He mea waihanga tēnei rauemi hei tautoko i ngā pouako ki te: 

• tautohu hononga ki Te Marautanga o Aotearoa 
• tautohu hononga ki ngā Taumata Mātauranga ā-Motu ka Taea 
• whakahāngai i ngā kōrero o te putanga nei ki tā te kura hōtaka reo matatini 
• whakawhānui i ngā horopaki me ngā whakamahinga o tēnei pukapuka mā te whakatauira i ngā momo ngohe ako 
• tīpako i ngā pūkenga me te mātauranga e arotahitia ana me te tautohu i ngā rautaki ako hei whāngai i ēnei āhuatanga ki te ākonga. 

Tekau-mā-waru ngā kōrero o roto i Te Wharekura 92. Kei ngā whārangi e whai ake nei he paku whakamārama mō ia kōrero. Kua tohua te momo reo tuhi o ia kōrero, ōna āhuatanga, me ētahi tauira nō roto tonu i ia kōrero. Ko te whāinga, kia āhei ngā ākonga ki te torotoro i te whānuitanga o ngā momo reo tuhi me ngā āhuatanga o tēnā momo tuhituhi, o tēnā momo tuhituhi. 

He Whāinga Ako 

Kia tautoko i ngā ākonga ki te: 

• whakawhanake i ō rātou mōhiotanga e pā ana ki te orokohanga o te whare tapere 
• tautohu i ngā momo āhuatanga reo o ngā tuhinga pūrākau whakamārama 
• whakawhanake i ō rātou pūkenga ki te tautohu i ngā take matua o tētahi pūrākau me te whakaraupapa tika mai i aua take 
• whakawhānui rautaki whakamārama kia taea ai te whakamahi hononga i waenganui i ngā ariā, te pātai, te hīkaro, me te tautohu i te pūtake me te whakaaro o te kaituhi. 

He Horopaki Ako 

Anei ētahi whakaaro mō ngā horopaki ako, ko: 

• te whare tapere 
• te whakapapa 
• te mana wahine, te kaiārahi wahine Māori 
• ngā pūrākau 
• ngā tūhono ā-iwi. 

1. Ohia manomanotia ngā mōhiotanga o ngā ākonga e pā ana ki ngā tākaro whai. Tautohua ngā āhuatanga o te tākaro whai e hiahia ana ngā ākonga ki te mōhio. 
2. Ohia manomanotia ngā mōhiotanga o ngā ākonga e pā ana ki te whare tapere. Tautohua ngā āhuatanga o te whare tapere e hiahia ana ngā ākonga ki te mōhio. 
3. Pānuihia ētahi pūrākau mō Māui, mō Hinauri, mō Tinirau, mō Hineteiwaiwa, mō Kae hoki. Ākina ngā ākonga kia matapaki i ō rātou pānga ki te orokohanga o te whare tapere. Tonoa ngā ākonga ki te tā i te pānga o ia tangata ki te whare tapere. 
4. Whakamāramahia atu ētahi āhuatanga o te tuhinga pūrākau whakamārama, ā, whakaaturia ētahi tauira o ēnei āhuatanga ki a rātou. Hei tauira: te reo raupapa, te reo whakaahua, te reo tūhono i te take me te pānga, me te kupu tāruarua. 

Ka taea e te pouako te whakamahi ēnei ngohe hei aromatawai, hei whakawhānui hoki i ngā pūkenga o ngā ākonga. 

1.  Ākina ngā ākonga kia matapaki i ngā pātai nei: 
   He aha ngā akoranga matua ka mau i a tātou mai i tēnei pukapuka? 
   He aha ngā pātai i tuhia e koe i mua i tō pānuitanga o te pukapuka nei? 
   Kua whakautua e koe āu pātai? Ki te kore, rapua he whakautu mā tētahi atu huarahi, arā, i te whare pukapuka, i te ipurangi, i ō whanaunga rānei. 
2. Tautohutiangā tauira o te reo whakaahua i roto i te pukapuka, ā, whakamārama atu ki ngā ākonga ka pēhea te reo whakaahua e āwhina ai i te kaipānui ki te whai i te whakaaro o te kaituhi. Hei tāpiri atu, me whakamārama atu ki ngā ākonga mā te whakamahi i ngā momo tauira maha o te reo whakaahua e whakapai te aronga o ngā kōrero. 

He Hokinga Whakamuri hei Kōkiringa Whakamua 

1. Ākina ngā ākonga kia rangahau i tētahi pūrākau e whakamārama ana i ētahi tikanga Māori e rangona ana ināianei tonu. 
2. Me uiui e ia ākonga tōna ake koroua, tōna ake kuia, pakeke rānei mō tētahi pūrākau i rangona ai e ia i a ia e tamariki ana, ka rangahau ai i tētahi pūrākau ōrite. Kātahi ka whakaatu mai rātou i te pārongo mā te whaikōrero, mā te whakaaturanga ā-rorohiko rānei. 

He karakia tēnei e whakamārama ana i ngā mahi whai wawewawe a Māui. 

He kōrero tēnei mō te haerenga o Māui rāua ko tana taokete, a Irawaru, ki te hī ika, me te pūtakenga mai o ngā tautohetohe i waenganui i a rāua. 

I konei, ka rongo i te hua o ngā tautohetohe i waenga i a Māui rāua ko Irawaru. 

I konei, ka rongo i ngā mahi hanariki a Māui ki te huri i tana taokete hei kurī me ngā āhuatanga i pā ki a Hinauri, te tuahine o Māui. 

I konei, ka rongo i ngā mahi hanariki a Māui ki te huri i tana taokete hei kurī me ngā āhuatanga i pā ki a Hinauri, te tuahine o Māui. 

I konei, ka kaha pōuri a Hineteiwaiwa i ngā mahi pūremu a Tinirau. Ka tuku karakia atu a ia ki tōna tungāne, ki a Māuimua, ki te tiki mai i a ia. Ko ngā āhua o Māuimua, ko Rupe te kūkupa, ko te ruru hoki. Ka heria atu tana tuahine. Engari, nā te nui o ngā inoi a Tinirau kia noho mai, ka mahue mai a Tūhuruhuru ki tōna taha. Ka noho atu a Rupe rāua ko Hineteiwaiwa ki te kāinga o Rēhua. 

Ka pakeke haere a Tūhuruhuru, te tama a Tinirau rāua ko Hineteiwaiwa. Ka ako ia i ngā momo karakia, i ngā pūkenga hei āwhina i a ia. Ka pūhaehae ētahi tamariki, ka whiu kōrero whakaiti mō tōna kore mōhio ki tōna whaea. Ka takatū ia ki te kimi i tōna whaea i runga tonu i ngā tohutohu a tōna matua. 

I konei, ka kite tātou i te haerenga o Tūhuruhuru ki te rapu i tōna whaea. Ka whakamahi ia i ngā pungarehu hei whakaparuparu i a ia kia kore ai tōna whaea rātou ko āna pononga e mōhio ko wai a ia. Ka riro tūnga ia hei kaikawe wahie, kaikawe wai hoki ki tōna matua kēkē, ki a Rupe. Nāwai, nāwai, ka hangarau ia ki a Rupe, ā, tae atu ana ki mua i tōna whaea. Ka waiata ia i tāna waiata, kātahi ka mōhio a Hineteiwaiwa ko Tūhuruhuru te tamaiti tūmau nei. 

I roto i tēnei kōrero, ka tono atu a Tinirau ki a Kae, he tohunga, ki te whakahaere i ngā karakia iriiri i a Tūhuruhuru. Ka oti ngā karakia, ka tapahia e Tinirau tētahi wāhanga kikokiko o tana mōkai tohorā, a Tutunui, hei koha ki a Kae. Nā te reka o te tohorā, ka matekai anō a ia ki te kiko o Tutunui. Ka inoi atu a Kae kia hoki atu ia mā runga i a Tutunui. I te mutunga, ka whakaae a Tinirau, ā, koinā hoki te wā whakamutunga i kitea ai e ia tana mōkai tohorā e ora ana. 

E hāngai ana tēnei kōrero ki a Kae rāua ko Tutunui. Ka whakaaro a Tinirau kia kaua e tuku i tētahi taua, engari he ope wahine kē ki te kimi i a Kae. He kaupapa muna nōna, me te tūmanako ka kore a Kae e mōhio kua raru ia. 

E hāngai ana tēnei kōrero ki te mahi a te tira wahine i haere ki te kimi i a Kae. Ka tākaro whai rātou, ka kori i te tinana, ka whakaaturia ngā momo kanikani o te tinana. Nā ā rātou mahi whakangahau, ka kata a Kae. Ka kitea e ngā wāhine ngā niho tāpiki, kātahi ka mōhio tūturu ko ia te tangata e kimi nei rātou. 

I tēnei kōrero, ka oti pai ngā mahi. Ka taki karakia rotu kia warea ai te katoa e te moe. Ka āta hīkina a Kae e ngā wāhine, ka kawea atu ki te waka ki te kāinga o Tinirau. Ka whai utu ai a Tinirau mō te matenga o Tutunui. 

Koinei te waiata i waiatahia ai e te ope wahine ki a Kae me tōna iwi. Koinei te waiata i whakakata ai a Kae.