Te pukapuka
He mea tuhi te pukapuka e Keri Tākao. E tākina ana te kōrero o Ngārarahuarau, te tipua o Wainui. Ko tana kāinga, ko tētahi ana i te tahamoana. Ka hipa ana he tāngata i te waha o tōna ana, kapohia atu ana e ia. Heoi anō, ko tēnei pūrākau nei, e whakaahua ana i te matenga o Ngārarahuarau i tētahi wahine ko Rūru te ingoa. Kei te kōrero hoki i ngā tohu pūmau o Ngārarahuarau kua mahue mai ki te whenua. Nā Robin Slow i peita ngā whakaahua. He tohu whakarite, he kōrero whakarite kei ngā whakaahua nei, kei te haumako anō te reo ataata o roto.
Ngā ataata
He tautoko tonu tā ngā ataata i ngā kōrero. He takinga māmā, he takinga tāoreore a Ngārarahuarau e whakamahi ana i ngā kupu me ngā whakaahua o te pukapuka. Ko tā Tohuwhenua, he kōtui i te kōrero me te whakaahua me te whaiwhai haere i te ara i tāraia e Ngārarahuarau ki te whenua. I Kōkōwai, ka whāia te kōhatu mai i tōna pūtakenga ki te whakamahinga ōna hei waituhi.
Hītori Māori
Kua hoahoaina te rauemi nei mō roto i ngā akomanga teina i te kura, hei tautoko i te whakaako me te ako i ngā Hītori Māori, engari kāore e kore ka whānui ake i tērā te hāpainga ake me te pīrangitia mai o te rauemi nei.
Mā roto i te rauemi nei, ka takoto he ara:
- e hono atu ai ngā ākonga ki ngā iwi me te whenua
- e āta tirohia ai tā te Māori whakamārama i ētahi āhuatanga o te ao tūroa
- e whiria ai he taura ki ngā iwi o te rohe
- e ākona ai ngā hangarau a te Māori hei mahi taonga, hei mahi taputapu
- e ākona ai ētahi kupu e hāngai pū ana ki Mohua me te takoto o te whenua i reira
- e tūhuratia ai ngā kōrero tuku iho mō ngā taniwha o tōu ake rohe
- e tūhuratia ai ngā tohu me ngā takotoranga whenua o tōu nā rohe me ō rātou whakapapa
- e āta wherawheratia ai ngā toi Māori me ngā kōrero/tohu e mau mai ana ki roto
- hei tūhono atu ki ērā atu wāhanga ako, pērā i te Pūtaiao me te Tikanga ā-Iwi.
Ngā hononga ki ngā wāhanga ako
Tikanga ā-Iwi
Te Wāhi me te Taiao – taumata 2
Ka whakaahua i te whakaawenga o ngā mahi a te tangata i te wāhi me te taiao, me te whakaawenga o te wāhi me taiao i ngā mahi a te tangata.
Te Wāhi me te Taiao – taumata 3
3.2 Ka whakamārama i ngā take me ngā huarahi e whakaatu ai te tangata i tōna hononga ki tētahi tino wāhi, ki tētahi tino taiao.
Pūtaiao
Te Ao Tūroa – taumata 2
Papatūānuku
4 Ka ako haere me pēhea te rū whenua me te puia e huri ai i te āhua o te takiwā, me ngā pānga ki te maunga.
Te Ao Tūroa – taumata 3
Papatūānuku
4(i) Ka ako haere i ngā uptake o ngā āhuatanga ā-nuku o te takiwā, tae atu ki ngā tāpui wai.
4(ii) Ka ako mō te āta titiro, te tuhi me te matapae i te huarere.
