Ngā Muriwai o Ruapehu 

He maha ngā wai ka heke iho i a Ruapehu. He wai pupū, he wai pipī, katoa he muriwai nā ngā kaitiaki o te maunga nei i a Rangitaiki, i a Te Ririo, i a Tākaka hoki. Otirā, he toru ngā awa matua ka hono ai ngā wai katoa ko: 

• Ngā muriwai nō raro, arā, ko Whanganui tēnā 
• Ngā muriwai nō runga, arā, ko Whangaehu tēnā 
• Ngā muriwai o te uranga, arā, ko Waikato-iti. 

Ngā Muriwai nō Raro 

He maha ngā awa ka koropupū ake i te maunga nei, i a Ruapehu, ā, he maha anō ngā wai ka pipī mai i te maunga nei. Ko ngā wai katoa nō te taha raki tae atu ki te uru ki Mangaturuturu, ka uru atu ki roto i te awa tupua o Whanganui me te taura whiri e hono ana ki tēnei o ngā awa rongonui o te motu e kīia ana: 

He muka nā te taura whiri a Hinengākau. 

Ko ngā awa matua ka hono atu i hēnei rangi mai i a Ruapehu ki te awa tupua, ko Whakapapa me Manga-nui-o-te-ao. Katoa he awa hēnei me ngā manga iti ka hono atu hei muka mō 

Te Taurawhiri-a-Hinengākau mai i a Matua te Mana. Nō reira, me kī pēnei, he rerenga awa, he putanga kōrero mā konei ka kīia ai: 

He wai tuku kiri 

He wai herunga 

He wai kaukau. 

Whanganui 

Ka koropupū ake te awa nui nei ko runga o Tongariro, arā, ko Te Waiinuinu-a-Rua-Tipua, otirā ko Te Hokowhitu-a-Rākeipoho tēnā. Nō te tupuna nei a Rua Tipua te ingoa taketake o te awa o Whanganui, arā, ko Te Awanui-a-Rua me tōna karangatanga iwi ko Te Wainui-a-Rua. 

Nō te ūnga mai o te waka o Matahourua tae atu ki te taenga mai o Aotea waka te ingoa e mōhiotia whānuitia huri i te ao, arā, ko Whanganui. E rua ngā whakamāramatanga: 

• Nō te tatari roa o te whānau a Kupe kia hoki atu a ia mai i uta ki te wahapū o te awa nei, ina ko Te Whanga-nui-a-Kupe. 
• Nō te tatari roa a Hau kia whiti atu a ia i te awa nui i tōna mahi tapatapa i ngā awa o te tai hauāuru, mai i a Whenuakura ki Te Umu-o-Hau ki Porirua. Otirā, ko te roanga ake o te ingoa e whēnei ana, ko Te Whanga-nuia-Hau. 

Mō te tīmatanga o te awa nei, ka taea te karikari i te one kei ngā wāhi tītōhea o te mātāpuna o te awa o Whanganui, ā, ka rere mai te wai. 

Whakapapa 

E rua ngā awa ka heke iho i a Ruapehu ka tupu hei awa kotahi, ko Whakapapa-nui, ko Whakapapa-iti hēnā. Ka hono ngā awa e rua, ka tupu ko te awa Whakapapa. Nō reira, ka ahu mai te ingoa nei a Whakapapa i ngā taumata ka heke iho te awa, me kī, ko te whakapaparanga tēnā e tupu ana hei awa. I roto i hēnei rangi nā ngā awa nei o Whakapapa me Whanganui e hono ai ngā iwi o Whanganui me Tūwharetoa. 

Mangahuia 

Ahakoa he manu huia i tioro mai i te take o maunga Ruapehu, engari ko te hōhonutanga o te ingoa o te awa nei, ko te huihuitanga o ngā iwi o te kāhui maunga i ngā motu o reira kia 

hohou ai te rongo. 

Waimarino 

He manga iti tēnei awa, engari nō tēnei manga te ingoa o te rohe me tōna poroka whenua. Ko Waimarino hoki te ingoa tūturu o te tāone iti e mōhiotia ana ko National Park. Heoi anō, ko te awa nei he awa mārire, arā, koia ko Waimarino. 

Mākātote  

Me kī pēnei: 

He kātote kei uta 

He mamaku kei tai. 

Koia nei ko te kai nui e tuputupu mai ana i te awa nei, arā, ko te pītau o te kātote me tōna kiri mā ka whakamaoa ki te umu tao roa a Uenuku-Manawa-Wiri. 

Manga-nui-o-te-ao 

Ko te ingoa taketake o te awa nei ko Wai Tahupārae. Otirā, he awa nui tēnei ka hono atu ki te awa o Whanganui. Me kī, ko ngā manga katoa o te uru o Ruapehu ka rere ki roto o tēnei awa atu i ngā wai o Whakapapa me Mangahuia. Mai i te awa o Whanganui, he ara matua tēnei ki te maunga me ngākarangatanga o reira. Koia e kīia ana ko te ara nui, ko te manga nui, mai i te awa o Whanganui ki te ao o te maunga. 

Mangaturuturu 

E rua ngā kōrero mō te ingoa o te awa nei: 

• Ko te turuturutanga o ngā wai ko runga o Ruapehu. 
• Ko ngā pari o te awa nei i a koe e tiro whakauta ana he rite ki ngā pou turuturu o te Whare Pora. 

Ngā Muriwai o te Uranga 

Kei te uranga o te rā ko te koropupūtanga o Whangaehu me Waikato-iti. Mō te awa o Waikato-iti, ka tīmata ki Nukuhau.He tihi, he toka, he huihuinga tipua a Nukuhau ko  

runga i a Ruapehu. 

Waikato-iti 

Ko tēnei awa ko te roimata mārua i tukuna e Ranginui ki ngā rekereke o Matua te Mana i te wā i tū kotahi te maunga tupuna nei. Otirā, nō te whānautanga mai a Te Ruataiko (arā, ko te ingoa tuatahi o Taupō moana) ka motua te ara o te awa nei ki te moana. He tongi hoki tēnei mō Ngāti Rangi kia haere atu ki tēnei o ngā awa karakia ai. 

Mō tōna ingoa, ko te katonga tēnā o te wai. Heoti anō, ki te takatakahi i te ara o te awa nei kei Te Onetapu ka kite i te rerekētanga o taua katonga me te hōhonutanga ki tōna ingoa. Ina, ka rere te wai, ā, ka huna te wai, ā, ka pupū ake anō te wai, ka rere, ka huna, ka rere te awa nei. E pēnei hoki te tīmatanga o te awa o Whanganui. 

Nō reira, e ōrite ki te katonga o te hoe te rere o tēnei awa, o Waikato-iti, ki uta, ki Te Onetapu. Arā, ka keria te wai e te hoe ka puare mai he rua kia hoki te wai ki roto i te rua, koia ko te hunanga o ngā wai o te awa nei. Kātahi ka katohia te wai e te hoe, ā, ka rere anō te wai pērā i te awa o Waikato-iti nei. 

Ki tā Ngāti Rangi kōrero, ka puea ake a Waikato-iti, ka rere aTongariro ki roto o Taupō, ā, ka rere anō te awa o Waikato. 

Mangatoetoe-nui 

Koia nei te awa e tuputupu ana i te toetoe mātotoru. 

Te Waihōhonu 

Ka rere tēnei awa i te take o Ruapehu me Ngāuruhoe. Ka tīmata te awa nei i tētehi puna nui, me kī, he tomo kei raro wai. Koia hoki ko te ingoa o te moana nui kei raro iho o Te Onetapu nō runga i te mōhio he wai tino hōhonu kei raro whenua. 

Ngā Muriwai nō Runga 

Ko te awa matua o Ngāti Rangi ko Whangaehu, e rere iho ana ki ngā kārangarangatanga o tōna puku,ko Te Awaiti me ngā hapū o Ōtoko, heke iho ki tai, ko Ngā Wairiki me hōna pānga ki a Ngāti Apa me Whanganui. Ko te koropupūtanga o tēnei awa kei te kōpū tonu o Ruapehu. Ka puta mai ko te roto tapu o Ngāti Rangi ko runga ake i te maunga, ko Te Wai-ā-moe tēnā. 

Ko Te Wai-ā-moe he urupā hoki mō ngā kāwai ariki o Ngāti Rangi ake, koia e noho tapu ana te wāhi me ngā wai o te roto nei. 

Ko te pakarutanga o te roto nei ko te tīmatanga o te awa o Whangaehu, ā, nō te pakarutanga me tōna hekenga i ngā waiheke ka huri tōna tapu hei wai tīehu mā te tangata. Ko te wai tīehu he wai whakaora i te tangata, koia ka tīehutia te wai, pērā i ngā mahi a Hau i tōna tapatapanga i ngā awa o te uru. Me kī,ka whanga a Hau mō te wā iti kia tīehutia e ia ki te wai i mua i 

tōna whāinga i tana ipo. 

Ā, ko tētehi o ngā kōrero hoki a ngā pāhake ko tēnei mea ko te ehu, he tū kaupeka nā runga i te mōhio ko te awa nei he ara mā te tuna kia whai atu i ngā kaupeka wai māori o te awa tōtā 

o Whangaehu. Otirā, e pēnei ana ngā kōrero matua mō te awa o Whangaehu: 

Te wai tōtā o ngā tipua 

Te wai tīehu o ngā kuia 

Te wai tuku kiri o ngā tūpuna. 

Nō tēnei awa o Whangaehu ka puta mai te kōrero, ko Te Wera a Ruapehu me tana whakapapa e kīia ana ko ngā awa me ngā manga ka tupu hei awa matua mō ngā iwi e toru – a Ngāti Rangi, a Te Awaiti, me Ngā Wairiki (Ngāti Apa), ā, whakaputa atu ki te 

kōpū nui a Tangaroa. 

Nō te tau 1953, i te pō i mua mai i te rā Kirihimete, ka rongonui tēnei awa a Whangaehu. Nō te rerenga wai tōtā i Te Wai-ā-moe ka turakina te piriti tereina ki Tangiwai, kei te rohe o Ngāti Rangi, ā, ka mate te 151 tāngata. Kotahi o rātau he uri no Ngāti Rangi me te awa o Whanganui, ko James Te Whetūrere Gray. Ko te take e pēnei ana ngā rerenga wai tōtā, ko Whangaehu he ara e heke ai te wera i te rae o Ruapehu. Otirā, ko ngā kōrero tuku iho, pai 

kē me heke te wera kei hū te maunga nei. 

Heoi anō, anei te whakapapa o te awa nei e kīia ana ko “Te Wera a Ruapehu”, ina ko Whangaehu. 

Tomowai 

Ko te mātāpuna o tēnei awa ka tīmata ko runga i Te Onetapu i tētehi tomo kei raro whenua, koia ko ngā wai nō taua tomo, arā ko Tomowai. E hono ana tēnei tomo ki te moana kei raro anō i Te Onetapu, ko te ingoa o tēnei moana ko Te Waihōhonu. 

Mākahikātoa 

I ahu mai te ingoa o tēnei manga i ngā mahi wānanga o te takiwā me te tuputupu o te kahikātoa i ngā rangi ka huri, koia ko te manga o te kahikātoa, o te mānuka. Koia nei hoki ko te taupā a Te Kōti Māori i waenga i a Ngāti Rangi me Ngāti Tūwharetoa i hēnei rangi. 

Wāhianoa 

He mea wāwāhi i te tapu kia noa, koia nei te āhuatanga o tēnei ingoa. E pēnei ana nā te mea kei uta o tēnei awa ko te whare wānanga mātai whetū o Ngāti Rangi ko runga maunga a 

Te Rangi-wānangananga. I heke iho ai te iwi ki te whakarite anō kia noa i mua i te hekenga ki ngā papatairite me te iwi nui. 

Waitangi 

Nō ngā parekura pakanga o ngā tau ki muri te ingoa o te awa nei. Koia hoki ko te awa e rere ana i te wāhi o Tangiwai. Ko te pakanga whakamutunga i waenga i a Whanganui nui tonu me Tūwharetoa i tū ki uta o tēnei awa, e tata ana ki te rori matua tuatahi o te motu kei te raki o Waiouru. Nā tēnei pakanga ka tū te taupā i waenga i a Ngāti Rangi me Tūwharetoa i roto i ngā kōrero a Te Kōti Māori. Koia nei tētehi o ngā awa ka uru i te taha rāwhiti o te awa o Whangaehu. 

Ōtemataraha 

He roto tēnei i ngā tau tawhito engari nā te mahi pāmu kua huri hei repo. I ahu mai tēnei ingoa i tētehi o ngā tūpuna o Ngāti Rangi, a Te Mataraha. Ko ia te tamaiti nā Paerangi, te tupuna taketake o Ngāti Rangi. Heoi anō, kei te hē tonu te tuhi i te ingoa o tēnei roto i ngā mahere o te rohe. 

Te Tokiāhuru 

Ko Whangaehu te awa nui o Ngāti Rangi heoi anō ko Te Tokiāhuru tētehi o ngā awa matua o te iwi nei. E rua ngā whakamārama o te ingoa nei: 

• Ko te toki nā Hururangi (Ururangi ki te nuinga). 
• Ko te mana o tēnei awa he mana hiki tapu pērā i te toki e āhuru ana i te mana o te kawa me te mana o te iwi. 

Hei te wā ka uru atu ngā wai o Te Tokiāhuru ki roto i a Whangaehu ka pai haere te hono o te wai māori me te wai tōtā. 

Waitaiki 

He manga ka uru atu ki roto ki te awa o Te Tokiāhuru, otirā ko te wai tēnei o Rangitaiki, te puhi ko runga Ruapehu. Me kī, ko Rangitaiki ko te puhi kahurangi kei runga i te maunga, ko 

Waitaiki ko te wahine tapairu kei roto i te wai o te awa nei. Nō tēnei awa hoki te kaitiaki o te pounamu kei Te Tai Poutini. 

Mangaehuehu 

Ko te ehuehutanga o ngā wai, arā, ko ngā kaupeka awa heiwhāinga mā ngā tuna me ngā ika ki te wai māori i te wai tōtā koia ko te awa nei a Mangaehuehu. 

Rangiwaea 

He manga iti tēnei, engari nō tēnei manga te ingoa o te poroka whenua, me kī, ko te ara ka wawaetia ki te rangi koia ko Rangiwaea. 

Mangawherawhera 

Kei tēnei pito o te riu o Whangaehu ka tīmata te tuwhera haere o te whenua i tōna pikitanga ki te maunga me ngā papatairite o reira. 

Koukoupō 

Ko te koukou, ko te keokeo, ko te peopeo, ko ngā tangi hēnei a te manu o te pō, a te rūrū. 

Mangamāhu 

Mai i tēnei o ngā awa ka kite i Te Rua-o-Māhu he kapua pango i Te Whānau Mārama kei te paepae o Māhutonga. Arā, he wāhanga pango i Te Moungaroa, ko Te Rua-pātiki ki hētehi.  

E whakaritea ana ki te puehu o te pātiki ki te pae o Māhutonga. 

Mangawhero 

I te orokohanga o te awa matua nei he ara wai hāhā i te pahūtanga mai o Ruapehu, koia i whero ai te awa nei a Mangawhero. Ā, kei tai iho o te waiheke nui a Raukawa ka whakahuatia ko Te Awaiti tōna ingoa me te ingoa o te karangatanga o reira. 

Mākōtuku 

He manga tēnei ka tuputupu mai te rākau kōtukutuku me te nui o ngā kōtuku i hōna wā. Otirā, ki te rehu mai tētehi kōtuku mā i tēnei o ngā awa, he tohu aituā. Koia hoki tētehi o 

ngā awa nui ka uru ki roto i te awa o Mangawhero. 

Mangateitei 

Nō ngā taumata teitei, ikeike o te maunga te mātāpuna o tēnei o ngā awa. Ka rere iho ki ngā papatairite, ā, ka hono atu ki te awa o Mangawhero ki te marae o Te Maungārongo. 

Mangaetūroa 

Ko te awa ka hono atu ki te whetūrere a Auahi-tūroa. 

Ngā Wai Momotu 

Tērā ngā wai e rere nei i te kāhui maunga ki te takapau hora nui a Tangaroa, engari ko hētehi o ngā wai nei he wai kua motuhia e ngā mahi tinihanga a te tangata. Nō tēnei āhuatanga, ka 

whakatūngia ngā pā kōhatu kia tahuritia te wai ki te mahi hiko, arā,  ko Te Kaupapa Hiko o Tongariro. 

E rua ngā wāhanga o Te Kaupapa Hiko o Tongariro: 

• te tahuritanga māuru – ko ngā hikuwai o Whanganui hēnei. 
• te tahuritanga marangai – ko ngā hikuwai o Whangaehu hēnei. 

Ko te tahuritanga māuru ka tahuritia ngā awa e waru o te hikuwai o Whanganui kia huihui atu ki roto i te roto o Ōtamangākau, rere atu ki roto o Rotoaira. Ka rere ngā wai i tētehi ana ki roto i te Teihana Hiko o Tokaanu, ā, rere atu ana ki te moana o Taupō. Nō hēnei kā tū āhuatanga ngā iwi o hēnei awa e roa ana te pakanga me Te Karauna i ngā kōti o te motu. 

Ko te tahuritanga marangai, ka tahuritia ngā wai māori e 26 o te hikuwai o Whangaehu kia huihui atu me ngā awa o Mangaio me Moawhango ki te roto ā-hiko o Moawhango. Ka tahuritia ngā wai i tētehi ana ki roto i te Teihana Hiko o Rangipō, rere ana ngā wai ki roto i te awa o Tongariro ki te moana o Taupō hoki. Koia hoki e pakanga ana ngā iwi o hēnei awa me Te Karauna mō te oranga o te wai rānei, mō te mahi hiko rānei te take.

He ngeri 

Papā te whatitiri 

Hikohiko te uira 

Ngarue te whenua 

Haruru e! 

Turaki auahi 

Puahiri whakarunga 

Ki whaitua! Ki whaitua! 

Rere hāhā, tahu ana te rangi e! 

Ka rū, ka rū! 

Tē turaki! 

He wera heke iho i te rae 

Rere tōtā, rere tōtā! 

E koro! 

He aha tāu e kī mai ai? 

He wai hāhā, he wai tōtā 

Kākā te whare 

Kia tū, kia oho, kia ora ai! 

Aha ita, ita mau tonu. 

Auē! 

He ngeri tēnei i whakahī ake i ngā tau i kaha tohe mai te iwi o Ngāti Rangi ki Te Kaunihera 

o Ruapehu, ko Te Wai-ā-moe te take. Ko te kaupapa o te ngeri he mea tohutohu atu ki ngā uri kia kauaka e mataku ki te tupuna nei a Ruapehu, engari kia mātau anō ngā uri he maunga mātāpuna mō ngā uri a Paerangi i ahu mai, i whanake mai i a Ruapehu maunga. 

Nō reira, ki te turaki mai me te hāhā, ki te pahū mai me te tōtā rānei ko te mea nui, me whakatū ngā marae kei ngā wāhi e tika ana. Ā, ka mātau te uri ki ngā wāhi tika mō te 

whakatū kāinga i runga i te hononga wairua o te tangata ki tōna maunga mātāpuna. 

Nō Te Kāhui Rū te Mana o Ruapehu 

Nō te mana o Rūaumoko hēnei āhuatanga o te maunga nei, ā, i tino rongonui hōna mahi i ngā pahū nui me ngā rerenga tōtā nui nei: 

• he pahūtanga i te tau 1895 
• he pahūtanga i te tau 1945 
• he rerenga tōtā i te tau 1953 – koia ko te Parekura o Tangiwai 
• he pahūtanga i te tau 1995–96 
• he rerenga tōtā i te tau 2007 
• he pahūtanga i te tau 2007. 

Hei tauira, atu i te pahūtanga tuatahi i te Hepetema 1995 ki te pahūtanga whakamutunga i te Ākuhata 1996, he 36 ngā pahūtanga – iti rānei, rahi rānei. 

Nō te noho roa a te iwi i te take o te maunga nei, kua whakatūria ngā kāinga ki ngā wāhi e tika ana kia kore e riro i ngā mahi a te koroheke maunga nei me hōna āhuatanga katoa. Nō reira, kāhore he kāinga nui kei te taha rāwhiti o te maunga nei, kei Te Onetapu atu i ngā wāhi noho mō te hopu, mō te kohi kai nā runga i te mōhio ka tere waipuketia Te Onetapu e ngā rerenga tōtā me te turaki auahi kia tau ai ngā pungarehu ki reira. Nā tēnei kā tū āhua ka hua mai te pao a ngā kuia: 

O rongo Ruapehu turaki auahi 

Puahiri whakarunga ki whaitua e. 

He pao tēnei e tohu atu ana ki ngā uri ki te pahū mai te tupuna, kauaka e mataku tā te mea ka rere te nuinga o hōna pungarehu ki te taha rāwhiti me te taha raki, arā, ki whaitua. Koia e noho ana te nuinga o ngā kāinga ki te uru tae atu ki te tonga o te maunga nei. 

Te Waiū-a-Te-Ika 

Mai i ngā kōrero a Māui Pōtiki i Hawaiki rā anō mō tana ika, ka tū a Ruapehu hei poutokomanawa mō te ika nei. Otirā, ka tū kāhui mai te kāhui maunga hei poutokomanawa. Koia e toko ake ana te ika nei kia kore e hoki ki te moana. I tū hoki a ia hei pou rama i te pō mō ngā waka i pae mai ki Aotearoa i ngā moutere, i runga i te mōhio ka tīaho ngā whetū me te marama i te huka, ā, ka pīata mai. Koia e kīia ana, ko Ruapehu te aunahi pīata o Te Ika-mana-nui. 

Tēnei hoki te kōrero mō te aunahi pīata o te ika hei tumu, hei pou rama mō ngā waka tūpuna me ngā waka tipua hoki pērā i ngā rangatira nui o te moana ko Te Whānau Piha, arā, ko ngā 

wēra hēnā. Nā tēnei ka rere mai te awa o Whangaehu ki te moana me tērā o hōna ingoa 

ko Te Waiū-a-Te-Ika. I te tūhonotanga o te wai tōtā, te wai māori, me te wai tai ka huihui mai ngā ngāore, ngā inanga hoki ki te wahapū. He wāhi papai tēnei hei tauranga whāngai punua mā ngā wēra, ngā upokohue, me ngā maki. Koia e hua ana he rite tēnei awa ki te waiū a te whaene, arā, he āhua pūehuehu te tae, kāhore i te kātea pērā i te wai māori. 

Nā tēnei āhuatanga ka haongia mai ngā punua wēra e ngā uwha mō te kai, ā, ka whai mai ngā mangō ki te whai i ngā punua wēra. Nō te ūnga mai o ngā wēra ka puta ngā waka tāngata ki te whakatū ārai mā ngā punua wēra e kai ana kia kore ngā mangō e kai i ngā punua nei. Nā tēnei āhuatanga ka puta mai te karangatanga hapū a Ngāti Tūmango.