TMoA - Te Waiora - Te Iho

Te Pūtake

Kei Te Waiora ngā mōhiotanga, ngā pūkenga me ngā aronga mō ngā mokopuna, e pakari ai Te Whare Tapa Whā. Ka rarangahia ngā māramatanga me ngā mahi e rite ai te mokopuna ki te whakapūmau i te waiora whaiaro me te waiora kiritōpū, ki te whai oranga i ngā horopaki maha, ki te whai hua hoki tana whai wāhi ki ana hapori. 

Ka whakatairangatia te waiora taumano, ā, ka noho ngā mātāpono o Te Hauora hei tūāpapa mō Te Waiora, e hua mai ai te taurite me te aumārire i te ora me te noho. Ko tā Te Hauora, ko ngā hononga rau o Te Whare Tapa Whā, ā, ko tā Te Waiora, ko te whakaata i te taurite hononga i waenga i te tangata, te wāhi me te wheako. Ka whakatōpūhia ai, ka hāpaitia te oranga, te toitūtanga me te hononga ki te taiao, ka noho hoki hei tūāpapa mō te ako mā roto mai i ngā māramatanga nō te ahurea mō te waiora, te manawaroa me te taurite.

Ka āki Te Waiora i te mokopuna ki te whakatinana i ōna āhuatanga tūturu, ki te whakahīhī hoki ki ōna anō āhua. Ka whakatairangahia te ngahau, te angitu, me te māha i roto i te whai wāhitanga ki te nekeneke me ngā mahi ā-tinana. Ka whakapakari hoki i te tūoho whaiaro, te mātau kare ā-roto, me te manawaroa pāpori. Ka miramira a Te Waiora i ngā hononga ahurea ki te taiao, ka whakanui hoki i te wāhi ki ngā mokopuna hei kaitiaki, hei kaikōkiri hoki mō te oranga o Papatūānuku. Nā tana mōhio ki te whakapūmau i tana waiora e rite ai te mokopuna kia whai take ana mahi, kia whai hua hoki ana mahi mō te waiora o tangata kē, o te taiao hoki.  

I roto i ngā mōhiotanga o tēnei kaupapa ka whakaakona, ka ako te mokopuna mō te kai me te taiora, ka whakawhanake i tana mārama mō ngā kōwhiringa kai me ngā ritenga kai e tika ana ki te tautoko i te taiora pai me te ngao mō te tipu me te mahi. Ka tūhura te mokopuna i te tinana me te tipuranga, ka ako mō ngā panonitanga i roto i ngā tau, tae atu ki te tipu, te whanake, me ngā āhua ka whakaaweawe i te waiora tinana me te waiora hinengaro. Ka ako te mokopuna i ngā rautaki mō te haumaru i ngā ritenga o ia rā, i ngā taiao wai, i ngā mahi ā-tinana hoki, me ngā mahi ki te whakamaru, ki te tiaki hoki i tangata kē. Ka whakapai ake i ngā nekehanga tinana, ka māia haere, ka ngahau ake hoki i roto i te whanaketanga o ngā pūkenga nekeneke, te aroā mokowā, me te whakataunga rautata i ngā kēmu me ngā ngohe. Kātahi ka ako te mokopuna kia whakaute, kia ngākau aroha hoki ngā hononga i roto i te mārama o te whakawhiti whakaaro, te tau o te mauri, me te mahitahi ki te whakatika i ngā raru i ngā horopaki pāpori e rerekē ana. 

Kei roto i te tūāpapa o tēnei kaupapa ngā mōhiotanga me ngā mahi e rite ai te mokopuna kia taurite te noho, kia āta whakaarohia ngā whakatau, kia noho hoki hei kaitiaki mōna, mō tangata kē, mō te taiao hoki — ka whakanuia te waiora raumano me ngā hapori taurikura. 

Te Hanga

Ngā Toi Mokopuna

Ka tautuhi ngā toi mokopuna, me ngā pou e whā o Te Marautanga o Aotearoa, i ngā aronga ka whanakehia i ngā mokopuna e whai wāhi ana ki ngā mahi ako o Te Waiora i roto i ngā tau i te kura. 

Ngā Whenu

Ka whakaritea e Te Waiora he ara ngangahu mō te whanaketanga atu i Te Tau 1 ki Te Tau 10, kei ngā whenu e whā. Ka tautohu ia whenu i ngā mōhiotanga matua kua whakamahia ki te whakaraupapa i ngā akoranga huri noa i Ngā Tūārere. Ka miramira ngā whenu i ngā akoranga i ēnei āhua e whai ake nei: 

Tiakina te Wairua kia Tipu (Te Waiora Whaiaro)

• Te Tuakiri — ka mōhio te mokopuna ki a ia anō, ā, ka mānawatia hoki tērā, ka poipoia te māia, te manawaroa me te kiritau e whakatau ai te mokopuna i ngā kōwhiringa, e whakapuaki motuhēhē ai te mokopuna i ōna whakaaro, e whai tikanga ai hoki te whanaketanga o te mokopuna. 
• Te Tipu me te Whanaketanga o te Tinana — ka mārama te mokopuna ki ngā panonitanga o te tinana i roto i ngā tau, tae atu ki te tipu, te whanaketanga, me ngā āhua e whakaaweawe ana i te waiora tinana me te waiora hinengaro. Ka ako mō ngā kōwhiringa kai pai me ngā ritenga hauora hei tautoko i te taiora tika me te ngao mō te tipu me ngā mahi ā-tinana. 
• Te Haumaru — ka whai mōhiotanga, ka whai pūkenga hoki te mokopuna e haumaru ai ia i te taha tinana, te taha kare ā-roto me te taha pāpori hoki, hei poipoi i te mana motuhake, te manawaroa me te ngākau aroha kia whai take ngā kōwhiringa, kia kōkiri mōna anō, kia hāpai hoki i tana tautoko ki te whakarite i ngā hapori e haumaru ana, e tauawhi ana hoki. 

Kia Māhorahora te Ngākau kia Puāwai (Te Waiora Hinengaro, te Waiora Kare ā-Roto hoki) 

• Te Tūoho Whaiaro — ka mārama te mokopuna ki te whakaawenga o tōna tuakiri me ōna kare ā-roto ki tōna mātau kare ā-roto, tōna ngākau aroha, me tana whakatau i runga i te huritao, e pakari ai te waiora hinengaro me te waiora kare ā-roto. 
• Ngā Hononga — ka whakapakari i te waiora hinengaro me te waiora kare ā-roto o te mokopuna mā roto mai i te poipoi i ngā hononga whakaute e kauawhi ana hei tautoko i te ngākau aroha, te māramatanga pāpori, me ngā pūkenga ki te whai wāhi atu ki ngā pāhekoheko tuatini i runga i te manaaki, te tōkeke, me te noho huānga.  
• Te Atamai mō te Ahupori me ngā Kare ā-Roto — ka whakawhanake te mokopuna i te aroā kare ā-roto me te aroā ahurea e rite ai ia ki te whakapuaki motuhēhē i ōna whakaaro, ki te whakatau i tōna mauri, ki te ū hoki ki ngā tikanga i ngā horopaki rerekē hei poipoi i te ngākau aroha, te kauawhi me te kaha o te noho huānga. 

Whakakoria te Tinana kia Ora (Te Waiora Tinana) 

• Te Aroā me te Whakahaere i te Tinana — ka whakawhanake te mokopuna i te aroā me te whakahaere i te tinana, ka whakapakari i ngā pūkenga tūāpapa mō te nekeneke me te māia ki te neke i runga i te whai take, te haumaru me te urutau, hei poipoi i te waiora tinana me te whai wāhitanga mō ngā rā katoa o tōna ao. 
• Te Aroā Mokowā me te Aroā Pūāhua, te Rautaki me te Whakataunga — ka whakawhanake te mokopuna i te aroā mokowā me te aroā pūāhua, e rite ai ia ki te neke i runga i te haumaru me te rautaki, ki te urutau ki ngā horopaki e panoni haere ana, ki te whakatau hoki i runga i te māia me te whai whakaaro i ngā horopaki o te mahitahi me te whakataetae.  
• Te Ihumanea mō ngā Kare ā-Roto me te Pāpori, te Māramatanga mō te Ahurea me te Horopaki — ka tautokona te mokopuna ki te neke i runga i te whai take me te whakaute mā roto mai i te whanaketanga o te aroā kare ā-roto me te aroā ahurea, i te whai wāhitanga e kauawhi ana, me te whakanui i ngā uara ōrite me ngā tikanga ōrite i te horopaki o te nekeneke. 

Morimoria te Mauri kia Tau (Te Waiora Taiao) 

• Ngā Hononga Rau me te Kaitiakitanga — ka tautokona te mokopuna ki te whai māramatanga mō ōna hononga hōhonu ki te taiao, hei poipoi i te whakaute, te kaitiakitanga, me te haepapa hononga e toitū ai te taurite, te tuakiri me te waiora o te tangata me te ao tūroa.  

He Tirohanga Whānui

Puta noa i Ngā Tūārere 1–4, ka whanake Te Waiora atu i te tūhuratanga o te tuakiri, o ngā kare ā-roto, o ngā ritenga haumaru hoki, ki te whakahaere i ngā pūāhua pāpori e tuatini ana, te whakawhāiti i ngā āheinga nekeneke, me te arotake i ngā mahi waiora e matatika ana, e hono ana hoki ki te hapori. 

Ka rarangahia ngā akoranga i ngā whenu e whā, arā, ko Tiakina te Wairua kia Tipu (Te Waiora Whaiaro), ko Kia Māhorahora te Ngākau kia Puāwai (Te Waiora Hinengaro, Te Waiora Kare ā-Roto hoki), ko Whakakoria te Tinana kia Ora (Te Waiora Tinana), ko Morimori te Mauri kia Tau (Te Waiora Taiao) hoki. Ka noho mātāmua ngā toi mokopuna e tipu ai te mokopuna i runga i te whakahīhī, te ngākau aroha me te manawaroa. 
 

Ka whakarite a Te Waiora i te mokopuna mō ngā ara o mua i Te Akoranga Hauora, Te Akoranga Tinana, Te Hauora, Te Ako Waiora hoki, me ngā horopaki whānui mō te mahi i te hapori me ngā ratonga pāpori. I roto i tēnei haerenga, ka tipu mai te mokopuna hei rangatira ngākau aroha, hei rangatira manawaroa, hei rangatira ka ārahina e ōna uara, ā, ka rite ia ki te whakatau i runga i te matatika e kaha ake ai te waiora o te tangata, te hapori, me te taiao hoki.