Te Mōhiotanga

Te Tuakiri

Ka tautoko tā te mokopuna mōhio ki a ia anō i tana rongo i te māia, i te hononga, me te kaha ki roto tonu i a ia, ā, ka tautoko tērā i te taha kare ā-roto, i te taha hinengaro, i te taha pāpori hoki o tōna waiora. Ka whakapakari ēnei mōhiotanga i tō te mokopuna kiritau me tana whakapono ki a ia anō, arā, ka tautoko i a ia ki te mōhio ki ōna anō āhua, me te kaingākau ki aua āhua me āheinga tūhāhā, e rite ai ia kia māia i te whakaaturanga o ōna whakaaro, o ōna uara me ōna piropiro. 
Ka ārahi tēnei mōhiotanga i te mokopuna ki te whiriwhiri i ngā kōwhiringa e hāngai ana ki a ia anō. Ka whakapakari tēnei i te manawaroa o te mokopuna kia mauri tau i ngā wā o te panoni, te wero rānei, ā, ka whakamana i a ia kia whai pūtake mō tana tipu, kia whakarite hoki i ana whāinga whaiaro.

Ka mōhio te mokopuna:  

• he nui ngā wāhanga nō te tuakiri, ā, ka rerekē haere i roto i ngā tau
• ka whakaaweawe pea ngā kōrero, ngā mahi me ngā whakaaro o tangata kē i tōna ata whaiaro me tōna tuakiri
• ka puta te ahunga o tōna tuakiri i te ahurea, i ngā tāngata, i ngā kōwhiringa whaiaro hoki
• ka tautoko te noho huānga i tōna waiora katoa
• ka āwhina ngā wāhi hirahira i a ia kia mārama ki ōna uara, kia whakatinana hoki i aua uara
• ka āwhina ngā whanonga, ngā whakaaro me ngā mōhiohio i a ia mō te haumaru tuihono.

Ka whakaatu te mokopuna i tōna mōhio:

• ki te kōrero mō te wāhi ki ngā tuakiri e panoni ana i te ahunga o tōna tuakiri (hei tauira, E rerekē ana ahau ki te taha o ōku hoa, tēnā i te taha o tōku whānau, engari ko au tonu aua āhua e rua. Ka āwhina tēnei i a au ki te ako i ngā āhua e tau ai taku noho ki ngā rōpū rerekē)
• ki te kōrero mō ngā whakaaro pāpori me ngā pēhanga aropā e whakaaweawe ana i te rangatahi (hei tauira, Kei te kōrero ngā tāngata katoa i te ipurangi mō ngā kākahu tika kia komohia — i ētahi wā, ka whakahē ahau i taku tāera i runga i aua kōrero)
• ki te ngoikoretanga o ngā whanonga papare, pērā i te raweke i ngā tautuhinga tūmataiti ā-tuihono, te tuku pūrongo rānei mō ngā kiko kino, hei kaupare katoa i ngā tūraru tuihono
• ki te tūhura i te whakaawenga o ngā hātepe ki ngā wheako tuihono
• ki te kōrero mō ngā whakaawenga o tōna ahurea, ōna kōwhiringa me ngā tāngata i tōna ao ki ōna whakaaro mōna anō
• ki te kōrero mō tā te noho huānga āwhina i ngā taha kare ā-roto, hinengaro me tinana o tōna waiora (hei tauira, I a au ka haere ki te kapa haka, ka rongo au i te kaha o te noho huānga, kātahi ka rongo au i te kaha)
• ki te kite i ngā āhua o ngā wāhi hirahira (hei tauira, te tūrangawaewae, te marae, te tūpuna whare) e ārahi ana i ōna uara, i ōna whakataunga hoki.

Ka mōhio te mokopuna:  

• ka rerekē haere tōna tuakiri ki te taha o ngā tāngata rerekē, ki ngā wāhi rerekē hoki
• ka whakaaweawe pea ngā whakaaro pāpori me te pēhanga aropā i ōna whakapono me tōna tuakiri 
• ka ahu mai te pēhanga tuihono i ngā hoa, i ngā ia, i te wehi rānei kia mahue mai ia 
• e tika ana kia urutau pea ia i ngā horopaki rerekē, ā, kia ū tonu ki ōna uara i aua wā 
• ka āwhina te noho taurite i a ia ki te rongo i te kaha, kia ora tonu hoki
• ka tautoko ngā hononga ki ngā tāngata, te ahurea me ngā wāhi i te waiora 
• ka pakari haere ngā hononga me te hapori i te tautiaki me te whakaute. 

Ka whakaatu te mokopuna i tōna mōhio:

• ki te kite i tōna tuakiri e rerekē haere ana i ngā horopaki rerekē, engari ka ū tonu ki ngā mea hirahira ki a ia (hei tauira, I a au e titikaha ana, ka pērā āku mahi. Engari, I a au e konekone ana, ka rerekē aku mahi. Ka whakamahara i a au, e hia kē nei ōku āhua) 
• ki ngā tauira o te whakaaro pāpori me te pēhanga aropā e whakaaweawe ana i tōna tuakiri, ōna uara me ōna whakapono 
• ki te whakatau i ngā kōwhiringa uaua, e rerekē ana pea ki ngā mahi a ētahi atu, mehemea e hāngai ana ki tōna tuakiri, ki ōna uara, ki ōna whakapono hoki
• ki te āwhina ka puta i tana whakapakari i te mātau matihiko, te atamai kare ā-roto me te tūoho whaiaro mō tana māramatanga ki ngā āhua o ngā kino tuihono, arā, ehara i te mea ka kite ā-kanohi i ngā wā katoa, ehara hoki i te mea ka hua mai i taua wā tonu
• ki ngā tauira o ōna whakataunga e whakaaweawe ana i tōna waiora i te wāheke (hei tauira, Ki te kōwhiri ahau i ngā hoa mākoha, ka pai ōku whakaaro mōku. Engari, ki te noho tahi au me ngā tāngata e whakaweti ana i a au, ka pērā kē ōku whakaaro)
• ki ngā tauira o tā te noho huānga (hei tauira, ki te whānau, te ahurea, te rōpū, te wāhi) āwhina i ngā taha hinengaro, kare ā-roto me tinana o tōna waiora
• ki te whakaatu i te manaakitanga me te tiakitanga i ngā horopaki maha.

Te Mōhiotanga

Te Tipu me te Whanaketanga o te Tinana

Ka tipu, ka whanake hoki te tinana i roto i ngā tau. Ka āwhina tā te mokopuna ako mō ēnei āhua i tana tiaki i tana ora me tana waiora. Kei te mōhio te mokopuna, ko te kai pai me te taiora tētahi ara hei tautoko i te tipuranga, hei aukati i te māuiui, hei whakapiki hoki i te ngao e pīrangitia ana ki te noho, ki te ako, ki te whai wāhi me tana katoa. 
Ka whakamana tēnei māramatanga i te mokopuna ki te whakatau kōwhiringa i runga i te mōhiotanga mō te tiaki i a ia anō. Ka āwhina i a ia ki te aro ki ngā rerekētanga o te tinana, ki te whai māramatanga ki te take mō aua rerekētanga, ki te urupare hoki ki aua rerekētanga i runga i te tautiaki me te māia. Ka ako te mokopuna ki te kōwhiri i ngā kai e ora ai te tinana, e whakaute ai i ngā uara ahurea, e tautoko ai hoki i te oranga paetawhiti. I tōna mōhio ki a ia anō me tōna mana motuhake e tipu ana, ka kaha haere tō te mokopuna mōhio ki ōna haepapa mō tōna anō waiora tinana i ia rā. Ka kite ia i ngā whakaawenga o te whānau, o te ahurea me ngā tuku ihotanga i te ahunga o ngā whakaaro mō te kai, te mōhio ki tōna tinana, me ngā kōwhiringa e pā ana ki te oranga. 
Ka mārama hoki te mokopuna ki te hononga i waenga i te oranga tinana me te waiora kare ā-roto — arā, ka mārama ki ngā hua o te ora, ki te korikori me te whakatā hei tautoko i ngā kare ā-roto, i te māia me te ako. Ka akiaki tēnei mōhiotanga i te mokopuna ki te whakaaro arohaehae e pā ana ki ngā karere waiora i te ao pāpāho me te porihanga, tae rā anō ki te wero i ngā angaparuhi tinana e hē ana me te kōrero horihori. Ka poipoia hoki te mokopuna ki te whakaute i ngā āhua, i ngā āheinga me ngā matea rerekē o te tinana, arā, ka whakatairanga i ngā waiaro kauawhi, ka mimiti hoki te hahani mō te kanorau.

Ka mōhio te mokopuna:  

• nā te pūhuruhurutanga me te tipu ka puta ngā panonitanga i te tinana, ngā kare ā-roto me te pāpori, ā, ka whai pānga aua panonitanga ki te oranga me te waiora
• he hononga rau i waenga i te kai, te neke, te whakatā me te waiora kare ā-roto, ā, ka whakaaweawe aua āhua i ngā piropiro me ngā mahi
• ka ahuahu ngā awenga pāpori (hei tauira, ngā hoa, te arapāho me te ahurea) i ngā waiaro mō te ata tinana me te oranga.

Ka whakaatu te mokopuna i tōna mōhio:

• ki te whakaahua i ngā pānga o te pūhuruhurutanga me te tipuranga o te tinana ki tōna ora me tōna waiora (hei tauira, E kaha ake ana te heke o taku werawera ināianei, ā, me kaha ake au ki te horoi e hāneanea ai taku noho)
• ki te huritao ki ngā whakaawenga i waenga i te kai, te kori tinana, te whakatā me ngā kare ā-roto (hei tauira, A muri i te hākinakina, ka harikoa ake ahau, ā, ka mimiti taku pōkaikaha)
• ki te whakaahua i te hua o ngā awenga o ngā aropā, te ahurea me te arapāho ki ngā whakaaro mō te ata tinana me te oranga (hei tauira, E ai ki ngā pāhopori, e pakari ana, e tūpuhi ana rānei te katoa, engari he rūkahu tērā).

Ka mōhio te mokopuna:  

• ka whakaaweawe ngā panonitanga nā te pūhuruhurutanga i te tuakiri, ngā hononga me ngā whakataunga
• he whakaawenga tōtika i te kai, te neke, te moe me te whakahaere pōkaikaha ki tōna whanaketanga me tōna waiora
• ka ahuahu ngā tirohanga kanorau o te ahurea, te whaiaro me te pāpori i te rongo me te mārama o te tangata ki te oranga
• ka whakaaweawe pea ngā ritenga oranga, ngā arotoka me ngā whakaata i te arapāho ki tō te tangata tirohanga i ngā tinana me te oranga, ā, i te nuinga o te wā e tōkeke-kore ana, e pono-kore ana rānei.

Ka whakaatu te mokopuna i tōna mōhio:

• ki te whakamārama i te whakaawenga o ngā panonitanga i te pūhuruhurutanga ki te tuakiri, ngā hononga me te whakataunga (hei tauira, Kua kite au i te ngū haere o taku hoa. Ka toro au ki a ia, ā, tērā pea ka noho tahi māua i te mutunga wiki)
• ki te whakamahi i ōna mōhiotanga mō te tipu, te taiora me te waiora kia puta mai ngā whakatau whaiaro i runga i te mōhio (hei tauira, Kua tīmata au ki te āta whakarite i aku kai i te wiki, nā te mea he āwhina nui tērā e taiora ake ai ngā kai e kaingia ana e au, ā, ka whakapiki hoki i taku ngao)
• ki te arotake i te whakaawenga o ōna ritenga noho o ia rā (hei tauira, te kai, te moe, te neke, te pōkaikaha) ki tōna ora me tōna whanaketanga (hei tauira, Kua mārama ahau, ka pā mai te ānini, ka rongo hoki i te haukerekere ki te kore au e whakatā i roto i ngā mahi kāinga)
• ki te tātari arohaehae i te arapāho, ngā ritenga ahurea me ngā arotoka mō te oranga me te ata tinana (hei tauira, Ka pōhēhē ētahi he ōrite te ‘ora’ ki te tūpuhi, engari he rerekē te āhua o te ora ki tēnā, ki tēnā)
• ki te whakaatu i tōna tūoho mō ngā wheako, ngā matea me ngā uara rerekē mō te ora me te waiora (hei tauira, Kāore taku hoa i te hākinakina i tēnei wā, nā te mea e māuiui ana ia — ka kauawhi tonu au i a ia ki tō mātou rōpū).

Te Mōhiotanga

Te Haumaru

Ka tautoko te mōhio ki te noho haumaru — i te taha tinana, i te taha kare ā-roto me te taha pāpori — i te mokopuna ki te whakawhanake i tana mana motuhake, i tana manawaroa me tana haepapa. Ka ako te mokopuna ki te kite, ki te whakaute hoki i ōna pae whaiaro me ō tangata kē pae whaiaro, ā, ki te whakaaro ki ngā whakataunga haumaru i ngā horopaki rerekē, tae rā anō ki ngā mahi tika i ngā wāhi tuihono. 
Me rongo te mokopuna i te haumaru i tōna ao e tautoko ai i te taha hinengaro me te taha kare ā-roto o tōna waiora, e wātea ai ia ki te aro ki te ako me te whai hononga pai ki tangata kē. Ka mārama hoki te mokopuna ki te hirahira o te kōkiri whaiaro — te whakaputa i ōna hiahia mōna anō i ngā horopaki e rongo rā ia i te mōrearea. Ka mārama ia, kāore te haumaru i te hāngai ki te manaaki i a ia anake, engari, me manaaki hoki i tangata kē, me whakaatu i te aroha me te tauwhirotanga, me tautoko i ngā mahi e haumaru ai, e kauawhi ai hoki ngā hapori mō te katoa.

Ka mōhio te mokopuna:  

• ka tohu pea ngā urupare kare ā-roto (pērā i te anipā me te mataku) i te haumaru-kore o tētahi horopaki, i te mate rānei kia āta aro atu
• e hirahira ana te pūmautanga o ngā pae kare ā-roto, ngā pae tinana, me ngā pae matihiko kia mau tonu i tōna mana
• ka ahuahu ngā karere pāpori me ngā karere ahurea i ngā māramatanga mō te haumaru, ā, ka ārahi pea ngā uara whaiaro i te āhua o tōna urupare.

Ka whakaatu te mokopuna i tōna mōhio:

• ki te whakaahua i te wāhi ki ngā kare ā-roto, pērā i te āwangawanga, te matakū me te anipā, i tāna tautuhi i te haumaru-kore, i te anipā rānei o ngā horopaki (hei tauira, Mehemea ka rongo au i te mataku i te kēmu, i te wero rānei, he tohu tērā kia kaua pea au e whai tonu i taua ara; Ka āmaimai au i te wā ka hiahia tētahi tauhou ki te kawe i a au ki wāhi kē, he tohu tērā nō te haumaru-kore pea)
• ki te kite i tā te tangata whakawhiti i te pae kare ā-roto, te pae tinana, te pae matihiko rānei, ā, ki te urupare i runga i ngā rautaki whakaute me ngā rautaki titikaha (hei tauira, te whakaputa kōrero, te wehe atu, te whakamōhio atu ki tētahi pakeke whakawhirinaki)
• ki te whakamārama i ngā take e āwhina ana te whakarite me te whakaute i ngā pae kia noho tonu i te haumaru, i te mana, i ngā hononga oranga hoki
• ki te huritao ki te whakaawenga o te pēhanga aropā, ngā arotoka, te arapāho, me ngā kawatau ahurea ki ōna whakaaro mō te haumaru, ā, ki te huritao hoki mō te whakatau kōwhiringa e hāngai ana ki ōna anō uara.

Ka mōhio te mokopuna:  

• ka tautoko te rongo i te haumaru tinana, te haumaru kare ā-roto me te haumaru pāpori i tōna waiora i ngā horopaki tuatini me ngā horopaki hou
• ka āwhina tana kōkiri mōna, mō tangata kē hoki ki te whakaū i te tōkeke, te whakaute me te haumaru 
• ka ārahi pea te tika me te pono i a ia ki te tae ki ngā whakatau matatiki, ahakoa ngā whakaawenga o te pae pāpori me te pēhanga aropā 
• ka ahuahu pea ngā karere arapāho me ngā karere pāpori i ngā whakapono, ngā waiora me ngā whanonga e pā ana ki te haumaru 
• ka hāpai te whanonga whakaute, te kauawhi me te noho huānga i ngā hapori kia haumaru ake, kia kaha ake hoki ngā hononga. 

Ka whakaatu te mokopuna i tōna mōhio:

• ki te whakamahi i ngā mea kei te mōhiotia e ia e pā ana ki te noho haumaru ki te āwhina i a ia mō ngā whakatau pai i ngā horopaki rerekē — i te kura, i te ipurangi, i te hapori rānei 
• ki te whakamahi i te reo titikaha me ngā mahi whakaute ki te tū ki te kōrero i te wā e kauparea ana tētahi, e tūkinotia ana tētahi, e tōkeke-kore ana rānei ngā mahi ki tētahi, ā, ka tautoko hoki i tangata kē kia pērā hoki 
• ki te tae ki ngā whakatau matatiki i runga i te tika me te pono, ahakoa te whakaawenga o te pae pāpori me te pēhanga aropā 
• ki te arotake i te whakaawenga o ngā rongo kōrero, te pae pāpori, ngā whakatairanga, me ngā kōrero ahurea ki ōna whakapono me āna mahi e pā ana ki te haumaru, te tūraru me te whakapono
• ki te mahi i ngā mahi (hei tauira, te kauawhi i tangata kē, te wero i ngā arotoka, te whakatauira i te mākoha) e tika ana ki te whakarite i ngā horopaki e haumaru ana, e wātea ana hoki ki te katoa.

Te Mōhiotanga

Te Tūoho Whaiaro

Ka tautoko tā te mokopuna mōhio ki a ia anō i te taha hinengaro me te taha kare ā-roto o tōna waiora. I a ia e tūhura ana i tōna tuakiri, ka tīmata ia ki te huritao ki ōna uara, ki ōna āheinga, ki ōna whakapono hoki, me ngā tāngata me ngā wāhi e ahuahu ana i a ia. 
Ka ako ia ki te tautohu, ki te whakaingoa hoki i ngā kare ā-roto maha i roto i a ia, i roto hoki i tangata kē, ā, ka mārama ki te whakaawenga o aua kare ā-roto ki ngā whanonga. Mā tēnei atamai kare ā-roto e rite ai te mokopuna ki te āta whakapuaki i ōna kare ā-roto, ki te urupare hoki i runga i te ngākau aroha me te tautiaki i ngā hononga. 
I te mokopuna e whakawhanake ana i te tūoho whaiaro, ka tīmata hoki tana huritao ki te āhua o ōna whakaaro — ka huritao ki ōna kōwhiringa, ka kitea ngā tauira, ka whakaaro hoki ki ngā urupare ki ngā horopaki rerekē. Ka whakapakari tēnei mōhiotanga i tana kaha ki te tū, ki te huritao, ki te āta whakatau i roto i ngā āhua e tautoko ana i tōna waiora me te waiora o tangata kē.

Ka mōhio te mokopuna:  

• e hono ana ngā whakaaro, ngā piropiro me ngā whanonga, ā, ka ahuahu aua āhua i ngā urupare
• ka tautoko te tautohu me te huritao ki ngā kare ā-roto kia āta whakaarohia ngā kōwhiringa.

Ka whakaatu te mokopuna i tōna mōhio:

• ki te whakaahua i te hononga i waenga i ngā whakaaro, ngā piropiro me ngā whanonga (hei tauira, Ki te kore tētahi atu e tuku mihi ki a au, tērā pea ka whakaaro au e riri mai ana ia, ā, ka pōuri au i tērā. Kātahi ka huri tuarā pea hoki ahau — ahakoa kāore pea ia i te paku riri mai) 
• ki te huritao ki ngā wheako kare ā-roto, ā, ka whakamahi i tēnei huritao ki te ārahi i ngā mahi i ngā wā kei te heke mai.

Ka mōhio te mokopuna:  

• ka whakahaere pea ngā piropiro i ngā horopaki rerekē ki ngā rautaki whai hua
• ka āwhina te huritao ki ngā wheako i a ia kia māia ake, kia pai hoki ngā whakatau.

Ka whakaatu te mokopuna i tōna mōhio:

• ki te whakamahi i ētahi rautaki rerekē ki te whakahaere i ngā kare ā-roto, ā, ka huritao ki ngā hua o aua rautaki
• ki te whakamahi i te arotake ki te whakapakari i tōna māia me tōna whakataunga.

Te Mōhiotanga

Ngā Hononga

Ko ngā hononga e pakari ana, e whakaatu ana hoki i te whakaute, koia tētahi wāhanga matua o te taha hinengaro me te taha kare ā-roto o tō te mokopuna waiora. Mā roto mai i ngā pāhekoheko kauawhi me ngā pāhekoheko ngātahi, ka ako haere te mokopuna ki te wāhi ki ngā ritenga me ngā kawatau pāpori i te ahunga o te āhua o tā te tangata whai hononga, o tō te tangata whanonga hoki i ngā horopaki rerekē. 
Ka āwhina tēnei mōhiotanga i te mokopuna ki te whai māramatanga, ki te whakapuaki hoki i ōna ake kare ā-roto, i ōna ake uara, i ōna ake hiahia hoki, i a ia e mārama ana hoki ki aua wāhanga o tangata kē. I roto i te whanaketanga o tōna ngākau aroha, ka pakari haere tana āheinga kia whai hua tana hono ki te tangata i ngā hononga kanorau, ki te urupare hoki ki te raruraru i runga i te tōkeke, i te mākoha me te tautiaki. Ka tautoko ēnei pūkenga i te mokopuna ki te noho tonu, ki te whakapakari hoki i ngā hononga i roto i ngā tau, ā, ka puta te noho huānga, te whakapono me te tautoko taupuhipuhi i āna mahi ako, i ōna pāpori hoki.

Ka mōhio te mokopuna:  

• me mōhio ki ngā tirohanga rerekē, me whakaputa hoki i ngā hiahia i runga i te whakaute e pai ai te mahi tahi ki ētahi atu kia whakatutuki i ngā whāinga ngātahi
• ki te tuku i te whakaaetanga ki te tuari i ngā kiko matihiko, me mārama te tangata ki ngā rerekētanga ka puta pea i te kaha o te kitea, i te horopaki, i te whakapono hoki whai i muri i te whakairinga tuihono
• ko te kimi whakaeetanga i mua i te whakamahi, i te tuari rānei i ngā rawa o tangata kē, koia tētahi ara hei whakaatu i te whakaute ki ngā pae whaiaro o tangata kē, hei ako hoki ki te tautoko i ōna whakataunga
• ka panoni ngā whakaaro o tangata kē, ā, he whakatīkai, he mamae hoki te pēhanga whai i muri i te whakanau.

Ka whakaatu te mokopuna i tōna mōhio:

• ki te whakaahua i ngā horopaki nō ngā tirohanga e rua, neke atu rānei
• kia tōkeke te whiriwhiringa o ngā tūranga me ngā haepapa o te rōpū
• ki te whakawhiti whakaaro i runga i te whakaute, i ngā wā o te whakatete hoki (hei tauira, te takawaenga i tētahi whakatete mā roto mai i te whakarongo ki ngā tirohanga o te katoa)
• ki te whakatau i ngā raru ki ētahi atu i ngā āhua e whai hua ana, e mahi tahi ana hoki (hei tauira, ka tūtohu i tētahi whakataunga ngātahi)
• ki te tautohu i ngā tauira huna o te tōkeke-kore me te kaupare mā roto mai i te whakawhanake pūkenga, pērā i te ngākau aroha, te titikaha, me te kōrero atu ki te tiaki i te whakapono me te waiora pāpori
• ki te tautohu, ki te whakaute hoki i ngā pae whaiaro, ki te urupare tika hoki ina panonihia ana ngā whakaaro o tētahi atu tangata.

Ka mōhio te mokopuna:  

• ka whakaaweawe ngā ritenga pāpori me ngā uara pāpori i te kauawhi me te kanorau
• ka uaua pea te whai i ngā tohu whakaae, inarā e rongo ana te tangata i te āmaimai, te rangirua, te pēhanga rānei kia whai i tētahi ara e anipā ana ki a ia
• i raro i ngā ture o te whakaae, ka rongo pea te tangata i te pēhanga ki te whakaae, ka rangirua rānei te tangata mō ngā ara kia rangona tōna reo, inarā i ngā horopaki e taurite-kore ana te mana, e kaha ana rānei ngā kawatau pāpori 
• i Aotearoa, ko te 16 tau te pakeke manature e whakaae ai te tangata ki te mahi hōkaka. He taihara te mahi hōkaka ki te tangata i mua i taua pakeke i raro i ngā whakaritenga ture hei tiaki i te hunga tamariki me te hunga taiohi, kia kore ai rātou e rongo i te kino me te kaiapo
• he taumaha ngā hua o ngā mahi hōkaka e kino ana (hei tauira, te tuari i ngā whakaahua taupiri i te korenga o te whakaaetanga, te aronga hōkaka e kore e hiahiatia ana)
• ka mahue i te karihika ngā āhuatanga matua o te taupiri tūturu, pērā i te whakaae me te hononga kare ā-roto. Ka whakamahia ngā tinana whaihanga me ngā whanonga whakamōmona ki te whakaahua i ngā paki motuhenga kore.

Ka whakaatu te mokopuna i tōna mōhio:

• ki te kite i te whakaawenga o ngā ritenga pāpori i te kauawhi me te kaupare (hei tauira, te kōrero, te pātai rānei mō ngā take e kauparea ana ētahi rangatahi i ngā kēmu, ngā rōpū, ngā mahi rānei; te huritao ki ngā whakaawenga o ngā ritenga pāpori, pērā i te ira, te arotini, me ngā pūkenga, i ngā tāngata ka kauawhitia) 
• ki te whakaatu i te ngākau aroha ki te tautoko i te hunga kua whakaparahakotia, kua pēhia, kua kauparea rānei 
• ki te whakamahi i ngā pūkenga kōkiri, pērā i te kōrero atu me te whakahaere i ngā āhuatanga o te rōpū
• ki te whakamahi i ngā rautaki ki te whakakaha i te haumaru kare ā-roto, mā roto mai i te urupare i runga i te whakaute ki te pēhanga aropā (hei tauira, ka māia te kī ‘kāo’, ka tū hei taituarā mō tētahi atu tangata, ka ākina ngā kōwhiringa whaiaro)
• ki te huritao ki te whakaawenga o tōna tuakiri ki ōna hononga.

Te Mōhiotanga

Te Atamai mō te Ahupori me ngā Kare ā-Roto

E rerekē ana te whakapuaki kare ā-roto o tēnā tāngata, o tēnā tangata i runga i te tuakiri me te wāhi i reira rā ia, ā, ka mārama hoki te mokopuna ki te motuhaketanga o ngā uara, o ngā kawatau me ngā tikanga o ngā wāhi rerekē, pērā i te kura, i te marae me ngā wāhi whānau. Ka tautoko tēnei māramatanga i te mokopuna ki te kite, ki te whakatau hoki i ōna kare ā-roto i ngā ara e whakaute ana, e aro ana hoki ki te ahurea. I a ia ka ako ki te urupare i runga i te mākoha me te tautiaki mō ngā hiahia kare ā-roto o tangata kē, ka urutau hoki ōna whanonga ki te whakamana i tangata kē, ki te whai hoki i ngā tikanga o ngā horopaki rerekē. I roto i tēnei māramatanga mō ngā kare ā-roto me te ahurea, ka māia haere te mokopuna kia motuhēhē tana whakapuaki i ōna whakaaro, ka tautokona ngā hononga kauawhi, ka whakapakari hoki i tā te mokopuna rongo i te waiora me te noho huānga i ngā hapori rerekē.

Ka mōhio te mokopuna:  

• me whakarongo, me mahitahi, me aro hoki ki te waiaro o te rōpū, e pai ai te whakarite whanonga
• he tohu te hā o te reo, te āhua o te tū, me ngā āhua o te kanohi hei āwhina i ētahi atu tangata ki te kite i te āhuru-kore
• he nui kē atu te ngākau aroha i te māramatanga — me urupare hoki i runga i te tautiaki me te tautoko.

Ka whakaatu te mokopuna i tōna mōhio:

• ki te urutau i ōna whanonga hei tautoko i ngā āhua o te rōpū (hei tauira, ka ngana ia ki te noho hei takawaenga, ki te whai whakaaetanga rānei, ina puta mai he raru)
• ki te kite i ētahi atu e rongo ana i te āmaimai, i te hāneanea-kore rānei
• ki te urupare i runga i te ngākau aroha ki ngā wero pāpori (hei tauira, ka akiaki i ngā hoaako e kauparetia ana, e whakamā ana rānei, kia whai wāhi mai).

Ka mōhio te mokopuna:  

• he uara ngātahi, he ritenga kare ā-roto hoki kei ngā rōpū rerekē
• me tau te mauri, me āta whakaaro, me mahi hoki i runga i te tautiaki e taurite ai ngā kare ā-roto — inarā, i ngā rōpū.

Ka whakaatu te mokopuna i tōna mōhio:

• ki te tautohu i ngā uara rōpū me ngā kawatau kare ā-roto (hei tauira, I tō mātou kapa haka, ka whakarongo tētahi ki tētahi i ngā wā katoa)
• ki te ū ki te taurite kare ā-roto i ngā horopaki rōpū (hei tauira, ka paku wehe atu mehemea ka kaha rawa ngā kare ā-roto, ā, ka hoki atu i a ia e rite ana).

Te Mōhiotanga

Te Aroā me te Whakahaere i te Tinana

Kei te mārama te mokopuna, ko te tautohu i ngā āhua o te nekehanga me te urupare o tōna tinana i ngā mahi ā-tinana rerekē, koia ētahi o ngā wāhanga o te aroā me te whakahaere i te tinana. Ka ako ia kia reretahi ngā āhuatanga neke, pērā i te taurite, i te tū, i te wā me te aroā tinana, i a ia e whakatipu ana i ngā pūkenga tūāpapa, pērā i te oma, i te peke, i te whiu, i te hopu me te taurite. Ka āwhina tēnei mōhiotanga i te mokopuna kia kaha ake te hāngai pū, te haumaru me te urutaunga o tana neke i ngā horopaki maha, pērā i te hākinakina, i te kanikani, i te kapa haka me ngā mahi o ia rā. 
I ōna pūkenga e pakari haere ana, ka tīmata te mokopuna ki te neke i runga i te pūtake me te takune, ā, ka kite i te whakaawenga o te kounga o te nekehanga i tana whai hua me tana ngahau. Ka tautoko tēnei tūāpapa i te waiora tinana mō ngā rā katoa o tōna ao, ka hiki i tana rongo i ngā āheinga tinana, ā, ka whakakaha i te māia me te hiahia ki te whai wāhi atu ki te whānuitanga o ngā wheako tinana. Ka whakaritea hoki te mokopuna ki te whakapai ake, ki te urutau hoki i ōna pūkenga hei urupare ki te panonitanga o ngā mahi ā-tinana kia uaua ake i roto i ngā tau.

Ka mōhio te mokopuna:  

• ki te whakawhenumi i ngā huānga nekehanga huhua (hei tauira, te taurite, te reretahi, te tere, me te rere) hei whakapakari i te mahi
• ki te whai wāhitanga o te reretahi o ngā wāhanga huhua o te tinana i tētahi raupapatanga ki te whai hua o te neke, me te whakahāngai ki ngā whāinga o te mahi
• mā te rautaki, mā te taki, me te whakapau kaha, ka whakamahenitia te neke, ka tautokona hoki te whai wāhi tonutanga
• ki te hāpai a te whakaharatau me te whakahokinga kōrero i te whakahaerenga o te tinana me te whakahekenga o te tūpono ka whara.

Ka whakaatu te mokopuna i tōna mōhio:

• ki te whakawhenumi i ngā huānga o te nekeneke (hei tauira, te peke, te huri, te taunga, te oma, te karo, me te tū anō), ka mutu, e pakari haere ana te rere me te whakahaere
• ki te reretahi o ngā wāhanga huhua o te tinana hei whakatutuki i ngā raupapatanga nekehanga matatini (hei tauira, te tuku tahi i te ringa me te waewae i te wā o te omaoma, o te mawhiti, o te kauhoe rānei)
• ki te manawataki, ki te rere, ki te tūnga hoki i ngā mahi nekeneke roa
• ki te tautoko i ngā ara e pakari ake ai tana neke, te whai hua rānei nā runga i ngā whakahokinga kōrero (hei tauira, te raweke i te kaha, i te tāwhai rānei ka mahi ana i ngā mahi hopu me ngā mahi whiu)
• ki te whakamārama i te āhua o tana whakarerekē i tana neke, kia haumaru tonu ai, kia whai hua ai hoki i tētahi mahi (hei tauira, te mōhio ki te wā me kuku ngā uapuku e pakari ake ai te whakahaere i ngā nekehanga tere, i ngā mahi taurite rānei).

Ka mōhio te mokopuna:  

• ki te whakamahi i ngā rautaki nekeneke whāiti hei whakapakari i te whai hua, i te hāngai pū, me te haumarutanga
• ko te whakamahenitanga o ngā rautaki, ko te tātari i te āhua o tā te tinana neke, me te whakahāngai i ngā whakahokinga kōrero e rerekē ai ngā mahi
• ki te whakaawenga o te tūnga o te tinana, o te rere, o te kaha, o te reretahi hoki ki ngā hua o te neke
• ki ngā mātāpono o te mātai neke tinana (hei tauira, te pū tō ā-papa, te ānga, me te kauwhiti) me tana hāngai ki ngā mahi nekeneke me te whakahaerenga o ngā mahi nekeneke.

Ka whakaatu te mokopuna i tōna mōhio:

• ki te whakamahi i ngā rautaki nekeneke huhua i ngā horopaki e taunga ana ki a ia, me ērā kāore e taunga ana ki a ia (hei tauira, te whakamaheni i ngā tīmatanga oma, i ngā rautaki o te taunga ki te papa, o te whakaheke rānei i te tūpono ka whara)
• ki te whakamaheni i ngā nekehanga nā runga i ngā whakahokinga kōrero me te aromatawai i a ia anō (hei tauira, te mātakitaki i tētahi whitiāhua, me ngā whakahokinga kōrero a tētahi hoa)
• ki te whakarerekē i te tūnga o te tinana me te kaha e tutuki ai ētahi whāinga whāiti o te nekeneke (hei tauira, te whakahaere i te kaha me te whakahāngai i te koki i te wā o te whiu me te patu i tētahi paoro i te hākinakina)
• ki te whakamārama i tā te rautaki whakaawe i ana mahi me te haumarutanga (hei tauira, te whakamārama i te āhua o te piko o ngā pona i te wā o te taunga ki te papa hei whakaheke i te mamae ki ngā ponapona)
• te whakamahi i te māramatanga ki te mātai neke tinana (hei tauira, te taurite, te kauwhititanga, me te tīaroaro tinana) hei whakapakari i te nekehanga.

Te Mōhiotanga

Te Aroā Mokowā me te Aroā Pūāhua, te Rautaki, me te Whakataunga

Ko tā te mokopuna mōhio ki tana tū, nā runga i tōna hāngai ki ētahi atu tāngata me te taiao, koia te tikanga o te aroā mokowā me te aroā pūāhua. Ka āwhina tēnei mōhiotanga i a ia kia haumaru, kia whai hua hoki tana noho i ngā mahi ā-rōpū me ngā mahi takitahi. Ka ako ia ki te rongo i ngā āhua e karapoti ana i a ia — pērā i te panoni i te tere, i te tūranga, i te nekehanga rānei — ki te urutau hoki i ana mahi i taua wā tonu. 
Ka whakarite tēnei i te mokopuna kia whakaaro nui, kia whai rautaki hoki tana whakamahinga i te wāhi, kia rite mō ngā tauira neke, kia urupare hoki ki ngā wero i ngā horopaki mahi tahi me ngā horopaki whakataetae. I a ia e whakawhanake ana i ēnei pūkenga, ka māia haere ia ki te whakaaro ki ngā wā kei te heke mai, kia kakama te whakatau, kia mauri tau hoki — inarā, i te horopaki e rerekē haere ana, i tana mahi tahi rānei ki te taha o tangata kē.

Ka mōhio te mokopuna:  

• me tūoho ki te wāhi, ki te wā, ki ngā mahi hoki a ētahi atu e tika ai te nekehanga i te mura o te ahi
• ka tautoko te whakahāngaitanga o te wawe me te tika o te neke i te haumarutanga, i te rere o ngā mahi, me te angitu i ngā taiao tainekeneke
• ki te whakaawenga o te taiao ōkiko me ngā mahi a ētahi atu ki ngā whakataunga nekehanga
• he mea nui te matapaetanga me te uruparetanga ki ngā whakataunga rautaki e whai hua ana.

Ka whakaatu te mokopuna i tōna mōhio:

• ki te whakatau i ngā whakataunga o te mura i te ahi mō te wāhi, mō te wā, me te āhua o te neke hei urupare ki ngā tūāhuatanga e tere panoni haere ana (hei tauira, i tētahi kēmu kī-o-rahi, ka tere tā te mokopuna panoni i tana ahunga hei karo i te kaiārahi, e kitea ai rānei he wāhi wātea)
• ki te whakahāngai i tana neke e kore ai e tukituki, e rere tonu ai te taki o ana mahi, e tautoko ai rānei i te rere o te mahi a te rōpū
• ki te mātakitaki i ngā nekehanga o ētahi atu me te taiao kia matapae i ngā āhuatanga ka heipū mai (hei tauira, i tētahi wero i waho, ko te kite i te papa e nekeneke haere ana, i te huarere rānei e panoni haere ana, ka panoni ai i tana ara e ū ai tana tauritenga me tana haumarutanga)
• ki te whakaahua i te āhua o te tautoko a ana whakatau i ngā hua ki te rōpū, i te ūnga rānei o tōna anō haumarutanga, o ō ētahi atu rānei (hei tauira, i te wā o te whakaharatau poitūkohu, ka makaia te paoro, ka haukoti rānei nā runga i ngā nekehanga o tana hoa tākaro, tē whai kē ai i ngā mahi kua āta whakamaheretia).

Ka mōhio te mokopuna:  

• me rerekē ngā rautaki me ngā whakahāngaitanga o te mokowā mō ngā mahi nekehanga
• mā te āta whakamahere i mua i te mahi me te whakahāngai i ngā nekehanga e āwhina ai i a ia kia haumaru, kia whai hua hoki te whai wāhi atu i ngā taiao huhua
• ki ngā āhuatanga o te mokowā (hei tauira, te rahi, ngā roherohenga, me ngā taupā) me te whakaawenga o aua āhuatanga ki ngā whakataunga nekehanga
• ka tārai ngā tūranga, ngā whāinga, me ngā āhuatanga o te tīma, i ngā whakataunga nekehanga e whai rautaki ana.

Ka whakaatu te mokopuna i tōna mōhio:

• ki te whakamahere me te whakahāngai i te nekehanga nā runga i te momo mahi me te takoto o te wāhi (hei tauira, i tētahi kēmu poitarawhiti kua whakarerekēhia, me wherawhera ngā mokopuna e tū mai ai ētahi ara makamaka, e kore ai hoki e kaha te kōpā)
• ki te whakahāngai i ngā rautaki māmā e whāomo ake ai te neke, e kore ai e kōpā, e nui ake ai rānei te wāhi wātea i ngā mahi takitahi me ngā mahi ā-rōpū
• ki te urupare ki ngā tūāhuatanga e panoni haere ana mā te whakarerekē i te tere, i te ahunga, i ngā rautaki rānei
• ki te whakamārama i te āhua o te whakaawenga o te wāhi, o te mahi, o ngā mahi rānei a ētahi atu ki ana whakataunga nekehanga (hei tauira, i te wā o te whakariterite i tētahi tauoma tānga i tētahi whare hākinakina pakupaku, me whakarerekē i ngā wāhi e tīmata ai te reihi, e whakawhiti ai hoki i te matire kia hāngai ki te wāhi e wātea ana).

Te Mōhiotanga

Te Ihumanea mō ngā Kare ā-Roto me te Pāpori, te Māramatanga mō te Ahurea me te Horopaki

Kia whai take te neke i runga i te whakaute, me mōhio te mokopuna ki ngā kare ā-roto me ngā āhua o te rōpū, me rongo ia i te hononga ki tangata kē, me whakatinana hoki ia i ngā uara o te rōpū i roto i te nekehanga. Ka āwhina tēnei mōhiotanga i te mokopuna ki te āta rongo i ngā kare ā-roto o tangata kē, kia tika hoki tana urupare ki aua kare ā-roto i roto i ana mahi, ā, ka poipoia te kauawhi me te whakaute o te whai wāhitanga. 
I roto i ngā wheako tinana e ngātahi ana, ka whakatipu te mokopuna i te noho huānga, ka whakapakari hoki i ngā hononga, ā, ka ako ia kia tōkeke ana mahi, kia tautiaki, kia kauawhi hoki i tangata kē. Ka kite te mokopuna i te whakaawe a ngā horopaki o te ahurea me te pāpori i te nekehanga, ā, ka tīmata ia ki te kawe i ngā uara o tōna whānau, o tōna hapū, o tōna hapori hoki — ka whakamana i ngā āhua tuku iho, ka hāpai i ngā kawatau, ka whakaatu hoki i tana tautiaki i te āhua o ana nekehanga. I tana mārama e pakari haere ana, ka kaha ake tā te mokopuna whai whakaaro, tana urupare hoki ki ngā tāngata me ngā taiao e karapoti ana i a ia, kia rongo te katoa i te haumaru, i te whakaute, i te kauawhi hoki.

Ka mōhio te mokopuna:  

• ka tārai te āhua o tana neke me ana whanonga i te tā te rōpū rongo i ngā kare ā-roto me te noho huānga
• ka whakamahia te nekeneke hei rautaki ārahi, hei hāpai, hei whakauru hoki i ētahi atu
• e poipoi ai i te oranga o te katoa mā roto mai i te nekeneke, me ngākau aroha, me tūoho, me takune hoki ngā mahi
• ka whai wāhi ki te ārahi i ngā horopaki o te nekeneke te whakatauira i te tōkeke, i te whakaute, me te whai wāhitanga.

Ka whakaatu te mokopuna i tōna mōhio:

• ki te ārahi i tangata kē mā te whakatairanga i te ngākaupai o ngā kare ā-roto o te rōpū i ngā mahi nekeneke e ngātahi ana (hei tauira, te whakahaere i ētahi mahi whakamahana mā te kōwhiri i ngā mahi e ngahau ana, e whai wāhi ai hoki te katoa, e hāpai nei i tētahi wairua ngākaupai i te rōpū)
• ki te āta whakamahi i te nekeneke e kaha ake ai te rongo i te noho huānga me te hononga i tētahi rōpū (hei tauira, tētahi whakaharatau poi, ka kitea tētahi hoa e raru ana, ka ngū ai tana hāpai i a ia ki te haere tonu, ki te rongo hoki i te kauawhi)
• ki te whakatauira i ngā whanonga kauawhi i ngā mahi nekeneke mā te akiaki i te whai wāhitanga me te hāpai i te māia o ētahi atu
• ki te huritao ki te mahi ārahi, me te whakaahua i taua mahi, i roto i ngā mahi nekeneke, me tana hāpai i te oranga o te katoa (hei tauira, i muri i te whakaharatau kapa haka, ka huritao ki te āhua o te rongo a ētahi atu i te ngahau o te wheako nā runga i tana ngao me tana akiaki).

Ka mōhio te mokopuna:  

• mā te nekeneke e puaki ai, e ū ai hoki ngā uara o tētahi rōpū, pērā i te tōkeke, i te whakaute, me te whanaungatanga
• mā te rongo ngātahi i ngā wheako o te nekeneke e hōhonu ake ai te hononga me te tuakiri o te rōpū
• a whakaata te āhua o tana neke i te taha o ētahi i ana uara, ka whakaawe hoki te taiao o te rōpū.

Ka whakaatu te mokopuna i tōna mōhio:

• ki te whakamahi i te nekehanga hei whakapuaki i ngā uara, pēnei i te tōkeke, i te whai wāhitanga, me te mahi tahi
• ki te tūoho ki ngā āhuatanga o te rōpū me te āta whakapakari i te mahi tahi i te rōpū mā roto mai i te āhua o te whai wāhitanga (hei tauira, te whakahaere i ētahi mahi whakamahana e kauawhi ana, e whakaata ana hoki i ngā uara o te rōpū, pēnei i te manaakitanga me te mahi tahi)
• ki te huritao ki te whakaū a te nekehanga i ngā uara o te rōpū, me tana whakahōhonu i te hononga o te katoa.

Te Mōhiotanga

Ngā Hononga Rau me te Kaitiakitanga

He hononga rau ki waenga i te tangata me te taiao, ā, he kaha te hononga o te waiora o te mokopuna ki te waiora o te ao tūroa. Ka whakaaweawe tana kite i a ia hei wāhanga mō tēnei pūnaha ngātahi i tana rongo i te haepapa, i te noho huānga me te manawaroa. Kei te mōhio ia, ko tana tiaki i te waiora, koia hoki tana tiaki i a ia anō, i tangata kē hoki, ā, ka kitea te whakapapa i roto i tēnei āhua me tā te whakapapa hono i ngā mea ora katoa. Ka akiaki tēnei mōhiotanga i te whakaute me te kaitiakitanga hei whakapuakitanga matua i aua hononga. Ka ako te mokopuna kia taurite, kia aumārire hoki ki te taiao hei tūāpapa mō te waiora paetawhiti. I roto i tēnei tirohanga hononga, ka whakaata āna mahi i te tautiaki, i te hononga, i te haepapa hoki, ā, ka whakapakari i te manawaroa, inarā, i ngā wā e panoni ana te taiao, te pāpori rānei. Ka whakaū tēnei māramatanga i tā te Māori titiro ki te taiao hei mea ora, hei mea tapu, hei mea matua hoki ki te tuakiri me te waiora.

Ka mōhio te mokopuna:  

• ko ngā hononga tauutuutu i waenga i te tangata me te taiao, koia te tūāpapa o te kaitiakitanga
• kei roto i te tiakitanga o te taiao, ko ngā here, ngā haepapa, me te whakahokinga o te waiora ki ngā tāngata me ngā wāhi hoki
• kei roto i te kaitiakitanga ngātahi, ko te whānau, te hapū, te iwi, me ngā hapori whānui e mahi tahi ana ki te tiaki, ki te whakaora hoki i te mauri
• ka whakaata pea ngā mahi ki te tiaki i te taiao i ngā uara, pērā i te manaakitanga, te aroha, me te rangatiratanga.

Ka whakaatu te mokopuna i tōna mōhio:

• ki te whakamārama i ngā whakaawenga o te tangata ki te taiao, o te taiao ki te tangata hoki i roto i te hononga tauutuutu (hei tauira, ka whakamārama i ngā hua ka puta i ngā mahi whakatō rākau ki te oranga o te awa, ki te pakari hoki o te waiora hapori)
• ki te tautohu, ki te huritao hoki ki ōna anō haepapa me ngā haepapa o tangata kē ki te whakatinana i te kaitiakitanga (hei tauira, ka huritao ki āna mahi whaiaro, pērā i te whakaiti i te para, i te tūao rānei, hei wāhanga mō te haepapa whānui o te katoa)
• ki te whakamārama i tā te mahi ngātahi tautoko i te tangata me te taiao (hei tauira, ka tūhura i te tūranga o te marae, te kura, te iwi rānei ki te whakaora i te taiao, ki te whai wāhi hoki ki te waiora o ngā reanga maha)
• ki te whai wāhi atu, ki te arotake hoki i ngā mahi ngātahi mō te kaitiakitanga hei whakaatu i te mahitahi me te tautiaki paetawhiti (hei tauira, ka whai wāhi ki tētahi kaupapa whakaora, ā, ka arotake i ngā hua ka puta i te tirohanga taiao me te tirohanga ahurea).

Ka mōhio te mokopuna:  

• ka hono te whakapapa i te tangata, ngā whenua, ngā wai, me ngā kaiao i roto i ngā reanga, ā, ka noho hei tūāpapa mō te haepapa
• ko te tikanga o te taupuhipuhi, ko te motunga-kore o te waiora o te tangata me te taiao 
• ka whakaata te whakahāwea taiao (hei tauira, te parahanga, te ngarohanga o te kanorau koiora) i te taurite-kore, ā, me whai urupare ā-ringa, ā-ahurea hoki 
• ka mahi tahi pea te mātauranga pūtaiao me ngā mōhiotanga pūtaiao ki te whakahoki i te taurite, ki te whakaora hoki i te mauri. 

Ka whakaatu te mokopuna i tōna mōhio:

• ki te tātari i tā te whakapapa ahuahu i ngā haepapa mō mea wāhi, mō mea momo, mō mea pūnaha hauropi rānei (hei tauira, ka tūhura i ngā pūrākau me te whakapapa e hāngai ana ki tētahi maunga tata hei whakamārama i ngā haepapa kaitiaki) 
• ki te tirohia ngā hua o ngā mahi a te tangata ki te waiora taiao, me ngā hua ka puta i reira ki ngā hapori (hei tauira, ka tātari i te tipuheke o tētahi awa tata mā roto mai i te hono i ngā panonitanga o te whakamahinga o te whenua ki ngā hua ahurea me ngā hua hauropi) 
• ki te whakatairite, ki te whakamahi hoki i ngā mōhiotanga nō te mātauranga pūtaiao, nō te pūtaiao hoki ki te tautoko i ngā mahi whakaora, i ngā mahi toitūtanga hoki (hei tauira, ka whakaritea he urupare, pērā i te whakatō, te kōkiri, te panonitanga rānei o ngā whakamahinga rauemi, e whakamahi tahi ana i te mātauranga pūtaiao me te pūtaiao taiao)
• ki te hanga, ki te parahau hoki i ngā mahi e hoki mai ai te taurite ki ngā taiao tata, hei whakaatu hoki i te māramatanga ki te taupuhipuhi (hei tauira, ka arotake i ngā hua o te āhuarangi hurihuri i roto i te tirohanga o te kaitiaki — ka whakaarohia ngā hua ā-tinana me ngā haepapa ahurea).