Te Mōhiotanga

Te Tuakiri

Ka tautoko tā te mokopuna mōhio ki a ia anō i tana rongo i te māia, i te hononga, me te kaha ki roto tonu i a ia, ā, ka tautoko tērā i te taha kare ā-roto, i te taha hinengaro, i te taha pāpori hoki o tōna waiora. Ka whakapakari ēnei mōhiotanga i tō te mokopuna kiritau me tana whakapono ki a ia anō, arā, ka tautoko i a ia ki te mōhio ki ōna anō āhua, me te kaingākau ki aua āhua me āheinga tūhāhā, e rite ai ia kia māia i te whakaaturanga o ōna whakaaro, o ōna uara me ōna piropiro.  

Ka ārahi tēnei mōhiotanga i te mokopuna ki te whiriwhiri i ngā kōwhiringa e hāngai ana ki a ia anō. Ka whakapakari tēnei i te manawaroa o te mokopuna kia mauri tau i ngā wā o te panoni, te wero rānei, ā, ka whakamana i a ia kia whai pūtake mō tana tipu, kia whakarite hoki i ana whāinga whaiaro. 

Ka mōhio te mokopuna:  

• ka whakaaweawe pea te ao matihiko (pāhopori, atamai hangahanga) i te tuakiri 
• ka puta mai ngā whanonga tuihono e kino ana i ngā kōwhiringa whaiaro me ngā āhuatanga o te rōpū 
• ka ahuahu ngā kaiwhakaaweawe me ngā whakatairanga ka āta whakahāngaihia i ngā whakapono me ngā whanonga mā roto mai i te whakamahinga o te raraunga whaiaro ki te whakatairanga i ngā rauemi me ngā whakaaro 
• ka whakaata pea, ka whakaatu pea hoki te āhua o tana whai wāhitanga ki ngā rōpū me ngā hononga i ōna uara  
• ka āwhina te māramatanga ki ngā whakapono, ngā wheako me ngā tuakiri o tangata kē ki ngā mahi ki te whakarite hapori kauawhi  
• ke wāhanga ngā wāhi — tae rā anō ki te tūrangawaewae me ngā wāhi ahurea — nō tōna tuakiri.

Ka whakaatu te mokopuna i tōna mōhio:

• ki te whakaahua i te whakaaweawe o ngā wheako matihiko ki te tuakiri 
• ki te whakamahi i ngā tohu whakawhiti whakaaro e titikaha ana i runga i te mārama me te māia i a ia e tūhura ana i ngā rautaki ki te noho i te āhuru kore o ngā kare ā-roto me te taha pāpori o ngā ritenga rōpū, o ngā mana kāhikahika rānei 
• ki te arotake arohaehae i ngā pānga o ngā karere arapāho, o ngā kaiwhakaaweawe, o ngā whakatairanga, o ngā ritenga tuihono, o ngā āhuatanga o te rōpū hoki ki te aroā whaiaro, me te wāhi o aua mea ki ngā whaonga kino, pērā i te whakaweti ā-ipurangi 
• ki te mātai i tā te arotoka whakawhāiti i ngā tuakiri tuatini ki ngā āhuatanga pūmau, ki te tautohu i te haukume, ki te whakanui hoki i te tōkeke i roto i ngā pāhekoheko o ia rā 
• ki ngā whakataunga whai whakaaro mō te āhua o tana whai wāhitanga ki ngā rōpū, ngā hononga me ngā hapori, i runga i ōna anō uara  
• ki te whakaute, ki te kauawhi hoki i ngā tāngata me te rerekē o ngā tuakiri, ngā whakapono, ngā wheako rānei ki ō te mokopuna 
• ki te whakarite tauira o ngā wāhi me ngā horopaki rerekē e whakaaweawe ana i te ahunga o tōna tuakiri me tāna whakapuaki i tōna ahurea. 

Ka mōhio te mokopuna:  

• ka whakaaweawe ngā uara, ngā whakapono me ngā wheako e rerekē haere ana i te tuakiri i roto i ngā tau 
• e kaha ana tā te arapāho matihiko whakatairanga i ngā whakaahua angaparuhi o te tuakiri me te āhua, ā, ka puta pea i reira te ata tinana matakawa me te whakakotiti o te tirohanga whaiaro 
• e huna ana tā te arapāho, tā te pae tuihono hoki whakaū i ngā ritenga e whakakotiti ana i te tūoho whaiaro  
• ka āwhina ngā uara i a ia ki te ārahi i āna mahi me ōna hononga  
• ka poipoi te whanonga whakaute me kauawhi i te noho huānga mō te katoa  
• ka whakapakari te hononga ki ngā wāhi i te tuakiri, ā, ka hua mai hoki te haepapa  
• he haepapa ngātahi te tōkeke me te whakaute mō te katoa 
• ka whakaaweawea te haumaru tuihono e te mātau tuihono, e te hoahoa pae, e ngā ritenga pāpori hoki mō te tūmataiti, te whakaae me te papanga aropā 
• ka hua mai te kohuki hinengaro, te mate ihokiri, me ngā hua ā-ture i te whakaweti ā-ipurangi. 

Ka whakaatu te mokopuna i tōna mōhio:

• ki te whakamārama i te whakaawenga o tōna tuakiri i roto i ngā tau i a ia e tipu ana, e ako ana, e whai hoki ana i ngā wheako hou 
• ki te arotake i ngā pānga o te mātau ki ngā hangarau matihiko, te hoahoa pae, me ngā ritenga pāpori ki te haumaru tuihono 
• ki te whakamahi i ngā rautaki papare hei whakahaere i te tūmataiti, te whakaae me ngā pāhekoheko aropā 
• ki te tātari i te whakaawenga o ngā pae tuihono ki ngā hononga, te ata whaiaro, me te whanaketanga whaiaro, ā, ki te whakarite rautaki hoki e haumaru ai te noho i waenga o ēnei whakaawenga 
• ki te whakaatu i ngā rautaki e ū ai te waiora matihiko, tae atu ki te whakahaere i te wā i mua i te mata, ngā urupare kare ā-roto, me ngā hononga tuihono 
• ki te huritao mō ngā uara whaiaro me ngā whakapono, me te whakaawenga o aua mea ki āna mahi, ki ōna hononga hoki  
• ki te hiki i ōna haepapa e haumaru ai, e kauawhi ai hoki tētahi wāhi, e rongo ai te katoa i te whakaute me te whakamānawa 
• ki te whakatinana i te kaitiakitanga mō ngā wāhi e hirahira ana ki a ia, ki tangata kē hoki 
• ki te whakaute, ki te kauawhi hoki i ngā tāngata e rerekē ana ngā wheako, ngā ahurea, ngā tuakiri hoki. 

Te Mōhiotanga

Te Tipu me te Whanaketanga o te Tinana

Ka tipu, ka whanake hoki te tinana i roto i ngā tau. Ka āwhina tā te mokopuna ako mō ēnei āhua i tana tiaki i tana ora me tana waiora. Kei te mōhio te mokopuna, ko te kai pai me te taiora tētahi ara hei tautoko i te tipuranga, hei aukati i te māuiui, hei whakapiki hoki i te ngao e pīrangitia ana ki te noho, ki te ako, ki te whai wāhi me tana katoa.  

Ka whakamana tēnei māramatanga i te mokopuna ki te whakatau kōwhiringa i runga i te mōhiotanga mō te tiaki i a ia anō. Ka āwhina i a ia ki te aro ki ngā rerekētanga o te tinana, ki te whai māramatanga ki te take mō aua rerekētanga, ki te urupare hoki ki aua rerekētanga i runga i te tautiaki me te māia. Ka ako te mokopuna ki te kōwhiri i ngā kai e ora ai te tinana, e whakaute ai i ngā uara ahurea, e tautoko ai hoki i te oranga paetawhiti. I tōna mōhio ki a ia anō me tōna mana motuhake e tipu ana, ka kaha haere tō te mokopuna mōhio ki ōna haepapa mō tōna anō waiora tinana i ia rā. Ka kite ia i ngā whakaawenga o te whānau, o te ahurea me ngā tuku ihotanga i te ahunga o ngā whakaaro mō te kai, te mōhio ki tōna tinana, me ngā kōwhiringa e pā ana ki te oranga.  

Ka mārama hoki te mokopuna ki te hononga i waenga i te oranga tinana me te waiora kare ā-roto — arā, ka mārama ki ngā hua o te ora, ki te korikori me te whakatā hei tautoko i ngā kare ā-roto, i te māia me te ako. Ka akiaki tēnei mōhiotanga i te mokopuna ki te whakaaro arohaehae e pā ana ki ngā karere waiora i te ao pāpāho me te porihanga, tae rā anō ki te wero i ngā angaparuhi tinana e hē ana me te kōrero horihori. Ka poipoia hoki te mokopuna ki te whakaute i ngā āhua, i ngā āheinga me ngā matea rerekē o te tinana, arā, ka whakatairanga i ngā waiaro kauawhi, ka mimiti hoki te hahani mō te kanorau. 

Ka mōhio te mokopuna:  

• ki ngā panonitanga o te tinana, ngā kare ā-roto me te pāpori i te pūhuruhurutanga e whakaaweawe ana i ngā matea ora me ngā whanonga  
• ka āwhina pea tana whakamahinga i ngā mōhiotanga mō te kai, te neke me te waiora i tana whakahaere i ngā panonitanga, ka tautoko hoki pea i te ora  
• ka whakaaweawe ngā kawatau o te whānau, ngā aropā, te arapāho me te ahurea i ngā whakaaro o te tangata mō te kai, te ata tinana me te ora. 

Ka whakaatu te mokopuna i tōna mōhio:

• ki te whakaahua i ngā whakaawenga o ngā panoni pūhuruhurutanga i ngā matea ora me ngā whanonga (hei tauira, Kua ako au ki te whakapiki i ngā taiora mō taku tinana i tēnei wā, nā te mea kei te tere ake taku tipu)  
• ki te whakamahi i ngā rautaki mō te taiora, te neke me te tautiaki whaiaro hei tautoko i tōna waiora i ngā wā o te panoni (hei tauira, I a au e pōkaikaha ana mō ngā aromatawai, ka ngana ahau ki te puta ki waho, nekeneke ai kia wātea taku hinengaro) 
• ki te tātari i ngā whakaawenga o te whānau, ngā aropā me te ahurea ki ngā waiora me ngā kōwhiringa mō te ora me te ata tinana (hei tauira, I ētahi wā ka kōrero whakakata ōku hoa mō te rahi tinana, engari kua mōhio ahau ka pāmamae pea te tangata nā aua momo kōrero) 
• ki te huritao ki ōna urupare ki ngā awenga roto me ngā awenga waho i tōna ora me tōna tuakiri (hei tauira, I ngā wā o mua, kāore au i kai parakuihi i runga i ngā kōrero i kitea i te ipurangi, engari, ināianei ka kōwhiri au i ngā kai e pai ai taku ngao). 

Ka mōhio te mokopuna:  

• me whakauruuru te tuakiri whaiaro ki ngā haepapa mōu me ngā haepapa ki tangata kē nā runga i ngā panonitanga e puta haere ana i te pūhuruhurutanga  
• ka whakaaweawe te mōhiotanga whaiaro, te mōhiotanga ahurea me te mōhiotanga pūtaiao i te waiora tinana  
• ka whakakaha pea ngā karere oranga, te arapāho me ngā pēhanga pāpori i ngā arotoka, ngā kōrero horihori, me ngā kawatau pono-kore  
• ka whakaaweawe te ngākau aroha, te tautika me te whai wāhitanga i ngā āhua o tā te tangata, o tā te hapori hoki rongo i te oranga me te waiora. 

Ka whakaatu te mokopuna i tōna mōhio:

• ki te arotake i te ahuahu o ngā panonitanga e puta tonu ana i te pūhuruhurutanga ki te waiora paetawhiti (hei tauira, Kua ako ahau, mehemea ka rawaka taku moe, ka kai au i te kai ora, ka whai wā hoki ahau ki ōku hoa e tautoko mai ana, nā, ka pakari ake ahau, ka harikoa ake hoki ahau. Kei te mōhio ahau, ka āwhina ēnei ritenga i a au kia noho ora tonu i a au e tipu ake ana, i a au ka tūpono ki ngā wero hou)  
• ki te whakaatu i te whakataunga motuhake hei tautoko i tōna waiora tinana (hei tauira, Kei te mōhio ahau ki te panoni i aku mahi kori tinana o ia rā mehemea e rongo ana au i te iti o taku ngao, e pōkaikaha ana rānei ahau)  
• ki te arotake arohaehae i ngā karere oranga, ngā kōrero arapāho, me ngā kawatau pāpori e whakaaweawe ana i te ata tinana me ngā whanonga oranga (hei tauira, He whakatairanga tēnei mō tētahi hautaonga tangotāoke, engari kāore i te hāngai ki te pūtaiao, ā, he mōrearea pea)  
• ki te wero i te kōrero horihori, te hahani, ngā arotoka rānei e pā ana ki te tinana, te kai, me te oranga (hei tauira, I wero au i tētahi kōrero whakakata mō te rahi tinana i te kura nā te mea ka whakaū noa i ngā whakaaro kino)  
• ki te kite i ngā matea, ngā uara me ngā wheako e kanorau ana, e ahuahu ana hoki i ngā kōwhiringa oranga o tangata kē, ā, ki te urupare i runga i te ngākau aroha me te whakaute (hei tauira, Kei te mārama ahau, kāore te katoa e whai wāhi ana ki ngā kai māota, e wātea ana rānei ki te kori tinana, ā, ka whai pānga tērā ki ngā kōwhiringa). 

Te Mōhiotanga

Te Haumaru

Ka tautoko te mōhio ki te noho haumaru — i te taha tinana, i te taha kare ā-roto me te taha pāpori — i te mokopuna ki te whakawhanake i tana mana motuhake, i tana manawaroa me tana haepapa. Ka ako te mokopuna ki te kite, ki te whakaute hoki i ōna pae whaiaro me ō tangata kē pae whaiaro, ā, ki te whakaaro ki ngā whakataunga haumaru i ngā horopaki rerekē, tae rā anō ki ngā mahi tika i ngā wāhi tuihono.  

Me rongo te mokopuna i te haumaru i tōna ao e tautoko ai i te taha hinengaro me te taha kare ā-roto o tōna waiora, e wātea ai ia ki te aro ki te ako me te whai hononga pai ki tangata kē. Ka mārama hoki te mokopuna ki te hirahira o te kōkiri whaiaro — te whakaputa i ōna hiahia mōna anō i ngā horopaki e rongo rā ia i te mōrearea. Ka mārama ia, kāore te haumaru i te hāngai ki te manaaki i a ia anake, engari, me manaaki hoki i tangata kē, me whakaatu i te aroha me te tauwhirotanga, me tautoko i ngā mahi e haumaru ai, e kauawhi ai hoki ngā hapori mō te katoa. 

Ka mōhio te mokopuna:  

• ka ahuahu ngā awenga pāpori, ngā awenga ahurea me ngā awenga whaiaro i tā te tangata mōhio me tā te tangata urupare ki te haumaru me te tūraru 
• ka whakaaweawe pea ngā pēhanga kare ā-roto, ngā pēhanga pāpori me ngā pēhanga matihiko i te whanonga me te whakataunga  
• ka whakaaweawe pea te mana kāhikahika, ngā arotoka, me te haukume i tā te tangata rongo i te haumaru me te noho huānga: 
• e kōrero ana te mana kāhikahika mō ngā hua o ngā rerekētanga i te awenga, te mana, te mana whakahaere rānei i waenga i ngā tāngata, i ngā rōpū rānei ki tā te tangata rongo i te haumaru, te waiora, te wātea rānei ki te mahi. He tūraru haumaru tēnei mehemea ka whakamahia ki te whakatuanui, ki te kaupare, ki te whakahaere rānei i tangata kē mā roto i ngā āhua e whakawehi ai i te taha kare ā-roto, te taha tinana, te taha hinengaro, te taha pāpori, te taha wairua rānei o te waiora. 
• kua whakawhāiti rawa ngā arotoka, ā, ka kūare ki ngā rerekētanga kiritahi. Ka hua mai pea ngā horopaki haumaru-kore i ngā arotoka nā te mea ka rongo te tangata i te whakawā, i te kaupare, i te uara-kore rānei. 
• he awenga tōkeke-kore te haukume, e whakaaweawe ana i ngā wheako o ngā tāngata. Ka hua mai pea ngā horopaki haumaru-kore memehea ka whāia te haukume ki te kaupare, ki te whakawā, ki te tautika-kore rānei.  
• e puta ai ngā horopaki haumaru e whakaute ana, me kite te rangatiratanga, te ngākau aroha me ngā mahi kauawhi. 

Ka whakaatu te mokopuna i tōna mōhio:

• ki te arotake arohaehae i te ahuahu o ngā awenga pāpori, ngā awenga ahurea me ngā awenga whaiaro i tō te tangata mārama ki te haumaru me te tūraru  
• ki te tautohu, ki te whakahaere hoki i ngā pēhanga kare ā-roto, ngā pēhanga pāpori, me ngā pēhanga matihiko i ngā ara e tautoko ana i te waiora whaiaro me ngā kōwhiringa whakaute  
• ki te tātari i ngā whakaawenga o te mana kāhikahika, ngā arotoka me te haukume ki te haumaru, te tuakiri me te noho tahitanga o te tangata  
• ki te whakaatu i te rangatiratanga mā roto mai i te hāpai hohe i ngā horopaki whakaute e kauawhi ana hei tautoko i te haumaru me te noho huānga o tangata kē.  

Ka mōhio te mokopuna:  

• ka whakaaweawe ngā mahi me ngā whanonga i te haumaru kare ā-roto, te haumaru tinana me te haumaru pāpori o ngā tāngata me ngā hapori  
• he mea nui te whakarite me te whakamārama i ngā pae whaiaro hei tiaki i tōna waiora, hei whakaute hoki i tangata kē  
• ki ngā mahi ki te whakatau raru me te tautoko tonu i te haumaru, te tōkeke, me ngā hononga pai  
• ka whakaū te tautohu me te whakatika i ngā whanonga haumaru-kore, i ngā whanonga kaupare rānei i ngā mōtika me te mana o te katoa 
• he hua paetawhiti pea ka puta ki te waiora o te tangata mehemea ka rongo tonu ia i te haumaru-kore, ka whakaiti hoki pea i tana āheinga ki te puāwai  
• ka tautoko ngā horopaki kauawhi e whakaute ana i te waiora, te noho huānga me te haumaru o te katoa. 

Ka whakaatu te mokopuna i tōna mōhio:

• ki te arotake arohaehae i te whakaaweawe o ngā whanonga whaiora me ngā whanonga rōpū ki te haumaru me te waiora o tangata kē i roto i ngā horopaki rerekē  
• ki te whakaatu i ngā mahi ki te whakarite, ki te whakamārama, ki te whakaū hoki i ngā pae whaiaro i ngā ara e whakatairanga ana i te whakaute me te haumaru e pātahi ana  
• ki te whakamahi i ngā rautaki whakatau raru e tautoko ana i te haumaru kare ā-roto, i ngā hononga hoki  
• ki te urupare ki te whanonga haumaru-kore, te whanonga kaupare rānei i ngā ara e titikaha ana, e whakaute ana hoki hei tautoko i te tōkeke me te kauawhi  
• ki te whakamārama i ngā hua ka puta pea ki te whanaketanga whaiaro me te waiora hinengaro i roto i ngā tau mehemea ka rongo tonu te tangata i te haumaru-kore o ngā kare ā-roto, te pāpori me te tinana 
• ki te mahi i ngā mahi e whakarite tahi ai i ngā horopaki e kauawhi ana, e whakaute ana, e whakamaru hoki ana i te haumaru me te mana o te katoa. 

Te Mōhiotanga

Te Tūoho Whaiaro

Ka tautoko tā te mokopuna mōhio ki a ia anō i te taha hinengaro me te taha kare ā-roto o tōna waiora. I a ia e tūhura ana i tōna tuakiri, ka tīmata ia ki te huritao ki ōna uara, ki ōna āheinga, ki ōna whakapono hoki, me ngā tāngata me ngā wāhi e ahuahu ana i a ia.  

Ka ako ia ki te tautohu, ki te whakaingoa hoki i ngā kare ā-roto maha i roto i a ia, i roto hoki i tangata kē, ā, ka mārama ki te whakaawenga o aua kare ā-roto ki ngā whanonga. Mā tēnei atamai kare ā-roto e rite ai te mokopuna ki te āta whakapuaki i ōna kare ā-roto, ki te urupare hoki i runga i te ngākau aroha me te tautiaki i ngā hononga.  

I te mokopuna e whakawhanake ana i te tūoho whaiaro, ka tīmata hoki tana huritao ki te āhua o ōna whakaaro — ka huritao ki ōna kōwhiringa, ka kitea ngā tauira, ka whakaaro hoki ki ngā urupare ki ngā horopaki rerekē. Ka whakapakari tēnei mōhiotanga i tana kaha ki te tū, ki te huritao, ki te āta whakatau i roto i ngā āhua e tautoko ana i tōna waiora me te waiora o tangata kē. 

Ka mōhio te mokopuna:  

• ka ahuahu tōna ao ā-roto me ngā āhua e karapoti ana i a ia i ōna kare ā-roto  
• ka āwhina te māramatanga ki ōna whakaaro i a ia ki te whakahaere i ngā kare ā-roto, ki te whakatau hoki i ngā kōwhiringa pai. 

Ka whakaatu te mokopuna i tōna mōhio:

• ki te arotake i te ahuahu o ngā āhua ō-roto, ō-waho hoki i ōna kare ā-roto. Hei tauira, ka whakamārama i tētahi horopaki pōkaikaha (hei tauira, te tuku kauhau) me te anipā i puta, ā, ka tautohu i ngā āhua ō-roto (hei tauira, te kore whakapono ki a ia anō, ngā hapa o mua) me ngā āhua ō-waho, pērā i ngā aropā e mātakitaki ana me te māharahara mō te whakawā 
• ki te whakamahi i ngā rauemi whiringa hirikapo ki te mārama, ki te whakatau hoki i ngā urupare kare ā-roto whai i muri i tētahi wheako kare ā-roto kaha. Hei tauira, te whakamahi i tētahi rauemi whakarite whāinga, i tētahi anga arotake whaiaro rānei (hei tauira, ‘I ahatia? I pēhea aku piropiro? He aha ngā rongoā? Ki te pērā anō, me aha ahau?’). 

Ka mōhio te mokopuna:  

• ka tautoko te māramatanga ki ngā kare ā-roto i te whanaketanga, ngā hononga me te waiora  
• ka āwhina te huritao ki ngā wheako o mua ki te ārahi i ngā whanonga me ngā whakatau i ngā wā kei te heke mai.  

Ka whakaatu te mokopuna i tōna mōhio:

• ki te arotake arohaehae i ngā hua o te māramatanga ki ngā kare ā-roto ki te tautoko i te whanaketanga whaiaro me te waiora whaiaro (hei tauira, te tuhi, te kōrero rānei mō tana tautohu i tōna riri i tētahi raru me tana whakatau kia wehe atu, kia mauri tau rānei, tēnā i te whakanui i te raru — ā, i whakatipu tērā i te whakapono o tangata kē ki a ia)  
• ki te whakaaweawe i ngā āhua o tana whakawhiti whakaaro ki ngā kaiako, ngā aropā me ngā tāngata whai mana  
• ki te whakamahi i te whakaaro arotake kia whai māramatanga mō ngā wheako o mua, kia ārahi hoki i ngā whanonga a muri iho, hei tauira, whai i muri i te mūhore, te matekiri rānei (hei tauira, kāore i whai wāhi atu ki tētahi tīma, i whiwhi rānei i te whakahokinga arohaehae), kia whakaahua i tana whai mōhiotanga ki ōna kare ā-roto, i ōna akoranga mōna anō, ā, i ōna whakaaro mō te whakamahinga i aua akoranga hei whakatipu i a ia. 

Te Mōhiotanga

Ngā Hononga

Ko ngā hononga e pakari ana, e whakaatu ana hoki i te whakaute, koia tētahi wāhanga matua o te taha hinengaro me te taha kare ā-roto o tō te mokopuna waiora. Mā roto mai i ngā pāhekoheko kauawhi me ngā pāhekoheko ngātahi, ka ako haere te mokopuna ki te wāhi ki ngā ritenga me ngā kawatau pāpori i te ahunga o te āhua o tā te tangata whai hononga, o tō te tangata whanonga hoki i ngā horopaki rerekē.  

Ka āwhina tēnei mōhiotanga i te mokopuna ki te whai māramatanga, ki te whakapuaki hoki i ōna ake kare ā-roto, i ōna ake uara, i ōna ake hiahia hoki, i a ia e mārama ana hoki ki aua wāhanga o tangata kē. I roto i te whanaketanga o tōna ngākau aroha, ka pakari haere tana āheinga kia whai hua tana hono ki te tangata i ngā hononga kanorau, ki te urupare hoki ki te raruraru i runga i te tōkeke, i te mākoha me te tautiaki. Ka tautoko ēnei pūkenga i te mokopuna ki te noho tonu, ki te whakapakari hoki i ngā hononga i roto i ngā tau, ā, ka puta te noho huānga, te whakapono me te tautoko taupuhipuhi i āna mahi ako, i ōna pāpori hoki. 

Ka mōhio te mokopuna:  

• ka whakaaweawe āna ake mahi me ngā mahi o tangata kē i te haumaru kare ā-roto me te noho huānga 
• ka uaua pea te tautohu i ngā horopaki uruhi nā te mea ka huna pea te tīmatanga o ngā horopaki uruhi, ā, ka kore pea e rangona te kino i te tīmatanga 
• ka ahuahu te mana, te whakapono, me te haumaru hononga i te whakaae, ā, ka āwhina te tautohu i ēnei āhua i te tangata ki te whakaū i ngā pae whaiaro 
• ka whai pānga pea te taurite kore o te mana i te āheinga o te tangata ki te whakaae, ki te kore e whakaae rānei i runga i te wātea me te haumaru 
• e whakautea ai te whakaae, me mōhio ki ngā āhuatanga mana me ngā pēhanga pāpori i ngā hononga, me mātua whai kia pātaihia, kia āta whakamāramahia atu, kia uruhi kore hoki ngā whakatau 
• i Aotearoa, ko te 16 tau te pakeke manature e whakaae ai te tangata ki te mahi hōkaka. He taihara te mahi hōkaka ki te tangata i mua i taua pakeke. E kore rawa e whai mana te whakaae o te tangata e rongo ana i te kaha o te waipiro, o ngā pūroi rānei, ā, ka whakakorea te whakaae i te korenga o te tangata e wātea ana kia whakaae i runga i te mōhio me te hiahia. 
• ka ahuahu ngā uara me ngā whakapono ā-ahurea, ā-whakapono, ā-whānau hoki i ngā waiaro mō te whakaae, te whanonga hōkaka, me ngā mōtika me ngā haepapa i ngā hononga 
• kei ia tangata te mōtika mō te motuhake ā-tinana me te mōtika kia whakaae i runga i te mōhio me te whakaute mō te mahi hōkaka, te hauora hōkaka, me ngā hononga, e hāngai ana ki ngā uara me ngā mātāpono whaiaro 
• ka whakaaweawe ngā panonitanga taiaki i ngā piropiro, te whanaketanga whaiaro, me ngā hiahia hōkaka, ā, ka tautoko te tautohunga o ēnei whakaawenga i te tangata ki te whakahaere i ngā whakaawenga i runga i te whakaute me te haumaru 
• ka whai wāhi ki te whanaketanga hōkaka, ko te tipuranga o ngā uara, te māramatanga ki te whakaae, me te mōhio ki ngā ara ki te whai i te akoako me te tautoko e matatapu ana mō te hauora hōkaka ina hiahiatia ana 
• ka tautoko te māramatanga ki te whakaae, te whakawhiti whakaaro, me te whiwhita kare ā-roto i ngā hononga hōkaka e hauora ana, e matareka ana hoki. 

Ka whakaatu te mokopuna i tōna mōhio:

• ki te aromatawai i te whakaute, te tōkeke me te haumaru o ngā hononga  
• ki te whakamahi i ngā rautaki ki te whakahaere i ngā hononga tata (hei tauira, ka āta whakawhiti whakaaro i runga i te whakaute, ka whakaritea ngā pae oranga, ka whai wā ki te huritao whaiaro, ka whakahaere i te pōkaikaha me ngā kare ā-roto nui, ka tono āwhina ina pīrangitia)  
• ki te tātari i tā te arotoka whakawhāiti i ngā tuakiri tuatini ki ngā āhuatanga pūmau, ki te whakarite rautaki hoki ki te tautohu i te haukume, ki te whakakaha hoki i te tōkeke 
• ki te hāpai hohe i ngā horopaki e haumaru kare ā-roto ana, e tautoko ana hoki (hei tauira, ka kauawhi i tangata kē, ā, ka whakahē i te kaupare, ka wero i te whanonga mākoha-kore, ka whakatauira i te mākoha me te whakaute, ka whai hua te whakataunga o ngā raru). 

Ka mōhio te mokopuna:  

• ka ārahi ōna uara whaiaro i ōna whakataunga i ngā hononga, ā, he haepapa takitahi, he haepapa takirōpū hoki ki te poipoi i ngā āhua o te rōpū kia whakaute 
• ka ahuahu te mana hononga, te whakaraerae kare ā-roto, me te whai wāhitanga ki ngā mōhiotanga i te whakaae, ā, ka whakaaweawe hoki pea i tā te tangata āhei ki te whakatau i runga i te mana motuhake 
• he tukanga hononga te whakaae, ka whakaaweawetia e ngā āhuatanga rau pērā i te mana, ngā ritenga aropā, me te whirinaki kare ā-roto 
• he nui ngā ara āraihapū, kia kauparea ngā hapūtanga kāore e hiahiatia ana. Ka whakaiti hoki ngā tikanga haukoti i te tūraru o ngā mate paipai.  
• ka whakawhiti ngā mate paipai i ngā pānga hōkaka, ā, ka whai pānga pea ki ngā pūnaha maha o te tinana. Ka āwhina pea te whai wāhitanga ki ngā ratonga hauora mō te hōkaka (pērā i te whakamātau, te rongoā, me te tohuora) i tā te tangata whakaū i te waiora whaiaro me ngā hononga. 
• ka hua mai pea ngā raru nui ā-hinengaro, ā-pāpori, ā-ture hoki i te whai wāhitanga atu ki ngā whanonga hōkaka e kino ana, pērā i te tuaritanga o ngā kiko taupiri i te korenga o te whakaaetanga me te whakaipoipo kāore e hiahiatia ana 
• e kaha ana te karihika ki te whakaatu i ngā whakaata whakakotiti, me ngā whakaata motuhenga kore o te mahi hōkaka, te whakaae me ngā hononga. Ka kino pea te whakaawenga i ngā waiaro, ngā kawatau, me ngā whanonga, ā, ka whai wāhi hoki ki ngā mahi haumaru-kore, ki ngā mahi whakaute-kore hoki. 
• i tōna tikanga, me haumaru, me whakaute, me ngahau pātahi te mahi hōkaka i waenga i ngā pakeke e whakaae ana 
• he nui ngā tukanga whaiaroaro (hei tauira, te pikinga o te hoto manawa, te nui o te toto e rere ana ki te paehema) i tā te tinana urupare i te whakahihiko hōkaka. 

Ka whakaatu te mokopuna i tōna mōhio:

• ki te whakatau i runga i ngā uara i roto i ngā hononga hoa me ngā tūranga rōpū (hei tauira, ka mau ki ōna mātāpono i runga i te whakaute)  
• ki te mātai i tā te arotoka matareka whakaū i ngā kawatau o te rōpū, me te whakahaere i te mana motuhake o ia tangata ki te wero i ngā pūmāramarama, ki te whakanui hoki i ngā whakaahuahanga kanorau 
• ki te whakahaere i ngā whakatete i runga i te kōhure me te ngākau aroha (hei tauira, ka kōrero mōna anō, ka tuku hoki hei tautoko i te whakataunga raru)  
• ki te hiki i te haepapa ki te whakatau i ngā take i runga i te tōkeke me te whai hua  
• ki te hāpai i te whakatipuranga o ngā ahurea e whakaute ana, e kauawhi ana hoki i te kura me te hapori (hei tauira, ka mātua whai kia rangona hoki ngā reo e ngū ana). 

Te Mōhiotanga

Te Atamai mō te Ahupori me ngā Kare ā-Roto

E rerekē ana te whakapuaki kare ā-roto o tēnā tāngata, o tēnā tangata i runga i te tuakiri me te wāhi i reira rā ia, ā, ka mārama hoki te mokopuna ki te motuhaketanga o ngā uara, o ngā kawatau me ngā tikanga o ngā wāhi rerekē, pērā i te kura, i te marae me ngā wāhi whānau. Ka tautoko tēnei māramatanga i te mokopuna ki te kite, ki te whakatau hoki i ōna kare ā-roto i ngā ara e whakaute ana, e aro ana hoki ki te ahurea. I a ia ka ako ki te urupare i runga i te mākoha me te tautiaki mō ngā hiahia kare ā-roto o tangata kē, ka urutau hoki ōna whanonga ki te whakamana i tangata kē, ki te whai hoki i ngā tikanga o ngā horopaki rerekē. I roto i tēnei māramatanga mō ngā kare ā-roto me te ahurea, ka māia haere te mokopuna kia motuhēhē tana whakapuaki i ōna whakaaro, ka tautokona ngā hononga kauawhi, ka whakapakari hoki i tā te mokopuna rongo i te waiora me te noho huānga i ngā hapori rerekē. 

Ka mōhio te mokopuna:  

• ka whakaaweawe ngā horopaki rerekē i ngā āhua o ngā rōpū ki te mahi me te whakawhiti  
• he tauira te kaupare, te whakatoihara, te mana taurite-kore, me te arotoka nō te tōkeke-kore  
• ka puta te haumaru kare ā-roto i te whakaute, te whakarongo, me te wātea o te tangata kia tū i tōna ake tūhāhātanga  
• me āta whai i ētahi mahi e kauawhi ai te horopaki (hei tauira, me pōwhiri ki tangata kē, me urutau ki ngā matea kanorau, me wero i ngā arotoka).

Ka whakaatu te mokopuna i tōna mōhio:

• ki te arotake i te whakaawenga o ngā horopaki i te whanonga o te rōpū  
• ki te tautohu, ki te wero hoki i ngā āhua pāpori e tōkeke-kore ana (hei tauira, ka kite i whakatuanui o tētahi reo i te rōpū, ā, ka pātai atu, ‘He aha ngā whakaaro o ētahi atu?’)  
• ki te poipoi i te haumaru kare ā-roto mō ngā aropā (hei tauira, ka kōrero ki tētahi e hūkokikoki ana: ‘Kei te pai koe? Kei te hia kōrero mai koe?’)  
• ki te āta hāpai i te whakatipuranga o ngā horopaki kauawhi (hei tauira, ka akiaki i te katoa ki te mahi tahi i ngā mahi ā-rōpū, ka mātua whai kia rangona ngā reo e ngū ake ana).  

Ka mōhio te mokopuna:  

• me āta mahi, me āta tautiaki hoki e whakaute ai ngā hononga  
• ki ngā rautaki hei rauemi māna ki te whakatau i ngā raru, pērā i:  
  • te whakarongo  
  • te tuku  
  • te urupare i runga i te mauri tau  
  • te whai i ngā ara whakamua, tēnā i te heitara  
• kei roto i te whakapuakitanga o ngā kare ā-roto ko te whakaingoa i ngā piropiro, ko te kōrero mōu anō, ko te whiriwhiri hoki i te wā me te hā o te reo e tika ana  
• kei roto i te kauawhi ko te whakamana i ngā reo, ngā wheako me ngā matea e rerekē ana 
• kei roto i te tōkeke ko te tautika — me whai kia tika ngā mahi ki tēnā, ki tēnā, tēnā i te whai kia ōrite ngā mahi ki te katoa.  

Ka whakaatu te mokopuna i tōna mōhio:

• ki te whakaū i ngā hononga whakaute i runga i te whāinga kia pērā (hei tauira, ka whakaute i ngā pae o tangata kē, ka kōwhiri kia kaua e komekome, kia kaua rānei e urupare i ngā raru ka puta i te ipurangi)  
• ki te whakatau whai hua i ngā wero pāpori (hei tauira, ka whakapāha tūturu, ā, ka noho haepapa mō ōna hē)  
• ki te whakapuaki i ōna kare ā-roto kia mārama, kia whai whakaaro hoki (hei tauira, ka kōwhiria te horopaki tika ki te kōrero mō ngā kare ā-roto, pērā i te wā e tūmataiti ana, e mauri tau ana hoki)  
• ki te hāpai i te kauawhi me te tōkeke (hei tauira, ka pōwhiritia tētahi e rite tona ana te kauparetia ōna).  

Te Mōhiotanga

Te Aroā me te Whakahaere i te Tinana

Kei te mārama te mokopuna, ko te tautohu i ngā āhua o te nekehanga me te urupare o tōna tinana i ngā mahi ā-tinana rerekē, koia ētahi o ngā wāhanga o te aroā me te whakahaere i te tinana. Ka ako ia kia reretahi ngā āhuatanga neke, pērā i te taurite, i te tū, i te wā me te aroā tinana, i a ia e whakatipu ana i ngā pūkenga tūāpapa, pērā i te oma, i te peke, i te whiu, i te hopu me te taurite. Ka āwhina tēnei mōhiotanga i te mokopuna kia kaha ake te hāngai pū, te haumaru me te urutaunga o tana neke i ngā horopaki maha, pērā i te hākinakina, i te kanikani, i te kapa haka me ngā mahi o ia rā. I ōna pūkenga e pakari haere ana, ka tīmata te mokopuna ki te neke i runga i te pūtake me te takune, ā, ka kite i te whakaawenga o te kounga o te nekehanga i tana whai hua me tana ngahau. Ka tautoko tēnei tūāpapa i te waiora tinana mō ngā rā katoa o tōna ao, ka hiki i tana rongo i ngā āheinga tinana, ā, ka whakakaha i te māia me te hiahia ki te whai wāhi atu ki te whānuitanga o ngā wheako tinana. Ka whakaritea hoki te mokopuna ki te whakapai ake, ki te urutau hoki i ōna pūkenga hei urupare ki te panonitanga o ngā mahi ā-tinana kia uaua ake i roto i ngā tau. 

Ka mōhio te mokopuna:  

• e mātāmua ana te hāngai pū o te whakahaere i te tinana e angitu ai ia i ngā mahi me ngā taiao huhua 
• ki te whai wāhitanga o te wā, o te kaha, me te reretahi ki te whakahaere i te tinana hei whakatutuki i ngā whāinga o ngā mahi huhua 
• ki te pānga o ngā āhuatanga o te taiao (hei tauira, ngā papa, te mokowā, me te huarere) ki te āhuatanga o te haumarutanga me te whai hua o te mahi me tutuki 
• ki te tautoko o roto i te mārama ki a ia anō me te whakahokinga kōrero e whakamaheni tonuhia ai te whakahaerenga o te nekehanga. 

Ka whakaatu te mokopuna i tōna mōhio:

• ki te whakahaere i ana nekehanga i runga i te tika i ngā horopaki ōkiko, me ngā horopaki pāpori e huhua ana (hei tauira, te whakahāngai i te tere o te oma, me te wāhi e tau ai ngā waewae i runga i te pātītī me te raima) 
• ki te whakahāngai i te rere, i te kaha, me te reretahi o ngā mahi nā runga i ngā mahi me ngā taiao e huhua ana (hei tauira, te whakahaere i te kaha me te ahunga ka maka ana i te paoro i tētahi tākaro ā-tīma kei roto i te whare, kei waho rānei) 
• ki te whakaatu i te nekehanga e haumaru ana, e whai hua ana hoki i ngā āhuatanga e rerekē haere ana (hei tauira, te urupare ki ngā papa torehapehape mā te raweke i te tauritenga me te roa o te tāwhai i te wā o te haere pakituri, o te oma rānei i ngā ara) 
• ki te whakamahi i ngā whakahokinga kōrero hei whakamaheni i te whakahaerenga o ngā nekehanga me te whakapakari i ngā mahi 
• ki te whakamārama i te whakaawe a ngā āhuatanga o te taiao me te horopaki i ana kōwhiringa nekehanga (hei tauira, te whakamārama i tā te hau, i tā te ua rānei whakarerekē i tana rautaki i ngā mahi o waho). 

Ka mōhio te mokopuna:  

• ki te takenga mai o te māia ki te nekeneke i te mārama me te whakahāngaitanga ki ngā hiahia ōkiko me ngā taiao huhua 
• ko tā ngā rautaki nekeneke e urutau ana, he whakapakari i ngā mahi, he whakaheke hoki i te tūponotanga o te tūraru i ngā āhuatanga matatini, i ngā āhuatanga kāore nei e taunga ana ki a ia 
• ki ngā āhuatanga whaiaro, ki ngā āhuatanga ahurea, ki ngā āhuatanga hoki o te taiao e whakaawe ana i tā te tangata neke, me tana urupare ōkiko 
• ki te tautoko o te haerenga tonutanga o te huritao me te aromatawai whaiaro i tana tautōhitotanga me tana auahatanga i te nekehanga. 

Ka whakaatu te mokopuna i tōna mōhio:

• ki te whakaatu i tana māia me tana urutau i ana nekehanga i ngā tūāhuatanga huhua me ngā wero huhua 
• ki te whakarerekē i ngā rautaki nekeneke i te wā o te mahi e whai hua ai te urupare ki ngā hiahia e rerekē haere ana 
• ki te whakahāngai i ngā mōhiotanga ki te mātai neke tinana me ngā āhuatanga o te taiao e ū tonu ai te haumarutanga me te kounga o te mahi 
• kia arohaehae te huritao ki ana wheako nekehanga hei tautohu i ngā āhuatanga e pakari ana me ngā āhuatanga hei whakapakari tonu māna 
• kia whai wāhi ngā uara ahurea me ngā uara whaiaro ki āna mahi nekeneke me āna mahi ā-tinana. 

Te Mōhiotanga

Te Aroā Mokowā me te Aroā Pūāhua, te Rautaki, me te Whakataunga

Ko tā te mokopuna mōhio ki tana tū, nā runga i tōna hāngai ki ētahi atu tāngata me te taiao, koia te tikanga o te aroā mokowā me te aroā pūāhua. Ka āwhina tēnei mōhiotanga i a ia kia haumaru, kia whai hua hoki tana noho i ngā mahi ā-rōpū me ngā mahi takitahi. Ka ako ia ki te rongo i ngā āhua e karapoti ana i a ia — pērā i te panoni i te tere, i te tūranga, i te nekehanga rānei — ki te urutau hoki i ana mahi i taua wā tonu.  

Ka whakarite tēnei i te mokopuna kia whakaaro nui, kia whai rautaki hoki tana whakamahinga i te wāhi, kia rite mō ngā tauira neke, kia urupare hoki ki ngā wero i ngā horopaki mahi tahi me ngā horopaki whakataetae. I a ia e whakawhanake ana i ēnei pūkenga, ka māia haere ia ki te whakaaro ki ngā wā kei te heke mai, kia kakama te whakatau, kia mauri tau hoki — inarā, i te horopaki e rerekē haere ana, i tana mahi tahi rānei ki te taha o tangata kē. 

Ka mōhio te mokopuna:  

• me mātua tere ngā whakataunga nekehanga e whai hua ai te mahi ā-tīma me te whāomo mokowā 
• ki te hāngai o te mahi ā-tīma ki te reretahi o te neke, ki te whakawhiti kōrero, me te tūoho ki te wāhi e whakamahia ngātahi ana 
• ka whai wāhi ki te mokowā whai hua te tū ki tētahi wāhi e pai ai te tautoko i ngā whāinga a te rōpū, i a ia e whakaū ana i te haumarutanga 
• mā te matapaetanga me te urutaunga e kaha ake ai te kounga o ngā mahi a te tīma i ngā tūāhuatanga tainekeneke. 

Ka whakaatu te mokopuna i tōna mōhio:

• kia tere ngā whakataunga mō te nekehanga hei tautoko i ngā rautaki me ngā whāinga a te tīma (hei tauira, i tētahi kēmu poitūkohu, ka tere makaia te paoro, ka haukoti rānei ki tētahi wāhi wātea hei tautoko i ana hoa tākaro) 
• kia reretahi ana mahi ki ā ōna hoa tākaro e pai katoa ai te whakamahinga o te wāhi, e ū ai hoki te rere (hei tauira, kia whakahāngaitia te rangamaro i te rerekē haeretanga o te titonga nekehanga i tētahi whakaaturanga hipihope) 
• ki te whakahāngai i ngā nekehanga ki ngā tainekenekehanga o te rōpū, ki ngā āhuatanga rānei o te taiao e rerekē haere ana (hei tauira, te matapae i ngā tūnga o ngā hoa tākaro me ngā hoariri e oma ai, e maka ai rānei i te wā e tika ana i te tākaro ripi rewa) 
• ki te whakamārama i te hāpai a ana kōwhiringa nekehanga i ngā mahi a te tīma me te whai hua whānui o te rōpū (hei tauira, te whai rautaki o tana tū e pai katoa ai te whakawhitinga o ngā matire, e ū ai hoki te tere o te tīma i tētahi tauoma tānga). 

Ka mōhio te mokopuna:  

• e mātāmua ana te tika o te mātakitaki i ngā tūāhuatanga hei kōwhiri i ngā rautaki nekehanga ka whai hua 
• ka tautoko te nekehanga kua whakahāngaitia i te angitutanga i ngā taiao me ngā mahi e huhua ana 
• ko te mārama ki ngā tūnga, ki ngā hiahia, me ngā horopaki ahurea ka whakaawe i ngā kōwhiringa nekehanga 
• e mātāmua ana te pīngore me te rautaki o te whakaaro hei ārahi i ngā wāhi e matatini ana, kāore rānei e taunga ana. 

Ka whakaatu te mokopuna i tōna mōhio:

• ki te mātakitaki me te whakamāori i ngā tūāhuatanga nekeneke e tainekeneke ana hei ārahi i ngā whakataunga (hei tauira, te whakahāngai i tana tū e whai wāhi ai ngā kaitākaro katoa, e ū ai hoki te rere o ngā mahi i tētahi kēmu e whānui nei ngā pūkenga o ngā tāngata) 
• ki te whakahāngai i ngā rautaki nekeneke urutau e tika ana ki ngā taiao me ngā horopaki rōpū huhua (hei tauira, te whakamāori i ngā tīwhiri i te wāhi me te whakahāngai i ngā nekehanga e whakautea ai te tikanga me te reretau o te rōpū i tētahi whakaaturanga ahurea) 
• ki te matapae i ngā mahi a ētahi atu me te tika o tana whakahāngai i ana mahi (hei tauira, te whakarerekē i ana mahi nā runga i te āhua o te papa me ngā whakahokinga kōrero a ana hoa tākaro i a ia e ārahi ana i a ia anō i tētahi ara taupare i waho) 
• ki te huritao ki te pānga o ngā kōwhiringa nekehanga ki ngā hua ka puta i ngā horopaki kanorau. 

Te Mōhiotanga

Te Ihumanea mō ngā Kare ā-Roto me te Pāpori, te Māramatanga mō te Ahurea me te Horopaki

Kia whai take te neke i runga i te whakaute, me mōhio te mokopuna ki ngā kare ā-roto me ngā āhua o te rōpū, me rongo ia i te hononga ki tangata kē, me whakatinana hoki ia i ngā uara o te rōpū i roto i te nekehanga. Ka āwhina tēnei mōhiotanga i te mokopuna ki te āta rongo i ngā kare ā-roto o tangata kē, kia tika hoki tana urupare ki aua kare ā-roto i roto i ana mahi, ā, ka poipoia te kauawhi me te whakaute o te whai wāhitanga. I roto i ngā wheako tinana e ngātahi ana, ka whakatipu te mokopuna i te noho huānga, ka whakapakari hoki i ngā hononga, ā, ka ako ia kia tōkeke ana mahi, kia tautiaki, kia kauawhi hoki i tangata kē. Ka kite te mokopuna i te whakaawe a ngā horopaki o te ahurea me te pāpori i te nekehanga, ā, ka tīmata ia ki te kawe i ngā uara o tōna whānau, o tōna hapū, o tōna hapori hoki — ka whakamana i ngā āhua tuku iho, ka hāpai i ngā kawatau, ka whakaatu hoki i tana tautiaki i te āhua o ana nekehanga. I tana mārama e pakari haere ana, ka kaha ake tā te mokopuna whai whakaaro, tana urupare hoki ki ngā tāngata me ngā taiao e karapoti ana i a ia, kia rongo te katoa i te haumaru, i te whakaute, i te kauawhi hoki. 

Ka mōhio te mokopuna:  

• ki te pānga o ngā āhuatanga o te rōpū ki ngā kare ā-roto o ngā tāngata me ā rātou mahi i ngā horopaki o te nekeneke ngātahi 
• ka taea te whakamahi te nekehanga hei hāpai i ētahi atu, hei tārai hoki i ngā taiao e kauawhi ana, e whakaute ana hoki 
• ko ana urupare ki te ngao me ngā whanonga o te rōpū, ka whakaawe i te haumarutanga me tā te rōpū mahi tahi 
• mā te takune o ngā mahi i te nekeneke e ū ai te ngākaupai me te hāpaitanga o te mana i te ahurea o te rōpū. 

Ka whakaatu te mokopuna i tōna mōhio:

• ki te tautohu i ngā hiahia o te rōpū, ki te urupare hoki ki aua hiahia, hei tautoko i te haumarutanga me te whai wāhitanga i ngā horopaki o te neke ngātahi (hei tauira, i tētahi ara korikori tinana ā-rōpū, ka kitea tētahi kua whakatahaina, ka whakahāngaitia ai te mahi, tērā rānei ko te akiaki i a ia kia whai wāhi atu) 
• ki te hāpai i te tārai i tētahi ahurea o te rōpū e whakaute ana, e ngākaupai ana hoki mā roto mai i tana whai wāhi ki te nekehanga (hei tauira, te āwhina kia ū tonu ai tētahi wairua pai mā te whakahaere i te ngao i te rōpū me te tautoko i te hunga kāore e pērā ana te māia i ngā whakaharatau mō te kapa haka, mō ngā whakaari nekeneke rānei) 
• kia takune te nekehanga kia whai wāhi ai, kia whakaūria ai, kia hāpai ai hoki ētahi atu i ngā mahi ā-tinana (hei tauira, te kuhu atu ki te whakatau i ngā raruraru i ngā hākinakina, e tahuri ai te aro mā roto mai i te mauri tau me te whakaute o te mahi) 
• ki te huritao ki te āhua o te pānga o ana mahi ki ngā āhuatanga o te rōpū, otirā i te wā o te whakatau i ngā raruraru me te whakatairanga i te kotahitanga. 

Ka mōhio te mokopuna:  

• ki te āhua o te tārai a ngā āhuatanga o te hononga me te ahurea i tā te tangata rongo me tā te tangata whai wāhi ki ngā mahi nekeneke a te rōpū 
• e mahi tahi ai i te nekehanga, me tūoho ki ngā tirohanga, ki ngā uara, me ngā tāera whakawhiti whakaaro e huhua ana 
• mā te māramatanga ahurea me te pūtake e ngātahi ana e whakaawe te neke tahi a ngā rōpū i runga i te whakapono me te whakaute 
• ka tautokona te whai wāhi a te rōpū e te ngākau aroha, e te urutaunga, me te takune o te mahi. 

Ka whakaatu te mokopuna i tōna mōhio:

• ki te tātari i te whakaawe a ngā āhuatanga o ngā kare ā-roto, o ngā hononga, me te ahurea i te neke me te mahi a te rōpū (hei tauira, i tētahi kaupapa ngātahi o te nekeneke, pēnei i te titonga haka, i te titonga kanikani, i te titonga whakaari rānei), e whai whakaaro nei ki ngā tikanga, ki ngā uara o ngā rōpū, me te kaha o ngā kare ā-roto hei tārai i tētahi koringa e whakaute ana, e ngātahi ana hoki 
• ki te whakahāngai i ngā pūkenga pāhekoheko me ngā mōhiotanga ahurea hei tautoko i te mahi tahi me te reretau i ngā horopaki o te nekehanga (hei tauira, te tōtō i ōna māramatanga ki ngā hiahia me ngā hononga e kanorau ana i tētahi tūranga hautū, pēnei i te mahi kaiako, me ngā mahi a te tuakana ki te teina, hei tautoko i te whai wāhitanga me te noho huānga) 
• ki te whakahāngai i tana neke me tana whai wāhi kia ū tonu ai ngā uara o te rōpū, ngā uara ngātahi, me ngā tikanga kauawhi (hei tauira, te āta whakarite i tētahi wāhi e rangona ai ngā reo kāore e pērā ana te hoihoi i ngā hākinakina me ngā wero ā-rōpū, e mōhiotia ai e tōkeke ana te whai wāhi me te urupare i runga i te tūoho ki ngā raru, ki te anipā rānei) 
• ki te whakaatu i te hautūtanga me te ngākau aroha i te waihanga ngātahi i ngā wheako o te rōpū mā roto mai i te nekehanga (hei tauira, te huritao ki tētahi pōhēhētanga o te ahurea, o ngā kare ā-roto rānei, me te whakaawenga o te mahi a te rōpū, ka whakarite ai i ētahi rautaki hei whakatika, hei whakapakari hoki te mahi tahi). 

Te Mōhiotanga

Ngā Hononga Rau me te Kaitiakitanga

He hononga rau ki waenga i te tangata me te taiao, ā, he kaha te hononga o te waiora o te mokopuna ki te waiora o te ao tūroa. Ka whakaaweawe tana kite i a ia hei wāhanga mō tēnei pūnaha ngātahi i tana rongo i te haepapa, i te noho huānga me te manawaroa. Kei te mōhio ia, ko tana tiaki i te waiora, koia hoki tana tiaki i a ia anō, i tangata kē hoki, ā, ka kitea te whakapapa i roto i tēnei āhua me tā te whakapapa hono i ngā mea ora katoa. Ka akiaki tēnei mōhiotanga i te whakaute me te kaitiakitanga hei whakapuakitanga matua i aua hononga. Ka ako te mokopuna kia taurite, kia aumārire hoki ki te taiao hei tūāpapa mō te waiora paetawhiti. I roto i tēnei tirohanga hononga, ka whakaata āna mahi i te tautiaki, i te hononga, i te haepapa hoki, ā, ka whakapakari i te manawaroa, inarā, i ngā wā e panoni ana te taiao, te pāpori rānei. Ka whakaū tēnei māramatanga i tā te Māori titiro ki te taiao hei mea ora, hei mea tapu, hei mea matua hoki ki te tuakiri me te waiora. 

Ka mōhio te mokopuna:  

• ka ahuahu ngā pūnaha tuatini i te waiora taiao — te hauropi, te ahurea, te pāpori, me te ohaoha 
• ko te whakapapa, te haepapa ngātahi, me te whakaute i te mauri, koia te tūāpapa mō te whakataunga i runga i ngā matatika  
• ka puta te kaitiakitanga whai hua i te mātauranga pūtaiao, te pūtaiao, me ngā mōhiotanga nō te wāhi hei ārahi i te tūhura me ngā urupare 
• ko ētahi wāhanga o te rangatiratanga ko te whakarongo, te mahitahi me te whakaute i ngā tirohanga kanorau, inarā, e kōkiri ana mō ngā mahi ki te tiaki i te taiao. 
   

Ka whakaatu te mokopuna i tōna mōhio:

• ki te ārahi i ngā tūhuratanga mahitahi mō ngā take taiao e whai pānga ana ki tōna hapori (hei tauira, ka ārahi i tētahi kaupapa ā-kura ki te whakaora i tētahi nōhanga tata, ā, ka whai wāhi ngā pūrākau, ngā uiui hauropi, me ngā kōrero hapori) 
• ki te whakamahi i te mātauranga pūtaiao me te pūtaiao hei tūhura i ngā pūtake, ngā hua, me ngā urupare ka taea (hei tauira, ka whakahaere i tētahi kōkirikiri mō te huatika āhuarangi e hono ai te mātauranga taketake, ngā raraunga pūtaiao, me te reo o te taiohi)  
• ki te arotake i ngā āhuatanga matatika o ngā whakataunga taiao i runga i te tirohanga o te whakapapa me te kaitiakitanga (hei tauira, ka whakaritea he pāhorangi ki te tūhura i ngā whakatete matatika i waenga i te whanaketanga me te whakamaru taiao)  
• ki te hoahoa, ki te whakahaere hoki i ngā mahi e hoki mai ai te taurite, e pai ake ai hoki te waiora taiao, hei whakaatu i te rangatiratanga me te tautiaki (hei tauira, ka tūhura i te whakaawenga o te pūhore wai i ngā pūnaha hauropi me ngā hapori, kātahi ka whakaaranga i ngā urupare e hāngai ana ki te ahurea).  

Ka mōhio te mokopuna:  

• ka hono te whakapapa i te tangata, te taiao me ngā kaiao katoa, ahakoa te wā, ā, ko te whakapapa hoki hei tūāpapa mō te rangatiratanga i runga i ngā matatiki me te tautiaki  
• e tau ana te noho tahi o ngā tirohanga rerekē o te mātauranga pūtaiao me te pūtaiao nō iwi kē e hōhonu ake ai te māramatanga ki te waiora taiao  
• he mea hirahira te whakaaro arohaehae me te arotake matatika hei ārahi i ngā mahi ki te whakaute i ngā uara ahurea me te toitūtanga o te taiao 
• e whai hua ai te whakawhitinga whakaaro, me tuku i te mōhiotanga i runga i te whakaute ki ngā minenga kanorau hei whakahihiko i ngā panonitanga pai.  

Ka whakaatu te mokopuna i tōna mōhio:

• ki te whakamahi tahi i te whakapapa, te mātauranga pūtaiao, me ngā mōhiotanga pūtaiao hei whakahōhonu i te māramatanga ki ngā take taiao (hei tauira, ka hoahoa, ka ārahi hoki i ngā kaupapa hapori e noho tahi ai ngā kōrero whakapapa me ngā raraunga pūtaiao hei whakaora i ngā pūnaha hauropi)  
• ki te arotake arohaehae i ngā wero taiao e tuatini ana i runga i ngā tirohanga o te ahurea, ngā matatika me te pūtaiao (hei tauira, he tuhinga whakawhere, he kauhau whakawhere rānei e kōkiri ana i ngā kaupapahere ki te whakamaru i ngā momo taonga me ngā nōhanga)  
• ki te ārahi i ngā kaupapa e whakatairanga ana i ngā hononga e toitū ana i waenga i ngā tāngata me te taiao (hei tauira, ka whakaritea he whakaaturanga pāhorau hei whakamārama i ngā wero taiao i roto i te mātauranga pūtaiao me ngā taunaki pūtaiao)  
• ki te kōrero mō ngā whakaaro tuatini e pā ana ki te waiora taiao kia mārama, kia whakaute hoki, ki ngā minenga kanorau (hei tauira, ka whakahaere kōrero ki te tūhura i runga i te whakaute i ngā whakatete i waenga i te whanaketanga ohaoha me te tiakitanga taiao).