Ngā Taniwha e Rua o Waiapu
Ngā Taniwha e Rua o Waiapu
Ngāti Porou
E kōrero ana tēnei pūrākau mō Te Taniwha Horowhatu o Waiapu, tae atu ki ōna whakaakoranga o te haumaru ki te awa me te tiaki i te taiao. He maha ngā āhuatanga e pā ana ki te whenua, ko ngā mahi poro rākau tērā, ā, kua horo te whenua, kua heke te paru i te awa o Waiapu, ā, tau noa ki te awakeri o Hikurangi, arā, te Hikurangi Trench.
Order copies of this book from Down the Back of the Chair (MOE50796)
- Rauemi Matua
- Ngā Tauira Whakaakoranga
- Ngohe
Rauemi Matua
He kōrero whakataki
Hei rauemi ēnei mā te kaiako, i a ia ka whakamahi i te pukapuka Ngā Taniwha e Rua o Waiapu i te taha o ngā ākonga.
He pukapuka pikitia tēnei e kōrero ana mō ngā taniwha e rua. Arā:
- Ko tētahi ko Horowhatu tōna ingoa. E ai ki ngā kōrero a te iwi o Ngāti Porou, noho ai a Horowhatu i roto i te awa o Waiapu. Ina toromi ana tētahi i roto i te awa o Waiapu, i kīia te kōrero, nā te taniwha i riro ai. Koinā hoki te kōrero a ngā pākeke ki ngā tamariki hei tohutohu, hei whakatūpato hoki i a rātou ina whakawhiti haere ana i te awa o Waiapu. Nō te tau 1954, i muri i toromitanga o ētahi tāngata, ka whakahaere karakia ngā kaumātua o te hau kāinga, ā, kia wātea ai te awa i te taniwha, ka mutu nā ngā karakia i pana atu te taniwha ki waho ki te moana.
- I roto i te huringa o te wā kua topetopea ngā rākau Māori kei ngā tahataha o te awa o Waiapu, ā, kua kore he rākau hei pupuri i te whenua. Haere mai ana te marangai me ōna karawhiu, te kaha o te hau me te ua, ā, ka horo te whenua, ka heke te parakiwai ki te awa, ā, kawea atu ana e ngā au o te awa ki waho ki te moana. Kua putu haere ngā para ki te Awakeri Moana o Hikurangi, arā, te Hikurangi Trench. Ko te matapae o te hau kāinga ki te kore te tangata e tiaki i te taiao, ā tōna wā, ka hoki mai taua taniwha ki uta, he tai āniwhaniwha tōna hanga.
Ngā whāinga
Me akiaki i ngā ākonga me te kaiako kia mōhio, kia mārama:
- ki ngā pāhekohekotanga o te tangata, tētahi iwi rānei ki tētahi wāhi me tōna taiao;
- ki ngā mahi a te tangata, tētahi iwi rānei hei atawhai i te taiao;
- ki tētahi pūrākau taniwha me ōna pānga ki ngā tikanga me ngā mahi a tētahi iwi.
Te whakapapa o te pūrākau
I pū mai tēnei pūrākau i te koronga o tētahi kaiako tautōhito nō Waiapu, nō Ngāti Porou tonu kia puta ā rātou ake kōrero mō tētahi taniwha. He pūrākau tēnei i tuhia i ngā tau ki mua, heoi i noho tonu hei kōrero mō ngā hapū me ngā whānau i roto i te riu o Waiapu. Nā te kaupapa o Te Aho Ngarahu i whai huarahi ai te whānau ki:
- te whakaputa i te pūrākau hei rauemi mā ngā kura;
- te whakahāngai i ngā kōrero ki ngā take o ēnei wā.
Ko Hikurangi te maunga
Ko Waiapu te awa
Ko Ngāti Porou te iwi.
Mō te pukapuka
He pai tēnei pukapuka mō te pānui ā-ropū, takitahi rānei. Mā te pānui tahi ka mōhio, ka mārama ngā ākonga ki tā te iwi kāinga tirohanga ki tēnei wāhi me ōna herenga kōrero. Mā tēnei pukapuka anō e mōhio ai ngā ākonga ki ētahi kōrero tuku iho mō te awa o Waiapu.
Tukua mā ngā tamariki anō e whakaaro;
- ki te awa matua me ngā moana o tō rātou kāinga, rohe rānei;
- ki t/ētahi kōrero, pūrākau rānei e mōhio ana rātou mō taua wāhi;
- ki ngā mahi a te tangata, rōpū rānei hei tiaki i taua wāhi;
- ki ngā mahi a te tangata e tūkino ana i taua wāhi.
See Materials that come with this resource: TSM-Core-Resource-Info_FA-v2 (.pdf)
About this resource
Order copies of this book from Down the Back of the Chair (MOE50796)
Wāhanga Ako: Te Reo Māori, Tikanga ā-Iwi
Taumata: Taumata 3, Taumata 4
Kaupapa: Te Aho Ngārahu
