Whata rāua ko Tangowhiti – Mā te pouako
Whata rāua ko Tangowhiti
Ngāti Kahungunu ki Heretaunga, Ngāi Tahu
He pakiwaituhi tēnei hei pānui takitahi mā te ākonga, hei pānui takirōpū rānei. Ko te kaupapa o tēnei kōrero ko te rautaki i whāia e Taraia hei whakaū i tōna mana i runga te whenua, me ngā āhuatanga i puta hei whakararu i tana rautaki. Ko tēnei tētahi o ngā tino kōrero o Ngāti Kahungunu ki Heretaunga.
See the “About this resource” box below to download resources. Down the Back of the Chair (MOE712681)
See the “About this resource” box below to download resources.
- Rauemi Matua
- Ngā Tauira Whakaakoranga
- Ngā Akoranga
- Ngohe
Rauemi Matua
He kōrero whakataki
Ko te pūtake o tēnei pūrākau ko ngā kōrero tuku iho mai i ngā tīpuna o Ngāi Tahu ki Takapau, ki roto i te taiwhenua o Tamatea ki Ngāti Kahungunu. Ko tētahi o ngā kaupapa matua o te pūrākau nei he whakamārama i te āhua me te tū o tētahi rārangi hiwi e tata ana ki te tāone o Takapau. Ko Ngā Kai Hīnaki a Whata te ingoa o taua rārangi hiwi.
E ai ki ngā kōrero he uri a Whata nā Pouheni, nā Paikea hoki. Nāna i noho ki ngā whenua o tēnei takiwā e hia whakatipuranga ki muri.
I wānangahia tēnei kaupapa e ngā uri o ngā hapū o Ngāi Tahu ki Takapau, Ngāi Toroiwaho me Ngāti Mārau. Ka tapa ko Te Roro o Te Auroa hei ingoa rōpū mō te hunga nā rātou nei i waihanga tēnei pūrākau. Nā tēnei rōpū anō i whakatau, i whakamana ngā kōrero i tuhia.
Ko te wāhi matua e kōrerotia ana i roto i te pūrākau nei ko te roto o Whatumā, e tata ana ki te tāone o Waipukurau. I ngā wā o mua, ko Whatumā te pātaka kai o ngā hapū o tēnei rohe, ka mutu he roto tuna, he tino mahinga kai nō ngā tīpuna – hekeheke tonu mai ki ngā uri.
Torohia te pouaka "Mō te rauemi" ki raro nei e kite ai ngā rauemi hāngai.
Te whakapapa o te pūrākau
I puta mai tēnei kōrero i ngā puna kōrero o ngā tīpuna o Ngāi Tahu ki Takapau. I whakaputahia te kōrero tuatahi mō ēnei tīpuna, mō Whata rāua ko Tangowhiti i roto i te Hautaka o te Rōpū Poronīhia i te tau 1906. Ko Tanguru Tuhua te kaituhi i ērā kōrero.
I te tau 2019 i hui ētahi o ngā uri o te tipuna nāna i tuhi aua kōrero ki te wānanga i tētahi momo rauemi me tētahi kōrero e pai ana mā ngā tamariki i roto i ngā kura Māori, kura auraki hoki. Ka whakatakotoria he tāhū kōrero hei whakaatu i ngā mahi tauwhāinga a ngā tīpuna e rua, a Whata rāua ko Tangowhiti, me te take i tapā ai he ingoa ki te rārangi hiwi o tēnei kāinga.
Kua puta ngā tēnei tuhinga hou hei pukapuka pikitia mā ngā tamariki kei ngā kura.
Ka whakaaturia anō ngā mahi a te tohunga, arā, te takutaku karakia hei whakararu, hei whakapōrearea i ngā mahi a te tangata.
Mō te pukapuka
He pai tēnei pukapuka mō te pānui ā-rōpū mō te pānui takitahi hoki. Ko tētahi momo reo kua tuhia ki tēnei pukapuka ko te reo o te karakia. Ko ngā kiripuaki matua o tēnei pūrākau, he tipuna, he tohunga, he mauri tahito. Ko tā rāua mahi ki a rāua anō he mahi hīanga, he mahi māminga hei whakararu i te iwi a te hoa tauwhāinga. Ka riro mā ngā karakia a Tangowhiti e whakararu i ngā mahi a te iwi o Whata. Ko ā Whata karakia hei whakakore, hei whakatika rānei i te mahi a Tangowhiti. Katoa, e ono ngā karakia kei te pukapuka nei, he mea hanga noa ēnei e te kaituhi i runga i te hiahia ki te whakaatu i tēnei tū āhuatanga i roto i te kaupapa o tēnei pūrākau.
Tukua mā ngā tamariki anō e whakaaro;
- ki ngā mahi a ngā tohunga e rua nei me ā rāua karakia, arā, te takutaku atu me te takutaku mai;
- ki te ao o ngā tīpuna me ā rātou mahi hei pupuri i te mana i runga i tētahi mahinga kai pērā i te roto tuna.
Mō Mua Mai i te Pānui Tahi
Kōrero tahitia te uhi o te pukapuka
Matapakihia te āhua o ngā kiripuaki
Matapaehia te kaupapa matua o te kōrero
Ngā Tohutoro
Journal of the Polynesian Society; 1906. Volume 15 No. 2; P. 61. He korero tatai mo Horehore Pa, i Te Takapau. Nā Tanguru Tuhua i tuhituhi.
McEwen, J.M. Rangitāne: A Tribal History. 1990. Raupō Publishing.
He Mihi
He mihi nui tēnei ki a Beth Dixon rāua ko Louise Keepa. Nā rāua i tuhi; Ngā pātai hai arataki i te kaiako; Ngā Tauira Whakaakoranga me Ngā ngohe hai mahi mā ngā ākonga.
Me kore ake rāua hei āwhina i tēnei kaupapa.
I tāia i Aotearoa.
Manatārua i ngā kōrero © Huia Publishers 2019
Kua noho manatā tēnei rauemi. Atu i ngā take pēnei i ngā akoranga whaiaro, te rangahau, te arotake me te arohaehae mahi e whakaaetia ana i raro i te Ture Manatā, kore rawa e tukuna kia tāia anō tētahi wāhanga o ngā kōrero nei, ahakoa te huarahi tā. Me mātua tono whakaae ki a Huia Publishers.
About this resource
See the “About this resource” box below to download resources. Down the Back of the Chair (MOE712681)
Wāhanga Ako: Te Reo Māori; Tikanga ā-Iwi
Taumata: Taumata 3, Taumata 4
Kaupapa: Te Aho Ngārahu
