi, e whā pākete pīnati me te pounamu waireka. Kātahi au ka pātai atu, "Nō hea wāu moni i pēnā ai te tini o wāu mea?" Ka whakahoki mai ia, "Nō roto i taku pēke - nō hea i tō mahara?"
Ka haere māua ki raro i tētahi rākau kai ai i aua mea. Ko te tāima iāineinā e rua tekau mā tahi meneti pāhi i te toru karaka, ā, ā te rima karaka ka hoki mai mātou ki te kura.
Tokowaru ngā kōtiro kei te kauhoe tonu, kāore anō rātou i ngenge. Mutu rawa ake tā māua kai, ko hoki mai kē ngā kōtiro ki te tini i ō rātou kākahu.
"Tino pai koutou i tēnei rā, kōtiro mā," tā te māhita i mea, "tino puare ō koutou taringa. Engari, e hēhia kite ana ahau i tētahi o koutou mō tētahi hē nāna i mahi." Ka titiro tonu mai ia ki a au. "Āe, ko koe taua kōtiro nā."
Whakaaro tonu ana ahau he aha tāku mahi hē. I te mutunga, kīhai tō mātou māhita i mōhio me aha ia. Ka mea mai ia ki a au kia haere au ki runga i te pahi, ā, kua hoki mātou ki te kura.
E toru ā mātou pēke pipi, e whā pēke kina. Tae mai a mātou, ka kōhuengia ā mātou pipi, ka tī mātou. Mutu atu, ka hoki ki te moe.
Caroline Harriet Walker
Auckland Girls' Grammar School
Ko te Māoritanga
Ki taku whakaaro, tētahi o ngā mea tino pai i tēnei ao ko te Māoritanga, engari ahakoa he mea tino pai tēnei, e tini ana ngā Māori kāhore rātou e mōhio ki ēnei mea.
Mei e mēngia ana kia mahi tahi te Māori me te Pākehā, ka tino tini atu ngā iwi mōhio, me ka mōhio rātou i reira ki te whakapai i ngā mahi a te Māori.
Tēnei tangata te Pākehā ina mōhio ia ki te mahi kete, ki te waiata i ngā waiata Māori, kore rawa ia e wareware. Te mea pai o tēnei, ka mōhio ngā tāngata katoa he mea tēnei ina whakaakongia, kāhore e pakeke ana ki te hopu.
He mea tino pai tēnei, kia mahi tahi te Pākehā me te Māori. Ka whakarahitia te mōhiotanga o ngā tāngata e kite ana me ngā tāngata e mahi ana i ēnei mea. Ka tino whakapai katoa te Māori ina kite ia e pai mai ana te Pākehā ki ana mahi, tana rōpū me tana reo. Ka mōhio katoa te Māori me te Pākehā ki te āhua o tētahi ki tētahi. I roto i wētahi o ngā Karapu Māori, e hari ana te ngākau ina kite atu koe i ngā Pākehā e kōrero ana, e kata ana, e tākaro ana, e waiata ana me te whakarongo ki ngā mahi, i te taha o te Māori. Ka kite atu koe, kore rawa te Pākehā e māharahara ana me he mangu, he mā, he aha atu rānei te kara o tōu kiri.
E tino pai ana ētahi Pākehā ki te Māoritanga. He mea pai tēnei. Ina mōhio te Māori āianei ka whakarērea e te Pākehā, ka tino kaha atu tana mahi kei mahue ia. E mōhio ana ia ko tēnei nahe te mea kei runga atu ia i te Pākehā. Kāhore ia e hiahia ana kia tino mōhio atu te Pākehā ki āna nei mahi.
E pai katoa ana te Pākehā ki te Māori i te mea kāhore rawa tētahi Māori e pai kia mōhiotia he Māori ia, ka kite atu ia i te Pākehā e mahi ana i ngā mea kāhore rā ia i pai, ka whakamā ia. Ka tīmata ia i tērā wā ki te whakaaro, ē, "He aha taku take i kore ai e pai kia mōhiotia he Māori ahau?" Mei ka kore e taea e ia te whakautu ēnei kōrero, ka mea ia ki te whakamāori anō i a ia.
He mea tino pai tēnei ki te Pākehā ina mōhio ia ki te Māoritanga. Ahakoa e horo ana tana hopu i ngā mea katoa, tino pai ana te Māori ki te whakaako i a ia. He māhita pai te Māori, kore rawa ia e whakahorohoro i tana tangata e hiahia ana kia mōhio. Mei e mōhio ana te Māori e hiahiangia ana ia e te Pākehā, ki taku mahara ka tino hari tana ngākau.
Engari, ina paoro atu tētahi Pākehā pai ki tētahi Māori kino, ka pātai atu te Pākehā ki a ia, "Me pēhea tēnei? Me aha tērā?" me wētahi o āna pātai, ka whakautu kino atu te Māori. E mea ana te Māori nei, ē, te kino o te Pākehā. Ka mahara ia i ngā rā kua pahure. Kāhore ia e mahara ana i ngā mea pai, engari e mahara i ngā hēnga o te Pākehā. Koia tēnei ko tētahi o ngā mea e kino ana te Māori ki te Pākehā, ahakoa hore rawa ngā Pākehā katoa i tēnei ao i pērā ki a rātou. Te mea pai o ngā karapu e mahi tahi ana te Māori me te Pākehā ko te mea ka mōhio te Pākehā ki ētahi mea Māori, ā, ka kore te Māori e kino ki te Pākehā.
Wīkēpa Keelan
Ngata Memorial College, Ruatōria
Te Mahi Ahuwhenua i Ruatōria nei
Ko au nō Ruatōria, he kāinga iti nei, kei te Tairāwhiti. E waru tekau māero te tawhiti atu o Tūranga, kei te tonga. Ko ā mātou take katoa ka haere ki Tūranga.
Mai i Ruatōria nei, tae noa ki Opōtiki, ā, huri rauna tae noa ki Tūranga, ko ngā pāmu o ēnei wāhi; he hipi mō ngā wūru, he kau hei mīti, ā, he kau hei miraka, ā, ko ngā kirīmi e tukuna ana hei pata.
Ko te whenua he tino pai mō te kau, mō te hipi hoki. Kāore i wera rawa, ā, kāore i makariri rawa. Pai rawa atu mō ngā kararehe. Ko ngā pāmu nunui ngā mea mahi kau, hipi hoki, neke atu pea i te toru mano eka.
Ko ngā kaiwhakahaere, he Pākehā te nuinga. Ko ngā pāmu nei nā rātou tonu, ā, kei a rātou e rīhi ana rānei, engari, tērā anō ētahi pāmu he Māori te kaiwhakahaere, ā, kua whakamēnetia ia e tana whānau. He ruarua ngā Māori nāna tonu ake te pāmu. Engari ngā pāmu miraka kau; he tokomaha tonu ngā Māori nāna tonu ake te pāmu.
Tētahi tino kōrero mō ngā whenua o konei, o Ruatōria nei; kei te mōhio au ki ētahi pāmu, ā, ki taku mōhio hoki he tokomaha ngā tāngata whai pānga ki taua pāmu, nā reira i uaua ai te mahi. I mua o te hemonga o te matua wahine, tāne rānei, ka hoatu katoatia e ia he pito whenua mā tēnā mā tēnā o āna tamariki, tae noa ki ngā mokopuna, ki ngā irāmutu. I te kaha nui o ngā tamariki, riro atu ana hāwhe eka mā tēnā, heke rawa atu ki te koata eka. He aha te mahi ahuwhenua e taea i runga i te koata eka? Ka tae mai ki ngā hui he kume kē tā tēnā, he kume kē tā tēnā. Ko ngā mea kaha ki te kōrero, ko ngā mea iti noa iho ngā whenua. Ko te mahi mā rātou he hoko i ō rātou whenua, engari kei whea ngā moni hei hoko atu?
Ko ngā Māori kei runga i ngā pāmu nei e mahi ana, kāore he mātauranga. Pēnei nā, i haere ki Massey, ki Lincoln College rānei. Tae noa atu ki te kura tuarua kua mutu kē te kura, ā, kei runga pāmu e mahi ana. Kei te pōhēhē rātou ko te mahi pāmu he pēnei i te kai parāoa nei. Ka haere atu, ka miraka i ō kau, ka hoki ki te moe. Ko ēnei ngā whakaaro o ētahi o ngā tāngata mahi pāmu o konei. Arā noa atu ngā mahi; he titiro kia whai kai ngā kararehe i te makariri, kia whānau ngā kāwhe i te tāima tika, te parau i te whenua, kia ono ētahi kai. Ka pau ēnā kai, ka huri anō ki te whenua ka ono karaehe; he titiro mehemea kei te tika ngā taiapa; ko ērā katoa ngā mahi.
Tērā tētahi Pākehā kei Ruatōria nei e karangatia ana e te Pākehā he Agricultural Advisor. Ko tāna mahi he āwhina i ngā tāngata mahi pāmu, he mea atu ki a ratou me pēnei ō hipi, ka nui ō wūru; me pēnei ō whenua, ka nui te pātiti. Me aha? Me rui mā te mea e kīa nei e te Pākehā he manure. Kua kite ngā Māori he tika tēnei kōrero, ā, ināianei rite tonu te rui a ngā Māori i ō rātou whenua, mā te tarakihana mā te rererangi rānei. Tērā anō atu ngā Pākehā āwhina i ngā tāngata mahi pāmu. Ko ēnei ētahi taitara ki te reo Pākehā: Veterinarian, Catchment Board Officer, Weed inspector, Dog Doser... nui noa atu aua tāngata nei.
I Ruatōria nei, kua ngaro te tera, te hōiho, te kāta hoki. He mīhini katoa te mahi i ngā mahi - te huri whenua, ono pātītī, te miraka kau, te pēre hei, te kuti hipi me ētahi atu mahi o te pāmu.
I mua, mānuka katoa a Ruatōria. Ka haere mai te Pākehā, ka mea atu ki te Māori, "Tapahia ō mānuka, ka nui ai te kai mā ō kararehe." Ka tapahia e te Māori, ka kite ia he tika te kōrero a te Pākehā; ka nui atu ngā hipi, kau rānei i runga i tērā whenua. Nāwai rā, kua kite koe i tēnā, i tēnā, e tope ana, ā, ātaahua ana te whenua.
Tērā ētahi whenua kua riro i te Tari Māori nō te mea he māngere ngā Māori ki te mahi, nā reira i pēnei ai. Ka rawe te mahi a aua tāngata nei. He Pākehā te menetia, ā, he Māori ngā kaimahi. Ko ngā tāngata o Ruatōria nei kei te whakamīharo ki te ātaahua o aua whenua nei. I mua, mānuka katoa, ā, kāore he taiapa. Ko ētahi kua hoatu i ō rātou whenua ki te Tari Māori.
Tērā anō ētahi Māori kaha ki te mahi, engari ko ngā moni katoa e riro mai ana e haere ana mō te rīhi, mō te rēiti rānei. Me pēhea ēnei o tātou? Taku whakaaro, me āwhinatia mai rātou e te Kāwanatanga. Hei aha, kia kaha e tama mā!
Mihi Aroha Kaiwai,
Auckland Girls' Grammar School
Te Māori kei te Whare Wānanga
Whaiā te mātauranga, mai i tōna waimatua, te hiku i papī mai ai tae noa ki te wahapū, ka toha atu i konā, ko tōna whānuitanga.
Kua mōhio te rangatahi Māori ki te tomotomo ki tēnei takotoranga, ki tērā takotoranga o te mātauranga o te Pākehā. Kua mōhio rātau he mea tino pakeke rawa te whaiwhai i ērā mea. Ahakoa rā, ko te mea nui ko te tū a te ringa ki te kapokapo i ngā maramara rere kia taea te whakatakoto he kanoi kōrero hei kaupapa mō te mātauranga o te iwi Māori.
Ko te wahapū o te mātauranga ko te Whare Wānanga, ēngari i ngā tau kua taha, he wahapū iti tēnei mō te tamariki Māori. He tokoiti noa iho ngā tamariki Māori i tae ki ngā Whare Wānanga. Ahakoa he tokoiti noa iho ngā tāngata i tae, ko te mātauranga i whiwhia he mea tino nui rawa atu. I ēnei tau, kei te piki haere te tokomaha o ngā tamariki Māori e haere ana ki te Whare Wānanga. I mua tau tonu ka ōrite te haere o te Pākehā me te Māori ki te whai i te mātauranga o te Pākehā. Ka matatau te Pākehā ki ngā āhuatanga Māori, ka matatau te Māori ki ngā āhuatanga Pākehā, ka nui te whānuitanga o te mātauranga mai i te wahapū.
Ko tōku whakaaro kāhore anō ngā tamariki Māori o nāianei kia waia ki ngā mahi o te Whare Wānanga, ēngari kei te kapokapo ia ki te mātauranga, kua mōhio ia he aha tōna hiahia i tēnei ao, kei te mahi tika tonu ia.
He maha ngā uauatanga e pā ana ki te Māori i ōna rā i te kura, engari i tōna taenga ki te Whare Wānanga kua mōhio ia ki te tiaki i a ia tonu, kua reri ia ki te anga atu ki ngā rerekētanga o te taha Pākehā. Ahakoa rā ka whakamātau ngā tamariki Māori ki te whai i te mātauranga o te Pākehā, engari he tika tonu te kōrero, kāhore e taea e te tangata kotahi te whaiwhai i ngā takotoranga mātauranga o te Pākehā i ōna rā i tēnei ao. Me ngata tōna hiahia ki ngā āhuatanga o te Whare Wānanga, mā reira anake ia ka whai mana hei mau i a ia i tēnei ao Pākehā.
He tokomaha ngā tamariki Māori e puta ana i ngā Whare Whare Wānanga, kua whiwhi i te mātauranga, kua hoki ki te kāinga hei māhita, hei tākuta, hei Āpiha Toko-i-te-ora rānei, ēngari ko tōku tino hiahia i tēnei wā, ko te kite atu i ngā tamariki Māori e tae ana ki te runga rawa o te nuinga e haere ana ki ngā Whare Wānanga.
Me mahia he wahapū hei anga mō te Māori, ko ia, ko te rangatahi me hao. Mā ēnei tāngata e whakatakoto he kaupapa mō te mātauranga o te iwi Māori.
"Ko tāku, ko tā te Māori"
He whakamārama
Nā Tā Apirana Ngata i tuhi ngā kōrero mō te toa o Te Moana Ngārimu i whakawhiwhia ai ia ki te tohu toa V.C, ki te pukapuka, 'The Price of Citizenship', arā, ki te reo Māori, 'Ko Tāku, ko Tā te Māori'. I huaina ai taua pukapuka 'Ko Tāku, ko Tā te Māori' mōtemea i tū tahi te Māori rāua ko te Pākehā ki te whawhai mō tō rāua Kingi me tō rāua whenua, engari ko tā te pukapuka e kōrero ana mō 'taku, mō tā te Māori' wāhanga o te pakanga.
Kua mōmōhanga taua pukapuka, kua kore e taea te hoko mai i ngā toa, engari kei ngā whare pukapuka e takoto ana.
Ko Tā Āpirana Ngata te Mema Pāremata mō te Rohe Pōti o te Tairāwhiti mō te toru tekau mā waru tau - 1905 ki 1943. Kei 'Te Wharekura' 12 ētahi kōrero mōna. Ko te katoa o ngā moni mō taua pukapuka i tuku ki te Tahua mō te Karahipi.
Inā ētahi wāhanga o taua pukapuka, nā Wiremu Ngata, tama a Tā Āpirana, i whakamāori.
Ko tāku, ko tā te Māori
Ko Mua Upoko
I tukua te Ripeka a Kuini Wikitōria ki a Te Moana-nui-a- kiwa Ngārimu, he āpiha nō Te Taua Māori o te Whawhai Nui Tuarua, mō tōna māia me tōna toa ki te ārahi i tana taua. I taua whawhaitanga, ka hinga a Te Moana, ā, ka tukua taua tohu toa mōna, te Rīpeka a Kuini Wikitōria, ki ōna mātua i te tau 1943.
Tino nui te whakahī o Ngātiporou rāua ko Te Whānau-a Apanui, ngā iwi o Te Moana, mō tōna toa, mō tōna māia, nā reira ko te hui ki Ruatōria hei whakanui i te tukunga i te taonga nui whakahirahira te Rīpeka a Kuini Wikitōria.
Ka tono a Te Weihana, he mōrehu kaumātua nō Te Whānau-a-Apanui, ki tētahi o rāua, ki a Timutimu Tāwhai, mō te whakapapa o Te Moana.
Ka oti taua whakapapa, ka tuhi a Timutimu ki a Te Weihana. Kua tuhia ake taua pukapuka ki konei hei whakaata i tō te Māori tohungatanga ki te whakatakoto kupu.
Hei kaupapa mō tēnei pukapuka ka takoto te tono ki a Te Whānau-a-Apanui, nō reira rā hoki a Maraea, te whaea, mō te whakapapa o Te Moana. Nāku i tono atu ki a Te Weihana, ā, takitaro ake ka tae mai me te pukapuka a Timutimu. E tika ana kia tuhia ki konei taua pukapuka hei whakaatu ki ngā tohunga kei te raparapa i ngā kaupapa o ngāitāua o te Māori, i te whakatoitoi o te ngākau Māori ki te whakaatu i ōna whakaaro hōhonu.
Ākuhata 31, 1943
Ōtūwhare, Ōmāio.
Ki a Te Weihana,
Tēnei ngā mea nei te tupuna atu nei ki a koe, hai tuku. He nui te pōuri mō te roa, engari he mea kīhai rawa i taea e au. Ehara i te whakatoitoi i roa ai, engari he āhuatanga hou i pā mai ki ahau, i a au ka takatū te whakaaro ki te whakatutuki i te whakahau ki a au. Ka ngaro te hinengaro, ka taka ngoikore tōku tinana. Mōhio tonu atu kai te take maunutanga o rātau mō te tuku i a rātau he wāhi kē, he ringa tangata kē. I roto i tēnā āhua, taea ana e au te nohopuku, te inoi i roto i tōku whare karakia, kia whakawhiwhia ahau ki te kaha, kia arohatia mai, kia tutuki tēnei āhua i runga i te whakaaro mō te rā a te Motu, e tuku iho nei.
Ka kite iho koe i aku tuhituhi i roto i ngā whakapapa nā, te wiriwiri o taku ringa, te whakatoitoi o te pene ki te rere, ahakoa ko te ingoa noa o Pita. Tirohia te whakatukutuku iho i ngā tamariki a Te Aomoengariki. Nōnātahirā tonu ki nanahi nei, kātahi anō ka hoki mai taku āhua, ka hoki au ki te mahi kape hou o te katoa, o ēnei ka tukua atu nei.
Tōku whakaaro nui, e Wei, i roto i tēnei wā, ko te whakaiti i a tāua i raro i tēnei manaakitanga a te Atua i tā tāua mokopuna. Ahakoa i whakaputaputaina ia e au ko ia anake i roto i ngā whakapapa, e pai ana; i te mea i nā rungatia atu ia i a tēnei whakakoringa e whakangāueue nei i te motu, hai tirohanga mā te kanohi tangata, ahakoa hoki he kanohi titiro tonu kai te tangata, engari he kanohi kore kite.
He toki i roto i te ringa o te tangata i turakina ai te rākau te rite o tō tamaiti, o Moana. Ki a wai te hōnore? Ki te toki, ki te tangata rānei? Ehara ianei ia i te toki kau i roto i te ringa o tōna Kaihanga? He tika, me whiwhi anō te toki i tōna hōnore anō paku nei. Ko te tino hōnore ia ki tō tātau Matua i te rangi. Ko tēnā, kaua e pēhia e tō te toki hōnore.
Aroha. Nāku noa,
T. TĀWHAI
Ko te reo Māori nō tētahi tohunga o roto o ēnei rā, e whakaata ana i te ngākau tūpato kei whakapaea mō te whaka- manamana mō tōna ake. Ko Timutimu Tāwhai nō te waka nei nō Horouta., he mohoao kāore e kōrero noa ana hei whakarongo mā te tangata kē. Nā reira e te hoa, e Timutimu, ka tuhia ake āu kōrero ki konei, he kōrero nō tōu whatumanawa ake, hei kōrero mā te tokoiti, hei taonga whakahirahira mā te takitini, mā te takimano. Kua taha tēnei te wā e hunaia ai ngā taonga a te Māori ki ngā ngākau o te tangata takitahi, ki ngā pukapuka whakapapa rānei, hei kōrero mā ngā uri tuku iho anake e manaakitia, e ahatia rānei. He taonga ēnei tērā e warewaretia, e te hoa, ā, ka ngaro noa. E tika ana kia mau tonu, ake tonu atu. Nā reira me pupuri e tāua me ētahi atu, pērā me te Pākehā, me tuhi ki te pukapuka hei taonga mā te hunga e manako ana.
A. T. NGATA
PŌNEKE
15 Hepetema 1943
He kōrero whakataki
I te atatū o te Mane, te rima o ngā rā o Āperira o tēnei tau, ka whiti rere ake au i te moe, mau tonu taku moemoeā pēnā anō he tika tonu nei. Moe iho au i Porourangi marae au, i Waiomatatini, māua ko tōku hoa pono ko Taiporutu. Kua tūahiahi, ā, e ahu mai ana māua i te hōro whakamaumahara ki a Rēiri Arihia, nā te waipuke taua hōro i tukituki i te rima tau ka taha ake nei, ā, ka whakawhiti i te awa o Waiōmatatini ki te rere o Porourangi.
Ko te mahau o taua whare anō e whakapoururu mai ana me ngā whakairo anō he tāngata e koromeke mai ana i muri o te paepae. Ka puare mai te tatau, ā, i te mārama mai o roto i te whare, ka putaputa mai te iwi rā, he wāhine katoa, he pango ngā kākahu, e tangi haere mai ana. E mōhio atu ana au ki te nuinga, nō Te Araroa, ā, nō ngā marae maha o Ngātiporou, kāore i ārikarika te tangi. Ka hongi atu au ki aua wāhine, ko tōku ohonga ake.
Kātahi au ka whakaaro he aha rawa rā tēnei, mōtemea ka puta a Porourangi he tohu aituā nui, otirā kāore i roa ka puta te rongo ko Te Moana-nui-a-Kiwa tērā kua hinga ki Tepaka i Tūnihia.
Ko Te Moana nō tētahi o ngā whānau i piri ki ngā mahi mō Porourangi i tōna whakaaratanga.
I a au e tamariki tonu ana, ka mātakitaki au ki ōna tipuna o Te Aowera, o Te Aitanga-a Mate, o Te Whānau-a-Rākairoa me ērā atu o ōna hapū e haere ana mai ki te maumau kai mai mā ngā ohu mahi whakairo, ohu mahi hoki, me te hunga i hui noa mai o tētahi moka ki tētahi moka o te rohe o Ngātiporou i tā te rangarangaihi te kawe mai.
Kāore i hē tā te pō i whakaatu ai. Ko te tipuna o Te Moana a runga tonu o te hapū nō reira a Rōpata Wahawaha, nā ōna kaha rā ko Porourangi te tihi o ngā tohungatanga whakairo, tohungatanga tukutuku me ngā tohungatanga o te hanga i tēnei mea i te whare whakairo.
Eke tonu hoki tā te moemoeā, mōtemea kāore i pō rua ko ngā rongo mai o te kaupapa hāro, āpiti atu ki a Te Moana, tekau mā rua o ōna whanaunga tata i hinga mate rawa, me tētahi wha tekau mā tahi i tū-ā-kiko, ko ētahi he tino taumaha atu. Ko te katoa o tenei hunga nō Ngātiporou, he nanakia nō te ope kotahi, ko te ope o ngā roherohenga o te Tairāwhiti ki Ngātiporou me Te Whānau-a-Apanui, Taua Māori o te Pakanga Nui Tuarua.
Kātahi hanga, e ngā Kurī Pākā a Uetuhiao; me te manu e pokai ana.
Nā Taniwha o Te Whānau-a-Apanui te whakatauākī nei.
Nō te 26 o ngā rā o Maehe ka mate a Te Moana Ngārimu. Nō Hune rā anō kātahi anō te ao ka rongo i pēhea tōna matenga. Nā tōna matenga, nā te āhua o tōna matenga, i katohia ai te tangata ora anō he putiputi kua puāwai, ka whakataua kia whakahōnoretia te ingoa o Te Moana-nui-a- kiwa Ngārimu e tōna Kingi ki te tino hōnore nui e āhei ana ia ki te tuku ki tētahi o ana hōia.
Ko te Kaihautū o te ope o Te Moana ko Kāpene Arapeta Awatere i whakawhiwhia, i taua whawhaitanga, ki te tohu MC., ko tana haihana, ā, ko tōna whanaunga tata i tū tahi rā rāua ki te whawhai ki te hoariri, ko Wīwī Tēneti, i uhia ki te tohu toa D.M.C. He tokomaha o taua ope, a, o te ope nui tonu, he whanaunga tata ētahi, ā, ko ētahi anō he whanaunga i runga i ngā honohono-ā-waka i whakawhiwhia ki ngā tohu toa maha noa atu; he whakahōnore pea ki a Te Moana ahakoa rā kua taotū kino, tū tonu ki te whawhai. Ko te rārangi ingoa tēnei o taua hunga toa, ko Kānara Hāre Moihi Pēneti, D.S.O., ko Kāpara Wiwi Tēneti, D.C.M., ko Haihana Hōne Ihaka Waaka, M.M., ko Haihana Paki Walters, M.M., ko Kāpara Tame Tāmou, M.M., ko Hāre Titirahi Apihai, M. M., ko Kura Edwards M. M., ko Francis Jones, M. M., ko Keepa Rangi, M. M.
Nā te ringa mārika o te Kaihautū o Te Ope Nui tonu, nā Kānara Hāre M. Pēneti, i āta tuhi ngā kōrero mō te matenga o Te Moana. Ko ana kōrero i tuhia ki te reo Pākehā, ā, kitea ana te tohunga o te tangata ki te whakatakoto o te kupu, ka mutu pea; ko tētahi tēnei o ngā tino kōrero o tēnei whawhai. Kitea ana te ia nāna i honohono, nāna i wehewehe ngāitāua te Māori i roto i ngā tuhituhinga a Hāre Pēneti i mihi ai ia te tukunga a ngā kāwai rangatira o Te Arawa ki te uri o Horouta. Pēnā tonu i tau ki runga ki a ia te ihiihi, te wehi o te toa o te tangata, i a ia e whakairo ana i ngā kōrero nāna i tiki atu taua tohu toa, he kōrero hei whakatū, hei waiata, hei kōrero mā ngā tīpuna Māori o Te Moana mehemea rātou i mārangaranga mai i te Pō.
Ko aua kōrero mō te toa o Te Moana i tangohia e tēnā, e tēnā, hei tohu, hei kōrero, mā ngā whakatipuranga. Ka tuhia e au ana kōrero ki te reo Māori, ehara i te reo Māori o ngā haka, o ngā waiata, engari ko te tūmanako mā ēnei kōrero e timata ngā whakatū, ngā ngangahu o te reo Māori i roto o ngā tau.
Te Kōrero o te Toa o Te Moana-nui-a-kiwa Ngārimu (2nd Lt. 39784), whakaingoatia ai ki te VC.
I te riri i Tepaka (Tebaga Gap), i te 26 o ngā rā o Maehe (1943) ko 2nd Lt. Ngārimu te rangatira o tētahi ope iti, he wāhanga toru nō te Kamupene, nāna i whakaeke tētahi taukahiwi, he 209 te tohu, he wāhi whai tikanga i te tātai o te pakanga.
Ko te wāhi i whakaritea māna e whakaeke kia riro mai, he tautuku i mua atu o te hiwi 209, i reira e noho nui ana mai te hoariri. I ārahia tikatia atu e ia tōna ope mā te aroaro tonu o te hiwi, kāore rawa i numinumi mai i te waiwai pū o ngā pū mōtā, o ngā pū mīhini, i hinga nui ai te tangata.
Ko ia tonu i mātua tae ki te whakaekenga atu o te hiwi he tohu nō te kore e wehi, he whakaatu hoki i tōna mārama ki te hautū i tōna ope; e rua rawa ngā pū mīhini i mate i a ia. Ka rere mōrehu te hoariri i konei i te kaha o tana kōkiri; otirā kāore i mārō tonu te kōkiri, engari i mau i te whakarukenga mai a te pū mīhini i ahu mai i te hiwi 209. Kātahi ka whakamoea mai e te hoariri mā raro i te waiwaipū mōtā whakaharahara, ka kōkiri mai. Kei konei ka whakahaua e Ngārimu ōna tāngata kia tū ki runga, kia whakatūtakitia, he tangata ki te tangata. Nā! tā te toa hanga, ka tipia haurarotia te hunga e kōkiri mai rā; torowhitu nā te ringa ake o Ngārimu. E rua taotūtanga o te tangata nei, kotahi i te pakihiwi, nā te pū raiwhara; kotahi i te waewae, nā te matā korara o te pū mōtā. Nā, ahakoa te tohe a te Āpiha o tōna Kamupene, a te Āpiha hoki o te Battalion, kia puta ia ki waho o te riri, kāore ia i whakaae, ka mea kia noho tonu ia mō tētahi wā i te taha o āna tāngata. Ko tōna nohanga iho, ā, taea noatia tōna matenga i te ata ake.
Ka rokohanga nā ia, rātou ko ngā mōrehu o āna tāngata, e te pōuri e tāpapa ana i runga i te tūāpapa o te taiheketanga o te hiwi, ko te hoariri ki rāwāhi atu o rātau, ki tērā taiheketanga. mai, tāpapa ai anō, e rua tekau iāri te matara o tētahi hunga i tētahi. I katoa tēnā pō ko te mahi tonu a te hoariri he kōkiri mai, he whai ki te whakawātea i a Ngārimu rātau ko āna tāngata, otirā i hoki katoa aua kōkiri i te mārama me te wana o te whakahaere a Ngārimu.
I tētahi o aua kōkiri ka haramai te hoariri me te makamaka haere mai i ngā mea e kīa nei he hand grenade, ā, tomo rawa mai ki tētahi wāhi e tūria atu rā e Ngārimu mā. Inamata ka rere te tangata nei ki te aukati, ka patua te hoariri, ko ngā mōrehu ka kurukurua ki te kōhatu, ka āia haeretia hoki ki tana pū tame. Nā, ka kōkiri mai anō te hoariri, ā, koru rawa tētahi wāhi o tana kapa tangata. Kātahi ka hāmama ki te karanga, ki te whakahauhau i ana tāngata, ka rere ki mua hautū ai, ā, hoki mai ana te wāhi i riro rā.
I tēnā pō katoa, i waenganui i ngā whakaekenga a te hoariri, kei te hēmanawa rātau i te waiwaipū mōtā, pū mīhini hoki, otirā i tino kaha tōna tieke me te whakakoakoa me te whakamanatū i ana tāngata e titiro mai rā ki tōna toa.
Ka kōwae te ata, e mau tonu ana i a ia te taukahiwi rā, engari ko ia anake te mōrehu me ngā hoa tokorua, kāore anō ērā i whara i te matā. Ka tupuna ake he tāngata hou, hei āwhina. I te ata, ka kōkiri anō te hoariri, ā, nō tēnei takiwā rawa ka mate a Ngārimu. I hinga tū tonu, anga atu ai te kanohi ki te hoariri me tana pū tame i te taha. I te hinganga ai, tau tonu iho ki runga i ngā tāngata i mate rā i tana pū, nā tō rātau tahua tonu i whakaatu te nui whakaharahara o tōna toa.
Ko ngā kōrero mō te toa o Te Moana i whakakaupapatia rā e Kānara Hāre Pēneti he mea tuku-ā-waea. mai ki Niu Tīreni, ā, ki te ao nui tonu. Hoki ana ngā mahara i ngā kōrero whakamutunga mō tōna toa ki te whawhai a ngā tipuna o Te Moana, arā, a ōna tīpuna o Te Whānau-a-Apanui ki ōna tīpuna o Ngātiporou, i ngā harapaki i kō tata atu o Te Araroa i runga ake o te one o Punaruku. Ko te ingoa o taua pakanga ko Te Māniaroa i hinga nui ai a Ngātiporou. Ko Tamahae, ko Tamakitekapua, ko Taniwha, ā, ko Apanui-mutu tō rātou tumuaki, ngā kaihautū o Te Whānau-a-Apanui. Nā te ringa mārika o Apanui-mutu i patu a Kuku, a Korohau, a Rongotangatakē, ā, i toe ai a Tūhorouta nā te aroha o Tamakitekapua.
Ka titiro ko Taniwha ki te putu o te tangata i te atarau, ki a Kuku, ki a Korohau, ki a Rongotangatakē, he tāina he tuākana, anō he kererū e putu ana i te mate. Ko ngā tama ēnei a Uetuhiao rāua ko te tāne ko Tūtehurutea, nā rātou rā i patu a Ngātiira, ngā toa o Hikurangi ki te tonga. Nā reira ka rere te kōrero a Taniwha, "Kātahi hanga, e ngā Kurī Pākā a Uetuhiao; me te manu e pōkai ana."
Ko Te Moana he tukunga nā ngā momo rangatira o te Taiwhakararo mai i Ngāiterangi ki Te Whānau-a-Apanui, ā, o te Tairāwhiti hoki, mai i Te ^Whānau-a-Tūwhakairiora ki Wharekahika, ki Ngāti Kahungunu ki Wairarapa. Kei te kaituhi o ngā kōrero nei ngā whakapapa a Te Weihana o Te Whānau-a-Apanui e kawe ana i ōna kaupapa tāngata ki ngā waka rā, ki Te Arawa, ki Mātaatua, ki Horouta, ki Tākitimu.
Ko te kōrero hoki nā te taitama tēnei whawhai. I whakataua kaua e heke iho i te rua tekau mā tahi tau te pakeke o te tangata. Ko te Māori kāore i māperetia pērā me ētahi o te Pākehā, ā, tētahi, i karo ētahi i ngā ture rēhita i te whānautanga, nā reira he hanga noa iho te ururūpahu atu ētahi ki ngā ope whawhai.
Kāore i eke te pakeke o Te Moana ki te rua tekau ma tahi i tōna whakaurunga ki te Ope Māori i Pāmutana i tetīmatanga o te tau 1940. I whānau ia ki Whareponga, te kāinga o Te Aitanga-a-Mate, kei waenganui o Tūpāroa me Waipiro kei te Tairāwhiti i te 7 o ngā rā o Āperira i te tau 1919. I timata atu ia ki te kura i Whareponga, a, ka neke atu ki te kura i Hiruhārama, ā, i reira ki Te Aute Kāreti i roto o Heretaunga; i Te Aute ia mai i te tau 1934 ki te tau 1935. Nō tēnei kura ētahi tāngata tokomaha tonu o Te Ope Māori.
Ehara a Te Moana i te tangata i pērā rawa atu tona mātauranga, engari he toa ki te tākaro nei ki te whutupaoro, he māhorahora tōna ngākau, ā, tērā e tipu hei tangata mōhio ki ngā mahi ahuwhenua rokohanga ko te whawhai.
I uru ngātahi rāua ko te tuakana, ko Hānara Tangiāwhā Reedy, ki Te Ope Māori, ā, i rere atu ki tāwāhi i roto o Te Ope Tuarua o Niu Tireni nui tonu. E rua tekau mā rua tau tōna pakeke ka whakatūria hei āpiha waitohu māramatanga mō tōna kānara, arā, hei intelligence officer, ā, i tēnei tūranga ka whakawhitia atu ia ki te Kamupene o te rohe o te Tairāwhiti, arā, o ngā rohe o Ngātiporou huri atu ki Te Whānau-a-Apanui; i riro i a ia te wāhanga o taua ope i a Te Hati Rangiuia. Ko ngā hōia o taua rōpū he Nāti tūturu, he whanaunga katoa nō Te Moana - he momo hīanga e kore e motu i te toki.
Ko Te Moana he tangata hūmārie, ā, kāore i roa kua matatau ōna whanaunga ki a ia me te aha hoki āno he tangata kotahi, te rere a te waka, i hinga nui te hoariri, putu atu, putu atu, i runga i te maunga rā i Tepaka. Waihoki kua taotū anō, tohe tonu a Te Moana me waiho noa ia kia āhua roa atu rātou ko ōna whanaunga e totohe ana ki te hoariri. Ka haere te riri, hinga atu, hinga mai te tangata pēnā tonu i reira ngātahi ōna tipuna Māori e whakahauhau ana i a Te Moana rātou ko tana wiwi, "Kia toa! Kia toa! Kia ū! Kia ū!" Waihoki te rongonga o te pāpā, o Hāmuera, mō te matenga o tana tama, ka mea ia, "Kati tonu i mate pērā. Mehemea i whati rātou ko tana ope, ka mutu pea te mea whakamā."
Waihoki ko ērā toa o Te Ope Māori, ko ngā toa o Maunga Takrouna ko Haihana Hōne Rogers o Ōhinemutu i hinga ki reira mate atu, ko Haihana Haane Manahi o Ōhinemutu anō, ko Matarehua Wikiriwhi, he āpiha, nō Te Whakarewarewa tēnei. Ko te kōrero e tika ana mehemea hoki i whakawhiwhia hoki a Rogers ki te Rīpeka a Wikitōria pērā me Te Moana, hei tohu mō tōna toa. I whakawhiwhia a Manahi ki te D.C.M, ko te tohu toa kei raro tata iho i te VC. mō te hōia ehara i te āpiha. I whakaatu a Matarehua Wikiriwhi i tōna tamatānetanga i te hingahinganga o ōna āpiha pakeke ka tū ko ia hei kaihautū mō Te Ope Māori, ā, i whakawhiwhia ia ki te tohu toa D.S.O., mō te āpiha kānara piki atu tēnei tohu toa, ā, tokorua anō rāua o Te Ope nui tonu o Niu Tīreni katoa, he Pākehā tētahi, i whakawhiwhia ki tēnei tohu toa, he āpiha noa ehara i te kānara.
I whakaatu ēnei ngā tama o Te Arawa i te wairua o tāua, o te Māori, i ū ki te kotahitanga iwi, ki te kotahitanga hapū me te whakamanamana hoki ki ō nehera whakangungunga rākau. Tamatuatahi tonu ko Te Arawa e tū ana ki te tuku i ōna taitama hei hoa mō Ingarangi ki te whawhai ki te Tiamana. I tukua whakareretia te katoa o tōna kaha tamatāne kia mau ai te kawa Māori, te kawa tangata.
Ehara i te mea ko Te Arawa anake te iwi e tika ana kia whakamihia mō tōna māia, ēngari ko te iwi nui tonu, kia tika ai hoki te apakura a Haihana Te Anania Amohau, te mokopuna a Te Amohau i whakaingoatia rā hei Kingi, i tana waiata mō Te Taua Māori:
Ka kōkiri, kōkiri tonu matou ki te hoariri,
Ka whawhai tonu ake, ake
Mō te Ātua, mō te Kīngi, mō te Kāinga! Aue!
Ake, ake, kia kaha e!
"Ko tōku taha Māori tōku taha rangatira"
I roto i te mura o te ahi ka whānau ko te whanaungatanga o te tangata ki te tangata, o te hapū ki te hapū, o te iwi ki te iwi, arā ia, ko te whakahī o te tangata Māori he Māori ia ko te Māoritanga tēnei kāore he mea i kō atu. Ko te koingo nui o tēnā tangata, o tēnā tangata, ko tōna Pākehātanga, ko tōna Māoritanga, ko tōna ahatanga rānei, e whai take ai tana ora i tēnei ao.
Ka hokihoki mai ā tātou tamariki, ngā mea i taotū i Kirihi, i Kiriti rānei, kotahi anō te kōrero kua rangatira mātou i tō mātou Māoritanga. Ko ngā mea i tuhi mai ki ā rātou wāhine, ki ō rātau mātua i te kāinga nei, kotahi anō te kōrero nui kia mau ki te Māoritanga. E kore e ngata te ngākau i te whakamārama rā ko te Māoritanga nei he mea whakahī nā te ngākau o te tangata; kāore, arā kē noa atu. Kia tika ai hoki ngā kōrero a tētahi o ngā āpiha o Te Ope Māori i hoki mai ki te kāinga nei, i tana whaikōrero i Ngāti Pōneke, he tangata tino mātau taua tangata, "Nōku i te mura o te ahi, kātahi anō au ka mōhio iho ko tōku taha Māori tōku taha rangatira. Kua hoki mai au ki te kāinga me kore e oti ētahi mahi i a au hei whakapiki i tōku iwi Māori."
Ko tētahi āpiha anō e tuhi mai ana ki tōna hoa wahine, he herehere ia i Tiamana i taua wā, ka mea mai kia kaha tana wahine ki te whai i ngā taonga Māori, me noho ia ki ngā wāhi e akona ai ia ki te reo Māori, ā, ki ngā tikanga hoki a te Māori.
Ko te Tangi tētahi tikanga a ngāitāua a te Māori, e whakahāweatia ana e te Pākehā. Ko te Pākehā hoki he iwi kuku i tōna ngākau pōuri, ā, kāore tōna ngākau e mārama ki te kuatau a te Māori. Ka hingahinga mai te tāngata i Kirihi, i Kiriti, ka hui te Māori ki ōna pā, ki ōna kāinga, ki te tangi mō ōna mate - tangi noa atu ana, tangi noa atu ana. Ka puta ora mai he hōia ka tangihia nuitia ko te pae mate mai o te hunga e tiraha, mai rā i te pae o te pakanga. Ko te tangi nui a ngā marae katoa, "He aha rawa rā i hinga pēnei ai au, te iwi Māori?"
He aha rawa rā te koha?
He aha rawa rā te koha mō tēnei kaupapa hāro? Ko te Māori i te Whawhai Nui Tuatahi i puritia kei uru ki ngā kōkiri e matemate nui ai. Ehara i te mea he whakahāwea ehara i te tangata toa; kāore, he uhupoho kē kei tuku whakareretia ki te mate, ka ngaro te Māori i te mata o te whenua. I tēnei whawhai, ka tono te Māori me tuku tahi rātou ko ōna whanaunga Pākehā o Niu Tireni ki te mura o te ahi. Ko te kōrero hoki a te Māori kua pakeke ia, ā, i te mea kua pakeke ia, ko te mea e oti i tōna tuakana Pākehā me oti hoki i a ia. Ko te pakeketanga o te tangata ki te mura o te ahi he tino pakeketanga, hāunga te pakeketanga ki te kāinga nei. Kua whakaae te ngākau Pākehā kei te mura o te ahi kei te tika tā tāua, tā te Māori. Ko te pātai kei te whakaae anō rānei ngā ngākau o taua whanaunga Pākehā e noho tahi nei tāua i te kāinga. Ko te tuku hoki a te tangata Pākehā, a te tangata Māori hoki, kia mate ngātahi rāua ki te mura o te ahi te utu tino nui mō tā rāua noho tahi.
Nō te 6 o ngā rā o Oketopa i te tau 1943, ka tū ki Ruatōria, wāhi o te Tairāwhiti, te hui a Ngāti Porou rāua ko Te Whānau-a-Apanui me ō rāua anō whanaunga-ā-iwi, hei whakanui i te tohu toa o Te Moana-nui-a-Kiwa Ngārimu.
Ko te manuhiri nui o taua hui ko te Kāwana-Tianara, ko Tā Cyril Newall, he waewae tapu ki ngā marae o Ngāti Porou. I reira hoki ngā iwi o te motu, mai i Te Rerenga Wairua ki Murihiku; kāore he iwi i hapa.
Nō taua hui ka whānau te whakaaro kia kohia he tahua moni hei punga mō tētahi karahipi hei whakamaumahara ki a Te Moana-nui-a-Kiwa Ngārimu me ōna hoa tokomaha noa atu o Te Ope Māori i hinga atu ki ngā marae maha o Tūmatauenga. Ka whakahuahuatia e mea mano, e mea mano pāuna te moni hei kohinga mā ngā iwi o te motu, ā, whakataua ana kia rua tekau mā rima mano pāuna taua moni, ā, ko te moni tāpiri mā te Kāwanatanga, kia pāuna mō te pāuna, ka hui katoa ai te moni mō te Karahipi ki te rima tekau mano pāuna; ko te moni hua ka whakaputaina mō ngā Karahipi.
Ka tīmata te whakaeke o ngā iwi o te motu ki Ruatōria, ki ngā marae maha o Ngāti Porou, ka tīmata hoki te whakarere a te marangai, tā Ngāti Porou kīnaki mō ana whakararu nunui; kore i ārikarika te marangai - kūtere atu, kūtere atu te poharu, ā, hei ngā awa rere ana te waipuke. Hei aha mā te Nāti. Tū ana ōna kapa haka, kapa waiata, ki te manaaki i ana manuhiri, me tō rātou kaihautū, me Tā Apirana Ngata, ki te tātaki i ngā haka, ki te whakahauhau i ngā kaiwaiata, ērā, ki te whakahaere i te katoa o te hui.
Nō ngā whakararu pērā me taua hui ka puta tō te Nāti wairua - he wairua whakakiriūka ahakoa he aha ngā uauatanga, kia ū ko te mahi ki uta.
Me titiro ake tātou ki ngā āhuatanga mō te rā nui o taua Hui. Inā te rārangi o ngā mahi mō te rā nui. Tuatahi, ko te manaaki i te Pirimia rātou ko tana ope. Tuarua, ko ngā manaaki ki te Kāwana-Tianara, ki a Tā Cyril Newall.
Ka tae mai te Kāwana ki te tomokanga mai ki te marae, e tū atu ana ngā hōia o Te Ope Taua Māori, e whakatūtū ana mō ngā ope whakawhiti ki tāwāhi. Ka whakatau te Kāwana ki taua ope i tā te hōia i tana whakatau.
Ka uru mai te Kāwana ki te marae, ko te wero, he tikanga nā ō tātou tīpuna nō neherā rānō. Ka mutu te wero, ka piki te Kāwana ki te atamira ki te mātakitaki i ā te Māori manaaki i te ope tūārangi pērā me ia.
Ka tūtū atu te kapa haka, ka mahi i te Peruperu, i te Tūtū Ngārahu rānei, te tīmatanga o ngā manaaki a te Māori i te tūārangi. Inā ngā kupu:
Katoa: Ā! Ki Waikurekure, hā!
Kaitātaki: Whiti! Whiti! Katoa E!
Kaitātaki: Kumekumea!
Katoa: Tōtōia!
Ā, e tō rā ki te tahataha
Ā, e tō rā ki te taparere
Ngā kōkako huataratara
Waikurekure, hā!
Ā, ki Waikurekure, hā!
Ā, ki Waikurekure, hā!
"Ā, ki Waikurekure, hā!" he haka na Ngāti Porou. Koianei tā rātou haka ki te Tiuka rāua ko tōna hoa, nō muri ka tū hei Kīngi, hei Kuini, arā, ki a Kngi Hōri te tuarima rāua ko Kuini Mēri, i te taenga mai ki Rotorua i te tau 1901. Ko te haka tēnei a Ngāti Porou i mua o ana haka nunui.
Inā te Peruperu, 'Kia kūtia! Au! Au!'
Kaitātaki: Whiti! Whiti!
Katoa: E!
Kaitātaki: Ka pāhi Itari! Ka poharu Tiamani!Ka miere Tiapani!
Katoa: Ko tō arero tēnā e whātero i mua rā,I ō rangi korokē whakapohautia,
Kei te poharutanga, pou! Pa!
Kaitātaki: Ka tohe au, ka tohe au -
Katoa: Ka tohe au ki a Hitara,
Ki taku karaka i whakaura i te waru,
E tū nei kati kawana!
Kaitātaki: Kia kūtia!
Katoa: Au! Au!
Kaitātaki: Kia wherahia!
Katoa: Au! Au!
E, kia rere atu te kōhuru
Ki tawhiti titiro mai ai!
Āe! Āe! A ... a!
Arā atu ngā waiata me ngā haka manaaki i te Kāwana, ā, ka tae ki te whaikōrero a Materoa Rire, hei kōkā ki a Te Moana, ko te tuahine o tōna matua, ō Hāmuera, ā, ko tētahi hoki o ngā upoko ariki o Ngāti Porou. Ko Materoa te kaikōrero mō Ngāti Porou i te hui nui ki Waitangi i te tau 1934, i te whakatau a te motu mō te tuku a te Kāwana, a Rore Bledisloe, i Waitangi whenua hei koha mō Niu Tīreni mō ake tonu atu.
Me tuhi ake ki konei ngā kupu o tētahi o ngā waiata manaaki i te Kāwana.
Haere mai rā, e te Kāwana, e,
Ki te Tai Rāwhiti.
Haria mai te tohu toa,
He mea tohenga nui,
Nā te toto heke rā,
Nā te whakamomori.
Haere mai rā, e te Kāwana, e!
Haere mai! Haere mai rā!
Nau mai, e te Pirimia
Me te Tūārangi!
Haere mai rā, kia tangi koe
Ki taku Raukura.
Nā te ao ana hanga,
Kia raru noa ko au.
Haere mai rā, e hoa mā!
Haere mai! Haere mai rā!
Aotea! Te Waipounamu!
Tēnei ngā kura nei!
Nā te toto heke rā,
Nā te whakamomori.
Moana, e! Manahi, e!
Me Te Tuahu rā!
E tama mā, i hira ai Ahau ki runga rā!
Ko te rangi o te waiata nei, nō tētahi waiata nā te ope mai o Rarotonga i waiata i taua hui anō ki Waitangi i te tau 1934 he rangi reka ki te whakarongo. Ko ngā kupu e whakataki ana i ngā tohu toa i riro i a Te Moana rātau ko ōna whanaunga.
Arā atu ngā manaaki ki te ope o te Kāwana me ngā iwi o te motu, mā koutou e whaiwhai haere kei ngā pukapuka mō te Tohu Toa o Ngārimu. Me huri ake ināianei ki te wāhanga o te hui e pā ana ki te tukunga i aua tohu toa.
I tīmataia tērā wāhanga ki te karakia, ā, ko te kaikarakia ko te Pīhopa o Aotearoa, ko Pererika Pēneti. Ko te kauhau i te Hāhi Ringatū, i a Te Weihana Teramia.
Ka mutu te karakia, ka tū ko te Pirimia, ko Pita Pereiha, ki te whaikōrero, ā, i muri i a ia, ko te Kāwana-Tianara, ko Tā Cyril Newall. Ka mutu te whaikōrero a te Kāwana-Tianara, ka tukua e ia te Tohu Toa a Kuini Wikitōria mō Te Moana-nui-a-Kiwa Ngārimu ki tōna matua, ki a Hāmuera Ngārimu.
I muri mai, ka tukua atu ētahi atu tohu toa ki ētahi atu o Te Ope Taua Māori, ki a Kānara Hāre Pēneti, ko te D.S.O, ki a Kānara Pererika Baker ko te D.S.O, ki a Kānara Hōri Pererika Bertrand ko te O.B.E ā, ki a Warrant Officer Martin McRae o Te Arawa ko te M.B.E.
I tukua hoki e te Kāwana te Military Cross me te Bar, te tohu e rua rawa toanga o te tangata, ki a Meiha Rangi Royal rāua ko Meiha Wiremu Poata, ā, ko te Military Cross ki a Hoani Puiraki Tikao-Barrett, he āpiha anō nō Te Taua Māori.
Ko tētahi mea whakamīharo o te Hui ko te tokomaha o ngā tamariki o ngā kura o te katoa o te rohe o Te Whānau-a-Awanui huri mai ki roto o Ngāti Porou i tae mai ki te whakanui i te hōnore o tō rātou whanaunga, o Te Moana-nui-a-Kiwa. I reira hoki ngā tamariki o Te Aute Kāreti me ō rātou tuāhine o Hukarere.
I whakanohonoho haeretia aua tamariki ki ngā whare kura e pātata ana ki Ruatōria. I tukua hoki ki ngā tamariki ētahi o ngā mahi whakangahau mō te rā nui o te Hui.
Kua pakeke rā taua hunga tamariki, ā, tēnā pea ko koutou, ko te hunga māna e kōrero te pukapuka nei, ngā uri. Kei te maumahara rātou, ā, kite iho rātou i ēnei pitopito kōrero, ka hoki whakamuri ō rātou whakaaro. Ko te mea nui ia, tamariki mā, ko te titiro whakamua; me waiho ngā mahi o ngā tau kua pahemo hei pou tūtoko mō ngā whakaaro kia whāia ngā taonga nunui mā tāua, mā te Māori. Me waiho tonu te ingoa o tēnei o ā tātou pukapuka - 'Ko Tāku, ko Tā te Māori - hei whakamaunga atu mō ngā tūmanako kei ō tātou ngākau Māori.
Ka mutu noa ēnei kōrero mō tēnei Hui nui whakaharahara hei tohu whakanui, hei tohu whakamoemiti mā te iwi Māori nui tonu, mō te tohu toa i tukua ki a Te Moana-nui-a-Kiwa Ngārimu.
'During the action at Tebaga Gap on 26 March Second Lieutenant Ngarimu commanded a platoon in an attack upon the vital hill feature point 209. He was given the task of attacking and capturing an under feature forward of point 209 itself and held in considerable strength by the enemy. He led his men with great determination straight up the face of the hill, undeterred by the intense mortar and machine gun fire which caused considerable casualties. Displaying courage and leadership of the highest order he was himself first on the hill crest, personally annihilating at least two enemy machine gun posts. In the face of such a determined attack the remainder of the enemy fled but further advance was impossible as the reverse slope was swept by machine gun fire from point 209 itself. Under cover of a most intense mortar barrage the enemy counter-attacked and Second Lieutenant Ngarimu ordered his men to stand up and engage the enemy man for man. This they did with such good effect that the attackers were literally mown down, Second Lieutenant Ngarimu personally killing seven. He was twice wounded, once by rifle fire in the shoulder, later by shrapnel in the leg, and though urged by both his Company and Battalion commanders to go out had refused to do so, saying that he would stay a little while with his men. He stayed till he met his death the following morning. Darkness found this officer and his depleted platoon lying on the rocky face of the forward slope of the hill feature with the enemy in a similar position on the reverse slope about 200 yards distant. Throughout the night the enemy repeatedly launched fierce attacks in an attempt to dislodge Second Lieutenant Ngarimu and his men, but each counter-attack was beaten off entirely by Second Lieutenant Ngarimu's inspired leadership. During one of these counter-attacks the enemy by using hand grenades succeeded in piercing a certain part of the line. Without hesitation this officer rushed to the threatened area and those of the enemy he did not kill he drove back with stones and with his tommy gun. During another detemiined counter-attack by the enemy part of his line broke. Yelling orders and encouragement he rallied his men and led them in a fierce onslaught back into their old positions. All through the night between attacks he and his men were heavily harassed by machine gun and mortar fire, but Second Lieutenant Ngarimu watched his line very carefully, cheering his men on and inspiring them by his gallant personal conduct. Morning found him still in possession of the hill feature but only he and two unwounded other ranks remained. Reinforcements were sent up to him. In the morning the enemy again counter- attacked and it was during this attack that Second Lieutenant Ngarimu was killed. He was killed on his feet defiantly facing the enemy with his tommy gun at his hip. As he fell he came to rest almost on the top of those of the enemy who had fallen to his gun, the number of whom testified to his outstanding courage and fortitude.'
Mō te rauemi
Kua whakakorea tēnei rauemi tā. Ka kitea pea te rauemi nei ki te ruma rauemi o tō kura.
Taumata: Taumata 6, Taumata 7, Taumata 8
Kaupapa: Rārangi Pukapuka
Kohinga: Te Wharekura
Tāpirihia ki te kohinga
