He Rapanga Pāhekoheko

He Whakamārama

He ngohe ēnei hei whakahau i ngā ākonga ki te whakawhitiwhiti kōrero i roto i te rōpū iti, hei whakaoti rapanga pāngarau. Ka whai wāhi mai ko ngā pūkenga nei:

• te pānui;
• te āta whakarongo;
• te whakawhitiwhiti kōrero;
• te mahi tahi me te rōpū;
• te āta whakaaro arorau;
• te whiriwhiri rautaki hei whakaoti rapanga;
• te āta whakaaro ki te tika, te whaitakenga rānei o te otinga.

E hāngai ana ngā ngohe ki tēnā, ki tēnā o ngā whenu o te marautanga, waihoki ki tēnā taumata ki tēnā. He tauira noa iho ēnei rapanga. Māu, mā te kaiako e whakarite āu ake rapanga e hāngai ana ki āu ake ākonga. He māmā anō hoki te huri i ngā tau o roto i ngā rapanga kia uaua ake, kia ngāwari ake rānei mā te rōpū ākonga.

E tino aro ana ēnei ngohe ki te whāinga paetae mō ‘Te Reo Matatini o te Pāngarau’ o ia taumata o te marautanga pāngarau, arā:

Ka whakawhitiwhiti whakaaro, ka āta wānanga te ākonga i āna mahi pāngarau, mā te kupu (ā-waha, ā-tuhi), mā te tohu, me ngā momo whakaahuahanga e hāngai ana. He mea nui tēnei hei tautoko i te whakatutukitanga o ngā whāinga paetae e whai ake nei, e pakari anō ai te whakaaro arorau, te whakaaro arohaehae, te whakaaro whaitake me te auahatanga o te ākonga e hāngai ana ki tēnei taumata.

Ngā Tohutohu

• E whā ngā kāri mō ia rapanga. Kua tuhia te rapanga, te pātai rānei ki ia kāri, me ētahi kōrero hei āwhina ki te whakaoti i te rapanga. He rerekē ngā kōrero āwhina kei tēnā kāri, kei tēnā.
• Ka mahi takiwhā ngā ākonga, ka hoatu he kāri ki ia ākonga.
• Me noho matatapu ngā kāri ki ia ākonga, arā, kāore e whakaaetia te titiro a tētahi ki te kāri a tētahi atu.
• Mā ia ākonga e pānui ngā kōrero kei tana kāri, hei āta whakarongo mā te rōpū.
• Ka mahi tahi, ka whakawhitiwhiti kōrero te rōpū ki te whakaoti i te rapanga. He pai tonu te tuhi whakaaro, te tuhi pikitia rānei ki te papa tuhituhi hei āwhina i te rōpū.

Torohia te pouaka Mō te rauemi ki raro nei e kitea ai ngā rauemi hāngai:

• Rapanga pāhekoheko 2.1 (.pdf)
• Rapanga pāhekoheko 2.2 (.pdf)
• Rapanga pāhekoheko 2.3 (.pdf)
• Rapanga pāhekoheko 2.4 (.pdf)
• Rapanga pāhekoheko 2.5 (.pdf)

Te Tau me te Taurangi
Taumata 2:

1. Ka mōhio ki ngā tauoti 0–1000:

• te whakaingoa i ngā tohutau;
• ngā raupapa tatauranga whakamua, whakamuri hoki;
• ngā tikanga uara tū:
• te maha o ngā tahi, ngātekau, me ngā rau kei roto i tētahi tau;
• te rahi me te hanga o tētahi tau;
• ngā tikanga o te taurua me te taukehe.

  2. Ka mōhio ki ngā rearua tae atu ki te 20, me ngā haurua e whai pānga ana.

He rerekē pea te kounga o ngā whakaahua kei tēnei whārangi nā tō momo pūrere matihiko, heoi anō, ki te tiki ake i ngā whakaahua, ka tika te kounga.