Ko Poukokonga te roto

Nā Te Ohomauri Stewart

I te wā i ahau e paku ana, i whakatipuhia mai ahau i Tuaraki, ko te ingoa o te whenua ko Tāwhao. Ko ōku tīpuna ko Pootihinga Te Rito me Te Hati Nepia. Nā rāua ahau i whāngai. Tokowhā mātau i whāngaihia e ngā koroua nei. Ko Mōkena Te Rito, ko Pootihinga Werihana, ko Mere Robin, me ahau. Ko tōku ingoa ko Te Ohomauri Stewart. 

Ko te roto i muri iho i tō mātau marae i a Te Pāhou, ko Poukokonga. E kī ana ōku tīpuna koia rā anā te ingoa o te taniwha i roto i taua roto, arā, ko Poukokonga. Haereere ai mātou i ngā raumati ki roto i taua roto kaukau ai. Tākaro ai mātou i roto i ngā raupō. Kia paruparu nei te wai i a mātou, ka kite koe i ngā mōrihana e puta ake ana i te wai i reira, ka hopuhopungia e mātou, me te whiuwhiu ake ki runga i te tahataha. Kei reira ētahi o mātau hei puru i ngā ika nei ki roto i ngā kete. He mahi tākaro tēnei mahi engari he mahi tino pai. 

He waka pakaru nei i roto i te wai. Tapitapihia ai e mātou mā te paruparu. He wā e pai ana engari he wā ka totohu te waka nei, engari ka pai tonu ki a mātou ēnei mahi. Kia totohu nei te waka, ētahi o mātou kei te mau tonu i ō rātou kākahu, ka mākū, kua kata mātou. He rapu tuna anō te mahi e mahia ana e ētahi ō mātou. Ko ngā pakeke hei mahi i ēnei mahi. Mōhio kē ake rātou ki te hopu i te tuna i a mātou ngā tamariki pakupaku. 

I ngā rā o mua ko te ingoa o te marae ko Poukokonga, he marae tino tawhito. E kīia ana na taku tipuna nā Te Hati i tō mai te whare nei ki te wāhi e tū nei, ma ōna hōiho. He tino toa taku tīpuna ki te mahi hōiho. E hia kē ōna hōiho. Ko te ingoa o te whenua kei reira nei te marae, me te whare e tū ana ko Matakakā. Ka whakatūngia te whare hou nei e ngā koroua rā hei whare kanikani. Nō reira i noho ai te ingoa o te whare nei ki a Te Pāhou. Ahakoa i nekehia mai te whare nei ka noho tonu te roto nei ki muri iho i te marae. 

Ināianei kei te aroha rawa atu mātou nōtemea kua maroke te roto nei, kua kore ngā mōrihana hei haeretanga atu mā ngā tamariki ki te hopuhopu. Kua mate te taniwha nei ināianei. Kāore e taea e ngā tamariki o ēnei rā ki te mahi i ngā mahi i mahia e mātou e noho tonu ana i te wa kāinga nei. I roto i ēnei mamae me ngā pōuri ki ōku whanaunga kua matemate, ka tuhia e ahau ēnei kōrero. I puta ēnei kōrero nōtemea kei te kite haere ahau e ngarongaro haere ana te momo o te tangata. Anei ngā kōrero nei: 

E hoki whakamuri ana ngā whakaaro, e whakarongo ana ki te tangi a ngā manu. Ka titiro whakawaho ko Tāwhao tērā te kainga i noho ai ngā mātua. 

Kia whitikihia taku haere ki te roto e maroke mai rā ko Poukokonga tērā, te takotoranga o te kuia nei i te pō. E Kui e, mehemea ka taea koe ki te whakaora mai ... 

Tukuna mā ōku roimata e whakakī tō moenga roa kia rongo anō aku taringa i te tangi a te matuku. Ka titiro ahau ki taku maunga ko Puketapu. Ka rere haere tonu taku titiro ko Hinehakirirangi, ko Manawaru, te kāinga i tanuhia rā ai te kūmara. E rere rā te haere o te awa o Te Arai, te kai whakamākūkū i ngā aka. Ka rere haere tonu taku titiro ko Hinetātauranga. 

Ka titiro whakamuri ahau ki ngā pari e mā mai rā, e pākia mai rā e ngā ngaru o te moana. Ko Te Huanui tērā ko Ngai Tāmanuhiri Kia whakahokia taku haere ki runga i ngā huarahi o Tuaraki ki te tū i mua i taku tipuna ko Taharākau nāna nei te kōrero: 

"Tini whetū ki te rangi ko Ngāti Maru ki raro 

Tini kahawai ki te moana ko Ngāti Maru ki uta" 

Tumeke ana taku huri, ko koia e oho ana ahau i taku moe. 

Ko te ingoa o taku pāpā i tuhia rā e ahau ēnei kōrero, ko Rupena Moeau. 

Nō reira he whakamaharatanga kōrero tēnei mōna. Moe mai rā e te pāpā i tō moenga roa. Mā ēnei kōrero e whakahoki mai tō wairua ki runga i ēnei marae o Manutuke. 

Ohopu

Nā Matahi Whakataka Brightwell
Nā Kerry Gemmill ngā pikitia 

Nō te tau 1985, tokorima ngā tāngata i tere mai i runga i te waka o Hawaikinui mai i Rarotonga ki Wharekahika, ko Matahi Brightwell tētahi o rātau. E rua tekau ngā rā he ika tā rātau tino kai. I tētahi o ngā hīnga ika ka mau a Ohopu, a, ka tarapeke ake te mangō, ka horomia atu a Ohopu. Takirua ēnei ika, takawhitiwhiti ana ki roto i te waka. 

Ko ngā kaiwhakatū 

Kaipānui

Ko Kahutia Te Rangi – te ika pōhatu nui, Tokanui 

Ko Kōpū – he whetū 

Ko Mangō Tuatini – he mangō kikorangi, noho takitahi 

Ko Maroro – he ika rere 

Ko Moko – te rangatira o ngā mangō 

Ko Oa – te rangatira o ngā aihe 

Ko Ohopu – he karere 

Ko Tangaroa – te Atua o te moana 

Ko Te Marama 

Ko Te Matau o Māui – he whetū 

Ko Tinirau – tohorā, tama mātāmua a Tangaroa 

Ko Toroa – he manu moana 

Whiti kōrero tuatahi 

Ko Ohopu te karere kei te kohi kōrero mā Tangaroa. 

KAIPĀNUI: Nō te wā e puta ana te huka me ngā hau mātao, i kau haere a Ohopu i tua o ngā tokai Takarangi e ahu atu ana ki Whangarā. I reira a Kahutia te Rangi e moe ana. Ko Kahutia te Rangi te tohorā nāna nei a Paikea i mau mai, ā, ū pai ana mai ki Aotearoa, ā, kua huri pōhatu kē ināianei. Ka rongo a Ohopu i te marama e waiata ana ki a Matau a Māui. Ka whai kupu a Ohopu te karere ki a Kahutia te Rangi. 

OHOPU: Whanaunga! Whanaunga! Kaumātua! 

KAHUTIA TE RANGI: A-A-A-E. 

OHOPU: He aha ngā kōrero? 

KAHUTIA TE RANGI: Ngā kōrero! Nga kōrero! I te moe kē au. I te takoto ahau i te tahaki o te wai mō te rua tekau mā rima ahunga, ā, me koe te tamāhine o te whānau o Ohopu, ui kē ana mai ki au mō ngā kōrero? Mea atu ki a Tangaroa kua rongo kōrero au. Ki te tiaho mai Te Matau a Māui ko ia anake, ka pērā anō te puta mai o te Hawaikinui waka, ā, ko ia anake. Mea atu ki ngā tamariki a Tangaroa kia tūpato, tiakina, aratakina, kia ngāwari ai te huarahi o tēnei waka. 

OHOPU: E te Tokanui, e Te Ika, ehara nei i te whare o Tangaroa, nā aku tīpuna i kawe atu te kōrero ki a koe kia aroha ki a Paikea. Māku anō hoki e kawe tō kōrero. 

KAHUTIA TE RANGI: Taihoa! Noho ake mō tētahi wā. Te tamāhine, ko wai to ingoa? He uri koe nā ngā Ohopu. Ko wai tō ingoa moana? 

OHOPU: Ko taku ingoa moana ko Maimiti. 

KAHUTIA TE RANGI: Maimiti, āe, he ingoa nō te tamāhine a te kuini o Tahiti. Kōrero mai ki au, Maimiti. He aha kē he kōrero māu ki a Tangaroa. 

OHOPU: Ki tō kōrero. Ka haria e au tō kōrero mō te waka nei a Hawaikinui e tere ana mai i Tahitinui, Moorea, Rangiatea, Rarotonga, ā, ki Aotearoa. He aha koa te koha a Tangaroa? He ngāwari te moana ki te whakawhiti, he kore he ika hei hopu mā ngā kaihoe o Hawaikinui waka, he karekare moana kē rānei? 

KAHUTIA TE RANGI: Ka pai tēnā, ka tāpaea mai a Tānemāhuta e toru o ana tamariki hei hanga i a Hawaikinui waka. Whakatā e taku tamāhine, he tawhiti te kauhoe kei mua i a koe. 

KAIPĀNUI: Nā ka tō haere te rā, ka ea haere mai ko Te Mārama, ka tīmata te whetu a Kōpū ki te waiata.

KŌPŪ: Tērā he waka te karanga ki au hei arataki i a ia i te arā moana. I roto o te mano tau kua pahemo, he maha aku haerenga. Nā ngā whetū i waitohu te huarahi. Ināianei ko tēnei. Ka uira mai au i roto o ngā kapua, ka kanapa, ka koiri, ka peke, kia kitea ake e te waka.

TE MATAU A MĀUI: Me whakakotahi tātou, me kore e tūpono ngā mea ātaahua te puta. Mauria atu tā mātou pānui ki a Tangaroa. 

TE MĀRAMA, KŌPŪ, TE MATAU A MĀUI: Kei te whakaae mātou ki te āwhina i ngā tamariki a Papatūānuku, kia mārama tā rātou haere i roto i tō mātou māramatanga. Kia hohoro Ohopu, kawea ā mātou pānui ki tō tīpuna tāne. Kia tere Ohopu paku, kau atu. 

Te Maiki Pou Kara, Kororāreka

Nā Josephine Reid ngā tuhinga Pākehā, nā Kene Martin rāua ko Tūpuna Te Riri Maihi Kawiti i whakamāori

Ko te rā tēnei i tohungia hei rā tirotiro mō tō mātou kura i te Pou Kara o Maiki. Kei Kororāreka te pou e tū ana, ā, ko te whakaaro kia tirohia i mua i te whakaheketanga mai i a ia ki te whenua kia whakaorangia tana mate pirau. Ko ngā tāngata o Te Papa Atawhai hei mahi i tēnā mahi. 

I ahau e titiro whakamīharo atu ana, ka tupu tētahi aroha tino nui mō Tūpuna Maihi Paraone Kawiti ki roto i ahau. He aroha mō tana kaha māia me tana toa ki te whakaara taonga ātaahua pēnei, hei mea tirotironga mō mātou, ōna uri whakatupu. 

Ka hoki aku whakaaro ki te wā i tonoa rā a Ngāti Hine me ētahi atu hapū ki te tapahi rākau kauri, mai i te ngahere o Whangaii i Kawakawa. Ka hinga te kauri, ka tōia ki te awa tupuna, ki Taumarere. Te taenga atu ki reira, ka tōia mā ngā waka ki tērā taha o te awa moana rā, i raro iho o te puke ikeike o Maiki, ka āhua kite atu ahau i a Tupuna mā, e tō haere ana i taua rākau kauri i roto i te wai. Ka rongo hoki ahau i ō rātou reo karanga, me te kite i ō rātou hoe e patii ana i te wai. Ka tangi mahara ahau ki a rātou mā. 

Te taenga atu ki Kororāreka, ka tōia anō te rākau e Ngāti Hine me ōna hapū āwhina ki te wāhi o Edward Cook, nāna i mahi, oti noa te pou. Ko te utu kotahi rau e toru pauna mō tana mahi. E whitu tekau mā rima putu te roa o te pou, ko te kurupae nā Te Kapotai i hōmai. I te whā o Tīhema, 1857, ka kawea te pou ki Maiki. Nā ngā uri tonu o Kawiti rāua ko Hone Heke i kawe. E toru rau rātou ki te mau i taua pou i te tāone o Kororāreka, tae noa ki Maiki puke. Ka whakaarahia, ka tū ki runga. 

Ko tētahi atu mea aroha ko te mahi kohi moni a ngā hapū o Kawiti rāua ko Heke, me ētahi tāngata Māori takitahi i whai ngākau ki te āwhina i ngā mahi whakaara i te pou. Kotahi rau whā tekau ma whitu te moni i kohia. 

I te otinga o tā rātou mahi ki te whakatū i te pou, ka puta ngā kōrero a Tupuna Maihi ki te iwi katoa, Māori me te Pākehā, "Mō te Pou Kara kua ara nei, nā Heke, nā Kawiti, i tūraki, nā mātou i whakaara. Ināianei, e kore tētahi o mātou e tae a muri nei ki te tapahi i tēnei pou. Ka tapaia te ingoa mō te pou, ko te Whakakotahitanga, arā, ko te whakakotahitanga a te Māori, me te Pākehā." 

I runga i ērā kōrero ka whakaaro ahau, "Āe Tupuna, e mahia tonu ana aua tohutohu āu, i runga i te aroha me te rangimārie. 

He kai anō te kōtero

Nā Kohine Mackie

Te tina pō i ngaro

Nā Oho Kaa

Kua tae ki te ahiahi o te tau hou. Koia nei taua pō i haere katoa ngā taitamariki ki te kanikani. Rikarika katoa rātau. 

"Māka, Hōri, Taina, haere mai ki konei." 

"Auē, kāore te tino pai te reo o Pāpā," te whakarongo atu a Taina. 

"Ā, tēnā koutou mā, kore rawa i topea e koutou he wahie mō te whare. Rokohanga, he whakahokihoki tā koutou mahi ki to koutou Māmā. Kia pēhea rawa tō koutou pakeke e mōhio ai koutou?" te kohete mai a Pāpā. 

"I tūreiti tō mātou hokinga mai i te whutupaoro, ā, ... " 

"Anā, kei te whakahokihoki anō koutou. Ā, kāti, kāhore he kanikani mā koutou i tēnei pō. Ka noho koutou ki te taha o tō koutou Nāni. Ka mate koutou i ahau mehemea ka whakatoitoi koutou ki a ia." Mōhio tonu mātou kotahi tonu te kōrero a Pāpā. Kāhore he painga o te tohetohe. I muri tonu i te hapa ka wehe atu ō mātou mātua. Kore rawa i pōwhiri mai ki a mātou. Ka puta te riri i a Māka, "Kino atu ahau ki a rāua. Kua reri kē taku tarau mō tēnei pō. Kei te roa kē ahau ki te wehe atu i tēnei kāinga." 

"Nōhou tonu rā te hē, Māka. Nāhau i kī me noho atu tātou ki te whakararu a te tīma whutupaoro," te kī atu a Taina. 

"E kī. Ko au he tahataha mō kōrua. I te wātea tonu te huarahi. He waewae tonu ō kōrua." 

Ka wawao mai a Nāni, "Me mutu noa te whakaaro mō te kanikani." I te pīoioi a ia me te whatu wūru. Ka menemene atu au ki tō mātou Nāni. Koira te pai o tō mātou nāni, he mōhio nōna ki te whakauru mai i te wā e tika ana. 

"Kāti tonu kei konei koe, e Nāni, ka taea e mātou te kōrero atu ki a koe, ā, kāhore e ngaua ō mātou taringa." 

"Ko te hiahia a tō koutou pāpā kia pai katoa ngā āhuatanga o te kāinga, nā reira a ia i riri ai. Kei te haere mai te wā ka noho pāpā koutou, mā reira rawa pea koutou e mōhio ai." 

"Āe, Nāni, ka haere mātou ināianei ki tō mātou rūma waho whakatangitangi ai," ko au tērā. 

"Tēnā me kati mai te tatau kia kore au e turituri i a koutou," te kōrero mai a Nāni. Ka kihi mātou katoa i tō mātou nāni, ka puta atu ki waho. Ka roa mātou e whakatangitangi ana i a mātou kē, ka whakahau mai a Māka. 

"Haere mai rā. E haere ana tātou ki te kanikani." 

"He aha? Tō pōrangi hoki. Kei te mōhio tonu koe ko Matua Kēkē kei runga i te tatau. Kore rawa tātou e uru atu. Kei te mōhio tonu koe ki ōna whatu pūpū." Ko au tērā. 

"Waiho mai ki ahau. Ko Māka te nanakia ahau." Kua manana kē ōna whatu. "Whakatika mai, me haere tātou. Kaua e turituri, kei rongo mai a Nāni i a tātou. Raraua he kete nui inā taha kōrua i te whare." Nā te whiti o te marama, poto noa te wā ka tae mātou. E tangi mai ana te pēne. 

"Au, te papai hoki o te pēne, nē rā?" te aumihi a Taina. 

"Hei! Arā kē to tātou matua kēkē e haere rā, tāpapa ki raro,"te whakahau a Māka. 

"He aha koe i mōhio ai ko Matua Kēkē, Māka?" Te pātai a Taina. 

"Kāhore koe i te kite i tana tōti? Arā, kei te wharekai a ia ināianei. Ia rua tekau meneti ka tirotiro haere a ia. He Wātene Māori a ia, nā reira e hurihuri haere ai, me kore noa e kitea he tāngata e taka haere ana." 

"Hei aha. Me hoki tātou ki te kāinga, nē. He mahi takeo tēnei," ko Taina tērā e amuamu ana. 

"Mō te kore tēnā, Taina," te kōrero atu a Māka. "Ko koe me noho i konei hei tautiaki. Hoatu tō kete ki a Hōri. Heipū te puta mai he tangata, me whakaruru koe i a koe. Kaua e kī mai kāore e taea e koe te tangi a te ruru. Kua rongo ahau i a koe. Kia mau tonu o whatu ki te tatau. Kei te pai?" 

"Kei te pai," te ngunguru atu a Taina. Ka ngōki atu māua ko Māka ki te wharekai. "E piki ki runga i ōku pakihiwi, Hōri, ka pana atu te wini kia puare," te kī a Māka. 

"Āe, kua puare," taku whakahoki. 

"Piki atu, kei te whai atu ahau." Ka rarau, a Māka ki te whata wini, ka rewa tana tinana, ā, ka tomo atu ki rō whare. "Kia tere, whakakīa ā tāua kete. Kohia he keke, he pīkaokao, he hanawiti, he inu, he takakau uhi āporo." Ka puta te umere i ahau. 

"Taihoa, kia tirohia atu e au mehemea kei te wātea a waho." Ko Māka tērā. "Kia tere Hōri, hōmai te kete tuatahi. Nā, kua pau mai. Ko koe me heke mai ināianei. Kei wareware koe ki te kati i te wini. Māhau e whai mai." 

"MOREPORK." Tata tonu a au ki te whata ki runga i a Māka. 

"I rongo koe i tērā?" 

"Āe i rongo ahau. E pōhēhē ana koe he turi ahau?" te whakahoki atu a Māka. 

"Me haere ninihi atu tāua mā muri nei. Māku a Taina e tiki atu. Haere atu koe." 

"E haere ana tātou ki whea ināianei, Māka?" Ko Taina e amuamu ana. 

"E whai mai koe, ākuni tātou ka tae." 

"Ee, kei te mōhio ahau ki tēnei huarahi. Kei te haere tātou ki tātahi." Ko Taina tērā. 

"Ka pai, Taina. Kei te tika tāhau. Anei te wāhi mō tātou." Tāhinga ana mātou nei ki rō rīpene, hora ana ngā kete. 

"Aeii! He keke kī tonu i te kirīmi. Ko taku hemonga tēnei," te umere a Taina. 

"Anei he pīkaokao, Māka," taku ui atu. 

"Kei te pai. Kei te honi kē aku niho ki roto i te takakau uhi āporo nei. I rongo anō kōrua i te kakara i a tātou e hapa ana?" 

"Āe, pōhēhē tonu ahau mō tā tātou hapa kē," taku whakahoki tērā. "Kei te kainga e tātou ināianei. Ka pai, nē rā!" Ka ngau anō a ia. 

"He parāoa anō āhau, Taina?" te pātai a Māka. 

"Ā, taihoa. Kia mutu ake taku mitimiti i te kirīmi nei. Anei te parāoa." 

"Whuu, he tino hākari kē tēnei." Kei te miri a au i taku puku. 

"Kore rawa rātou i te kanikani e rongo i te reka o ēnei kai. Kei te kite atu ahau i a rātou." Kei te kata a Māka. 

"Engari kaua e noho nui, e hoa mā. Whakatika mai. Mauria atu te toenga o ngā kai mā ngā ika, me ngā karoro, ka hoki ai tātou ki te kāinga i mua i te hokinga mai o ō tātou mātua i te kanikani. Ia Hoo!" Te whakahohoro tērā a Māka. 

Tau atu ana mātou, uru mai ana tō mātou Nāni ki to mātou rūma waho. 

"Kua roa kē koutou e wahangū ana. Pōhēhē ahau kua moe kē koutou, ā, ka mahue te raiti kia kā ana. Engari, haere mai rā, he whakamīharo tāku mā koutou." Ka waiata hāmūmū a Nāni i a ia e tatari ana. E toha ana te kai i te kīhini. 

"Anā, e tama mā, kāhore tō koutou kōkā i wareware ki a koutou. He pīkaokao, he keke kī tonu i te kirīmi, he nui te takakau uhi āporo me te kirīmi hei kīnaki. Mōhio tonu a ia koina to koutou hemonga ko te TINA PŌ, ehara i te kanikani noa iho. Tērā pea kei te tina pō rātou i tēnei wā, nē?" Whākana ana ō mātou whatu. He pono tēnei āhuatanga i mua i a mātou, kāhore rānei? Ka ngunguru puku a Māka. 

"E kai, mokopuna mā. Heoi anō kāore he waireka, engari māku e mahi he mairō mā koutou." Ka ngaro atu a Nāni. 

"Auē, kāhore koutou i te kai. Pōhēhē ahau tērā koutou e hemo kai ana." 

"Auē Nāni, ehara i te mea he aha. Kāhore tonu mātou i te pīrangi kai i tēnei wā," ko Taina e karanga atu ana. 

"Ā kāti, me whakawhāititia e au hei kai mā koutou āpōpō." 

"Kei te pai, Nāni. Mā mātou e mahi. Me haere koe ki te moe. Kei te tino ngenge pea koe. Ngā mihi nui tonu ki a koe mō tō whakaaro nui ki a mātou." Ka waiata hāmūmū a Nāni, ka ngaro atu i te pāhihi. 

"Māka, e kī mai ana koe kāhore a ia i te mōhio?" 

"Kaua e māharahara, Taina. Kāhore a ia i te mōhio ki a tātou nekeneke mō tēnei pō." 

Nō te ata ka puta mai tō mātou matua kēkē. "Mōhio koe, e Nāni (koina tōna ingoa ki te katoa) tino pai tā mātou kanikani i tērā pō. Kotahi anō te wāhi hē." 

"Ā tēnā, he aha nā?" 

"Kāhore tonu ahau i mōhio i pēheatia, engari i riro katoa te nuinga o tā mātou tina pō. Kei te mōhio pea ngā tama nei?" 

"E tā! Kaua noa koe e whakaaro mō aku mokopuna. Kāhore rātou e mahi hīanga pēnā. E kao. Ehara i aku moko. He nui tonu te kai i konei mā rātou." 

"E Māka, Hōri, anei ō kōrua hoa whutupaoro, kei te pīrangi kōrero ki a kōrua." Tere tonu tā māua hanake. Rekareka kē māua i te ngaro atu i ngā whatu pūpū o tō māua matua kēkē. Ka tū mai ngā ringa o Maru rāua ko Hēmi. 

"Kāore māua i kite i a kōrua i te kanikani inapō nei. Te maha o te tāngata. Ko kōrua anake pea i te ngaro" 

"Āe, he tino pai, he nui ngā takoha. Etā! I waimarie ahau i tētahi." Rekareka ana te āhua o Hēmi. 

"Nē. Mō te aha?" 

"Mōhio koe te kanikani ka hurihuri rā te naihi? Ko māua anake ko taku tuahine a Hēni i mahue mai i runga i te papa." 

"Ā, ko te kanikani whakawātea. Wow, he aha tō takoha?" 

"He pāhi moni tāku, he pouaka tiokorete tā Hēni. Kātahi anō ahau ka whiwhi takoha." Ka tungou atu te māhunga o Māka. 

"Tino pai Hēmi." 

"Engari he tino koretake te tina pō. Kore rawa māua i hongi tētahi keke nei pea. I kī rātou me tāhae kē te nuinga o ngā kai, engari e kore au e whakapono ki tērā. Ko te mea kē, pōhēhē rātou kāhore e pērā rawa te nui o te tāngata. Ka haere māua ināianei. Hei konei rā." Ka tū māua, ā, haruru noa atu ō māua hoa i te huarahi. Nō tō māua huringa mai, ka kite māua i a Taina e kōrerorero ana ki tō mātou pāpā me Matua Kēkē. Nā te tino whio tonu a Pāpā māua i tō pērā atu. He kete i roto i te ringa o tō mātou pāpā, ā, he kete anō i te ringa o tō mātou matua kēkē. Ko ngā whakapūwharu e mau ana. 

"Inā," te hāparangi mai a Pāpā. "Kei te mōhiotia i ngaro pēhea te tina pō, nē rā?" Ka tiro korotaha atu māua ki a Taina. Ka tuohu ō māua māhunga. "Mauria atu, kaua rawa koe e aroha ki a rātou." Ka neke atu mātou ki te motokā o Matua Kēkē, ka piki atu. "Āe! Me tīmata koutou ki te whakatikatika ngā āhuatanga o muri i te kanikani, ā, he pātītī hei tapahitanga a ..." kōrero tonu tō mātou matua kēkē i a mātou e haere ana i te huarahi ki te marae. 

A – K

A

ahi pakū fire demon (dynamite) 

ahunga generation 

aihe dolphin 

amuamu complain 

anuhea listless, pinched with cold, weak 

apiapi gathered together 

aratakina point out 

 

H 

haere ninihi move stealthily 

hāmama gaping, open 

harakeke flax 

hēmanawa out of breath 

honi indulge (especially in eating) 

horomi to swallow 

 

 I 

ikeike high, lofty 

M – P

K

kamorā green potato 

kanikani whakawātea elimination dance 

kirīmi cream 

kōawa watercourse 

kōmaka sort out 

Kōpū Venus 

korowai cloak 

kōtero steeped potatoes 

kōwhiri select 

 

M 

mahu heal 

mairō milo 

manana raise of eyebrows, eyes 

Matau a Māui Scorpio 

maunu float 

menemene contort the face, smile 

miri massage, rub 

mitimiti lick 

mōrihana carp 

 

NG 

ngāwari smooth 

ngoikore weak, listless 

ngote suck 

ngunguru puku groan, mutter under breath 

 

P 

pāhihi corridor, passageway 

pākorokoro cage, enclosure 

papapounamu calmness, peaceful 

pēpēhi press 

piha fin 

pīhore peel 

pīoioi rocking motion 

porohita round 

Pou Kara o Maiki The Maiki Flagpole 

puhipuhi blow frequently 

pūrārā brush wood (of manuka) 

pūtiki tie together 

R – WH

R

rangatiratanga evidence of breeding and greatness 

raruraru doubt, trouble 

rikarika excited 

rūpene lupin 

 

T 

tahataha blame, 

tāhekeheke stripe 

tāhinga lie down 

taka haere wandering around 

takakau uhi āporo apple pie 

takarika toss oneself about 

takatakahi trample 

takitahi move as one 

tapitapi pack or patch up with mud 

tino whio special whistle 

tiro korotaha, titiro kohura glance sideways 

titakataka turn over and over 

tohetohe be stubborn, persistent 

tokai reef 

tope chop 

totohu sink 

tuawhenua mainland 

 

U 

uira lightning, shine 

umere shout of joy, yell 

urutomo enter 

 

W 

waiata hāmūmū hum 

waitohu mark 

wawao console 

 

WH 

whakahokihoki answer back 

whakakākahu to dress 

whakakī to fill 

whakakīa to fill up 

whakamaharatanga in remembrance  

whakamākūkū moisten 

whākana stare 

whakapono belief, believe 

whakapūwharu crumbs, titbits  

whakarihariha disgusting 

whakaruruhau shelter 

whakatakariri angry, cross 

whakatoitoi cheeky 

whakawhāiti gather up 

wharekanikani dance hall 

whatu pūpū scrutinising eyes 

whatu wūru knitting 

whiriwhiri choose, select, plait 

whītikihia bind, tie 

wiharahara whistling