Te Mōhiotanga

Te Tuakiri

Ka tautoko tā te mokopuna mōhio ki a ia anō i tana rongo i te māia, i te hononga, me te kaha ki roto tonu i a ia, ā, ka tautoko tērā i te taha kare ā-roto, i te taha hinengaro, i te taha pāpori hoki o tōna waiora. Ka whakapakari ēnei mōhiotanga i tō te mokopuna kiritau me tana whakapono ki a ia anō, arā, ka tautoko i a ia ki te mōhio ki ōna anō āhua, me te kaingākau ki aua āhua me āheinga tūhāhā, e rite ai ia kia māia i te whakaaturanga o ōna whakaaro, o ōna uara me ōna piropiro. 
Ka ārahi tēnei mōhiotanga i te mokopuna ki te whiriwhiri i ngā kōwhiringa e hāngai ana ki a ia anō. Ka whakapakari tēnei i te manawaroa o te mokopuna kia mauri tau i ngā wā o te panoni, te wero rānei, ā, ka whakamana i a ia kia whai pūtake mō tana tipu, kia whakarite hoki i ana whāinga whaiaro.

Ka mōhio te mokopuna:  

• he rerekē ngā wāhanga tuakiri o te katoa, koia i tūhāhā ai te tangata 
• ka āwhina te noho huānga i tōna waiora 
• e hono ana tōna tuakiri ki ngā wāhi e rongo ai ia i te hononga.

Ka whakaatu te mokopuna i tōna mōhio:

• ki te whakaahua i te wāhi ki ngā wāhanga rerekē o tōna tuakiri, o te tuakiri o tangata kē hoki ki te tūhāhā o te tangata (hei tauira, He Māori, he Itāria hoki ahau, ā, e kaingākaunui ana ahau ki te kapa haka me te tunu kai i te taha o taku nonna)
• ki te whakaatu i te manaakitanga me te tiakitanga (hei tauira, ka whakarongo, ka mihi hoki ki ngā whakaaro o tangata kē, ka tiaki i ngā wāhi noho tahi, ka tākaro ngātahi)
• ki tōna anō tipuranga me panonitanga, me ngā hua o tēnei ki ōna whakaaro mōna anō (hei tauira, I tērā tau, i te konekone ahau. I tēnei wā, e māia ana ahau ki te tū i mua i te akomanga)
• ki te whakahono i te noho huānga me te waiora ina tautokona ia (hei tauira, I a au ka noho tahi ki ōku whanaunga, ka harikoa, ka kaha hoki ahau)
• ki te kōrero mō ngā wāhi hirahira (hei tauira, He wāhi hirahira tō mātou marae nā te mea koirā te wāhi e rongo ai i te hononga kaha katoa ki tōku whānau).

Ka mōhio te mokopuna:  

• he motuhake, he rerekē hoki tōna tuakiri i ngā tuakiri o tangata kē 
• ka āwhina te whakaute i te mana i te waiora o te katoa 
• ko te whānau, te ahurea, ngā wāhi me ngā wheako e whai pānga ana ki te ahunga o tōna tuakiri
• he rerekē te āhua me ngā tohu o te taukiri i ngā wāhi rerekē, i ngā rōpū rerekē rānei
• he āhuatanga kei ngā wāhi hirahira hei tiaki, hei whakaute hoki. 

Ka whakaatu te mokopuna i tōna mōhio:

• ki te whakaatu i te whakamaiohatanga me te whakaute ki tōna mana motuhake, ki te mana motuhake o tangata kē hoki (hei tauira, He tino rerekē māua ko taku teina. He hoihoi ia, he wahangū ahau, ā, e pai ana tērā) 
• ki te whakamārama i te wāhi ki tōna whānau, ki tōna ahurea, ki ngā wāhi, ki ngā wheako hoki ki te ahunga o tana tuakiri 
• ki te kite i te panonitanga o tana tuakiri, me te rerekē o tana tuakiri i ngā horopaki rerekē (hei tauira, Ka kōrero Māori ahau i te kāinga me te reo Pākehā i te kura, he wāhanga nōku aua reo e rua) 
• ki te whakaute i ngā uara e hāngai ana ki ngā wāhi (hei tauira, I te ngahere e pātata ana ki tōku whare, ka tūpato au kia kaua e makere i te para nā te mea e hirahira ana taua ngahere ki tōku iwi).

Ka mōhio te mokopuna:  

• ka tautoko ngā horopaki kauawhi i te waiora o te tangata mā te whakanui i te rerekētanga o ngā takenga, ngā whakaaro me ngā āheinga
• ko te whai wāhi atu ki tētahi rōpū tētahi ara ki te whakapakari i te hononga me te tuakiri
• he rerekē te āhua me ngā tohu o te tuakiri i ngā wāhi rerekē, i ngā rōpū rerekē rānei
• ka āwhina tana noho huānga i tōna waiora katoa
• ka puta ngā hononga whakaute, ngā hononga tautiaki i ngā mahi me ngā kupu ka āta whakaarohia
• he uara, he kōrero hoki kei ngā wāhi motuhake e hono atu ai te tangata
• ko ngā tāngata, ngā wāhi me ngā kōrero e hono ai ia, koia ngā mea e tohu ana i te ahunga o tana tuakiri.

Ka whakaatu te mokopuna i tōna mōhio:

• ki te tūtohu i ngā āhua o ngā horopaki kauawhi, me ngā hua o aua horopaki ki te waiora kiritōpū
• ki te tūtohu i ngā tūranga rerekē me ngā haepapa rerekē i tētahi rōpū
• ki te kite i tōna whanaketanga, me ngā rerekētanga i tōna tuakiri e hua mai ana i ngā wheako hou
• ki te tūtohu i ngā āhua e āwhina ana i a ia, i tangata kē hoki ki te rongo i te noho huānga me te ora (i te taha o te tinana, te whatumanawa, te hinengaro me te wairua)
• ki te mahi tahi me ētahi atu, ki te renarena i te taukaea tangata, ki te tautoko hoki i tōna waiora me te waiora o tangata kē
• ki te whakaute, ki te tiaki hoki i ngā wāhi hirahira me ngā uara e hono ai te tangata ki aua wāhi
• ki te kite i te ahunga o tōna tuakiri nā ngā hononga ki ngā tāngata, ngā wāhi me ngā kōrero e haere tahi ana.

Te Mōhiotanga

Te Tipu me te Whanaketanga o te Tinana

Ka tipu, ka whanake hoki te tinana i roto i ngā tau. Ka āwhina tā te mokopuna ako mō ēnei āhua i tana tiaki i tana ora me tana waiora. Kei te mōhio te mokopuna, ko te kai pai me te taiora tētahi ara hei tautoko i te tipuranga, hei aukati i te māuiui, hei whakapiki hoki i te ngao e pīrangitia ana ki te noho, ki te ako, ki te whai wāhi me tana katoa. 
Ka whakamana tēnei māramatanga i te mokopuna ki te whakatau kōwhiringa i runga i te mōhiotanga mō te tiaki i a ia anō. Ka āwhina i a ia ki te aro ki ngā rerekētanga o te tinana, ki te whai māramatanga ki te take mō aua rerekētanga, ki te urupare hoki ki aua rerekētanga i runga i te tautiaki me te māia. Ka ako te mokopuna ki te kōwhiri i ngā kai e ora ai te tinana, e whakaute ai i ngā uara ahurea, e tautoko ai hoki i te oranga paetawhiti. I tōna mōhio ki a ia anō me tōna mana motuhake e tipu ana, ka kaha haere tō te mokopuna mōhio ki ōna haepapa mō tōna anō waiora tinana i ia rā. Ka kite ia i ngā whakaawenga o te whānau, o te ahurea me ngā tuku ihotanga i te ahunga o ngā whakaaro mō te kai, te mōhio ki tōna tinana, me ngā kōwhiringa e pā ana ki te oranga. 
Ka mārama hoki te mokopuna ki te hononga i waenga i te oranga tinana me te waiora kare ā-roto — arā, ka mārama ki ngā hua o te ora, ki te korikori me te whakatā hei tautoko i ngā kare ā-roto, i te māia me te ako. Ka akiaki tēnei mōhiotanga i te mokopuna ki te whakaaro arohaehae e pā ana ki ngā karere waiora i te ao pāpāho me te porihanga, tae rā anō ki te wero i ngā angaparuhi tinana e hē ana me te kōrero horihori. Ka poipoia hoki te mokopuna ki te whakaute i ngā āhua, i ngā āheinga me ngā matea rerekē o te tinana, arā, ka whakatairanga i ngā waiaro kauawhi, ka mimiti hoki te hahani mō te kanorau.

Ka mōhio te mokopuna:  

• he rerekē tō te tinana tipu me tō te tinana panoni, ā, ka rerekē hoki i roto i ngā tau
• ko te kai, te neke, te whakatā me te akuaku ētahi wāhanga o te tiaki i te oranga
• ka whakaaweawe ngā kare ā-roto, ngā hoa me ngā mahi ōrite o ia rā i ōna piropiro me āna mahi
• ka tautoko ngā kōwhiringa oranga i te waiora tinana me te waiora kare ā-roto.

Ka whakaatu te mokopuna i tōna mōhio:

• ki te whakaahua i ngā āhua o te panoni haere o tōna tinana, ā, ki te whakaahua hoki i te rerekētanga o te panoni ki tēnā tangata, ki tēnā tangata (hei tauira, Kua kaha taku tipu inā tata nei, engari kāore anō taku whanaunga)
• ki te whakamārama i tana whakataurite i te kai, te neke, te whakatā me te akuaku hei tautoko i tana oranga (hei tauira, Ka kawe au i te huarākau ki te kura, e pai ai taku ngao ki te ako)
• ki te kite i te whakaawenga o ngā kare ā-roto, ngā hoa me ngā mahi ōrite o ia rā ki tōna waiora (hei tauira, Mehemea ka whawhai māua ko taku hoa, kāore au e hiahia ki te tākaro)
• ki te whakamārama i ētahi take mō ana kōwhiringa oranga, me ngā hua o aua kōwhiringa e pai ai, e ora ai rānei ia (hei tauira, Ka kai au i ngā huawhenua nā te mea ka āwhina aua kai i taku tinana kia kaha tonu).

Ka mōhio te mokopuna:  

• ka rerekē ngā hiahia o te tinana i tōna tinana e tipu ana, e whanake ana hoki
• ka whakaaweawe te kai me te mahi ā-tinana i tōna ngao, i tōna tipu me ōna kare ā-roto
• ka ahuahu te ahurea, te whānau me te hapori i ngā whakapono, ngā kōwhiringa me ngā ritenga mō te kai me te waiora.

Ka whakaatu te mokopuna i tōna mōhio:

• ki te whakaahua i ngā rerekētanga o ngā hiahia o tōna tinana i a ia e tipu ana me te āwhina kei te pīrangitia e ea ai aua hiahia (hei tauira, Kua hiakai ake ahau inātatanei nā te mea e nui ake ana aku hākinakina)
• ki te whakamārama i te whakaawenga o te kai me te neke ki te ngao, te tipu me te waiora kare ā-roto (hei tauira, A muri i taku eke paihikara, ka harikoa ake ahau)
• ki te huritao ki te whakaawenga o te ahurea, te whānau me te hapori ki ōna whakapono me ōna kōwhiringa mō te kai me te waiora (hei tauira, Ka kai hāngī mātou i ngā hui hirahira — ka rongo au i te hononga ki tōku whānau).

Ka mōhio te mokopuna:  

• he wāhanga māori nō te whanaketanga te tipuranga o te tinana me te rerekētanga o ngā kare ā-roto, ā, ka puta aua āhua i ngā wā rerekē ki tēnā tangata, ki tēnā tangata
• e kaha ana te hononga ki waenga i te kai, te tipu me te waiora
• ka whakaaweawe ngā āhua whaiaro, ngā āhua ahurea me ngā āhua pāpori i ngā kōwhiringa e pā ana ki te waiora
• ka whakaaweawe ngā karere i te arapāho me te pāpori i ngā whakaaro me ngā kare ā-roto o te tangata e pā ana ki te kai, te waiora me te tinana
• ka tautoko ngā kōwhiringa kauawhi e whakaute ana i te waiora o te katoa.

Ka whakaatu te mokopuna i tōna mōhio:

• ki te whakaahua i ngā rerekētanga kei te rangona i a ia, i tangata kē hoki (hei tauira, He ōrite tō māua ko taku whanaunga tāroaroa i mua, engari, ināianei e tāroaroa ake ana ia i a au, ahakoa e rite tonu ana tō māua pakeke)
• ki te whakaahua i ngā hononga ki waenga i te kai, te tipu me te waiora (hei tauira, Ki te kore au e kai i ngā kai tika, ka ngenge au, ā, ka uaua taku aro)
• ki te whakamārama i te ahuahu o ngā whakaawenga whaiaro, ngā whakaawenga ahurea me ngā whakaawenga pāpori ki ngā kōwhiringa e pā ana ki te waiora (hei tauira, E pai ana ngā inu whakapiki ngao ki taku hoa, engari e pai kē ana te wai ki a au)
• ki te huritao arohaehae ki ngā karere arapāho me ngā karere pāpori mō te kai, te oranga me te tinana (hei tauira, E ai ki ngā whakatairanga, he ngahau ngā kai paraurehe, engari kāore ērā i te whakaatu i ngā hua kino)
• ki te whakaaranga i ngā kōwhiringa e whakaute ana, e kauawhi ana hoki hei tautoko i tōna waiora me te waiora o tangata kē (hei tauira, Me kawe mai tātou i ngā timotimo hauora e wātea ai te katoa ki te kai).

Te Mōhiotanga

Te Haumaru

Ka tautoko te mōhio ki te noho haumaru — i te taha tinana, i te taha kare ā-roto me te taha pāpori — i te mokopuna ki te whakawhanake i tana mana motuhake, i tana manawaroa me tana haepapa. Ka ako te mokopuna ki te kite, ki te whakaute hoki i ōna pae whaiaro me ō tangata kē pae whaiaro, ā, ki te whakaaro ki ngā whakataunga haumaru i ngā horopaki rerekē, tae rā anō ki ngā mahi tika i ngā wāhi tuihono. 
Me rongo te mokopuna i te haumaru i tōna ao e tautoko ai i te taha hinengaro me te taha kare ā-roto o tōna waiora, e wātea ai ia ki te aro ki te ako me te whai hononga pai ki tangata kē. Ka mārama hoki te mokopuna ki te hirahira o te kōkiri whaiaro — te whakaputa i ōna hiahia mōna anō i ngā horopaki e rongo rā ia i te mōrearea. Ka mārama ia, kāore te haumaru i te hāngai ki te manaaki i a ia anake, engari, me manaaki hoki i tangata kē, me whakaatu i te aroha me te tauwhirotanga, me tautoko i ngā mahi e haumaru ai, e kauawhi ai hoki ngā hapori mō te katoa.

Ka mōhio te mokopuna:  

• he rerekē ngā rautaki haumaru i ngā horopaki rerekē (pērā i te kura, te kāinga, te ipurangi, me ngā wāhi hapori)
• mehemea ka mōrearea, ka tōkeke-kore, ka anipā rānei tētahi mea, me whai āwhina, me mahi rānei i aua horopaki
• ka pēhea tana tono āwhina, ko wai hoki ngā tāngata whakawhirinaki ki te tautoko i tōna haumaru me tōna waiora
• he tohu pea ngā kare ā-roto pērā i te mataku, te āmaimai me te anipā e raru ana tētahi āhuatanga
• ka tautoko pea āna mahi, āna kupu me ōna waiaro i ētahi atu ki te rongo i te haumaru, te kauawhi me te whakaute.

Ka whakaatu te mokopuna i tōna mōhio:

• ki te whakamahi i ngā mahi e hāngai pū ana kia haumaru ia i te kura, i te kāinga, i te ipurangi, i te hapori anō hoki
• ki te tautohu i tētahi āhua e mōrearea ana, e tōkeke-kore ana, e anipā ana rānei, ā, ki te whakamārama i ngā take e pērā ana ōna whakaaro
• ki te whakaatu i ngā mahi tika ki te tono āwhina ina hiahiatia, ā, ki te whakamārama atu i ngā tāngata whakawhirinaki ki a ia me ngā take e pērā ana ōna whakaaro (hei tauira, Ka whakamōhio au ki tōku kaiako i ngā mahi kino o tētahi atu, nā te mea ka tiaki ia i a mātou, i ngā tamariki, kia haumaru. Ka kōrero au ki tōku tuakana i a au e āwangawanga ana, nā te mea kāore ia e whāki atu i aku kōrero muna, ā, ka āwhina mai ia)
• ki te whakaahua i ngā kare ā-roto, pērā i te mataku me te āwangawanga, hei tohu pea mō te matea kia mahi i tētahi mahi, kia whai āwhina rānei
• ki te mahi i tētahi mahi hei tautoko i te haumaru me te waiora o tangata kē mā roto mai i te whakaatu i te tōkeke, te tautiaki, me te kauawhi.

Ka mōhio te mokopuna:  

• ka ārahi pea ngā uara whaiaro me ngā uara ngātahi i ngā whakatau ki te tautoko i te haumaru me te waiora 
• kei a ia te mōtika ki te kōrero i a ia, i tētahi atu rānei, e rongo ana i te mōrearea, ā, ka tiaki pea taua reo i a ia, i tangata kē hoki 
• ka whakaaweawe pea ngā awenga aropā i ōna whakatau, ā, ka tautoko ngā kōwhiringa e hāngai ana ki ngā uara whaiaro i tōna waiora 
• ko te whakaatu i te tautiaki, te whakaute me te kauawhi ētahi ara hei āwhina pea i te horopaki kia haumaru mō te katoa 
• e haumaru ai ia, e haumaru ai hoki ētahi atu, me tūoho, me hiki haepapa hoki i ngā horopaki whānui. 

Ka whakaatu te mokopuna i tōna mōhio:

• ki te whakamahi i ngā uara whaiaro me ngā uara ngātahi (pērā i te tōkeke, te pono, te tautiaki, me te haepapa) e puta ai ngā whakatau e tiaki ana i tōna waiora, i te waiora o tangata kē hoki i ngā horopaki i te kura, i te kāinga, i te ipurangi, i te hapori hoki 
• ki te kōrero māia mōna, mō tangata kē rānei, i a ia e rongo ana i te mōrearea, te tōkeke-kore rānei
• ki te tautohu i te pēhanga aropā (hei tauira, e āki ana ia ki te takahi i ngā ture, ki te kaupare i tangata kē, ki te mahi i tētahi mahi kino mōna, pērā i te momirehu, ki te whai rānei i ngā tūraru), ā, ki te whai i ngā kōwhiringa e whakaatu ana i ōna uara whaiaro me tōna waiora 
• ki te whakatairanga i te haumaru mā roto mai i tōna whakaatu i te mākoha, i tāna kauawhi i tangata kē i ngā mahi, i tāna tū ki te whakahē i ngā whanonga tōkeke-kore, ngā whanonga haumaru-kore rānei, i tāna akiaki hoki i tangata kē ki te whakaatu i te tautiaki me te whakaute ki ngā tāngata me ngā wāhi 
• ki te kawe i te haepapa mō tōna haumaru me tōna waiora i ngā horopaki rerekē (hei tauira, te hīkoi haumaru i te hapori, te mahi tika i te ipurangi, te whai i ngā mahere haumaru i te kāinga, i te kura rānei), ā, ki te āwhina hoki i tangata kē kia noho haumaru i tana whakatauira atu i ngā whanonga tika.

Ka mōhio te mokopuna:  

• ka tautoko tana rongo i te haumaru kare ā-roto me te haumaru tinana i tōna waiora whānui me tāna ako 
• ki ngā tūraru torohū i ngā horopaki rerekē me ngā rautaki ki te whakahaere, ki te kaupare rānei i aua tūraru torohū 
• ka āwhina te hāpai i ngā hapori e whakaute ana, e kauawhi ana hoki i tā te katoa rongo i te haumaru
• ka ahuahu pea ngā ture, ngā kawatau pāpori, me ngā karere arapāho i ōna whakaaro mō te haumaru, ka whakaaweawe hoki pea i ōna hononga.

Ka whakaatu te mokopuna i tōna mōhio:

• ki te whakamārama i tā te haumaru kare ā-roto me tā te haumaru tinana āwhina i a ia ki te aro, ki te whai wāhi i runga i te māia, ki te whakatipu hoki i ngā hononga whai hua i te ako, i ngā horopaki pāpori hoki
• ki te tautohu i ngā tūraru torohū i te taha tinana, te taha hinengaro, te taha pāpori rānei i ngā horopaki pērā i te kura, te kāinga, te ipurangi, ngā wāhi tūmatanui rānei, ā, ki te whakamahi i ngā rautaki māmā ki te whakahaere, ki te kaupare rānei i aua tūraru 
• ki te hāpai i ngā hapori e whakaute ana, e kauawhi ana hoki, mā roto mai i tana whakaatu i te ngākau aroha, i ana kōrero whakaute, i tana āwhina hoki i tangata kē ki te rongo i te wairua mihi me te haumaru 
• ki te whakaahua i ngā whakaawenga o te arapāho (hei tauira, ngā rongo kōrero, ngā whakatairanga, te pae pāpori) me ngā kawatau pāpori (hei tauira, ngā ritenga aropā, ngā tūranga ira) i ngā whakaaro o ngā tāngata mō te haumaru, me ngā ara e whai hononga ai rātou ki tangata kē.

Te Mōhiotanga

Te Tūoho Whaiaro

Ka tautoko tā te mokopuna mōhio ki a ia anō i te taha hinengaro me te taha kare ā-roto o tōna waiora. I a ia e tūhura ana i tōna tuakiri, ka tīmata ia ki te huritao ki ōna uara, ki ōna āheinga, ki ōna whakapono hoki, me ngā tāngata me ngā wāhi e ahuahu ana i a ia. 

Ka ako ia ki te tautohu, ki te whakaingoa hoki i ngā kare ā-roto maha i roto i a ia, i roto hoki i tangata kē, ā, ka mārama ki te whakaawenga o aua kare ā-roto ki ngā whanonga. Mā tēnei atamai kare ā-roto e rite ai te mokopuna ki te āta whakapuaki i ōna kare ā-roto, ki te urupare hoki i runga i te ngākau aroha me te tautiaki i ngā hononga. 

I te mokopuna e whakawhanake ana i te tūoho whaiaro, ka tīmata hoki tana huritao ki te āhua o ōna whakaaro — ka huritao ki ōna kōwhiringa, ka kitea ngā tauira, ka whakaaro hoki ki ngā urupare ki ngā horopaki rerekē. Ka whakapakari tēnei mōhiotanga i tana kaha ki te tū, ki te huritao, ki te āta whakatau i roto i ngā āhua e tautoko ana i tōna waiora me te waiora o tangata kē.

Ka mōhio te mokopuna:  

• ka āwhina pea tōna mārama ki ōna piropiro me ngā pūtake i tāna āhei ki te urupare ki ōna kare ā-roto. 

Ka whakaatu te mokopuna i tōna mōhio:

• ki te kite i te whānui o ngā kare ā-roto, ki te whakaahua hoki i ngā pūtake pea o aua kare ā-roto (hei tauira, Kei te pōuri ahau nā te mea i mate tētahi o ngā punua ngeru)
• ki te huritao ki ōna piropiro me āna whanonga, ina tautokona ia
• ki te whakamahi i ngā rautaki māmā ki te whakahaere kare ā-roto (hei tauira, te hā nui i te wā o te mauri rere, te kōrero pai ki a koe anō, te whakatā, te kōrero ki tētahi atu, te neke i te tinana, te mahi whakatae pikitia, te tuhi pikitia, te tuhi kōrero rānei).

Ka mōhio te mokopuna:  

• ka whakaaweawe ngā horopaki rerekē i ōna piropiro
• ka uaua pea te whakahaere i ngā kare ā-roto kaha.

Ka whakaatu te mokopuna i tōna mōhio:

• ki te kite i ngā whakaawenga o ngā horopaki rerekē ki ōna piropiro (hei tauira, ngā wero, ngā toa, ngā raru)
• ki te whakamahi i ngā rautaki ki te whakahaere i ngā kare ā-roto kaha, ina tautokona ia (hei tauira, te taki i tētahi karakia māmā; te hīkoi, te noho ngū rānei i te taiao; te hā nui me te wawata; te whakaingoa i te piropiro mā te waha, mā te pene rānei; te tikanga 5-4-3-2-1 — ka whakaingoatia ngā mea e rima kei te kitea, ngā mea e whā kei te pāngia, ngā mea e toru kei te rangona, ngā mea e rua kei te pihongia, te mea kotahi kei te hāngia).

Ka mōhio te mokopuna:  

• ka whakaaweawe pea ngā kare ā-roto i ngā whakatau, ngā hononga me te whanonga.

Ka whakaatu te mokopuna i tōna mōhio:

• ki te whakamārama i te whakaawenga o ngā kare ā-roto i ngā whakatau, ngā hononga me te whanonga (hei tauira, mehemea e hiamo ana ia, tērā pea ka whakaae, ka whakanau rānei i tētahi tono i mua i te āta whakaaro; memehea e pōuri ana ia, ka maunu pea i te rōpū; mehemea e whakahīhī ana ia whai i muri i tētahi toa, ka kaha ake pea āna mahi a muri iho, ka kaha rānei ia ki te akiaki i ētahi atu).

Te Mōhiotanga

Ngā Hononga

Ko ngā hononga e pakari ana, e whakaatu ana hoki i te whakaute, koia tētahi wāhanga matua o te taha hinengaro me te taha kare ā-roto o tō te mokopuna waiora. Mā roto mai i ngā pāhekoheko kauawhi me ngā pāhekoheko ngātahi, ka ako haere te mokopuna ki te wāhi ki ngā ritenga me ngā kawatau pāpori i te ahunga o te āhua o tā te tangata whai hononga, o tō te tangata whanonga hoki i ngā horopaki rerekē.

Ka āwhina tēnei mōhiotanga i te mokopuna ki te whai māramatanga, ki te whakapuaki hoki i ōna ake kare ā-roto, i ōna ake uara, i ōna ake hiahia hoki, i a ia e mārama ana hoki ki aua wāhanga o tangata kē. I roto i te whanaketanga o tōna ngākau aroha, ka pakari haere tana āheinga kia whai hua tana hono ki te tangata i ngā hononga kanorau, ki te urupare hoki ki te raruraru i runga i te tōkeke, i te mākoha me te tautiaki. Ka tautoko ēnei pūkenga i te mokopuna ki te noho tonu, ki te whakapakari hoki i ngā hononga i roto i ngā tau, ā, ka puta te noho huānga, te whakapono me te tautoko taupuhipuhi i āna mahi ako, i ōna pāpori hoki.

Ka mōhio te mokopuna:  

• ka whakatipu ngā hononga i runga i te whakapono, te tōkeke me te tautiaki, ā, kia mahi tahi, me whakarongo, me whakaute hoki i ngā rerekētanga
• ko tētahi wāhanga o te whakaae, ko te whakatau i ngā kōwhiringa mō ngā taputapu whaiaro, te wāhi me te tinana, ā, ka tautoko tā te tangata marama ki ēnei mōtika i a ia ki te whakarite pae whaiaro, ki te tautohu hoki i te whanonga whakaute. 

Ka whakaatu te mokopuna i tōna mōhio:

• ki te mahi tahi i tētahi takirua, i ngā rōpū iti rānei hei whai i ngā whāinga ngātahi
• ki te mahi i runga i te tōkeke me te pono i ngā whakawhitinga (hei tauira, te āta tatari kia whai wā, ahakoa kāore i tonoa kia pērā)
• ki te āta whakarongo, ki te urupare hoki i runga i te whakaute ki ngā whakaaro rerekē
• ki te tīmata ki te huritao ki te whakaawenga o āna mahi ki tangata kē.

Ka mōhio te mokopuna:  

• ki te te urupare ia i runga i te tautiaki me te tōkeke kia rangona ana e ētahi atu te pōuri, te kaupare rānei, he āwhina tērā ki te oranga o ngā hononga rōpū
• ka ahuahutia te whakaae e te horopaki, e te whakawhiti whakaaro, e ngā pae whaiaro hoki, ā, he mea nui te whakaute i te mōtika o tangata kē ki te panoni i ōna whakaaro
• ka āwhina ngā whanonga papare, pērā i te kī ‘kāo’, te kimi tautoko, te wehe rānei i ngā horopaki mōrearea, i te tangata kia urupare i ngā tūraru, kia mau tonu hoki ki te haumaru whaiaro.

Ka whakaatu te mokopuna i tōna mōhio:

• ki te tautohu i āna mahi e pai tonu ai te āhua o te rōpū 
• ki te tautoko i te hunga kua kauparea, kua hūkokikoki rānei (hei tauira, ka whakamanawa i tētahi aropā i muri i tana hē) 
• ki te whakawhiti whakaaro i runga i te whakaute hei whakatau i ngā tautohe 
• ki te āta whakaaro mō ngā kōwhiringa hei whakakaha i te kauawhi me te mākoha (hei tauira, ka kōrero mākoha kia kauawhitia tētahi tangata hou).

Ka mōhio te mokopuna:  

• ka whai hua, ka kino hoki te whakaawenga o te pēhanga aropā ki a ia, ki tangata kē hoki
• ka whakaaturia te whakaae i roto i ngā tohu o te reo ā-waha me te reo ā-tinana e mārama ana, ā, ka āwhina te māramatanga ki ēnei tohu i tā te tangata tautohu i te whakaute me te pātahi o ngā pāhekoheko
• e kīia ai he whakaae, me whakaae i runga i te hiahia, te mōhio, me te ngākau whiwhita, ā, ka kore rawa te whakaae ka rangona i runga i te pēhanga, te raweke, te ngū rānei.

Ka whakaatu te mokopuna i tōna mōhio:

• ki te tautohu i ngā horopaki o te pēhanga aropā, ā, kia haumaru, kia whakaute hoki ngā kōwhiringa (hei tauira, te whakaputa kōrero; te kōwhiringa kia kaua e whai wāhi atu ki te whakatoi)
• ki te whakaatu i ngā pūkenga e mau tonu ai ngā hononga hoa (hei tauira, te whakatau āmaimai, te tū pirihonga, te whakarongo)
• ki te tautohu i ōna āhua e āwhina ana ki te hāpai i te akomanga, i te rōpū rānei e taupua ana (hei tauira, ko ngā kupu mākoha, ko te mahi tahi)
• ki te tīmata kia kakama ki te kauawhi, ki te whakamanawa hoki i ētahi atu.

Te Mōhiotanga

Te Atamai mō te Ahupori me ngā Kare ā-Roto

E rerekē ana te whakapuaki kare ā-roto o tēnā tāngata, o tēnā tangata i runga i te tuakiri me te wāhi i reira rā ia, ā, ka mārama hoki te mokopuna ki te motuhaketanga o ngā uara, o ngā kawatau me ngā tikanga o ngā wāhi rerekē, pērā i te kura, i te marae me ngā wāhi whānau. Ka tautoko tēnei māramatanga i te mokopuna ki te kite, ki te whakatau hoki i ōna kare ā-roto i ngā ara e whakaute ana, e aro ana hoki ki te ahurea. I a ia ka ako ki te urupare i runga i te mākoha me te tautiaki mō ngā hiahia kare ā-roto o tangata kē, ka urutau hoki ōna whanonga ki te whakamana i tangata kē, ki te whai hoki i ngā tikanga o ngā horopaki rerekē. I roto i tēnei māramatanga mō ngā kare ā-roto me te ahurea, ka māia haere te mokopuna kia motuhēhē tana whakapuaki i ōna whakaaro, ka tautokona ngā hononga kauawhi, ka whakapakari hoki i tā te mokopuna rongo i te waiora me te noho huānga i ngā hapori rerekē.

Ka mōhio te mokopuna:  

• he rerekē ngā ture i ngā wāhi rerekē mō ngā whanonga whakaute
• ka whakaaweawe ngā kare ā-rotoi ngā tāngata i tōna ao
• ka āwhina tana tūoho ki ōna kare ā-roto me āna mahi i a ia kia noho tau me ētahi atu.

Ka whakaatu te mokopuna i tōna mōhio:

• ki te whakaahua i ngā kawatau whanonga i ngā horopaki rerekē (hei tauira, ka whakamārama i ngā take e hirahira ana te tango i ngā hū i te marae, te whakatū rānei i tōna ringa i mua i te kōrero i te akomanga)
• ki te mārama ki te whakaawenga o ōna kare ā-roto ki tangata kē (hei tauira, ka kite i tōna riri, i tōna hōhā rāne e whakararu ana i tētahi aropā, ā, ka whai kia whakatikahia)
• ki te whakatinana i te tūoho whaiaro i ngā horopaki pāpori (hei tauira, te tū me te whai hā i a ia e hihiko rawa ana, e hiamo ana rānei i tētahi rōpū).

Ka mōhio te mokopuna:  

• ka āwhina te whakaatu i te mākoha kia whakatipu i ngā hononga e kaha ana, e whakaute ana hoki
• ka rerekē pea ngā whanonga o ngā tāngata me ngā ahurea, ā, kia whakaute, me whakamānawa i aua rerekētanga.

Ka whakaatu te mokopuna i tōna mōhio:

• ki te whakaatu i te tautiaki me te mākoha i ngā hononga (hei tauira, ka kauawhi i tētahi kua kauparea, kā āta whakarongo rānei i tētahi atu e kōrero ana mō tētahi take nui)
• ki te whakaute i ngā whanonga kanorau i ngā horopaki ahurea (hei tauira, ka whai i ngā tikanga a te rōpū i te korenga o ngā whakamaharatanga, ā, ka whakamārama i te take e hirahira ana kia pērā).

Ka mōhio te mokopuna:  

• he tikanga ahurea kei ngā wāhi rerekē, ā, kei roto i te whanonga whakaute te māramatanga me te tautiaki
• ka āwhina te huritao ki ōna kare ā-roto i a ia ki te tipu, ki te ako hoki e pā ana ki ōna wheako
• ko te whakamanawa, te kauawhi, te tū tuarā mō tētahi atu, me te tautohu i te wā kia wātea tētahi hoa, koia ētahi ara hei tautoko i tētahi atu.

Ka whakaatu te mokopuna i tōna mōhio:

• ki te whakaatu i te whakaute i ngā wāhi ahurea e hirahira ana (hei tauira, ka tika ngā kupu me te āhua o te reo i ngā wāhi whakamaumahara, i ngā wāhi wairua rānei e hirahira ana)
• ki te huritao ki ngā urupare kare ā-roto (hei tauira, a muri i tētahi whakatete, ka whakamārama i ōna piropiro, i ngā pūtake, i ngā mahi hoki ka rerekē pea ina pērā anō)
• ki te tautoko i tangata kē i ngā horopaki pāpori (hei tauira, ka kite i tētahi e kauparetia ana, ā, ka tuku i te reo pōwhiri ki a ia).

Te Mōhiotanga

Te Aroā me te Whakahaere i te Tinana

Kei te mārama te mokopuna, ko te tautohu i ngā āhua o te nekehanga me te urupare o tōna tinana i ngā mahi ā-tinana rerekē, koia ētahi o ngā wāhanga o te aroā me te whakahaere i te tinana. Ka ako ia kia reretahi ngā āhuatanga neke, pērā i te taurite, i te tū, i te wā me te aroā tinana, i a ia e whakatipu ana i ngā pūkenga tūāpapa, pērā i te oma, i te peke, i te whiu, i te hopu me te taurite. Ka āwhina tēnei mōhiotanga i te mokopuna kia kaha ake te hāngai pū, te haumaru me te urutaunga o tana neke i ngā horopaki maha, pērā i te hākinakina, i te kanikani, i te kapa haka me ngā mahi o ia rā. 
I ōna pūkenga e pakari haere ana, ka tīmata te mokopuna ki te neke i runga i te pūtake me te takune, ā, ka kite i te whakaawenga o te kounga o te nekehanga i tana whai hua me tana ngahau. Ka tautoko tēnei tūāpapa i te waiora tinana mō ngā rā katoa o tōna ao, ka hiki i tana rongo i ngā āheinga tinana, ā, ka whakakaha i te māia me te hiahia ki te whai wāhi atu ki te whānuitanga o ngā wheako tinana. Ka whakaritea hoki te mokopuna ki te whakapai ake, ki te urutau hoki i ōna pūkenga hei urupare ki te panonitanga o ngā mahi ā-tinana kia uaua ake i roto i ngā tau.

Ka mōhio te mokopuna:  

• ki te hāngai o te tōtika o te tuarā me te āhua o te tū a te tangata ki tana taurite, ki tana whakahaere, me te pai o ana mahi
• ka hāpai te tīaroaro tinana i te pakari, i te whai hua, me te whakahekenga hoki o te tūpono ka whara
• ki te whai wāhitanga o te mārama ki te wāhi o ana ringaringa me ana waewae, me te āhua hoki o te nekeneke a aua wāhanga, ki te aroā tinana
• ki te whakahāngaitanga o te tōtika o te tuarā ki ngā momo nekehanga rerekē (hei tauira, te piki, te whiu, me te taunga).

Ka whakaatu te mokopuna i tōna mōhio:

• kia ū te tōtika o te tuarā i ngā mahi nekeneke huhua (hei tauira, kia pakari, kia tōtika hoki te tuarā hei whakariterite ki te peke tawhiti; ko te pā o te kauwae ki te poho, ko te tōtika o te tinana, me te noho a ngā ringa ki mua i tana pana whakamua kia mānu i mua i te tūnga anō ka toaitia ai te nekehanga)
• ki te whakarerekētanga o te tūnga o te tinana kia taurite tonu ai, kia tutuki ai rānei ētahi o ngā whāinga nekeneke (hei tauira, te whakarerekē i te tū ka hopu ana i te paora kia taurite tonu ai ia)
• ki te kōwhiri i te tūnga e tika ana i ngā horopaki whāiti o te nekehanga (hei tauira, te tū tāroaroa ki te peke, te wharara rānei ki mua kia tere ake ai te oma)
• ki te tautohu i ngā tūnga tika hei hāpai i ana mahi, hei rautaki whakahaumaru rānei (hei tauira, te whakaharatau i ētahi tūnga mō te whakataunga i ngā teiteitanga iti me te whakaahua i te āhua o tā taua tūnga āwhina kia kaua e kaha rangona taua taunga)
• ki te whakaahua i te wāhi ki ngā wāhanga o te tinana (hei tauira, te puku, ngā ringaringa, me ngā waewae) e ū ai tana taurite, tana whakahaere rānei i tōna tinana.

Ka mōhio te mokopuna:  

• ki te tika o te rerekētanga o te kaha me te rere o ngā nekehanga e ai ki ngā nekehanga rerekē
• mā te whakahaere i te kaha me te rere o ngā nekehanga, ka hāpaitia te tika, te haumarutanga, me te whai hua o te nekehanga
• mā ngā uaua, mā te reretahi, me te whakaū, ka tika ake te rere me te whakahaere
• ki te whai pānga o te kaha rawa, o te ngoikore rawa rānei ki te taurite, ki te ahunga, ki te tika rānei o te nekehanga.

Ka whakaatu te mokopuna i tōna mōhio:

• me kaha ake te whakahaere ina kaha ake te mahi (hei tauira, te whiu māmā me te whiu kaha)
• kia hāngai pū te rere o ana nekehanga (hei tauira, te peke i te wā e tika ana)
• ki te whakahāngai i te kaha me te tere o te nekehanga ki te whāinga o te mahi (hei tauira, te āta epa tukuraro i tētahi tauoma tānga, me te epa tukurunga kaha i tētahi kēmu taikaha)
• ki te whakamahi i ngā whakahokinga kōrero me ngā tirohanga e tika ake ai, e rere ake ai hoki ngā nekehanga (hei tauira, te kite i te hāngai o te hohoro o te haere me te takahanga, me te whakatika i tērā ina mahia anō)
• ki te whakamārama i te hāngai o te kaha me te rere ki te hua o tētahi mahi nekeneke (hei tauira, te whakaahua i tana whakarerekē i ana nekehanga e māmā ake ai tana taunga, e ngū ake ai rānei tana neke).

Ka mōhio te mokopuna:  

• ki te hāngai o te tūoho tinana, o te reretahi, me te whakahaere i te tinana, ki te whai hua o te neke
• ki te whai wāhitanga o te mārama ki ngā tepenga whaiaro o te tangata me te kimi rautaki ki te whakaheke i te tūpono ka whara
• ki te hāpai a te tūoho mokowā, me te whakahaere i te kaha, i te haumaru me te whai hua o tana neke
• ki te tautoko a te tūnga tika me te rautaki tika i te tika o te neke me te whakahekenga o te tūraru.

Ka whakaatu te mokopuna i tōna mōhio:

• ki te neke nā runga i tana whakahaere, me tana māia, i ngā mahi ā-tinana huhua (hei tauira, mā te āta whakahaere me te kaunuku i te wā o te piki, o te taurite, o te haere rānei i ngā ara taupare)
• ki te whakahāngai i ngā rautaki mō te haumarutanga (hei tauira, te piko o ngā pona ka tau ana ki te papa, me te taurite o te tū ka huri ana te tangata)
• ki ētahi atu me ngā mea e karapoti ana i a ia kia haumaru tana neke ka whakamahi ngātahi ana i tētahi wāhi (hei tauira, te neke i ngā wāhi e muia ana e te tangata me te kore e tukituki ki ētahi atu, pēnei i ngā tauoma tānga)
• ki te whakahāngai i tana neke nā runga i ngā whakahokinga kōrero me ngā hua kua kitea (hei tauira, te whakamārama i te āhua o tana whakamahi i ana uapuku e tōtika tonu ai te tū i te wā o te huri, o te peke rānei)
• ki te whakamārama i ngā ara e haumaru tonu ai ia, e haumaru tonu ai hoki ētahi atu i ngā mahi nekeneke (hei tauira, te mōhio ki te wā e tika ana ki te āta haere, ki te whakatā rānei kia haumaru tonu ai ia).

Te Mōhiotanga

Te Aroā Mokowā me te Aroā Pūāhua, te Rautaki, me te Whakataunga

Ko tā te mokopuna mōhio ki tana tū, nā runga i tōna hāngai ki ētahi atu tāngata me te taiao, koia te tikanga o te aroā mokowā me te aroā pūāhua. Ka āwhina tēnei mōhiotanga i a ia kia haumaru, kia whai hua hoki tana noho i ngā mahi ā-rōpū me ngā mahi takitahi. Ka ako ia ki te rongo i ngā āhua e karapoti ana i a ia — pērā i te panoni i te tere, i te tūranga, i te nekehanga rānei — ki te urutau hoki i ana mahi i taua wā tonu.

Ka whakarite tēnei i te mokopuna kia whakaaro nui, kia whai rautaki hoki tana whakamahinga i te wāhi, kia rite mō ngā tauira neke, kia urupare hoki ki ngā wero i ngā horopaki mahi tahi me ngā horopaki whakataetae. I a ia e whakawhanake ana i ēnei pūkenga, ka māia haere ia ki te whakaaro ki ngā wā kei te heke mai, kia kakama te whakatau, kia mauri tau hoki — inarā, i te horopaki e rerekē haere ana, i tana mahi tahi rānei ki te taha o tangata kē.

Ka mōhio te mokopuna:  

• ki te āwhina o roto i ngā rautaki nekeneke kia whai hua, kia haumaru hoki te whai wāhi atu ki ētahi atu
• me rerekē ngā whakataunga mokowā nā runga i ngā mahi rerekē, pēnei i te wāhi me haere, i te wā me tū, i te āhua rānei o te neke
• kia tūoho ki tā te rōpū nekeneke e kore ai e tukituki, e hāpai ai hoki i te mahi tahi
• ki te pānga o ngā ture me ngā tūranga ki tana whakamahi i te wāhi me te whakapā atu ki ētahi atu tāngata.

Ka whakaatu te mokopuna i tōna mōhio:

• ki te whakamahi i ngā rautaki nekeneke, pēnei i te karo, i te wherawhera haere, i te noho rānei ki muri i ngā taupā kia haumaru ai i ngā wāhi e whakamahia ngātahitia ana
• ki te titiro, ki te urupare hoki ki te āhua o tā ētahi atu tāngata nekeneke e ngātahi ai ngā mahi, e kore ai hoki e raruraru, e whara rānei
• ki te tīpako i ngā kōwhiringa nekeneke hei hāpai i te mahi ā-tīma me te tōkeketanga i ngā kēmu
• ki te whakaatu i te tūoho mokowā mā te neke i runga i te whakahaere me te pūtake i ngā mahi kua whakamaheretia.

Ka mōhio te mokopuna:  

• ki te āwhina o roto i te whakamaheretanga o te nekeneke kia pai ake te whai wāhi ki ngā rōpū me ngā kēmu
• ki te whakaawe a ngā mahi a ētahi atu me ō rātou tūnga i āna anō whakataunga mō te nekeneke
• ki te āwhina o roto i te matapae i ngā tauira, i ngā ahunga rānei o te nekeneke kia kimi rautaki, kia haumaru hoki
• ki te hāpai a ngā whakataunga mokowā ki te tōkeke o te tākaro me te mahi tahi.

Ka whakaatu te mokopuna i tōna mōhio:

• ki te whakamahere, me te whakahāngai i ngā nekehanga nā runga i ngā tauira kua kitea e ia i ngā mahi a ētahi atu (hei tauira, te matapae i te haere a ētahi atu)
• ki te whakamahi i ngā rautaki mokowā, pēnei i te māka, i te hīpoki, me te matapae i ngā maka i ngā mahi ā-tīma
• ki te neke i runga i te tūoho ki ētahi atu, e kore ai e tukituki, e hāpai ai hoki i te tākaro ngātahi
• ki te whakahāngai i ngā rautaki matua, pēnei i te tū ki te wāhi tika me te urupare ki ngā tūāhuatanga o roto i te kēmu.

Ka mōhio te mokopuna:  

• ki te āwhina o roto i te āta whakatau i ngā whakataunga mokowā ki te mahi ā-tīma, ki te haumarutanga, ki te angitu hoki i ngā mahi ā-rōpū
• ki te whai wāhi o te whakahāngai i tana tū me tana neke ki te hāpai i ngā whāinga a te rōpū
• ka whai wāhi te mārama ki te wā, ki te tawhiti, ki te tūnga hoki nā runga i te tata ki ētahi atu tāngata, ki te tūoho mokowā
• mēnā e whakamahi ngātahi ana i ngā wāhi nekeneke, me tūoho i runga i te whakaute ki ngā tūranga o ētahi atu me ā rātou mahi.

Ka whakaatu te mokopuna i tōna mōhio:

• ki ngā whakataunga mokowā (hei tauira, te wā me te wāhi e neke ai te tangata) hei tautoko i ngā mahi a te rōpū me ngā hua ki te rōpū
• kia reretahi tana neke ki ā ētahi atu i ngā kēmu, i ngā mahi, me te mahi ngātahi a te tīma
• ki te whakahāngai i tana tūnga e ū ai te rere, te tōkeke, te haumarutanga rānei i ngā wāhi e whakamahia ngātahitia ana
• ki te whakamārama i te hāpai a ana whakataunga mokowā i te angitu, i te hāneanea rānei o te rōpū (hei tauira, i tētahi ara korikori, ka kōwhiria te wā e neke ai ki tētahi atu teihana, e whai wā ai, e whai wāhi ai hoki ētahi atu ki te whakatutuki i ā rātou mahi).

Te Mōhiotanga

Te Ihumanea mō ngā Kare ā-Roto me te Pāpori, te Māramatanga mō te Ahurea me te Horopakie horopaki

Kia whai take te neke i runga i te whakaute, me mōhio te mokopuna ki ngā kare ā-roto me ngā āhua o te rōpū, me rongo ia i te hononga ki tangata kē, me whakatinana hoki ia i ngā uara o te rōpū i roto i te nekehanga. Ka āwhina tēnei mōhiotanga i te mokopuna ki te āta rongo i ngā kare ā-roto o tangata kē, kia tika hoki tana urupare ki aua kare ā-roto i roto i ana mahi, ā, ka poipoia te kauawhi me te whakaute o te whai wāhitanga.

I roto i ngā wheako tinana e ngātahi ana, ka whakatipu te mokopuna i te noho huānga, ka whakapakari hoki i ngā hononga, ā, ka ako ia kia tōkeke ana mahi, kia tautiaki, kia kauawhi hoki i tangata kē. Ka kite te mokopuna i te whakaawe a ngā horopaki o te ahurea me te pāpori i te nekehanga, ā, ka tīmata ia ki te kawe i ngā uara o tōna whānau, o tōna hapū, o tōna hapori hoki — ka whakamana i ngā āhua tuku iho, ka hāpai i ngā kawatau, ka whakaatu hoki i tana tautiaki i te āhua o ana nekehanga. I tana mārama e pakari haere ana, ka kaha ake tā te mokopuna whai whakaaro, tana urupare hoki ki ngā tāngata me ngā taiao e karapoti ana i a ia, kia rongo te katoa i te haumaru, i te whakaute, i te kauawhi hoki.

Ka mōhio te mokopuna:  

• mā te tōkeke me te whakaute e rongo ai te katoa i te haumaru, i te uara, me te whai wāhitanga i ngā mahi nekeneke e ngātahi ana
• ka whai wāhi ki te whakaute te whakarongo, te whakahau i ētahi atu, tē kite kē ai i te whakaiti
• ka hāpai te tōkeke me te whakaute i ngā wheako me ngā hononga ngākaupai o te rōpū.

Ka whakaatu te mokopuna i tōna mōhio:

• ki te tōkeke i ngā mahi nekeneke e ngātahi ana mā te hohoko o te karawhiu, mā te whakamahi ngātahi i ngā taputapu, me te whai i ngā ture o te rōpū
• kia whakaute ngā whanonga mā te akiaki i ētahi atu, nā runga i te whakamahia o ētahi kupu manaaki, me te whai wāhi a te katoa
• ki te tautoko i ngā wā e whakaatu ai ia, e whakaatu ai rānei ētahi atu i te tōkeke, i te whakaute rānei i tētahi mahi.

Ka mōhio te mokopuna:  

• mā te āta whakarite kia whai wāhi ētahi atu e rongo ai i te noho huānga, e pakari ake ai hoki te hononga i waenga i te rōpū
• ko te tikanga o te āta neke, ko te tūoho ki te pānga o ana mahi ki te haumarutanga, ki te hāneanea, me te whai wāhitanga o ētahi atu
• he mōtika tō te katoa kia rongo i te whai wāhitanga me te uara i ngā mahi nekeneke e ngātahi ana
• me manaaki, me tūoho, me kauawhi hoki ngā whanonga e ngākaupai ai ngā āhuatanga o te rōpū.

Ka whakaatu te mokopuna i tōna mōhio:

• ki te āta neke mā te mātakitaki i ngā hiahia o ētahi atu, me te urutau ki aua hiahia i te wā o ngā mahi ā-rōpū
• ki te whakarite i te whai wāhitanga mā te pōwhiri i te tangata, mā te tiritiri haere i ngā tūranga, mā te hihiri hoki i tā te katoa rongo i te rāhiritanga
• ki te tautoko i te noho huānga mā roto mai i ngā mahi manaaki, i te mahi tahi, me te akiaki i ngā mahi nekeneke
• ki te huritao ki te āhua o te hāpai a ana mahi i ngā tāngata kia rangona ai te haumarutanga, te whai wāhitanga, me te wāhi ki a rātou i te rōpū.

Ka mōhio te mokopuna:  

• ki te pānga o ngā kare ā-roto o te rōpū ki te rongo, ki te mahi, ki te whai wāhi a te tangata ki te nekeneke ngātahi
• ki te whakaawe a tana whakahāngai i tana nekeneke i te ngākaupai o ngā wheako o tangata kē (hei tauira, te tere, te ngao, me te kaha)
• ka tautoko te ngākau aroha, te tūoho, me te uruparetanga i ngā āhuatanga ngākaupai o te rōpū
• mā te neke ngātahi e pakari ai ngā hononga ina rongo ngā tāngata i te haumarutanga me te whai wāhitanga.

Ka whakaatu te mokopuna i tōna mōhio:

• ki te ngao kei roto i ngā kare ā-roto o te rōpū, me te urupare ki tērā mā te whakahāngai i te āhua o tana neke (hei tauira, i tētahi kēmu, ka rongo te mokopuna i te nui rawa o te wairua whakataetae, ka āta haere ai, ka kōrero ai rānei i ētahi kōrero whakaaio hei tautoko i ētahi atu)
• ki te whakahāngai i ngā kōwhiringa nekeneke hei hāpai i tā ētahi atu tāngata rongo i te haumarutanga, i te hāneanea, me te whai wāhitanga
• ki te whakamahi i te nekehanga hei hāpai i te mahi tahi, hei tautoko hoki i te taiao ngākaupai o te rōpū (hei tauira, te kite i tētahi e rongo ana i te pokea ōna, ā, ka tono ai kia whakawhiti tūranga, kia whakarerekē rānei i te tere o te kēmu)
• ki te huritao ki te āhua o tāna anō neke me te pānga o tērā ki ngā kare ā-roto me ngā wheako o te rōpū.

Te Mōhiotanga

Ngā Hononga Rau me te Kaitiakitanga

He hononga rau ki waenga i te tangata me te taiao, ā, he kaha te hononga o te waiora o te mokopuna ki te waiora o te ao tūroa. Ka whakaaweawe tana kite i a ia hei wāhanga mō tēnei pūnaha ngātahi i tana rongo i te haepapa, i te noho huānga me te manawaroa. Kei te mōhio ia, ko tana tiaki i te waiora, koia hoki tana tiaki i a ia anō, i tangata kē hoki, ā, ka kitea te whakapapa i roto i tēnei āhua me tā te whakapapa hono i ngā mea ora katoa. Ka akiaki tēnei mōhiotanga i te whakaute me te kaitiakitanga hei whakapuakitanga matua i aua hononga. Ka ako te mokopuna kia taurite, kia aumārire hoki ki te taiao hei tūāpapa mō te waiora paetawhiti. I roto i tēnei tirohanga hononga, ka whakaata āna mahi i te tautiaki, i te hononga, i te haepapa hoki, ā, ka whakapakari i te manawaroa, inarā, i ngā wā e panoni ana te taiao, te pāpori rānei. Ka whakaū tēnei māramatanga i tā te Māori titiro ki te taiao hei mea ora, hei mea tapu, hei mea matua hoki ki te tuakiri me te waiora.

Ka mōhio te mokopuna:  

• ka whakaatu te whakapapa i ngā hononga i waenga i te tangata, ngā wāhi, me ngā kaiao
• ka hono te whakapapa i te tangata ki te taiao, ka āwhina hoki te whakapapa ki te whakamārama i ngā haepapa ki te tautiaki, ki te whakamaru hoki
• ka tautoko te waiora mā roto mai i ngā hononga me te tuku ihotanga o ngā mōhiotanga, ngā mahi, me te tautiaki
• ka whakapakari ngā mahi e tautiaki ana i te tangata me te taiao i te whanaungatanga me te waiora o te katoa.

Ka whakaatu te mokopuna i tōna mōhio:

• ki te tautohu, ki te whakamārama hoki i te āhua o tā te whakapapa hono i a ia ki te tangata, ki ngā wāhi, ki te taiao hoki (hei tauira, ka hanga, ka tūhura rānei i tētahi rārangi whakapapa hei hono i a ia ki tētahi maunga, ki tētahi awa, ki tētahi whenua rānei)
• ki te whakaahua i ngā mahi a te whānau, te hapū, ngā hapori rānei ki te tiaki i te taiao hei tautoko i te waiora (hei tauira, ka whakaahua i tā te marae, tā te kura rānei tiaki i tētahi wāhi tata, me te whakapakaritanga ka puta ki te hapori i taua mahi)
• ki te tautohu, ki te tuku tauira hoki mō ngā hononga whakapapa e āwhina ana i te tangata me te taiao kia puāwai (hei tauira, ka kōrero mō tā te tangata tiaki i te taiao hei wāhanga mō tana tiaki i ētahi atu, pērā i te kohi kai mā tētahi hui, te whakatika i ngā puna wai, te whakatō rākau rānei)
• ki te kite i ngā tūranga o ngā tīpuna, ngā atua, me te whānau i te ahunga o ngā tikanga me ngā haepapa o te tiaki (hei tauira, ka whai i ngā tikanga tuku iho, pērā i te karakia, te waiata, me ngā ritenga tiaki).

Ka mōhio te mokopuna:  

• i roto i te kaitiakitanga, me hohe te tautiaki mō te taiao i runga i te whakaute, te haepapa me te whakapapa
• he hononga rau i waenga i te tangata, ngā tipu, ngā kararehe, me ngā wāhi, ā, ka whakaaweawe te katoa i te waiora o tangata kē
• ka tautoko ngā mahi o te kaitiakitanga i te waiora o te taiao me te tangata hoki
• ka ahuahu te mōhiotanga me ngā uara o te ahurea i te whakamaru me te whakaū o te hapori i te taiao.

Ka whakaatu te mokopuna i tōna mōhio:

• ki te whakaahua i ngā mahi ka mahia ki te tiaki i te taiao, me ngā hua ka tautoko hoki i te waiora pāpori (hei tauira, ka hono atu ki tētahi rangi whakatō, tētahi rangi whakapai rānei i te kura, i te hapori tata rānei, ā, ka whakamārama i ōna hua)
• ki te tuku tauira o te kaitiakitanga i tōna whānau, i tōna kura, i tōna hapori rānei (hei tauira, ka tātari i ngā pūnaha hauropi tata e tautoko ana i te kai, ngā rauemirānei; ka kōrero ki te whānau, ki te hapori rānei e pā ana ki te mahinga kai, ngā wāhanga o te tau, te rāhui rānei)
• ki te whai wāhi ki ngā mahi e tautoko ana i te waiora o te tangata me te taiao (hei tauira, te whakatō, te whāomo, te whakaora, te wairākau)
• ki te whakamārama i te whakaawenga o ngā uara ahurea, pērā i te manaakitanga, te whanaungatanga, me te whakapapa, ki ngā mahi kaitiakitanga (hei tauira, ka kite, ka whakaahua hoki i te hononga i waenga i te tiaki i te taiao me te rongo i te whakahīhī, te mauri tau, te hononga rānei).

Ka mōhio te mokopuna:  

• e tōtika ana te whakaawenga o te taiao ki te waiora o te tangata, te hapori, me ngā reanga ka whai mai
• ka rerekē te pāhekoheko, me te tautiaki a te tangata i te taiao, ā, ka hāngai ki te ahurea, ngā uara, ngā wheako, me ngā pūnaha mōhiotanga
• kei roto i te kaitiakitanga, ko te haepapa ngātahi me te mahi ngātahi, tēnā i ngā kōwhiringa takitahi
• ka whakaaweawe pea ngā tirohanga maha, pērā i te mātauranga pūtaiao me te mōhiotanga pūtaiao, i ngā whakataunga mō te taiao.

Ka whakaatu te mokopuna i tōna mōhio:

• ki te whakaahua i tā ngā panonitanga i te taiao (hei tauira, te parahanga, te āhuarangi hurihuri, te ngarohanga o te kanorau koiora) whakaaweawe i te waiora tangata me te waiora taiao
• ki te tautohu, ki te whakatairite hoki i ngā mahi rerekē a ngā tāngata ki te tiaki i te taiao, me ngā uara e noho ana hei tūāpapa mō aua mahi (hei tauira, ka whakatairite i ngā kaupapa whāomo a ngā hapori e whakaata ana i ngā uara rerekē, i ngā pūnaha mōhiotanga rerekē rānei, pērā i te rāhui me ngā ture rohenga a te kaunihera)
• ki te mahi tahi me ētahi atu ki te hiki i te haepapa ki te tiaki i tētahi wāhi noho ngātahi, i runga i te whakaute i ngā tirohanga kanorau
• ki te whakamārama i te wāhi o ngā tirohanga Māori, pērā i te whakapapa me te mātauranga, ki te kaitiakitanga (hei tauira, ka tūhura i ngā whakataukī e whakapuaki ana i ngā haepapa ki te taiao hei tautoko i tētahi whakataunga rōpū, i tētahi whakaaturanga rānei; ka wānanga i ngā mahi a ngā hapū me ngā iwi ki te tiaki i te whenua, me te take e hirahira ana ō rātou reo i ngā whakataunga).