Ngā Āhuatanga Matua O Te Marautanga
Ngā Āhuatanga Matua o Te Marautanga
Kua whakaemia ngā marautanga mō ngā wāhanga ako katoa o te kura ki te pukapuka kotahi, koirā te marautanga ka whakamanahia e te paremata mō roto i ngā kura reo Māori.
Ehara i te mea kua hou katoa te āhua o te whakaako i te pāngarau. Ka mau tonu te iho o te pāngarau o mua, he paku rerekē ngā Āhuatanga hei aro atu mā te kaiako i tēnā taumata i tēnā.
Ngā Whenu
I mua, e rima ngā whenu o te marautanga pāngarau, engari kua whakakotahingia te Tau me te Taurangi, te Ine me te āhuahanga, i runga anō i ngā tino hono o tētahi ki tētahi. Koia nei ngā whenu e toru o te marautanga pāngarau hou:
Ko te iho o te pāngarau, ko te tūhura, ko te whakamātau i ngā tauira me ngā pānga o roto i ngā āhuatanga o ēnei whenu. Mai rā anō, he mea nui te mātauranga pāngarau hei āwhina i te tangata me te iwi i roto i ngā mahi o ia rā. Ahakoa te rerekē haere me te tipu o te mātauranga pāngarau i roto i ngā tau, he kaupapa nui tonu hei āwhina i ā tātou tamariki i roto i ngā wāhanga ako katoa o te kura, i roto i ngā tūranga mahi huhua me ngā mahi i te kāinga, i te marae, me te hapori whānui.
Te Reo Matatini o te Pāngarau
Mō ia taumata kua tuhia he kōrero mō te wāhi nui kim 'te reo matatini o te pāngarau'. Arā, ko te mōhio o te ākonga ki te reo motuhake o te pāngarau e tutuki ai tana whakawhitiwhiti kōrero, e pakari anō ai tōna hinengaro ki te whakaaro auaha, whakaaro whaitake, whakaaro arorau, whakaaro arohaehae.
Te Whakamahinga o te Pāngarau
Kua tuhia hoki he kōrero mō te whakamahinga o te pāngarau me te mārama haere o te ākonga ki ngā horopaki maha o te pāngarau i roto i tōna ake ao, i te kāinga, i te kura, i te marae, i ngā kaupapa a te iwi, otirā i ngā kaupapa o te ao whānui. Ka whanake anō hoki tana āhei ki te arohaehae i te takenga mai o te mātauranga pāngarau me te whaitakenga o te whakamahinga i te pāngarau.
Ngā Whāinga Paetae
Ko tā ngā whāinga paetae, he tohu i te mātauranga me ngā pūkenga hei ako mā ngā ākonga i tēnā taumata, i tēnā taumata o te kura. Kua tuhia ngā whāinga paetae ki raro i ngā tino wāhanga o ia whenu:
Mō te Tau me te Taurangi:
- Te Mātauranga Tau
- Ngā Rautaki Tau
- Te Tauira me te Pānga
Mō te Ine me te Āhuahanga:
- Te Ine
- Te Hanga
- Te Wāhi me te Ahunga
- Te Panoni
Mō te Tauanga:
- Te Tūhuratanga Tauanga
- Te Tūponotanga
Mō ngā taumata 1 ki te 5, he rerekē ngā whāinga paetae o te marautanga pāngarau i ērā o te pāngarau reo Ingarihi, engari kei reira tonu ngā hononga. He mea whakamāori ngā whāinga paetae o ngā taumata 6 ki te 8, mai i te marautanga pāngarau reo Ingarihi.
Mō te rauemi
Wāhango Ako: Pāngarau
Kohinga Whāiti: Ngā Āhuatanga Matua o te Marautanga
