He Tupua Rongonui
He Tupua Rongonui
Ngāti Tūwharetoa
He pakimaero tēnei mō Māui te tupuna rongonui. He kōrero ēnei mō tōna oranga, mai i tōna whānautanga mai, ā, tae noa ki tōna matenga. Kua tuhia ēnei kōrero ki tā Ngāti Tūwharetoa tirohanga.
He rauemi mā te pouako hei tautoko i te pukapuka Māui: He Tupua Rongonui. Kei roto nei he Rauemi Matua, tētahi Tauira Whakaakoranga me ētahi ngohe hei māhi mā ngā ākonga i te taha o te pukapuka.
Ko tēnei kohinga pūrākau mō Māui, he mea whakakao mai i ngā tuhinga whaiaro a te kaituhi nei. Nāna i tuhi hei pūrākau motuhake me ōna karakia, waiata hoki i roto i ngā tau ki mua, ā, kua oti te raupapa ki te pukapuka nei kia rite ai hei whai, hei pānui hoki mā ngā ākonga me ngā uri kei roto i ngā kura rumaki reo Māori o tēnei wā.
Kua wehewehea ngā pūrākau ki ngā wāhanga e whā, kia rite ki te tipu o te tangata i te ao. Ko te wāhanga tuatahi ko Māui te tamaiti, ko te tuarua o ngā wāhanga ko Māui te pōtiki o te whānau, ko te wāhanga tuatoru ko Māui te tangata, te nanakia, te tupua, ā, ko te wāhanga tuawhā ko Māui te toa, te tupua, te tangata. Heoi, ko te mutunga atu o ngā kōrero ko tōna matenga. Hei āwhina i te kaipānui kua tuhia ētahi whakapapa hei whakaatu i te kāwai heke a Māui me tōna whānau, me ētahi hononga ōna ki ngā tīpuna mō rātou ētahi o ngā kōrero. Nā te kaituhi anō ēnei whakapapa i tuhi me te mōhio kei tēnā iwi, kei tēnā ōna anō whakapapa, ōna anō kōrero mō tēnei tipuna rongonui. Kua tāia hoki he mahere hei whakaatu i te ao o Māui, te moutere o Hawaiki-runga, me ngā wāhi noho o ngā tīpuna. Ko te reo o te kaituhi ko tōna reo ūkaipō. Kei roto nei ētahi
āhuatanga reo nōna ake. Kua waiho aua āhuatanga kia kitea e te kaipānui, kia mau tonu ki te puna reo o ngā tipuranga o nāianei, o muri anō hoki. Hei tauira, ko ētahi kupu kua tuhia hei kupu kotahi; arā, noaiho, kāwhia, me ētahi atu kupu.
Kei ia pūrākau tōna ake kuputaka kia mōhio te kaipānui ki te tikanga o ngā kupu me te aronga i roto i te pūrākau.
Tonoa he kape o te pukapuka mai i Down the Back of the Chair (MOE50650)
- Rauemi Matua
- Ngā Tauira Whakaakoranga
- Ngā Akoranga
- Ngohe
Rauemi Matua
He kōrero whakataki
Ko tēnei kohinga pūrākau he mea whakakao mai i ngā tuhinga whaiaro a te kaituhi a Te Kawana Pitiroi. Nō Ngāti Tuwharetoa ia. Nāna i tuhi hei pūrākau motuhake i roto i ngā tau ki muri, me ōna karakia, waiata hoki. Kua oti te raupapa ki te pukapuka nei hei pānui, hei wānanga hoki mā ngā ākonga me ngā uri kei roto i ngā kura rumaki reo Māori o tēnei wā.
Kua wehewehea ngā pūrākau ki ngā wāhanga e whā, kia rite ngā kōrero ki te tipu o te tangata i tōna ao. Ko te wāhanga tuatahi ko Māui te tamaiti, ko te wāhanga tuarua ko Māui te pōtiki whakahirahira, ko te wāhanga tuatoru ko Māui te tangata, te nanakia, te tupua, ā, ko te wāhanga tuawhā ko Māui te toa, te tupua, te tangata. Heoi ko te mutunga atu o ngā kōrero ko tōna matenga.
Hei āwhina i te kaipānui kua tuhia ētahi whakapapa hei whakaatu i ngā kāwai heke a Māui, ōna mātua me tōna whānau, me ētahi hononga ōna ki ngā tūpuna mō rātou ēnei kōrero. Nā te kaituhi anō ngā whakapapa i tuhi me te mōhio kei tēnā iwi, kei tēnā iwi ōna anō whakapapa, ōna anō kōrero mō tēnei tupuna rongonui.
Kua tāia hoki he momo mahere hei whakaatu i te ao o Māui, te moutere o Hawaiki-runga, me ngā wāhi noho o ētahi o ngā tūpuna.
Ko te reo o te kaituhi ko tōna reo ūkaipō. Kei roto nei ētahi āhuatanga reo nōna ake. Kua waiho aua āhuatanga kia kitea e kaipānui, kia mau tonu ki te puna reo o ngā tupuranga ō nāianei, o muri hoki.
Hei tauira, ko ētahi kupu kua tuhia hei kupu kotahi; pēnei i ‘noaiho’, ‘kāwhia’.
Kei ia pūrākau anō he kuputaka kia mōhio te kaipānui ki te tikanga o ngā kupu me te aronga i roto i te pūrākau.
Ngā whāinga
Ko te whāinga matua ko te whakaputa i ngā kōrero mō Māui ki te reo Māori hei whakatītina i te rangatahi ki te pānui, kia aronui hoki ki ā tātou kōrero tuku iho.
Mā te pukapuka nei e;
- whakaatu i te rerenga kētanga o ngā kōrero whānui kua puta kē mō tēnei tupuna rongonui ki ngā kōrero ā-tētahi iwi ake
- whakatauira, e whakatairanga hoki i te mita o Ngāti Tuwharetoa
- whakawhānui i ngā tānga kōrero mō Māui kia rite ki ngā reanga rangatahi
- whakamana i te tuakiri ahurea me ngā mōhiotanga ahurea
- whakamārama i ngā tikanga me ngā kōrero tuku iho ki te reo o te kaumātua.
Ngā tūmanako o te kaituhi
Tōku rangona tuatahi ki ngā kōrero mō Māui i puta mai i tōku koroua i te wā i noho mātou ki mua i te pākaiahi ki roto i tō mātou whare. I te hoatutanga ki ahau ki te hika i te ahi, i mea mai ia, “Tēna, tahuna ki te tōiti o Māui!” I tēra wā i puta mai ngā kōrero mō Māui rātou ko Mahuika ko Hine-nui-te-pō me Hine-tapeka.
I te mahuetanga o ngā tau ki muri, tae rawa ki tōku haerenga ki te Kura o Te Aute, ki reira rongo anō ki wētehi kōrero i hōmai ki a mātou e te kaiako reo Māori, ko Williams tōna ingoa. Te nuinga o ōna kōrero nā Kāwana Hori Kerei i tuhituhi ki tana pukapuka, Nga Mahi a Nga Tupuna.
He kōrero ōrite me he kōrero rerekē ki wērā nō tōku koroua. Ahakoa ngā rerekē, i mea mai tōku koroua ki ahau, “Kaore e taea te kī, kei te tika wērā kōrero, kei te hē rānei. Engari kia mōhio koe, koinei te āhua o taua tupuna, te pōkaikaha i te tangata. I te mutunga, kei ia tangata, kei ia tangata te whakaaro ko tēhea e tika ana ki a ia.”
Tae pakeke mai, he nui rawa ngā kōrero i hopu i ahau. Ahakoa i iti noaiho wētehi kōrero, i waihotia ki ahau te whakakīkī i ngā wāhi ngaro.
Tae atu ki te wā i tīmata au ki te haere ki ngā moutere o Te Moana-nui-a-Kiwa me te rongo ki wētehi kōrero mō Māui, ahakoa paku, i whakaongaonga i tōku hinengaro ki te tāpiri korero kia oti ai ki ōku nei whakaaro.
I te kore mōhio, hei te wā ka tuhi pukapuka au mō ngā kohinga kōrero mō Māui, kua wareware au ki wētehi o ngā ingoa o ngā tāngata i koha mai i ō rātou kōrero.
Ahakoa kua wareware au ki ngā ingoa o wētehi i hōmai korero ki ahau mō Māui, tēnei te mihi nui ki a rātou.
Ētahi whakamārama a te kaituhi mō Māui
He nui rawa ngā ingoa me ngā korero mo tēnei tūpua rongonui a Māui. Kei ngā motu katoa o Te Moana-nui-a-Kiwa ō rātou ake kōrero mōna. Ahakoa ngā rerekē kei tēnā, kei tēnā, ko te pū o ngā kōrero he ōrite.
Kei te mōhiotia hoki āna mahi i a ia e tupu ana tae atu ki tōna pakeketanga. He tangata kaha ki te mahi māminga. I taea hoki ia ki te whakarerekē i tōna āhua ki tērā o te manu. I tana pakeketanga i whai kaha ia i ngā mahi a Tūmatauenga. Kei te mau tonu tōna mana ki roto i te ao Maori.
Kua āta titiro au ki te nuinga o ngā kōrero mo Māūi. Kei roto i wāku nei tuhi ōku nei whakaaro me ōku mōhiotanga mo tēnei tūpuna. Wētehi he kōrero tawhito, wētehi he kōrero hou. Engari me whakaaro pēnei; ka kore rawa e mutu te hanga kōrero mō Māui. Mai i ngā rautau, i puta mai ngā kōrero o tēnā iwi o tēnā iwi me ngā rerekētanga. Me whakaaro pēnei; i roto i aua kōrero, i puta mai te ‘Māui’ nō roto i tēnā tangata, i tēnā tangata, koinei kei te ora tonu a Māui.
Engari te nuinga o ngā kōrero kua tuhia, he kōrero ngahau noaiho kāore i tino puta mai ngā whakahau. Tērā pea ko Māui anō tērā e mahi māminga ana.
Mō te kaituhi
Heke mai a Te Kanawa Pitiroi i te kawa o ōna mātua tīpuna, i te tuāhu o Te Rangituamatotoru. Koia te tātai hono ki te kāhui maunga me te kāhui wai o Te Puku-o-te-ika-a-Māui! Pārāweranuitia ana tōna reo i ngā marae huri noa i Ngāti Tūwharetoa – ko ia te puna o te kī, te puna o te kōrero, te tangata i whāngaia ki te wai pūangi o Te Puna Whakaata hei whakainu i te iwi.
Nā te roa o tana noho hei māngai mō te ahikā i ngā rōpū maha, he whānui āna wheako me āna pūkenga. Matatau rawa a ia ki te kawe i ngā tini kaupapa kia ea ai ngā moemoeā.
Atu i te pou tikanga, he mātanga reo, he puna mōteatea, he kaipupuri mātauranga ā te iwi, he tangata hūmārie, he tangata mākohakoha, he tangata whakaaro nui mō te iwi.
Nō muri tonu i tōna whānautanga mai ka tae atu tana koroua ki te tiki i a ia, ā, ka tangohia hei tamaiti whāngai mōna. Nā tana tipu i te taha o tōna koroua ka rongo ia i ngā kōrero tuku iho, kōrero tawhito hoki, ā, ka mau mōhio ia ki aua kōrero me ngā tikanga hoki.
Nā Te Kanawa Pitiroi ēnei pūrākau i tuhi i roto i ngā tau roa. Ko Ngāti Rangiita te hapū, ko Ngāti Tūwharetoa te iwi. I whānau mai ia i Ōruanui, i te taha raki o te moana o Taupō.
Mō ētahi kōrero mō Te Kanawa Pitiroi tirohia ngā kiriata o Wakahuia 2016 Episode:
- TE KANAWA PITIROI
Waka Huia 2016 Te Kanawa Pitiroi, primary speaker of the house of Te Heuheu
Mō te ringa toi
Nō Ngāiterangi me Tuwharetoa a Te Maari Gardiner. He tautōhito ia ki ngā mahi toi. E hia kē ngā pukapuka mā te tamariki nāna ngā pikitia i tā. He kaituhi pukapuka hoki a Te Maari, ā, kua tuhi pukapuka mā te tamariki, pukapuka hītori hoki mō tōna marae. Tokowhā āna tamariki, ā, kei Tokaanu ia e noho ana.
Mō ngā pikitia
Kua tāia e te ringa toi tekau mā iwa ngā pikitia mō te pukapuka nei. Ka takoto ia pikitia te taha tonu
o te whārangi taitara o ia kōrero. Tā te mea
e whakaahua ana te pikitia i te taitara o te kōrero.
Ētahi atu kōrero, hononga ipurangi
- A MĀUI TE TIPUA
Maui the Enchanted (Full series)
Torohia te pouaka Mō te rauemi ki raro nei e kite ai ngā rauemi hāngai:
- TWT2002-TSM-Core-Resource-Info_FA (.pdf)
- TWT2002-TSM-Koinei-nga-whakapakehatanga_FA (.pdf)
- Te whakarāpopototanga o ia kōrero mō Māui (.pdf)
Mō te rauemi
Tonoa he kape o te pukapuka mai i Down the Back of the Chair (MOE50650)
Wāhanga Ako: Te Reo Māori, Tikanga ā-Iwi, Ngā Toi
Taumata: Taumata 4, Taumata 5
Kaupapa: Te Aho Ngārahu
