Skip to main content
Tāhūrangi - Kauwhata Reo
Support
  • Reo Māori
  • English
Tāhūrangi - Kauwhata Reo
  • Reo Māori
  • English
Support
Switch Curriculum:
Te-Reo-Rangatira-675x450-Hero-image.png

He tauākī herenga ōkawa mō te wāhanga ako Reo Rangatira e pā ana ki te whakaako, te ako, me te aromatawai ki ngā kura arareo katoa.

WEB

Wāhanga Ako

Te Reo Rangatira – Tau 0-6

Te Reo Rangatira

Tau 0‑6

  

Te Reo Rangatira
Tūārere 1 – Tau 0‑3

  

Te Reo Rangatira
Tūārere 2 – Tau 4‑6

Ataata tīaroaro - tirotiro Reo Rangatira

Video transcript
Video transcriptVideo transcript

Mō tēnei rauemi

E wātea ana ngā mōhiotanga o te wāhanga ako Reo Rangatira tau 0-6 i nāianei.

Add to kete
Add to Collection

Add to collection

Download resources
Materials that come with this resource:

    Tohutohu mō ngā Poari o Ngā Kura e pā ana ki ngā herenga

    hoki ki runga ake

    Me mātua whakatinana ngā kura i te Wāhanga Ako Te Reo Rangatira Tau 0–6.

    Nā te Minita o te Mātauranga, te Hōnore Erica Stanford, i tuku atu i te Wāhanga Ako Te Reo Rangatira, Tau 0–6, i raro i te Education and Training Act 2020, section 90(1), hei tauākī herenga marautanga taketake, hei tauākī marautanga ā motu hoki.

    Ko ngā wehenga i waihangatia hei tauākī marautanga ā-motu ēnei – Whenu, Toi Mokopuna, Tohu Ako (hāunga Mā te Kaiako). Ka whakatakoto ēnei i ngā mea hei ako mā ngā ākonga i tā rātou wā ki te kura, tae rā anō ki ngā taumata e manakotia ana mō te mātauranga, te māramatanga, me ngā pūkenga ka tutuki ai.

    Ko te toenga (tae atu ki Mā te Kaiako i roto i ngā Tohu Ako) i waihanga kē hei tauākī herenga marautanga taketake. Ka whakatakoto ēnei i ngā kawatau mō te whakaako, te ako, me te aromatawai hei tautoko i ngā tauākī marautanga ā-motu, ā, ka horipū hoki ēnei kia whaimana ngā hōtaka whakaako me ngā hōtaka akoako o Te Reo Rangatira (tae atu ki te reo matatini, arā, te pānui me te tuhituhi).

    Ka whakamana ēnei tauākī hei te 1 Hanuere 2025, kātahi ka whakakapi te marautanga Te Reo Māori 2010 mō ngā ākonga tau 0–6. Ka noho, ā, ka mana tonu ērā atu tauākī marautanga o Te Marautanga o Aotearoa (2010).1

    Ko ēnei ngā tauākī o ngā herenga ōkawa e pā ana ki ngā whakaakoranga o Te Reo Rangatira (tae hoki ki te reo matatini) hei ahunga mō ngā haepapa marautanga, aromatawai hoki kei runga i ngā kura (Education and Training Act 2020, section 127), ngā hōtaka whakaako me ngā hōtaka akoako (section 164 of the Act), me ngā aroturuki, ngā pūrongorongo hoki o ngā mahi a ngā ākonga (section 165 of the Act and associated Regulations). I raro i ēnei wāhanga o te Ture, ka noho here ngā Poari o Ngā Kura, nō reira mā rātou e here anō ki tā rātou tumuaki me ā rātou kaimahi o te kura kia whanake, kia puaki hoki i ngā hōtaka whakaako me ngā hōtaka akoako e whakamana ai i ēnei tauākī.

    He aha ngā herenga?

    Me mātua whakaatu mai ngā kura i tā rātou whakamahi i aua tauākī i ngā āhuatanga o te whakamahere i ngā aha me ngā pēhea o te whakaako i Te Reo Rangatira mō ngā ākonga tau 0–6. Me pēnei rawa ngā kaiako: 

    • whakamahia te raupapa whakaako o ia tau, o ia tau i ngā Tohu Ako hei whaimōhio i ngā aha hei whakaako, mō āhea hoki ki runga i ngā akoranga o mua a ngā ākonga.
    • arohia ngā aratohu tikanga whakaako me ngā rautaki whakaako ki raro i Mā te Kaiako me Te Roanga o te Kōrero mō ngā kaiako i ā rātou ake mahi whakaakoako. 
    • aromatawaitia haeretia te kauneke me te tutuki o ngā ākonga mō Te Reo Rangatira e ai ki ngā hua kauneke o ngā Tohu Ako.

    Me whakawā ngaio tonu ngā kaiako kia urutau ai ā rātou hōtaka whakaako, hōtaka akoako hoki ki ngā matea ako o ā rātou ākonga – tērā pea ka rerekē te ako a ētahi ākonga ki ngā raupapa whakaako o tā rātou tau kura. Mēnā ka hiahia ētahi ākonga i ngā mahi torohanga kei kō atu i ngā tau 6 o te wāhanga ako mō Te Reo Rangatira, me tahuri kē ngā kaiako ki te wāhanga ako mō Te Reo Māori, taumata 4 piki ake o te tauākī marautanga 2010.

    Ngā herenga wā2 mō te whakaako pānui, tuhituhi, pāngarau hoki

    Ko te whakaako me te ako i ngā mahi pānui, me te tuhituhi, me te pāngarau te whakaarotau matua mō ngā kura katoa. Kia rawaka ai ngā wā whakaako me ngā wā ako i ngā mahi pānui, me te tuhituhi, me te pāngarau. Ko ngā poari ā-kura kei a rātou ngā ākonga Tau 0 ki te 8 mā roto mai i ngā tumuaki me ngā kaiako e whakarite hōtaka me ngā wātaka whakaako me te ako i ngā Tauākī Marautanga ā-Motu, tae atu ki tēnei nā, mā te aha ki te whakarato:

    • kia 10 hāora i ia wiki e aro ana ki ngā mahi whakaako me te ako ki te tautoko i te whanaketanga me tutukitanga i roto i ngā mahi pānui me te tuhituhi ka kitea i ngā rā o te kura i ia wiki, me te mōhio anō ki te mana o te kōrero, e pā ana ki ngā akoranga tau tōmua.
    • kia 5 hāora i ia wiki e aro ana ki ngā mahi whakaako me te ako ki te tautoko i te whanaketanga me te tutukitanga i roto i ngā mahi pāngarau ka kitea i ngā rā o te kura i ia wiki.

    Kei ngā wā ka whakahaeretia ngā mahi whakaako me ngā mahi ako i te pānui, i te tuhituhi, me te pāngarau ki te horopaki o ngā Tauākī Marautanga ā-Motu i tua atu i te reo Māori me te pāngarau. Me āta whakaritea, āta whakatinanatia, āta tautokotia te whanaketanga a ngā ākonga i roto i ā rātou mahi pānui, mahi tuhituhi, me te pāngarau hoki/rānei, ngā aronga, ngā mōhiohio me ngā pūkenga hāngai tika.

    Ahakoa ko ngā kupu pānui me te tuhituhi e whakamahia ana, ka taka mai anō ko ngā momo whakawhitinga kōrero, tae atu ki te Reo Rotarota, ki ngā momo whakawhiti kōrero kē rānei me te Tuhi Matapō.

    Photo of a family drawing in the sand on the beach

    E whakanohoia ai te tīrewa e whakairia ai ngā wheako o tōu ao ... Ko te tīrewa ko te reo.

    Te Wharehuia Milroy (2012). Waka Huia. (7:35)

    Ko te reo Māori te kākahu o te whakaaro e mārama ai te mokopuna ki ngā wheako o tōna ao.

    Te whai take o te ako i Te Reo Rangatira

    hoki ki runga ake

    Kei te iho o Te Reo Rangatira ko te tūhononga o ngā tini āhuatanga reo e whai hua ai te whai wāhi atu a te mokopuna ki tōna ao, hei kanohi mō tōna whānau, mō tōna hapū, mō tōna iwi. Ka noho hoki ki te tūāpapa o Te Reo Rangatira ko te reo matatini e angitu ai te mokopuna i te kura tuatoru, i te ao hoki o te mahi.

    Ko tā te reo Māori he aro ki te mana motuhake o te mokopuna me ōna takenga katoa – takenga reo, takenga tangata, takenga tikanga, takenga wairua. Mā reira e angitu ai tana tū ki tōna ao hei uri whakaheke, otirā hei tangata. Ko te reo te whakapuakitanga o te mokopuna – ōna whakaaro, tōna tuakiri, tōna wairua. Heoi, he reo ake tō tēnā mokopuna, he reo ake anō tō tōna iwi. Me whai wāhi hoki te kaiako ki te whakamana i te reo o te tamaiti, o tōna iwi, me te mita ake o te mana whenua. Nō reira, me matatau te mokopuna ki te ako i te reo Māori, me matatau hoki te kaiako ki te whakaako i te reo.

    Ka tautohu Te Reo Rangatira i ngā toi mokopuna, i ngā pūkenga me ngā mātauranga e āhei ai te mokopuna ki te whakapuaki i tōna katoa, ki te whakawhiti kōrero, ki te ako, ki te torotoro i ngā huatau, i ngā whakaaro, i ngā mātauranga kia angitu, kia whai hua.


    Ngā Tirohanga

    hoki ki runga ake

    E ai ki te tirohanga a Te Reo Rangatira ki te whakaako me te ako i te reo:

    graphic

    Whakapapa

    He taonga tuku iho te reo Māori.

    graphic

    Tūrangawaewae

    Nō tēnei whenua te reo Māori.

    graphic

    Mana Motuhake

    Nō te iwi te mana o te reo.
     

    graphic

    Kaitiakitanga

    He taonga te reo Māori, ko tā tātou he tiaki i a ia kia ora ai.

    graphic

    Whanaungatanga

    Ko te reo te waka kawe i ngā tūhononga tāngata.

    		  

    Te Hanganga o Te Reo Rangatira

    hoki ki runga ake

    Ko ngā whenu

    E whā ngā whenu o Te Reo Rangatira:

    • Kia Tika – te hāngai me te tika o te reo 
    • Kia Mārama – te arohaehae o te whakaaro 
    • Kia Arero Taiaha – te wairua tōkeke o te whakawhiti kōrero 
    • Kia Auaha – te auaha o te tuku kōrero

    E hāpai ana ēnei whenu i ngā pou matua o te marautanga.

    Takarangi for Te Reo Rangatira

    Ko ngā Toi Mokopuna

    hoki ki runga ake

    Ko tā ngā Toi Mokopuna he whakamārama i te āhua o te mokopuna ina ako ia i Te Reo Rangatira mō te 13 tau. E whakaata ana ngā Toi Mokopuna i ngā awhero o ngā whānau, o ngā hapū, o ngā iwi, i ngā tino hua o Te Reo Rangatira, me te pūtake o ia whenu. Ka noho ngā Toi Mokopuna hei aronga mō te ako, puta noa i ngā tūārere, kia mōhio pū ai te mokopuna me te kaiako ki te take o ngā mātauranga, o ngā pūkenga, o ngā māramatanga, me ngā wheako ako i roto i ia whenu.

    Ngā Whenu

    Kia Tika

    Kia Mārama

    Kia Arero Taiaha

    Kia Auaha

    Ngā Toi Mokopuna

    He kaingākaunui te mokopuna ki te tika o te reo.

    He whakaaro arohaehae te mokopuna.

    He whai whakaaro te mokopuna ki te āhua o tana whakapuaki i ōna whakaaro.

    He whai hua, he auaha, he Māori te whakamahi a te mokopuna i te reo.

    He whanaketanga ako reo

    hoki ki runga ake

    E whakaatu ana Te Reo Rangatira i te whanake haere o te ako i te reo i ngā tūārere e rima atu i te Tau 0 ki te Tau 13.

    E whā ngā whāinga o ia tūārere, tētahi mō tēnā Toi Mokopuna, tētahi mō tēnā Toi Mokopuna. E tohu ana ngā whāinga i ngā akoranga tāpua i tētahi tūārere.

    Puta noa i ngā tūārere, atu i te Tūārere 1 ki te Tūārere 5, ka tautohu ngā whāinga i te whanaketanga o te reo i ngā tau tekau mā toru i te kura.

    Heoi, he tino rerekē te tere me te tipu o te ako a tēnā mokopuna, a tēnā mokopuna. Nō reira, me mōhio rawa te kaiako ki ngā akoranga matua o ngā tau o mua, me ngā tau e whai ake nei. Koinei tētahi o ngā painga o te nohotahi o ētahi tau ki tētahi tūārere, he māmā te kite i ngā akoranga o mua, me ngā akoranga ki mua. E whakaata ana hoki tēnei i te āhua o ngā akomanga taumata maha, arā, he rerekē ngā taumata ako o ngā mokopuna.

    Ahakoa te whanaketanga o te reo kua whakaahuatia i ngā tūārere, he rerekē te ako a tēnā mokopuna, a tēnā mokopuna. Nō reira me aro atu te āhua o te whakaako ki ngā āhuatanga ake o ia mokopuna, ki tōna tipuranga, ki tōna ake whanaketanga me te āhua o te ako (tirohia ngā kōrero mō te Science of Learning3). Mā konā e ū ai te ako, e whanake ai te mokopuna.

    Ngā whāinga matua

    hoki ki runga ake

    E whā ngā whāinga matua i ia tūārere:

     

    Kia Tika

    Kia Mārama

    Kia Arero Taiaha

    Kia Auaha

    Ka aro te ako a te mokopuna ki:

    Tūārere 1
    (Tau 0-3)

    te tika o te mārama me te whakamahi i ngā kupu me ngā rerenga kōrero waiwai.

    te whakawhanake i ngā pūkenga me ngā rautaki aroā waiwai.

    te whakawhanake i ngā pūkenga pāhekoheko waiwai.

    te tūhura i ngā huarahi hei whakapuaki i ōna whakaaro me tōna pohewatanga.

    Tūārere 2
    (Tau 4-6)

    te tika o te mārama me te whakamahi i te huhua o ngā kupu me ngā rerenga kōrero.

    te whakamāori i te huhua o ngā kōrero ā-waha, ā-tuhi, ā-ataata hoki.

    te whakamahi i ngā pūkenga pāhekoheko waiwai kia whai hua.

    te whakamahi i te reo whakaahua me te reo peha.

    Tūārere 3
    (Tau 7-8)

    te tika o te mārama me te whakamahi i te puna kupu me ngā rerenga kōrero e whānui haere ana.

    te āhua me te pūtake o ngā kōrero puta noa i te whānuitanga o ngā kōrero ā-waha, ā-tuhi, ā-ataata hoki.

    te whakawhitiwhiti kōrero kia whai take.

    te whakamahi i te reo whakaahua me te reo peha kia whai take.

    Tūārere 4
    (Tau 9-10)

    te tika o te mārama me te whakamahi i te whānui o ngā kupu kaupapa me ngā rerenga kōrero tuatini.

    te tātari i ngā kōrero ā-waha, ā-tuhi, ā-ataata hoki.

    te whakawhiti kōrero kia hāngai.

    te tātari me te whakamahi i te reo kia auaha.

    Tūārere 5
    (Tau 11-13)

    te tika o te mārama me te whakamahi i te whānui haere o ngā kupu whāiti me ngā rerenga kōrero tuatini.

    te kōtuitui me te tātari arohaehae i ngā pārongo.

    te whakawhiti kōrero kia arero taiaha, kia ngākau aroha.

    ngā whakamahinga auaha o te reo.

    Te Wāwāhi i ngā Whāinga Matua

    hoki ki runga ake

    Ko tā Te Reo Rangatira nei, he āta whakamārama i ia whāinga matua. Kua wāhia ia whāinga kia kitea ai tōna kiko, arā, ngā mātauranga me ngā pūkenga hei ako mā te kaiako i ia tau o te tūārere.

    I te Tau 1, e rua ngā aronga – ko ngā marama e ono i te tīmatanga ki te kura, ko ngā marama e ono e whai muri mai ana. E pēnei ana nā te hiahia kia tautokona te whakawhitinga mai o te mokopuna i te kura kōhungahunga me ngā kōhanga reo ki te kura tuatahi.

    Ko te āhua hoki o te ako reo, he haere whakamua, he hoki whakamuri, kātahi ka haere whakamua anō. Ehara i te mea ka ākona tētahi pūkenga o te reo, ka mau i te mokopuna mō ake tonu atu. Nō reira, katoa ngā akoranga tāpua e whanake haerehia ana i ngā tūārere katoa. Engari me mātua aro atu te kaiako ki te āta whakaako i ngā pūkenga, i ngā mātauranga, i ngā māramatanga, me ngā āhuatanga reo i te tau e tohua ana.

    Mehemea he tino akoranga tā te whāinga hei aronga matua mā te kaiako, kua āta tohua ki te wāhi, Kia Mataara. Me aro atu ngā kaiako katoa ki ēnei kōrero, kei raru te ako a te mokopuna me tōna whanaketanga i ngā tau whai muri.

    Ko Te Ngako o te Whāinga he whakarāpopototanga o ngā akoranga tāpua o te whāinga. Koinei te wetewete tuatahi i te whāinga matua. I tēnei wāhanga, e hāngai ana ngā kōrero ki ngā akoranga o ia tau.

    Ko tā te wāhanga e kīia ana ko Te Roanga o te Kōrero, he āta whakamārama i ngā āhuatanga whāiti me ngā akoranga whāiti o te whāinga. E hāngai ana ngā kōrero o tēnei wāhanga ki te tūārere. E pēnei ana i te mea he rerekē te āhua me te tere o te ako a tēnā mokopuna, a tēnā mokopuna. Heoi, i te roanga o te tūārere, koinei ngā āhuatanga whāiti hei whakaako.

    Ka tīmata ngā kōrero ki ētahi whakamārama mō ngā āhuatanga o te mokopuna i taua tūārere me ngā āhuatanga o te whakaako hei whakaarotanga mā te kaiako.

    E hono ana ēnei whakamārama ki ngā tini mata o te whakaako e kōrerohia ana i te marautanga, arā, ki: Ngā Tini Mata o te Reo, Ngā Tini Mata o te Ako, Ngā Tini Mata o te Mātauranga me Ngā Tini Mata o te Tuakiri. Mā reira e kitea ai te whānuitanga o te whāinga me ngā taha katoa o te whāinga hei whakaako mā te kaiako. E whakaata ana Ngā Tini Mata o te Ako i ngā huatau matua o Te Marautanga o Aotearoa, arā, ko tā ngā kaiako he whakaako i te reo, he whakaako i te ako, he whakaako i te mokopuna.

    Kei te wāhanga o Hei Tautoko i te Ako ngā kōrero hei āwhina i te kaiako ki te whakamahere i tētahi hōtaka reo me te hāpai i te ako.

     

    Te Kanorau i te Ako Reo

    hoki ki runga ake

    Ko te mōhio ki ngā taera ako huhua o ngā mokopuna whaikaha tētahi āhuatanga hiranga e mārama ai te āhua o te whakahaere i tāna ako i te reo. Kia tīmata mā te kōrero ki te whānau ki te tautohu, ki te mārama hoki ki ngā pūkenga motuhake me ngā āhuatanga e uaua ana ki tā rātou mokopuna, tae noa atu ki ngā rautaki ka whai hua ki a ia. Whakamahia Te Ngako o te Whāinga hei tūāpapa mō tētahi matapakinga e pā ana ki ā rātou whakaarotau mō te whanaketanga reo.

    Me mōhio ki ngā rautaki ka whai hua ki ngā mokopuna whaikaha, me te āhua hoki o ēnei rautaki i tētahi horopaki ako reo.

    I ngā akoranga reo, kia whai wāhi mai ngā mokopuna katoa mā te:

    Pūmau o te whakaako 

    • kia pūmau te anga e mōhio ai te mokopuna ki ngā whakahaerenga 
    • kia pūmau te koke me te rere o ngā mahi i te roanga o te akoranga 
    • kia whakaingoatia ngā rautaki ka whakamahia e koe e mōhio ai te mokopuna ki ngā mahi i ngā wā katoa.

    Arotahi ki te whakawhiti kōrero 

    • kia mārama, kia koi te kōrero – me poto ngā tohutohu 
    • kia waiho mā te mokopuna te nuinga o ngā kōrero.

    Poipoi i te ngākau hihiri 

    • kia whai wāhi te mokopuna mā ngā ngohe whakawhitiwhiti me ngā rautaki e pārekareka ana 
    • kia ākina te mokopuna ki te whakamahi i te katoa o te reo e mōhiotia ana e ia hei whakaoti i ngā ngohe ako reo 
    • kia ākina te mahinga tahitanga i waenganui i ngā mokopuna 
    • kia ākina, kia whakanuia hoki “te whakamātau” i te whakamahinga o te reo e hou ana.

    Whakatairanga i te ako 

    • kia whakamahia ngā rautaki whakaako reo hou hei tautohu i ērā ka whai hua ki ia mokopuna 
    • kia tīrewa te tuku tautoko hei arataki i te mokopuna matea ako rau 
    • kia tīmata ki ngā mea e mōhio kētia ana e te mokopuna hei tūāpapa mō te ako reo hou 
    • kia whakamahia ngā horopaki me ngā rautaki e taunga ana ka whakaakona ana he reo hou 
    • kia whakaakona ngā mokopuna ki ngā rautaki mō te ako i ngā kupu me te reo hou 
    • kia whakamahia ngā ara whakaako ā-ataata, ā-rongo, ā-ringapā hoki e whai wāhi atu ai ngā taera ako huhua 
    • kia rite tonu te kuhu atu i te wā huritao hei āwhina i te mokopuna ki te tautohu i ngā rautaki ka whai hua ki a ia me ngā pātai pea kei a ia 
    • kia whāngaihia he taiao akoranga kauawhi, e whakanui ana i ngā rerekētanga ako katoa.

     

    Ko te Rangaranga Reo ā-Tā

    hoki ki runga ake

    Ko te Rangaranga Reo ā-Tā te huarahi whakaako i te pānui me te tuhi. I ahu mai tēnei huarahi whakaako i te mātai pūnaha ioio (taha roro me te tukatuka reo), i te mātai wetewete reo, me te mātai hopu reo kia mārama, kia nahanaha, kia tāpiripiri te whakaakona o te pānui me te tuhituhi.

    I tēnei huarahi whakaako, ka kitea, ka ākona ngā wāhanga whāiti o te reo (pēnā i ngā oromotu me ngā orotuhi), ā, ka hoki atu, ka hoki atu te mokopuna ki ēnei ākoranga. Mā konā e tipu ai te mātauranga, e pakari ai te pūmahara, e pakari ai ngā pūkenga o te mokopuna ki te pānui me te tuhi i te whānuitanga o ngā momo kōrero.

    E ono ngā kaupapa o te Rangaranga Reo ā-Tā, arā, ko:

    1. Te Aroā Weteoro me te Aroā Oromotu
    2. Te Oro Arapū ā-Tā
    3. Ngā Kūoro me te Tautohu Kupu
    4. Te Mātai Wetekupu
    5. Te Tātaikupu
    6. Te Kawenga Tikanga Reo.

    I ia kaupapa, ka tautohua:

    • ngā hua whakaako – ngā mātauranga hei whakaako
    • te raupapa whakaako – te raupapa o te whakaako i aua mātauranga
    • te wā whakaako – te wā e tika ana kia whakaakona aua mātauranga.

    E kitea ana ētahi āhuatanga o ēnei kaupapa i ngā whenu o Te Reo Rangatira.

     

    Te Aroturuki me te Aromatawai

    hoki ki runga ake

    Ka whakarato ngā raraunga ā-motu mō ngā mahi aromatawai me ngā tohu i tētahi tirohanga matawhānui ki te mātau reo matatini, puta noa i ngā Tau 0-13.

    I ngā kura, ka whakamahia ngā mahi aromatawai hei whai, hei aroturuki hoki i te koke kiritahi a te mokopuna, e āhei ai te kaiako ki te whakanui i ngā tutukinga a tēnā mokopuna, a tēnā mokopuna. Mā te whakarite i ngā whakaarotau e mārama ana me ngā whāinga whāiti, ka mārama ake, ka kaha ake hoki te tautoko a te kaiako i te tipuranga o ngā mokopuna katoa.

    Ko te tikanga, ko ngā pārongo ka kohia mā roto i ngā mahi aromatawai, ka whakamōhio i ngā kura, i ngā kaiako, me ngā whānau e pā ana ki te whai hua rānei o te hōtaka reo. Ko te tikanga anō hoki, ka pūrangiaho te māramatanga o te mokopuna me te kaiako ki ngā tutukinga me ngā kokenga whakamuatanga.

    Ko te ako te tūāpapa o te aromatawai

    Ko te tikanga, kāore e tino rerekē ana te āhua o te aroturuki me te aromatawai i te whanaketanga reo i te ako pū i te reo. Kei ngā mea ka kitea e te kaiako me te āhua o tana mātai i ngā mahi a te mokopuna te rerekētanga. Ko te mātai hihiri tētahi o ngā rautaki matua mō te whai i ngā kokenga:

    1. Me āta aro ki ngā mahi, ki ngā whakawhitinga kōrero rānei a te mokopuna – te mātai, te whakarongo, te kite, me te huritao.
    2. Me tautohu ngā mōhiotanga whāiti, ngā pūkenga, ngā waiaro, me ngā whanonga e whakaaturia ana e te mokopuna.
    3. Me āta huritao, me āta whakaaro hoki ki ngā mahi e taea ana e te mokopuna me te āhua o te kōkiri atu i tērā.

    He whakapiki mana te aromatawai

    Me arotahi te aromatawai me te aroturuki i te reo ki te tautohu i ngā mōhiotanga, i ngā pūkenga, me ngā aronga reo e mātau kē ana te mokopuna, e mōhio ai ki te whai hua rānei o te whakaako ā mohoa, me te huarahi me whai ā haere ake nei.

    E mihia ai te whānuitanga me te kanorau o te ako, me kohi te kaiako me te kura i ngā taunakitanga o ngā kokenga, puta noa i ngā whenu me ngā wāhanga katoa o Te Reo Rangatira, tae noa atu ki: 

    • ngā mōhiotanga reo (ngā tini mata o te reo, ngā tini mata o te mātauranga), 
    • ngā pūkenga reo (ngā tini mata o te ako) 
    • ngā aronga reo (ngā tini mata o te tuakiri).

    He tika, he pono te aromatawai

    Kei te kaiako me te kura te haepapa mō ngā whakataunga ka puta i a rātou e pā ana ki te mokopuna me tōna whanaketanga reo. Nā konā tonu e whai take ana tō te kaiako, tō te kura, tō te whānau, me tō te mokopuna whakapono ki ngā taunaki i whakamahia rā hei tautoko i ēnei whiriwhiringa. Hei whakapūmau i te tika me te pono o ngā whakataunga e pā ana ki te ako reo, ka whakamahia ngā tukanga tūturu me ērā kāore e tūturu ana.

    Ka whai wāhi atu ki ngā tukanga tūturu ko ngā pāhekoheko ako, ngā aromatawai ōkawa, me ngā aromatawai ōpaki. Ka whai wāhi atu ki ngā tukanga kāore e tūturu ana ko ngā ara e hōhonu ake ana, pēnei i te whakamahi tairongo me te mārama pū ki te mokopuna hei tangata – ōna hiahia, ōna pūkenga, ōna uauatanga, me ōna aronga.

    hoki ki runga ake

    Heading

    Tohutoro

    1. https://gazette.govt.nz/notice/id/2009-go8814

    2. https://gazette.govt.nz/notice/id/2023-go5904

    3. Johnston, M., Hood, N., Aitken, G. (2024). A knowledge-rich curriculum underpinned by the science of learning. Ministry of Education

    hoki ki runga ake

    A

     

    āheinga

    capability, opportunity

    āhua

    form

    āhuareka

    interest

    āhuatanga

    characteristic, feature

    āhuatanga tuatini o te wetereo

    advanced grammar

    āhuatanga tuhi

    text features

    āki

    encourage

    ako horipū

    explicit teaching

    ako ngātahi

    collaborative learning

    ako tautauāmoa

    self-directed learning

    ako tūhura

    discovery learning

    akoranga

    learning opportunities

    angawā

    timeframe

    arapāho tuihono

    online media

    aratohu

    guideline

    ariā waiwai o te reo ā-tā

    basic concepts of print

    aro

    notice

    aroā oromutu

    phonemic awareness

    arohaehae

    critique, discerning

    aropā

    peer group

    arorau

    coherent, logical

    arotake

    evaluate

    arotake aropā

    peer evaluation

    aroturuki

    monitor

    aroturuki whaiaro

    self-monitoring

    aruaru

    interrupt

    ata

    image

    ata toka

    static image

    atataki

    vlog

    auaha (-tanga)

    creative, creativity

    aunoa

    automatically

    H

     

    hā

    intonation, tone

    hā o te reo

    style

    hā whaiaro

    personal style of expression

    hāngai (o te reo)

    appropriate, appropriateness (of language)

    hātuhi

    writing style

    haukume

    bias

    hautaka

    journal

    hīkaro

    inference

    hinengaro tātari

    analytical mind

    hoahoa

    design

    horopaki

    context

    huahuatau

    metaphor

    huarite

    rhyme

    huatau

    concept

    huatau/whakaaro

    ideas

    huatau matua

    key ideas

    hunga whakarongo/pānui/mātakitaki

    audience

    huritao

    reflect

    huritao takamua

    preview

    I

     

    īpāho

    podcast

    K

     

    kahaoro

    volume

    kāhua kaituhi

    writer profile

    kai tūraru

    risk taking

    kaimahi whakaputa

    actor-emphatic

    kaipānui motuhake

    independent reader

    kaitā pikitia

    illustrator

    kanorau

    diverse

    kārawarawa

    punctuation

    kare ā-roto

    emotion

    kātū

    genre

    kaupapa ako ngātahi

    collaborative projects

    kaupapa ārita

    sensitive topic

    kī horipū

    quote

    kīanga

    expression, saying

    kīanga pūtake

    clause/comment of reason

    kīhono

    conjunction

    kīpaki

    slang

    kīpeha

    figurative expressions

    kiripuaki

    character

    kiritōpū

    collective (collectivity)

    kiritūnei

    first person (voice/narrative)

    kiritūnā

    second person (voice/narrative)

    kiritūrā

    third person (voice/narrative)

    kokenga

    progress

    kore auau

    low frequency

    kōrero

    narrative, text

    kōrero autaki

    talk around

    kōrero horihori

    misinformation

    kōrero taikākā

    important information

    kōrero tene

    impromptu speaking

    kōrero tīrangorango

    jumbled text

    kōrero whaiaro

    self-talk

    kōtuitui

    synthesise

    kuhi

    affix

    kūmuri whakahāngū

    passive suffix

    kūmuri whakaingoa

    noun suffix

    kūoro

    syllable

    kūoro pūrua

    single consonant-vowel syllables

    kūororau

    multisyllabic

    kupu āhuareka

    interest words, near synonym

    kupu āhukahuka

    sight word

    kupu auau

    high frequency words

    kupu kakare

    emotive word

    kupu kaupapa

    subject-related word

    kupu kiko

    content word

    kupu motuhake

    specialised vocabulary

    kupu pūhui

    compound word

    kupu tauaro

    antonym

    kupu taurite

    synonym

    kupu tuatini

    complex word

    kupu waiwai

    basic vocabulary

    kupu whakamōmona

    hyperbole

    kupu whakarite

    simile

    M

     

    mahi ngātahi

    collaboration

    māia

    confidence

    manawataki

    rhythm

    matapaki

    discuss

    matapakinga

    discussion

    matapōkere (tia)

    randomly

    matawhānui

    comprehensive

    matawhawhati

    unexpected

    matihiko

    digital

    mauminamina

    receptive

    mōhio

    recognise

    momo reo

    register, text type

    N

     

    nuka reo

    language device

    nuka whakanahanaha

    organisational device

    NG

     

    ngākau aroha

    empathy

    ngākau whakaute

    respect

    ngaku

    strip (of paper)

    ngohe

    activities

    O

     

    ohia manomano

    brainstorm

    oro

    pitch, sound

    oro arapū ā-tā

    alphabetic principle

    orokati

    consonant

    orokati pūrua

    digraph

    orokati tārua

    alliteration

    oromotu

    phoneme

    oropuare

    vowel

    oropuare pūrua

    vowel blend

    oropuare tārua

    assonance

    ororite

    onomatopoeia

    orotuhi

    grapheme

    P

     

    pae tuihono

    online platform

    paearu

    criteria

    pāhekoheko

    interact

    paki, pakiwaitara

    story

    pākiki

    curious

    pakini

    apostrophe

    pānui anō

    re-reading

    pānui whakatika

    proof-reading

    pāpāho

    media

    paparanga tikanga

    layers of meaning

    paparua (tanga)

    restate

    pāpātanga

    impact

    parahau

    justify

    pārekareka

    interesting

    pārongo ataata

    visual information

    pārongo hauarea

    irrelevant information

    pārongo mātuatua

    key information

    pārongo, kōrero

    information

    pātai turuki

    follow-up question

    pātai tuwhera

    open-ended question

    pepa hāpiapia

    post-it note

    Pikinare

    Pictionary

    pikitia ataata

    visual picture

    piko

    comma

    pohewa

    imagination

    pono

    reliable, reliability

    pū

    letter

    pūāhua

    situation

    pūkenga nukuiti

    fine motor skills

    pūkenga pāhekoheko

    interpersonal (communication) skill

    pūkenga pāpori

    social skills

    pūkenga whakawhiti kōrero

    communicating skills

    puku

    body (of a text)

    pūmanawa

    ability

    pūmanawa patokupu

    word processing application

    pūmatua

    upper-case letter

    pūriki

    lower-case letter

    pūriro/pūpānga

    possessive particle

    pūrua

    double vowel

    pūtake/take o te kōrero

    purpose (of communicating)

    pūtakenga whakawhitiwhiti kōrero

    text purposes

    pūtohu

    modifier

    R

     

    ranga wairua

    inspiration

    rārangi puna kōrero

    bibliography

    rātaka

    diary

    raupapa

    sequence

    rautaki

    strategies

    rawa ōkiko

    concrete object

    raweke

    manipulate

    reo ā-iwi

    dialect

    reo ā-tuhi

    written word

    reo ihiihi

    expressive language

    reo kakare

    emotive language

    reo o te ngākau

    empathetic language

    reo ōpaki

    informal language

    reo peha

    figurative language

    reo pohewa

    imagery

    reo tinana

    body language

    reo tohu

    symbolism

    reo whakaahua

    descriptive language

    rereāhua

    descriptive sentence

    rereingoa

    nominal sentence

    rerekaimahi

    actor emphatic sentence

    reremahi

    verbal sentence

    reremahi āhua

    stative sentence

    rerenga

    sentence

    rerenga tuatini

    complex sentences

    rerepānga

    possessive sentence

    rerepūhui

    compound sentence

    reretūpono

    conditional sentence

    ringatoi

    artist

    ritenga

    manners

    rōnaki

    clines (game)

    Rūnanga Kura

    Board of Trustees

    T

     

    tāhū o te paki

    storyline

    taipitopito

    detail

    takatā

    edit

    takawaenga

    facilitator

    taki

    recount

    takirua

    retell

    tāmuramura

    highlight

    tāruarua

    repetition

    tātaitanga whakaahua

    graphic organiser

    tātaki kupu

    spell

    tātari

    analyse

    tātari arohaehae

    critically analyse/evaluate

    tātauira

    template

    taumata

    degrees

    tautohe

    controversial

    tautohe/tautohetohe

    argument

    tautohu

    identify

    tāuutuutu

    take turns

    tāwhai (-tanga)

    imitate

    te reo tūhono i te take me te pānga

    conjunction (of reason)

    tīaroaro

    alignment (of text)

    tikanga tuhi

    orthographic convention

    tikanga whakaaro

    thinking tool

    tīmatanga mahi

    stimulus

    tīrangorango

    mix

    tīwae

    column

    tīwhiri horopaki

    contextual clues

    tohu ā-tinana

    body cue

    tohu kī

    quote mark

    tohuoho

    exclamation mark

    tohutohu

    instruct

    tohutoro

    reference

    toikupu

    poetry

    topenga ataata

    video clip

    tūāhua

    adjective

    tūāhuatanga

    scenario

    tuakiri

    identity

    tūāpapa o te reo

    basics of language

    tuhi tīpoka

    note taking

    tuhinga paki

    narrative text

    tūhonohono

    cohesive

    tūhura

    explore

    tūingoa

    noun

    tūkē

    adverb

    tukutuku

    grid

    tūmahi ingoa

    gerund, derived noun

    tūoho

    awareness

    tūoho whaiaro

    self-awareness

    tuone

    gesture

    tūpou

    pronoun

    tute

    prompt

    tūtohi

    chart

    tūtohi whakauru

    substitution table

    U

     

    uhingaro

    code

    urupare

    respond, response

    W

     

    waehanga

    component

    waihanga

    constructing

    waihanga o te kiripuaki

    characterisation

    waiwai

    basic

    wairua tōkeke

    diplomatic/equity

    wāmahi

    tense

    wehewehe

    differentiate/distinguish

    weteoro

    decode

    wetereo

    grammar

    WH

     

    whai wāhi

    engage

    whai wāhi hihiri

    active participation

    whaiaro

    personal

    whakaahua

    description, illustration

    whakaahua ā-hinengaro

    imaging

    whakaahua; whakaahua ā-kupu

    describe

    whakaahuahanga

    representation

    whakaari

    act, play (drama)

    whakaari taketake

    original story

    whakaaro ā-waha

    think aloud

    whakaaro arohaehae

    critical thinking

    whakaaroaro; whai whakaaro

    consider

    whakaatu

    demonstrate, depict

    whakaawhiwhitanga

    approximation

    whakahangahanga

    diplomatic

    whakahāngai

    adapt, make relevant

    whakaharatau

    practice

    whakahoa

    relate (to a character)

    whakahokinga whaihua

    constructive feedback

    whakahua

    enunciate, pronunciation

    whakakapi

    replace

    whakakapinga

    conclusion

    whakamāori

    interpret

    whakamārama

    explain

    whakamaumahara

    memorise

    whakaōrite

    consistent, consistently

    whakapai ake

    refine

    whakapalepake

    convince

    whakapapa reo

    language profile

    whakapoto

    concise, concisely

    whakapūaho

    caption

    whakapuakanga

    expression, phrasing

    whakapuaki

    express

    whakapuaki anō

    paraphrase, rephrase

    whakapūmau

    confirming

    whakaputa

    communicate (ideas)

    whakarāpopoto

    summarise

    whakari ngū

    mime

    whakarongo pīkari

    active listening

    whakatairite

    compare

    whakatakune

    charades

    whakatau

    role play

    whakatauaro

    contrast

    whakatauira

    model

    whakatauiratanga mataaho

    explicit modelling

    whakatautau

    dramatisation

    whakatika

    recite

    whakatika aropā

    peer correction

    whakatika whaiaro

    self-correct

    whakaū

    affirm

    whakauru

    substitution

    whakawhānui

    expanding

    whakawhānui/whakawhanake

    develop

    whakawhere

    persuasive

    whakawhiti

    transition

    whakawhiti kōrero

    communicate (text)

    whakawhiti whakaaro

    negotiate

    whakawhitinga kōrero

    dialogue

    whētui

    fold