Te Pūmanawa Tangata - Te Iho

Te Pūtake

Ko tā Te Pūmanawa Tangata he whakapakari i te mokopuna mā roto mai i ngā mōhiotanga me ngā pūkenga e māia ai, e matatika ai hoki tana whai wāhi atu me tana hāpai ki roto i tana hapori me te ao whānui.

Ka ako te mokopuna ki te āhukahuka i ngā ōritenga me te kanorautanga o ngā ritenga ahurea, o ngā kōrero o mua, o ngā tirohanga ki te ao, me ngā wheako o te tangata i te takanga o te wā, me te wāhi. Mā tēnei tirohanga e whānui haere ana, ka hōhonu ake tana mōhio ki ngā uara, ki ngā hononga, ki ngā tirohanga hoki ki te ao e whakaahua nei i te āhua o tā te tangata me tā ngā porihanga pāhekoheko ki a rātou anō me te taiao.

Ka whakaakona ngā mokopuna kia arohaehae te whakaaro, kia whakamahia hoki ngā rautaki me ngā tikanga hei mātai i ngā taunakitanga, i ngā tikanga, me ngā kōrero. Ka kohia, ka tātarihia, ka whakaaturia hoki ngā pārongo mō te āhua o tā te tangata me tā ngā porihanga whakarite i a rātou anō ki te whiriwhiri whakataunga, ki te ārahi hoki i a rātou anō i ngā panonitanga i te takanga o te wā. I a ia e ruku ana ki ēnei tauira, ka whakawhanake te mokopuna i tana māramatanga ki tā te ao o mua whakaahua i te ao o nāianei, me te pānga o āna ake mahi ki te ao e haere ake nei.

Ka whakawhanake hoki te mokopuna i tana māramatanga ki ngā pūnaha o te porihanga, o te ao tōrangapū, o te ōhanga hoki, tae atu ki ngā haepapa o ngā iwi, pēnei i te manaakitanga, i te whanaungatanga, i te hautūtanga anō hoki, e ārahi nei i te whakamahinga o ngā rawa, e poipoi nei i te oranga o te tangata, e tautoko nei hoki i te toitūtanga o te taiao mō ngā uri whakaheke. Ka ako te mokopuna i te āhua o te whakahaerenga o ēnei pūnaha i Aotearoa, me te whakapuakanga o aua pūnaha i ngā porihanga manapori puta noa i te ao.

Ka whakaūria ngā ritenga matua puta noa i a Te Pūmanawa Tangata kia mōhio ai te mokopuna ki:

Te whakarite i ngā pātai e whai take ana, e matatini ana hoki: ka panuku i ngā pātai māmā, pēnei i te 'ko wai' me te 'ko hea' ki ngā pātai e tuatini ake ana, pēnei i te 'nā te aha' me te 'me pēhea' e hōpara ai i te tuakiri, i te wāhi, i te ahurea, i ngā kōrero o mua, i ngā uara, i te whakahaere, me te panonitanga. Mā te ui i ngā pātai e whai take ana ia e ārahi i tana whai whakaaro, e āwhina hoki i tana tūhura i ngā whakaaro nā runga i te pākiki me te takunetanga.

Te kohikohi, te whakaraupapa, me te kōtuitui pārongo: ka ako te mokopuna ki te kohi pārongo i ngā mātāpuna e whānui haere ana—ngā kōrero, ngā wāhi, ngā whakaahua, ngā mahere, ngā taonga, ngā uiui, ngā tuhinga, me ngā arapāho matihiko. Ka whakaraupapa ia i ēnei pārongo kia tautohua ai ngā whakaaro matua, kia āhukahukatia ai ngā tauira, e mārama ai hoki ki ngā tikanga o roto. I te takanga o te wā, ka ako ia ki te tūhonohono i ngā pārongo i ngā tirohanga rerekē e hōhonu ai, e tika ake ai hoki tana mārama ki ngā tāngata, ki ngā wāhi, ki ngā kōrero o mua, ki ngā ahurea, ki ngā pūnaha mōhiotanga hoki.

Te tautohu i ngā uara me ngā tirohanga, te whakatau kupu whānui hoki: ka tautokona te mokopuna kia kitea te rerekē o tā te tangata titiro ki te ao nā runga i ōna wheako, i tōna ahurea, i tōna tuakiri, i ōna whakapono, i tōna hononga hoki ki tētahi wāhi. Ka ako ia ki te tautohu i ngā uara e whakaahua ana i tā te tangata whakatau me āna mahi me te āhukahuka i ngā haukume, i ngā reo rānei kāore i te rangona. Ka taka te wā, ka whakatau kupu whānui ia nā runga i tana mōhio ki ngā tauira puta noa i ngā tāngata, i ngā wāhi, me te wā, me te tātari i te whakaawenga o ngā mana whakahaere.

Te whakawhiti whakaaro mō ngā kitenga, mā te whakamahi i ngā ara me ngā tikanga e hāngai ana: ka ako te mokopuna kia ariari tana whakapuaki i ōna whakaaro mā te whai i tētahi ara e hāngai ana ki tana pūtake—te tā whakaahua, te whakamahere, te tuku kōrero, ngā arapāho matihiko, te whakapuakanga ā-waha, te whakaari, ngā hoahoa, ngā rārangi wā, ngā tuhinga rānei. Ka whakawhanake ia i ana pūkenga ki te whakawhiti whakaaro nā runga i ngā ara e whakaute ana, e tika ana, e auaha ana hoki, ā, ko tōna tūāpapa, ko ngā taunakitanga.

Te hoahoa, te whakatinana, me te arotake i te koringa pāpori: ka tautokona te mokopuna ki te whakamahi i ana akoranga hei hāpai i tētahi āhuatanga. Ka whakamahere ia, ka whakatutuki hoki ia i ētahi mahi hei whakaatu i tana aroha ki te tangata, ki ngā wāhi, ki te ahurea, me te taiao. I a ia e pakeke haere ana, ka arotake ia i te pānga o āna mahi me te whai whakaaro ki te āhua o tā ngā haepapa, o tā ngā uara, me tā te oranga o te katoa ārahi i ngā whakataunga me ngā panonitanga ki te pāpori.

Te Hanga

Ngā Toi Mokopuna

Ka tautuhi Ngā Toi Mokopuna, i te taha o ngā pou e whā o Te Marautanga o Aotearoa, i ngā aronga o te mokopuna e panoni haere ana, kua whai wāhi atu nei hoki ki te ako i Te Pūmanawa Tangata i te roanga o tana noho ki te kura. 

Ngā Whenu

Ko tā Te Pūmanawa Tangata he whakatakoto i ngā akoranga e ariari ana, e arorau ana i Te Tūārere 1 ki Te Tūārere 4 mā roto mai i ngā whenu e whā e whakariterite nei i ngā akoranga e pā ana ki ngā tāngata, ki te ahurea, ki te hapori, me ngā pūnaha o te pāpori me te ōhanga e whakaahua nei i te ao o te katoa. Ka tautohu ia whenu i ngā mōhiotanga matua e kōtuitui nei i waenga i ngā tūārere katoa e mōhiotia ai te whai take me te tūhonohono o ngā mahi akoako.

Te Mātātangata

Ka whakapakari a Te Mātātangata i te māramatanga o te mokopuna ki ōna tūpuna, e whakaū nei i tana tuakiri me tana noho huānga puta noa i ngā whānau, i ngā hapori e noho nā ia, me te hapori whānui. Mā te whai wāhi atu ki ngā ritenga ā-ahurea, ki ngā uara, me ngā tikanga, ka ako te mokopuna ki te mahi i runga i te pono, me te āhukahuka i te āhua o tā ngā whakapono ārahi i ngā pāhekohekotanga me ngā hononga. Mā te uara i ngā mōhiotanga, i te ahurea me ngā tuku ihotanga, ka whakawhanake te mokopuna i ōna pūkenga ki te kuhu haere ki ngā pāhekotanga ahurea nā runga i te whakaaro nui, me te hāpai hoki nā runga i te māia me te matatika i ōna hapori me tōna porihanga.

Te Mātai Whakamuri

Ka whakamana a Te Mātai Whakamuri i te mokopuna kia mārama ki tā te ao o mua ārahi i te ao o nāianei mā te whai wāhi atu ki ōna anō kōrero o mua, ki ō Aotearoa, me ō te ao hoki. Ka whakawhanake tēnei whenu i ōna pūkenga ki te whakamāori me te tuhi i ngā taki hītori mā te āhukahuka i te whakaahuatanga o ngā hītori mā roto mai i te tuku kōrero, i te taunaki, me ngā tirohanga. Mā tana toro atu ki tētahi pakirehua kua āta whakaritea e whakamahi nei i ngā puna mātāmua me ngā puna mātārua, ka whakapakari te mokopuna i tana mōhiotanga ki te tangata, ki ngā wāhi, me ngā tūāhua, ka arohaehae tana arotake i ngā taunakitanga, ka whakatairite ia i ngā kōrero, ka whakatau hoki i ētahi whakamāoritanga nā runga i te whakaaroaro. Mā ngā huatau hītori matua—pēnei i te pūtake me te pānga, i te panonitanga, i te hiranga, me te tirohanga—ia e tautoko ki te whakamārama i te ao o mua, e mārama ai ia ki tā te ahurea me te tuku ihotanga whakaahua i te tuakiri, e mātai ai hoki ia i te āhua me ngā hua o ngā pāhekotanga ahurea.

Te Noho ā-Iwi

Ka tautoko a Te Noho ā-Iwi i te mokopuna kia whanake tōna tūoho ki te pāpori me te haepapa mā te mārama ki te āhua o ngā pūnaha manapori, me tā ngā rōpū whakarite i a rātou anō kia tutuki ai ngā hiahia o te katoa. Ka ako hoki ia i te hiranga o ngā mōtika, o ngā tūranga, me ngā haepapa i roto i te whakaahua i ngā pāhekohekotanga i waenga i ngā hapori, me te mātai, i runga i te arohaehae, i te whakaaweawe a ngā hononga, a ngā whakahaere, a ngā rangatohe pāpori i te tautika, i te toitūtanga, me te huatika pāpori. Mā ēnei akoranga, ka whakapakari te mokopuna i ōna pūkenga kia takatū, kia matatika, kia māia hoki tana whai wāhi atu ki ōna hapori me te porihanga.

Te Ao Ohaoha

Ka tautoko a Te Ao Ohaoha kia mārama ki te āhua o te porihanga, o te ahumoni, o ngā pūnaha ohaoha, e whakaahuatia nei e ngā tirohanga kanorau, e ngā uara, e ngā ritenga hoki. Ka ako ia i te whakahaere ngātahi a ngā whānau, a ngā iwi, a ngā hapori hoki i ngā rawa hei whakaū i te oranga, i ngā tikanga, i te toitūtanga hoki o te taiao, i a ia e whakapakari haere ana i tana mōhio ki te ahumoni whaiaro, ki te rakahinonga, ki te wāhi ki te kāwanatanga, ki te ōhanga hoki o Aotearoa i te horopaki o te ao. Mā te hōpara i te āhua o te whakamahi me te tiritiri a te tangata i ngā rauemi, i tana whakatau i ngā whakataunga ā-ōhanga, i tana whai whakaaro hoki ki te tautika me ngā haepapa tuku iho, ka whakawhanake te mokopuna i ōna pūkenga ki te whiriwhiri whakataunga e hāpai ana i te tōkeke, i te oranga, i te anamata hoki e puāwai mai ana.

He Tirohanga Whānui

Puta noa i Te Tūārere 1–4, ka koke a Te Pūmanawa Tangata i te tūāpapa o te māramatanga, arā, i te tuakiri, i te noho huānga, i ngā kōrero o mua, i ngā tūranga pāpori hoki o ia rā, ki te tīmata ki te tātari i te panonitanga o te porihanga, i te ārahitanga, i te whakahaere, i ngā pūnaha ohaoha hoki. Ka pakari tā te mokopuna whakawhanake i tana mārama ki te tuakiri, ki ngā kōrero o mua, ki te porihanga, ki te ōhanga hoki i ōna hapori, puta noa i Aotearoa, i te ao whānui hoki. Ka whakapakari haere ia i tana mōhio
ā-kaupapa ki ngā kōrero matua o mua me ngā tatūnga, pēnei i He Whakaputanga o te Rangatiratanga o Niu Tīreni me Te Tiriti o Waitangi; i te whakarite, i te ārahi, i ngā whakatau hoki a ngā rōpū, atu i ngā whānau me ngā marae, tae atu ki ngā iwi, ki ngā hapori, ki te kāwanatanga; me te āhua hoki o tā te hokohoko rauemi, o tā te mātai ahumoni, o tā ngā pūnaha ohaoha hoki whakaahua i te oranga o te tangata. Ka hāngai ngā akoranga ki te rohe, ki te anamata hoki, e āhukahuka nei i te mōhiotanga hei āhuatanga e ora ana, e tūhonohono ana, e kawea ana hoki mā roto mai i te tuku ihotanga o ngā haepapa.

Ka whakarite a Te Pūmanawa Tangata i te mokopuna mō ngā kaupapa ako kei ngā taumata o runga, pēnei i Ngā Kōrero o Mua, i Te Matawhenua, i Te Mātai i te Ao Tawhito, i Te Mātai Ōhanga, me Te Mātai Pakihi, ā, e whakapakaritia ana tana ako i ngā tikanga ā-iwi whānui me te noho ā-iwi. Mā tēnei kaunekehanga, ka tipu te mokopuna hei kirirarau e mātau ana, e whai wāhi ana i runga i te arohaehae, e tūoho ana hoki ki te porihanga, e mārama nei ki te āhua o te whakaahua a te tuakiri, a ngā hononga, a te whakahaere, a te ārahitanga, a ngā pūnaha ōhanga hoki i ngā tāngata me ngā hapori i te takanga o te wā.