Kā Roimata o Hinehukatere
Kā Roimata o Hinehukatere
Kāti Māhaki, Ngāi Tahu
He pūrākau a Kā Roimata o Hinehukatere nō Poutini ki te Toka. E taki ana i te kōrero a Kāti Māhaki mō te hanga o te awa kōpaka e mōhiotia nei ko Kā Roimata o Hinehukatere. E taki ana tēnei pūrākau i te reo o Kāi Tahu.
Kei tēnei rauemi:
- tētahi pukapuka whai kupu, whai whakaahua
- ētahi ataata poto e toru.
Tonoa he kape o te pukapuka mai i Down the Back of the Chair (MOE 69617)
Te pukapuka
He mea tuhi te pukapuka e Hinerangi Barr rāua ko Ngāhiwi Apanui. E tākina ana te kōrero mō tētahi tipuna, he wahine tohunga ki te piki maunga, ko Hinehukatere te ingoa. I te raumati, kei ngā maunga a Hinehukatere e takahi ana i ngā ara whakawhiti maunga, e kake ana i ngā tihi o Kā Tiritiri o te Moana. I te takurua, kua hoki a Hinehukatere ki ngā whenua hakahaka. I tētahi takurua, ka tūtaki ia ki te tau o tōna ate, ki a Wawe. Ka haere tonu ngā kōrero, e whakaaturia ai te pūtakenga mai o tētahi o ngā awa kōpaka rongonui katoa o Poutini ki te Toka. Riro ana mā ngā whakaahua rerehua a Eleanor Logan e kīnaki ngā kupu. Nāna, kua tū mataora mai ngā whenua o Poutini ki ngā whārangi o te pukapuka.
Tonoa he kape o te pukapuka mai i Down the Back of the Chair (MOE 69617)
Ngā ataata
Ko ngā ataata, he rangitaki ataata e whai ana i tētahi taiohi o Kāti Māhaki e hoki ana ki tōna marae i Poutini ki te Toka. I reira, ka whakaputaina e ia ētahi atu kōrero e toru mō ngā māunga me ana tīpuna. I Kā Roimata o Hinehukatere, ka tīmata tātou i te pito whakarunga o te awa kōpaka, ka heke haere ki raro, me te taki haere anō a Ngātai i ngā kōrero. Whai i muri i a Ngātai, ko Noti Hinetamatea i te ara ki Pōpatea. Nā ōna tīpuna te ara ki Pōpātea i takahi, i tiaki mō te hia rau tau nei. I Kā Tiritiri o te Moana, e kōrerotia ana te hononga o Māui ki Maitahi me tāna whakaingoa i Kā Tiritiri o te Moana.
Te Rangitaki Ataata a Ngātai mō ana Hararei - Kā Roimata o Hinehukatere
Te Rangitaki Ataata a Ngātai mō ana Hararei - Noti Hinetamatea
Te Rangitaki Ataata a Ngātai mō ana Hararei - Kā Tiritiri o te Moana
Hītori Māori
Kua hoahoaina te rauemi nei mō roto i ngā akomanga teina i te kura, hei tautoko i te whakaako me te ako i ngā Hītori Māori.
Mā roto i te rauemi nei, ka takoto he ara:
- e hono atu ai ngā ākonga ki ngā iwi me te whenua
- e āta tirohia ai tā te Māori whakamārama i ētahi āhuatanga o te ao tūroa
- e whiria ai he taura ki ngā iwi o te rohe
- e ākona ai ngā hangarau a te Māori hei mahi taonga, hei mahi taputapu
- e ākona ai ētahi kupu e hāngai pū ana ki Mohua me te takoto o te whenua i reira
- e tūhuratia ai ngā kōrero tuku iho mō ngā tohu whenua o tōu ake rohe
- e rangahaua ai ngā awa kōpaka me ngā maunga, me te āhua o te noho tahi a te tangata ki ēnei taiao
- hei tūhono atu ki ērā atu wāhanga ako, pērā i te Pūtaiao, i te Tikanga ā-Iwi me Te Reo Māori.
Tikanga ā-Iwi
Te Wāhi me te Taiao – taumata 2
Ka whakaahua i te whakaawenga o ngā mahi a te tangata i te wāhi me te taiao, me te whakaawenga o te wāhi me taiao i ngā mahi a te tangata.
Te Wāhi me te Taiao – taumata 3
3.2 Ka whakamārama i ngā take me ngā huarahi e whakaatu ai te tangata i tōna hononga ki tētahi tino wāhi, ki tētahi tino taiao.
Pūtaiao
Te Ao Tūroa – taumata 2
Papatūānuku
4 Ka ako haere me pēhea te rū whenua me te puia e huri ai i te āhua o te takiwā, me ngā pānga ki te maunga.
Te Ao Tūroa – taumata 3
Papatūānuku
4(i) Ka ako haere i ngā uptake o ngā āhuatanga ā-nuku o te takiwā, tae atu ki ngā tāpui wai.
4(ii) Ka ako mō te āta titiro, te tuhi me te matapae i te huarere.
Ētahi atu rauemi e hāngai ana
Kā Puna Hauaitu
Nama take 1117
Mō te rauemi
Wāhanga Ako: Te Reo Māori, Tikanga ā-Iwi, Pūtaiao
Taumata: Taumata 2, Taumata 3
Kaupapa: Te Aho Ngārahu
