Te Wharekura 42

WEB

Te Wharekura 42

Nā Te Ohomauri Stewart rātou ko Matahi Whakataka Brightwell, ko Kohine Mackie, ko Oho Kaa ngā kōrero
Ko Kene Martin rāua ko Tūpuna Te Riri Maihi Kawiti ngā kaiwhakamāori
Ko Josephine Reid te kaituhi i te reo Pākehā
Nā Jamael Paea te uwhi me ētahi o ngā pikitia. Nā Miranda Witford rātou ko Kerry Jemmil, ko Caroline Campbell, ko Gus Hunter ngā pikitia. Nā Julian Ward ngā whakaahua

This collection brings together written works that shares times past and also includes a play about the children of Tangaroa.

Te Wharekura 42

This resource is no longer in print. You may be able to find it in the resource room in your kura.

Ngā pūrākau kei roto i te puka nei:

Ko Poukokonga te roto

Ohopu
Te Maiki Pou Kara, Kororāreka
He kai anō te kōtero
Te tina pō i ngaro

See the “About this resource” box below to download resources.

Ko Poukokonga te roto
Ohopu
Te Maiki Pou Kara, Kororāreka
He kai anō te kōtero
Te tina pō i ngaro

Ko Poukokonga te roto

Nā Te Ohomauri Stewart

I te wā i ahau e paku ana, i whakatipuhia mai ahau i Tuaraki, ko te ingoa o te whenua ko Tāwhao. Ko ōku tīpuna ko Pootihinga Te Rito me Te Hati Nepia. Nā rāua ahau i whāngai. Tokowhā mātau i whāngaihia e ngā koroua nei. Ko Mōkena Te Rito, ko Pootihinga Werihana, ko Mere Robin, me ahau. Ko tōku ingoa ko Te Ohomauri Stewart.

Ko te roto i muri iho i tō mātau marae i a Te Pāhou, ko Poukokonga. E kī ana ōku tīpuna koia rā anā te ingoa o te taniwha i roto i taua roto, arā, ko Poukokonga. Haereere ai mātou i ngā raumati ki roto i taua roto kaukau ai. Tākaro ai mātou i roto i ngā raupō. Kia paruparu nei te wai i a mātou, ka kite koe i ngā mōrihana e puta ake ana i te wai i reira, ka hopuhopungia e mātou, me te whiuwhiu ake ki runga i te tahataha. Kei reira ētahi o mātau hei puru i ngā ika nei ki roto i ngā kete. He mahi tākaro tēnei mahi engari he mahi tino pai.

He waka pakaru nei i roto i te wai. Tapitapihia ai e mātou mā te paruparu. He wā e pai ana engari he wā ka totohu te waka nei, engari ka pai tonu ki a mātou ēnei mahi. Kia totohu nei te waka, ētahi o mātou kei te mau tonu i ō rātou kākahu, ka mākū, kua kata mātou. He rapu tuna anō te mahi e mahia ana e ētahi ō mātou. Ko ngā pakeke hei mahi i ēnei mahi. Mōhio kē ake rātou ki te hopu i te tuna i a mātou ngā tamariki pakupaku.

I ngā rā o mua ko te ingoa o te marae ko Poukokonga, he marae tino tawhito. E kīia ana na taku tipuna nā Te Hati i tō mai te whare nei ki te wāhi e tū nei, ma ōna hōiho. He tino toa taku tīpuna ki te mahi hōiho. E hia kē ōna hōiho. Ko te ingoa o te whenua kei reira nei te marae, me te whare e tū ana ko Matakakā. Ka whakatūngia te whare hou nei e ngā koroua rā hei whare kanikani. Nō reira i noho ai te ingoa o te whare nei ki a Te Pāhou. Ahakoa i nekehia mai te whare nei ka noho tonu te roto nei ki muri iho i te marae.

Ināianei kei te aroha rawa atu mātou nōtemea kua maroke te roto nei, kua kore ngā mōrihana hei haeretanga atu mā ngā tamariki ki te hopuhopu. Kua mate te taniwha nei ināianei. Kāore e taea e ngā tamariki o ēnei rā ki te mahi i ngā mahi i mahia e mātou e noho tonu ana i te wa kāinga nei. I roto i ēnei mamae me ngā pōuri ki ōku whanaunga kua matemate, ka tuhia e ahau ēnei kōrero. I puta ēnei kōrero nōtemea kei te kite haere ahau e ngarongaro haere ana te momo o te tangata. Anei ngā kōrero nei:

E hoki whakamuri ana ngā whakaaro, e whakarongo ana ki te tangi a ngā manu. Ka titiro whakawaho ko Tāwhao tērā te kainga i noho ai ngā mātua.

Kia whitikihia taku haere ki te roto e maroke mai rā ko Poukokonga tērā, te takotoranga o te kuia nei i te pō. E Kui e, mehemea ka taea koe ki te whakaora mai ...

Tukuna mā ōku roimata e whakakī tō moenga roa kia rongo anō aku taringa i te tangi a te matuku. Ka titiro ahau ki taku maunga ko Puketapu. Ka rere haere tonu taku titiro ko Hinehakirirangi, ko Manawaru, te kāinga i tanuhia rā ai te kūmara. E rere rā te haere o te awa o Te Arai, te kai whakamākūkū i ngā aka. Ka rere haere tonu taku titiro ko Hinetātauranga.

Ka titiro whakamuri ahau ki ngā pari e mā mai rā, e pākia mai rā e ngā ngaru o te moana. Ko Te Huanui tērā ko Ngai Tāmanuhiri Kia whakahokia taku haere ki runga i ngā huarahi o Tuaraki ki te tū i mua i taku tipuna ko Taharākau nāna nei te kōrero:

"Tini whetū ki te rangi ko Ngāti Maru ki raro

Tini kahawai ki te moana ko Ngāti Maru ki uta"

Tumeke ana taku huri, ko koia e oho ana ahau i taku moe.

Ko te ingoa o taku pāpā i tuhia rā e ahau ēnei kōrero, ko Rupena Moeau.

Nō reira he whakamaharatanga kōrero tēnei mōna. Moe mai rā e te pāpā i tō moenga roa. Mā ēnei kōrero e whakahoki mai tō wairua ki runga i ēnei marae o Manutuke.

Ohopu

Nā Matahi Whakataka Brightwell
Nā Kerry Gemmill ngā pikitia

Nō te tau 1985, tokorima ngā tāngata i tere mai i runga i te waka o Hawaikinui mai i Rarotonga ki Wharekahika, ko Matahi Brightwell tētahi o rātau. E rua tekau ngā rā he ika tā rātau tino kai. I tētahi o ngā hīnga ika ka mau a Ohopu, a, ka tarapeke ake te mangō, ka horomia atu a Ohopu. Takirua ēnei ika, takawhitiwhiti ana ki roto i te waka.

Ko ngā kaiwhakatū

Kaipānui

Ko Kahutia Te Rangi – te ika pōhatu nui, Tokanui

Ko Kōpū – he whetū

Ko Mangō Tuatini – he mangō kikorangi, noho takitahi

Ko Maroro – he ika rere

Ko Moko – te rangatira o ngā mangō

Ko Oa – te rangatira o ngā aihe

Ko Ohopu – he karere

Ko Tangaroa – te Atua o te moana

Ko Te Marama

Ko Te Matau o Māui – he whetū

Ko Tinirau – tohorā, tama mātāmua a Tangaroa

Ko Toroa – he manu moana

Whiti kōrero tuatahi

Ko Ohopu te karere kei te kohi kōrero mā Tangaroa.

KAIPĀNUI: Nō te wā e puta ana te huka me ngā hau mātao, i kau haere a Ohopu i tua o ngā tokai Takarangi e ahu atu ana ki Whangarā. I reira a Kahutia te Rangi e moe ana. Ko Kahutia te Rangi te tohorā nāna nei a Paikea i mau mai, ā, ū pai ana mai ki Aotearoa, ā, kua huri pōhatu kē ināianei. Ka rongo a Ohopu i te marama e waiata ana ki a Matau a Māui. Ka whai kupu a Ohopu te karere ki a Kahutia te Rangi.

OHOPU: Whanaunga! Whanaunga! Kaumātua!

KAHUTIA TE RANGI: A-A-A-E.

OHOPU: He aha ngā kōrero?

KAHUTIA TE RANGI: Ngā kōrero! Nga kōrero! I te moe kē au. I te takoto ahau i te tahaki o te wai mō te rua tekau mā rima ahunga, ā, me koe te tamāhine o te whānau o Ohopu, ui kē ana mai ki au mō ngā kōrero? Mea atu ki a Tangaroa kua rongo kōrero au. Ki te tiaho mai Te Matau a Māui ko ia anake, ka pērā anō te puta mai o te Hawaikinui waka, ā, ko ia anake. Mea atu ki ngā tamariki a Tangaroa kia tūpato, tiakina, aratakina, kia ngāwari ai te huarahi o tēnei waka.

OHOPU: E te Tokanui, e Te Ika, ehara nei i te whare o Tangaroa, nā aku tīpuna i kawe atu te kōrero ki a koe kia aroha ki a Paikea. Māku anō hoki e kawe tō kōrero.

KAHUTIA TE RANGI: Taihoa! Noho ake mō tētahi wā. Te tamāhine, ko wai to ingoa? He uri koe nā ngā Ohopu. Ko wai tō ingoa moana?

OHOPU: Ko taku ingoa moana ko Maimiti.

KAHUTIA TE RANGI: Maimiti, āe, he ingoa nō te tamāhine a te kuini o Tahiti. Kōrero mai ki au, Maimiti. He aha kē he kōrero māu ki a Tangaroa.

OHOPU: Ki tō kōrero. Ka haria e au tō kōrero mō te waka nei a Hawaikinui e tere ana mai i Tahitinui, Moorea, Rangiatea, Rarotonga, ā, ki Aotearoa. He aha koa te koha a Tangaroa? He ngāwari te moana ki te whakawhiti, he kore he ika hei hopu mā ngā kaihoe o Hawaikinui waka, he karekare moana kē rānei?

KAHUTIA TE RANGI: Ka pai tēnā, ka tāpaea mai a Tānemāhuta e toru o ana tamariki hei hanga i a Hawaikinui waka. Whakatā e taku tamāhine, he tawhiti te kauhoe kei mua i a koe.

KAIPĀNUI: Nā ka tō haere te rā, ka ea haere mai ko Te Mārama, ka tīmata te whetu a Kōpū ki te waiata.

KŌPŪ: Tērā he waka te karanga ki au hei arataki i a ia i te arā moana. I roto o te mano tau kua pahemo, he maha aku haerenga. Nā ngā whetū i waitohu te huarahi. Ināianei ko tēnei. Ka uira mai au i roto o ngā kapua, ka kanapa, ka koiri, ka peke, kia kitea ake e te waka.

TE MATAU A MĀUI: Me whakakotahi tātou, me kore e tūpono ngā mea ātaahua te puta. Mauria atu tā mātou pānui ki a Tangaroa.

TE MĀRAMA, KŌPŪ, TE MATAU A MĀUI: Kei te whakaae mātou ki te āwhina i ngā tamariki a Papatūānuku, kia mārama tā rātou haere i roto i tō mātou māramatanga. Kia hohoro Ohopu, kawea ā mātou pānui ki tō tīpuna tāne. Kia tere Ohopu paku, kau atu.

Whiti kōrero tuarua

Ka whakakao a Tangaroa i ana tamariki.

KAIPĀNUI: Nō te hakiritanga o te kīngi o te marae kikorangi i ngā kōrero, ka karangatia e ia he hui mā tōna whānau i roto i tōna tauranga tapu, ka whanake rātou. Ka kōrerotia atu e Ohopu nga kōrero nā Kahutia te Rangi mō te hiahia o ngā whānau whetu ki te āwhina i te haere a Hawaikinui waka, ka takarika hoki ko Tangaroa.

TANGAROA: E taku tama, e Tinirau, i mua i haere ngātahi tāua ki Aotearoa me ō tāua waka, kia mahara tāua ki te whakahōnore i ngā manaakitanga o te wā.

KAIPĀNUI: Ko Moko i kōrero.

MOKO: E kī ana au te māngai o ngā mangō, kāore ko rātou. He rapa utu kē tā mātou mō te mahi a te tangata e patupatu nei i ngā ika i roto i ō rātou tauranga. Ka whai haere mātou i tēnei waka i a Hawaikinui, ka wehi te hunga o te waka i a mātou. (Ka titiro kohura ake a Moko ki a Ohopu). Kāore mātou e āwhina. Ka kite tonu mai rātou i runga i te waka Hawaikinui i ngā piha pango, tērā rātou e mātau he aha te wehi i te ao, i te pō.

KAIPĀNUI: Kātahi a Oa, te rangatira mō te whānau o ngā aihe ka kōrero.

OA: Ko tō mātou whānau o ngā aihe e kore mātou e whakataetae ki a koe e Moko, kei te tika tō rapa utu. Mehemea a Tānemāhuta tō tātou pāpā e tuku ana mai i ana tamariki hei hanga i a Hawaikinui waka, hei reira mātou te āwhina atu ai. Kei reira mātou anō te ūkui ai i o mātou puku ki runga i te waka, ka kī, tēnā koutou e ō mātou taina.

MOKO: (Ka katakata.) E Oa ka urutomo mai koe i waenganui i au, ā, me te waka, ākuanei ko koe ka noho hei kīnaki kai mā mātou.

MANGŌ TUATINI: AAAA, Ka tautoko au i taku rangatira. I mua, he hanga pai noa iho ki au te kōwhiri te kai e pai ana. Ināianei kei tawhiti te kai, kua kore, kua pau katoa, kāti rā e Moko, ka piri pono ahau ki a koe.

MARORO: Kāore mātou e tautoko ana i a aihe, i te kekeno rānei, ōotemea ko tō mātou ao kua anuhea noa iho, ko koe e Ohopu hei kai mā rātou.

OHOPU: Kei te pai, mā ngā Ohopu e āwhina te taha kai e hiahiatia ana e rātou mō tā rātou haere.

KAIPĀNUI: Whakatakariri ana te tarapeketanga atu o Moko ki a Ohopu.

MOKO: Kei te kōrero koe. Ka kōhuatia e rātou tō upoko, ka ngotea o whatu ki waho, me

kore e whakaaro pēnā i a koe, ika paku, ki te tūpono au te kite i a koe i te taha o tēnei waka, ka pau koe i a au te kai.

OHOPU: Kei te wareware koe e Moko, te iwi Māori e pāngia ana e te hēmanawa ka hoe atu ki waho i te tuawhenua ka tahuri, ka mate. O rātou tinana hei koha mō ō mātou tinana i hoatu e mātou ki a rātou. Kei te mārama, Moko?

MOKO: E mahara ake ana au i te wā e apiapi ana ō tātou wai, te kotahi o te āhua noho o ā tātou whānau, te kore te tītakataka, te aha. Kua mutu, kua tatū ōku whakaaro mō taku whānau mangō.

KAIPĀNUI: Kātahi ka korero a Tinirau te tama a Tangaroa.

TINIRAU: E aku whanaunga, tēnā koutou. E māuiui ana tātou katoa i tēnei wero hou, kore rawa i pērā i mua. Me kī, e whitu whakatipuranga tangata ki muri. E wīharahara ana au i tā rātou waiata mai anō i te awateatanga mai o Papatūānuku.

TOROA: Otirā e ngā whanaunga, he poto noa iho taku waiata, arā, pērā anō te poto me tō tātou oranga i ēnei rā.

Ka rere atu taku huarahi,

I runga o ngā ngaru,

Me kore noa he hau,

Hei tauranga mōku

Kia whanga atu ai au me kore,

He tohorā e whanake ki ahau.

KAIPĀNUI: Kātahi ka huri ake anō a Tinirau ki te whakaminenga.

TINIRAU: Ko tātou te whānau o ngā kekeno, me haere ngātahi me rātou, kia āhua matara mai i te awatea, kia piri atu ki a rātou i ngā pō, koia nei tāku rongo. Ko te Hawaikinui nei he pānui ā waka, he mea tārei i roto i te ao o Tāne, hei honohono i ngā kīngitanga i taotū mai runga, me raro.

KAIPĀNUI: Rātou katoa i whakaaro nui ki a Tinirau. Ka kōrerotia e ia, i te wā i ngā uri a Māui i noho i roto i te rangimārie me ōna tuākana, ngā rākau, ngā manu, me ngā ika.

TINIRAU: Pērā anō me Kahutia te Rangi i Whangarā. Kāore noa iho i roa rawa atu ko te kōrero o te tohorā. He mea tino uaua ki a tātou te mōhio mōna, i ngaro tōna korowai mahana, ā, ka whakakākahutia ana ia e Tāne. He taonga tapu ki te iwi Māori e noho ana i tōna taha, e aroha ana ki a ia pērā me tātou.

KAIPĀNUI: Ka kōrero a Tinirau mō te rongo kōrero; ko Kahutia te Rangi kei te tangi whakahuahua muri iho, pai ana tana moe mai anō i te rā o Paikea.

TINIRAU: I takoto ake au i runga i te moana whakarongorongo ake ai, hei taku putanga atu, inā te kōrero a taku taina " Tinirau, Tinirau, whakahuatia taku ingoa tapu me kore tāua e kau ngātahi, whakahuatia taku ingoa tapu." Ā, ka kite ahau i ōna taotū, ā, ka mea ahau, mehemea e āhei ana me kau atu tāua i tua atu o te tekau pukunga mai o te ngaru, ka totohu koe, nōtemea, ko ō ngutu me ētahi wāhanga o tō kauwae kua kore. Ka mate koe, tae atu hoki ki te mana o ngā tamariki e aroha nei ki a koe. Ko āu kaupapa nei hoki tō rātou oranga, ko koe rā tō mātou maungaringa atu ki tō rātou reo, ki to rātou ao. Ohopu paku, i kōrero koe ki a ia, kei te mahu haere tōna taotū?

OHOPU: Mai anō i taku kitenga whakamutunga i tō taina, hūmarie ana tōna āhua, otirā he tohu ora tērā.

TINIRAU: E mōhio ana ngā whanaunga ki ēnei tohu; he ātaahua. Nō muri iho i te ahi pakū i kai ake ki taku taina, kāore au i kōrero, i whakaaro rānei. Nō nāianei he waka kei te haeremai, tērā pea ināianei e whiwhi tātou i te rangimārie

KAIPĀNUI: Mai i taua wā ki tēnei, kei Whangarā tonu a Kahutia te Rangi e moe ana, kei te tāpaea tonutia e Tānemāhuta ana tamariki hei hanga waka, kei te uira tonu ngā whetū hei arataki i te arā moana, kei te āwhina tonu ngā Ohopu me nga aihe i te waka, ā, kei te whakawehi tonu ngā mangō.

Te Maiki Pou Kara, Kororāreka

Nā Josephine Reid ngā tuhinga Pākehā, nā Kene Martin rāua ko Tūpuna Te Riri Maihi Kawiti i whakamāori

Ko te rā tēnei i tohungia hei rā tirotiro mō tō mātou kura i te Pou Kara o Maiki. Kei Kororāreka te pou e tū ana, ā, ko te whakaaro kia tirohia i mua i te whakaheketanga mai i a ia ki te whenua kia whakaorangia tana mate pirau. Ko ngā tāngata o Te Papa Atawhai hei mahi i tēnā mahi.

I ahau e titiro whakamīharo atu ana, ka tupu tētahi aroha tino nui mō Tūpuna Maihi Paraone Kawiti ki roto i ahau. He aroha mō tana kaha māia me tana toa ki te whakaara taonga ātaahua pēnei, hei mea tirotironga mō mātou, ōna uri whakatupu.

Ka hoki aku whakaaro ki te wā i tonoa rā a Ngāti Hine me ētahi atu hapū ki te tapahi rākau kauri, mai i te ngahere o Whangaii i Kawakawa. Ka hinga te kauri, ka tōia ki te awa tupuna, ki Taumarere. Te taenga atu ki reira, ka tōia mā ngā waka ki tērā taha o te awa moana rā, i raro iho o te puke ikeike o Maiki, ka āhua kite atu ahau i a Tupuna mā, e tō haere ana i taua rākau kauri i roto i te wai. Ka rongo hoki ahau i ō rātou reo karanga, me te kite i ō rātou hoe e patii ana i te wai. Ka tangi mahara ahau ki a rātou mā.

Te taenga atu ki Kororāreka, ka tōia anō te rākau e Ngāti Hine me ōna hapū āwhina ki te wāhi o Edward Cook, nāna i mahi, oti noa te pou. Ko te utu kotahi rau e toru pauna mō tana mahi. E whitu tekau mā rima putu te roa o te pou, ko te kurupae nā Te Kapotai i hōmai. I te whā o Tīhema, 1857, ka kawea te pou ki Maiki. Nā ngā uri tonu o Kawiti rāua ko Hone Heke i kawe. E toru rau rātou ki te mau i taua pou i te tāone o Kororāreka, tae noa ki Maiki puke. Ka whakaarahia, ka tū ki runga.

Ko tētahi atu mea aroha ko te mahi kohi moni a ngā hapū o Kawiti rāua ko Heke, me ētahi tāngata Māori takitahi i whai ngākau ki te āwhina i ngā mahi whakaara i te pou. Kotahi rau whā tekau ma whitu te moni i kohia.

I te otinga o tā rātou mahi ki te whakatū i te pou, ka puta ngā kōrero a Tupuna Maihi ki te iwi katoa, Māori me te Pākehā, "Mō te Pou Kara kua ara nei, nā Heke, nā Kawiti, i tūraki, nā mātou i whakaara. Ināianei, e kore tētahi o mātou e tae a muri nei ki te tapahi i tēnei pou. Ka tapaia te ingoa mō te pou, ko te Whakakotahitanga, arā, ko te whakakotahitanga a te Māori, me te Pākehā."

I runga i ērā kōrero ka whakaaro ahau, "Āe Tupuna, e mahia tonu ana aua tohutohu āu, i runga i te aroha me te rangimārie.

He kai anō te kōtero

Nā Kohine Mackie

Te Puna Wai

"Kua tika ināianei ki te hari ngā pēke ki te wai," te kī a tōna kuia i muri mai o te herenga o te waha o te pēke.

"Haramai, haere tāua ki te kimi wāhi pai."

"Ka haere tāua ki te awa?"

"Ehē ... he whānui rawa te awa. He tino pai ngā kōawa, kāre e tino rahi. Whai mai koe i ahau." Kāhore i roa kua tae rāua ki tētahi kōawa.

"Me tuku te pēke ki konei?" te pātai a Rawinia.

"Taihoa ... i mua i tō rautanga i ō rīwai ki roto i te wai, mahia he puna."

"He aha te puna, e Kui?"

"Anei, me titiro mai koe Rawinia, kia mōhio ai koe ki te mahi puna."

I kari te kuia o Rawinia, i tētahi hōpua iti, ka kī atu ki a Rawinia, "Anei, he puna wai tēnei."

"Āe, e Kui he pai hei kaukau."

"Kao, mehemea he kai kei konei, kāhore e pai ki te horoi."

"Āe, e Kui."

Pākorokoro

Nō te ōtinga o te puna wai, ka tīmata te kuia nei ki te mahi pākorokoro.

"He aha tēnā, e Kui?"

"He pākorokoro tēnei hei pupuri i ā tāua pēke kia kore e riro i te wai." I mauria mai e te kuia o Rawinia he papa rākau hei mahi pākorokoro. Kāhore e tino roa rawa ngā papa. Ka poua e ia e whā ngā pou ki roto i te wai, kātahi ka pākati i ngā taha mā ngā papa. E rite ana ki te pouaka tapawhā. Kāhore i piri ngā papa ki ngā taha kia puta ai te wai.

Ka hōhā a Rawinia, ka kī a ia, "Kia tere, e Kui, āhea tāua ka mutu"

Tuku ki te wai

Kua mutu te mahi i te pākorokoro. "Kua pai ināianei ki te tuku i ngā pēke ki roto i te wai. Haere mai Rawinia," te kī a tōna kuia. Ka āwhina a Rawinia i tōna kuia ki te hiki i ngā pēke rīwai, ka tuku ki roto o te pākorokoro kei roto i te wai. "Ka herea ngā pēke ki ētahi o ngā pou, kia mau ai, kia kore e riro i te wai," te kī a tōna kuia.

"Kua mutu, e Kui?"

"Taihoa," te kī a tōna kuia, "Ināianei me taupokia e tāua kia kore e kitea e te kararehe."

"Ēhea kararehe?" te pātai a Rawinia.

"E ngā poaka. Ka kainga ā tāua rīwai e te poaka. He kau hoki tētahi kararehe ka takatakahi i tā tāua puna."

Whawhati mānuka

I whatia e te kuia nei he pūrārā mānuka. Ka āwhina atu a Rawinia ki te heri i aua pūrārā mānuka ki te taha o te puna wai. Nō te mutunga o tērā, ka uwhia e te kuia nei he pēke ki runga o te pākorokoro. Kātahi anō ka uwhi i ngā pūrārā mānuka. I te mutunga kāhore koe e mōhio he kai kei roto i te wai.

"Kua mutu ināianei," te kī a te kuia.

"Āhea tāua ka kai i ngā kōtero?" te pātai a Rawinia.

"He roa tonu tāua e tiaki ana kia ngāwari ngā rīwai. Māku anō koe e whakamōhio atu."

"E hia te roa, e Kui?"

"He rite anō ki te kānga wai tōna roa i roto i te wai, he rahi tonu ngā marama, engari, e Moko, kia tae ki tērā wā ka hoki mai anō tāua."

Te wā whakapiro

He roa te wā ka wareware a Rawinia ki ngā kōtero, engari tōna kuia, ia wā ka haere ia ki te tirotiro mehemea kai te pai, kāhore i te takatakahia e te kau, i kitea rānei e te poaka. Nā wai rā ka hoki anō te kuia ki te titiro i ngā kōtero, ka kite ia kua reri ki te tango, hei tunu kai. I whakaaro ia me tunu ētahi mō te huritau o Rawinia.

Te tiki kai

I te Rāhoroi, ka kī atu te kuia o Rawinia, "E Moko, kua tae ki te wā ka hoki tāua ki te puna ki te tiki i ngā kōtero."

"U...u...u... kua pai mō te kai?"

"Āe, e Moko, mauria mai tā tāua kete. Kai te pīrangi au ki te tunu ētahi kōtero mō tēnei ahiahi."

Oma tonu a Rawinia ki te tiki i te kete, ka oma ia ki te puna wai. "Kia tere mai e Kui," tana akiaki atu me te pekepeke ki runga me te oma āwhio ki te puna.

"Kia tūpato Rawinia, kei tanuku ngā taha o te puna i a koe."

Ka tae mai tōna kuia, ka tūturi ki runga i ōna pona, me Rawinia hoki.

"Tangohia ngā pūrārā mānuka, Rawinia," tana whakahau i tana mokopuna. Ka mutu tērā, ka tangohia te pēke uwhi, kātahi ka kūmea te pēke kōtero ki waho o te wai.

"Auē, te keha hoki! Kua pirau kē ēnā rīwai, e Kui! Me whiu! Kāre e pai hei kai." Ko tērā te kī a Rawinia, me te kōtē anō i ōna pongāihu mā ōna matihao.

Ka kata tōna kuia, ka kī a ia, "Kāhore, e Moko, ko tēnei tōna āhua. Ahakoa tōna haunga, kia tunua e au, ka kai koe. He tino reka."

"I...i...i... ka mau te anuanu! Kāhore au e kai! Kua pirau kē! P-u-u-u tino keha!"

Ka kī te kuia o Rawinia,"Tērā tētahi kōrero, e Moko,

Kāhore te kai kino e rere ki te pai tangata,

Ko te tangata pai ka rere ki te kai kino.

Me maumahara koe ki tēnei kōrero." Kāhore a Rawinia i whakautu, engari ki ōna mahara, kāhore i te kai pai, he keha.

He kai anō

Ka tango te kuia i te pūtiki o te waha o te pēke, ka hoatu ētahi rīwai ki roto i tā rāua kete. Tino kaha te heke o te wai o ngā kōtero nei i roto i te kete. Ka pūtikihia e ia te waha o te pēke, ka whakahokia ki roto o te puna, ka uwhi anō kia kore e kitea e ngā kararehe. Ka hoki rāua ki te kāinga.

"E noho, e Moko, ka titiro mai. Tuatahi, pīhoretia te kiri, kātahi ka kōtē i te wai ki waho."

Ka rere a Rawinia ki te mahi me te pupuri anō i tōna hā, me te puhipuhi anō "P-u-u-u!" Kia roa ia e mahi ana, kua kore ia e tino rongo i te haunga.

"Me kō te wai kia puta ki waho," te kī atu a tōna kuia. "Ināianei ka mahi porohita ka pēpēhi, rite ana ki te mahi panekeke.

E rima ngā mea i oti i a Rawinia. Nō te mutunga katoa, ka paraitia ētahi ki roto i te pata. Ka māoa ka hoatu tētahi kia kai a Rawinia. Āta tiki noa iho a Rawinia me te kore o tōna waha e hiahia ki te huaki.

"E kai," te kī a tōna kuia. Ka kati a Rawinia i ōna karu, ka hāmama tōna waha ka ngau ia i te kōtero.

"Mmmmmmm ... he reka, e Kui. Hōmai anō tētahi. Tino pai te kōtero." I maumahara ia ki te kōrero a tōna kuia.

"E kore te kai kino e rere ki te pai tangata

Ko te tangata pai ka rere ki te kai kino."

E kore au e whakahī, ahakoa he aha te kai a muri ake nei, tōna whakaaro.

Te tina pō i ngaro

Nā Oho Kaa

Kua tae ki te ahiahi o te tau hou. Koia nei taua pō i haere katoa ngā taitamariki ki te kanikani. Rikarika katoa rātau.

"Māka, Hōri, Taina, haere mai ki konei."

"Auē, kāore te tino pai te reo o Pāpā," te whakarongo atu a Taina.

"Ā, tēnā koutou mā, kore rawa i topea e koutou he wahie mō te whare. Rokohanga, he whakahokihoki tā koutou mahi ki to koutou Māmā. Kia pēhea rawa tō koutou pakeke e mōhio ai koutou?" te kohete mai a Pāpā.

"I tūreiti tō mātou hokinga mai i te whutupaoro, ā, ... "

"Anā, kei te whakahokihoki anō koutou. Ā, kāti, kāhore he kanikani mā koutou i tēnei pō. Ka noho koutou ki te taha o tō koutou Nāni. Ka mate koutou i ahau mehemea ka whakatoitoi koutou ki a ia." Mōhio tonu mātou kotahi tonu te kōrero a Pāpā. Kāhore he painga o te tohetohe. I muri tonu i te hapa ka wehe atu ō mātou mātua. Kore rawa i pōwhiri mai ki a mātou. Ka puta te riri i a Māka, "Kino atu ahau ki a rāua. Kua reri kē taku tarau mō tēnei pō. Kei te roa kē ahau ki te wehe atu i tēnei kāinga."

"Nōhou tonu rā te hē, Māka. Nāhau i kī me noho atu tātou ki te whakararu a te tīma whutupaoro," te kī atu a Taina.

"E kī. Ko au he tahataha mō kōrua. I te wātea tonu te huarahi. He waewae tonu ō kōrua."

Ka wawao mai a Nāni, "Me mutu noa te whakaaro mō te kanikani." I te pīoioi a ia me te whatu wūru. Ka menemene atu au ki tō mātou Nāni. Koira te pai o tō mātou nāni, he mōhio nōna ki te whakauru mai i te wā e tika ana.

"Kāti tonu kei konei koe, e Nāni, ka taea e mātou te kōrero atu ki a koe, ā, kāhore e ngaua ō mātou taringa."

"Ko te hiahia a tō koutou pāpā kia pai katoa ngā āhuatanga o te kāinga, nā reira a ia i riri ai. Kei te haere mai te wā ka noho pāpā koutou, mā reira rawa pea koutou e mōhio ai."

"Āe, Nāni, ka haere mātou ināianei ki tō mātou rūma waho whakatangitangi ai," ko au tērā.

"Tēnā me kati mai te tatau kia kore au e turituri i a koutou," te kōrero mai a Nāni. Ka kihi mātou katoa i tō mātou nāni, ka puta atu ki waho. Ka roa mātou e whakatangitangi ana i a mātou kē, ka whakahau mai a Māka.

"Haere mai rā. E haere ana tātou ki te kanikani."

"He aha? Tō pōrangi hoki. Kei te mōhio tonu koe ko Matua Kēkē kei runga i te tatau. Kore rawa tātou e uru atu. Kei te mōhio tonu koe ki ōna whatu pūpū." Ko au tērā.

"Waiho mai ki ahau. Ko Māka te nanakia ahau." Kua manana kē ōna whatu. "Whakatika mai, me haere tātou. Kaua e turituri, kei rongo mai a Nāni i a tātou. Raraua he kete nui inā taha kōrua i te whare." Nā te whiti o te marama, poto noa te wā ka tae mātou. E tangi mai ana te pēne.

"Au, te papai hoki o te pēne, nē rā?" te aumihi a Taina.

"Hei! Arā kē to tātou matua kēkē e haere rā, tāpapa ki raro,"te whakahau a Māka.

"He aha koe i mōhio ai ko Matua Kēkē, Māka?" Te pātai a Taina.

"Kāhore koe i te kite i tana tōti? Arā, kei te wharekai a ia ināianei. Ia rua tekau meneti ka tirotiro haere a ia. He Wātene Māori a ia, nā reira e hurihuri haere ai, me kore noa e kitea he tāngata e taka haere ana."

"Hei aha. Me hoki tātou ki te kāinga, nē. He mahi takeo tēnei," ko Taina tērā e amuamu ana.

"Mō te kore tēnā, Taina," te kōrero atu a Māka. "Ko koe me noho i konei hei tautiaki. Hoatu tō kete ki a Hōri. Heipū te puta mai he tangata, me whakaruru koe i a koe. Kaua e kī mai kāore e taea e koe te tangi a te ruru. Kua rongo ahau i a koe. Kia mau tonu o whatu ki te tatau. Kei te pai?"

"Kei te pai," te ngunguru atu a Taina. Ka ngōki atu māua ko Māka ki te wharekai. "E piki ki runga i ōku pakihiwi, Hōri, ka pana atu te wini kia puare," te kī a Māka.

"Āe, kua puare," taku whakahoki.

"Piki atu, kei te whai atu ahau." Ka rarau, a Māka ki te whata wini, ka rewa tana tinana, ā, ka tomo atu ki rō whare. "Kia tere, whakakīa ā tāua kete. Kohia he keke, he pīkaokao, he hanawiti, he inu, he takakau uhi āporo." Ka puta te umere i ahau.

"Taihoa, kia tirohia atu e au mehemea kei te wātea a waho." Ko Māka tērā. "Kia tere Hōri, hōmai te kete tuatahi. Nā, kua pau mai. Ko koe me heke mai ināianei. Kei wareware koe ki te kati i te wini. Māhau e whai mai."

"MOREPORK." Tata tonu a au ki te whata ki runga i a Māka.

"I rongo koe i tērā?"

"Āe i rongo ahau. E pōhēhē ana koe he turi ahau?" te whakahoki atu a Māka.

"Me haere ninihi atu tāua mā muri nei. Māku a Taina e tiki atu. Haere atu koe."

"E haere ana tātou ki whea ināianei, Māka?" Ko Taina e amuamu ana.

"E whai mai koe, ākuni tātou ka tae."

"Ee, kei te mōhio ahau ki tēnei huarahi. Kei te haere tātou ki tātahi." Ko Taina tērā.

"Ka pai, Taina. Kei te tika tāhau. Anei te wāhi mō tātou." Tāhinga ana mātou nei ki rō rīpene, hora ana ngā kete.

"Aeii! He keke kī tonu i te kirīmi. Ko taku hemonga tēnei," te umere a Taina.

"Anei he pīkaokao, Māka," taku ui atu.

"Kei te pai. Kei te honi kē aku niho ki roto i te takakau uhi āporo nei. I rongo anō kōrua i te kakara i a tātou e hapa ana?"

"Āe, pōhēhē tonu ahau mō tā tātou hapa kē," taku whakahoki tērā. "Kei te kainga e tātou ināianei. Ka pai, nē rā!" Ka ngau anō a ia.

"He parāoa anō āhau, Taina?" te pātai a Māka.

"Ā, taihoa. Kia mutu ake taku mitimiti i te kirīmi nei. Anei te parāoa."

"Whuu, he tino hākari kē tēnei." Kei te miri a au i taku puku.

"Kore rawa rātou i te kanikani e rongo i te reka o ēnei kai. Kei te kite atu ahau i a rātou." Kei te kata a Māka.

"Engari kaua e noho nui, e hoa mā. Whakatika mai. Mauria atu te toenga o ngā kai mā ngā ika, me ngā karoro, ka hoki ai tātou ki te kāinga i mua i te hokinga mai o ō tātou mātua i te kanikani. Ia Hoo!" Te whakahohoro tērā a Māka.

Tau atu ana mātou, uru mai ana tō mātou Nāni ki to mātou rūma waho.

"Kua roa kē koutou e wahangū ana. Pōhēhē ahau kua moe kē koutou, ā, ka mahue te raiti kia kā ana. Engari, haere mai rā, he whakamīharo tāku mā koutou." Ka waiata hāmūmū a Nāni i a ia e tatari ana. E toha ana te kai i te kīhini.

"Anā, e tama mā, kāhore tō koutou kōkā i wareware ki a koutou. He pīkaokao, he keke kī tonu i te kirīmi, he nui te takakau uhi āporo me te kirīmi hei kīnaki. Mōhio tonu a ia koina to koutou hemonga ko te TINA PŌ, ehara i te kanikani noa iho. Tērā pea kei te tina pō rātou i tēnei wā, nē?" Whākana ana ō mātou whatu. He pono tēnei āhuatanga i mua i a mātou, kāhore rānei? Ka ngunguru puku a Māka.

"E kai, mokopuna mā. Heoi anō kāore he waireka, engari māku e mahi he mairō mā koutou." Ka ngaro atu a Nāni.

"Auē, kāhore koutou i te kai. Pōhēhē ahau tērā koutou e hemo kai ana."

"Auē Nāni, ehara i te mea he aha. Kāhore tonu mātou i te pīrangi kai i tēnei wā," ko Taina e karanga atu ana.

"Ā kāti, me whakawhāititia e au hei kai mā koutou āpōpō."

"Kei te pai, Nāni. Mā mātou e mahi. Me haere koe ki te moe. Kei te tino ngenge pea koe. Ngā mihi nui tonu ki a koe mō tō whakaaro nui ki a mātou." Ka waiata hāmūmū a Nāni, ka ngaro atu i te pāhihi.

"Māka, e kī mai ana koe kāhore a ia i te mōhio?"

"Kaua e māharahara, Taina. Kāhore a ia i te mōhio ki a tātou nekeneke mō tēnei pō."

Nō te ata ka puta mai tō mātou matua kēkē. "Mōhio koe, e Nāni (koina tōna ingoa ki te katoa) tino pai tā mātou kanikani i tērā pō. Kotahi anō te wāhi hē."

"Ā tēnā, he aha nā?"

"Kāhore tonu ahau i mōhio i pēheatia, engari i riro katoa te nuinga o tā mātou tina pō. Kei te mōhio pea ngā tama nei?"

"E tā! Kaua noa koe e whakaaro mō aku mokopuna. Kāhore rātou e mahi hīanga pēnā. E kao. Ehara i aku moko. He nui tonu te kai i konei mā rātou."

"E Māka, Hōri, anei ō kōrua hoa whutupaoro, kei te pīrangi kōrero ki a kōrua." Tere tonu tā māua hanake. Rekareka kē māua i te ngaro atu i ngā whatu pūpū o tō māua matua kēkē. Ka tū mai ngā ringa o Maru rāua ko Hēmi.

"Kāore māua i kite i a kōrua i te kanikani inapō nei. Te maha o te tāngata. Ko kōrua anake pea i te ngaro"

"Āe, he tino pai, he nui ngā takoha. Etā! I waimarie ahau i tētahi." Rekareka ana te āhua o Hēmi.

"Nē. Mō te aha?"

"Mōhio koe te kanikani ka hurihuri rā te naihi? Ko māua anake ko taku tuahine a Hēni i mahue mai i runga i te papa."

"Ā, ko te kanikani whakawātea. Wow, he aha tō takoha?"

"He pāhi moni tāku, he pouaka tiokorete tā Hēni. Kātahi anō ahau ka whiwhi takoha." Ka tungou atu te māhunga o Māka.

"Tino pai Hēmi."

"Engari he tino koretake te tina pō. Kore rawa māua i hongi tētahi keke nei pea. I kī rātou me tāhae kē te nuinga o ngā kai, engari e kore au e whakapono ki tērā. Ko te mea kē, pōhēhē rātou kāhore e pērā rawa te nui o te tāngata. Ka haere māua ināianei. Hei konei rā." Ka tū māua, ā, haruru noa atu ō māua hoa i te huarahi. Nō tō māua huringa mai, ka kite māua i a Taina e kōrerorero ana ki tō mātou pāpā me Matua Kēkē. Nā te tino whio tonu a Pāpā māua i tō pērā atu. He kete i roto i te ringa o tō mātou pāpā, ā, he kete anō i te ringa o tō mātou matua kēkē. Ko ngā whakapūwharu e mau ana.

"Inā," te hāparangi mai a Pāpā. "Kei te mōhiotia i ngaro pēhea te tina pō, nē rā?" Ka tiro korotaha atu māua ki a Taina. Ka tuohu ō māua māhunga. "Mauria atu, kaua rawa koe e aroha ki a rātou." Ka neke atu mātou ki te motokā o Matua Kēkē, ka piki atu. "Āe! Me tīmata koutou ki te whakatikatika ngā āhuatanga o muri i te kanikani, ā, he pātītī hei tapahitanga a ..." kōrero tonu tō mātou matua kēkē i a mātou e haere ana i te huarahi ki te marae.

Ngā Kupu Whakamārama

A – K
M – P
R – WH

A – K

A

ahi pakū fire demon (dynamite)

ahunga generation

aihe dolphin

amuamu complain

anuhea listless, pinched with cold, weak

apiapi gathered together

aratakina point out

H

haere ninihi move stealthily

hāmama gaping, open

harakeke flax

hēmanawa out of breath

honi indulge (especially in eating)

horomi to swallow

I

ikeike high, lofty

M – P

K

kamorā green potato

kanikani whakawātea elimination dance

kirīmi cream

kōawa watercourse

kōmaka sort out

Kōpū Venus

korowai cloak

kōtero steeped potatoes

kōwhiri select

M

mahu heal

mairō milo

manana raise of eyebrows, eyes

Matau a Māui Scorpio

maunu float

menemene contort the face, smile

miri massage, rub

mitimiti lick

mōrihana carp

NG

ngāwari smooth

ngoikore weak, listless

ngote suck

ngunguru puku groan, mutter under breath

P

pāhihi corridor, passageway

pākorokoro cage, enclosure

papapounamu calmness, peaceful

pēpēhi press

piha fin

pīhore peel

pīoioi rocking motion

porohita round

Pou Kara o Maiki The Maiki Flagpole

puhipuhi blow frequently

pūrārā brush wood (of manuka)

pūtiki tie together

R – WH

R

rangatiratanga evidence of breeding and greatness

raruraru doubt, trouble

rikarika excited

rūpene lupin

T

tahataha blame,

tāhekeheke stripe

tāhinga lie down

taka haere wandering around

takakau uhi āporo apple pie

takarika toss oneself about

takatakahi trample

takitahi move as one

tapitapi pack or patch up with mud

tino whio special whistle

tiro korotaha, titiro kohura glance sideways

titakataka turn over and over

tohetohe be stubborn, persistent

tokai reef

tope chop

totohu sink

tuawhenua mainland

U

uira lightning, shine

umere shout of joy, yell

urutomo enter

W

waiata hāmūmū hum

waitohu mark

wawao console

WH

whakahokihoki answer back

whakakākahu to dress

whakakī to fill

whakakīa to fill up

whakamaharatanga in remembrance

whakamākūkū moisten

whākana stare

whakapono belief, believe

whakapūwharu crumbs, titbits

whakarihariha disgusting

whakaruruhau shelter

whakatakariri angry, cross

whakatoitoi cheeky

whakawhāiti gather up

wharekanikani dance hall

whatu pūpū scrutinising eyes

whatu wūru knitting

whiriwhiri choose, select, plait

whītikihia bind, tie

wiharahara whistling

About this resource

This resource is no longer in print. You may be able to find it in the resource room in your kura.

Taumata: Taumata 6, Taumata 7, Taumata 8
Kaupapa: Rārangi Pukapuka
Kohinga: Te Wharekura

Add to kete

Add to collection

Download resources

Materials that come with this resource: