Te Wharekura 47

WEB

Te Wharekura 47

Nā Iti Rangihinemutu Rāwiri ngā kōrero
Nā Te Whare Whakaahu o Tai te whakaahua o te uwhi, ā, nā rātou hoki ētahi o ngā whakaahua
Nā Te Whare Pukapuka o Tāmaki Makaurau, me Te Whare Pupuri Taonga o Waikato, me Te Kohikohinga a Roose me "Te Puea Herangi, From Darkness to Light" ētahi o ngā whakaahua hoki

This collection is focussed on the life of a kuia from Waikato and her participation and support of the Kīngitanga.

Te Wharekura 47

He mihi

He mihi atu tēnei ki a Iti Rangihinemutu Rawiri (Turner) mō ēnei kōrero aroha mō te wā e tipu ake a ia i roto o Tainui. Me mihi atu hoki ki ērā o tana whānau nā rātou nei tō rātou kuia i tautoko, i āwhina, kia puta ōna whakaaro ki te ao. He mea anō, ko te hiahia a te whānau kia tukuna he mihi ki te rōpū Foundation for Research, Science and Technology, nā rātou tētahi paku pūtea i oti ai ngā whakamāori o ngā kōrero a Iti i hōmai tuatahitia i roto i te reo Pākehā.

He whakamārama ake ki nga tauira: ko nga rerekētanga o te whakahuahua kupu a te wahine nei, he mea i tipu ake i roto i a ia, a, tae noa nei ki tōna kuiatanga. Nā reira, tirohia e koutou tōna reo me ōna rerekētanga hei whakaarotanga ake mā koutou.

Kua whakakorea tēnei rauemi tā. Ka kitea pea te rauemi nei ki te ruma rauemi o tō kura.

Ngā pūrākau kei roto i te puka nei:

He kuia nō Tainui
Te mahi ahuwhenua
Te Kīngitanga – ngā mahi i Ngaruawāhia
Ētahi mahi a Te Puea ki Manaia
Te Awamarahi marae
A Huakina
Te hīkoi ki Waitangi
Ngā kupu whakamārama

He kuia nō Tainui

Nā Iti Rangihinemutu Rawiri.

Hei tīmatanga

Ko te mea tuatahi anō, me wehi ki te Atua, me whakahōnore tō tātou Arikinui, Te Atairangikaahu, e noho nei ki runga i te Torona Tapu o ana tūpuna, tana matua, tatu mai ana ki a Whatumoana, ā rāua tamariki, ā rāua mokopuna, te Kāhui Ariki nui tonu, me Tainui whānui, me tātou katoa.

Ko taku ingoa ko Iti Rangihinemutu Turner, whoianō i tēnei wā, i moe au i taku tāne a Hōri Rāwiri.Ngakau tau, e ono tekau mā iwa. Taku rā whānau, tekau mā ono o Akuhata, te tau tahi mano, iwa rau, rua tekau mā rua. Ko taku iwi ko Waikato, ko Tainui.

Ko taku hapū ko Ngāti Maru. I whānaungia mai au ki runga te awa o Waikato, i Kahaha. Te mahi a taku matua, he tapahi harakeke, ko taku whaea ki te hao ika. E mamae ana taku whaea, e hao ika tonu ana.

Whoianō, nō te kahanga, ka tata tonu ki te whānau, ka hoki ki roto i te whare. Whoianō, te tata o ngā kāinga o te tuahine o taku matua neki, a Mona mā ki a ia, me taku tupuna a Paki, ka karangatia atu, ka haere mai, ka whānau ake au. Nā, ka tupu ake au ēnei ngā kōrero a taku matua me taku tupuna ki a au koia tēnei. Te mea nui ki tōku maharatanga, ko taku tupuna ko Paki. O ōku tūpuna, kāre au i mōhio ki ētahi atu. Ko tēnei te mea i tiaki i a mātou nei, i a mātou e ririki ana.

Te whare tuatahi

E mahara ana i te hokinga ake o taku matua rāua ko taku whaea ki Te Muriwai noho ai, te kaha o te hiahia o taku whaea kia hoki mātou ki runga tōna whenua. Tahuri taku matua ki te hanga whare ki reira. Te whare tuatahi, he whare tini noiho, kotahi anō te rūma. Whoianō, ka noho a Pura Turner, taku pāpā i a mātou e ririki ana, i tō mātou whare tini, me te toimaha o tō mātou whaea. Ka mahia tō mātou whare, oti katoa o waho, engari, ko roto kāre i oti ngā mahi o ngā rūma. He tēpu tā mātou, he pouaka ngā tūru. Kua kaha atu te toimaha o taku whaea i tēnei taima, kua mōhio pea tō mātou whaea ka mate ia.

Ka huihuingia mātou ki tana taha, kātahi ka kōrero ki a māua ko Napi. E iwa noiho ōku tau, ko Napi, tekau mā tahi. Ka tono ki a māua ko Napi, koia tērā ki te mate ia, ko hau hei whaea, ko Napi hei matua mō mātou. Nō tō māua whakaaetanga, ka tae ake te tono a Te Ata i tēnei wā, kia heke iho mātou ki tō rāua kāinga ko Tuhonia. Ka heke mātou.

Ka mate taku whaea

Ka noho mātou, ka haere taku matua ki te mahi keri awa, ka mutu, ka hoki mai. Ā, ka mate taku whaea. I mate i roto i tana moe. Haere rawa atu taku matua, ko mate. I takoto ia ki te wāhi e tū nei te marae o Te Awamarahi ināianei. Engari i tērā wā, kāre kau he marae. Ko te kāinga i reira, ko te kāinga tonu o Tuhonia rāua ko Te Ata. Kātahi ka mahia he tēneti i waho, tatatu ki reira takoto ai. Whoianō, ka mutu, ka hoki mātou ki tō mātou kāinga. Tō mātou matua anō kei te tiaki i a mātou, ā, ka tikina tō mātou tupuna a Paki kia hoki mai ki te tiaki i a mātou. Ka rarahi haere mātou, ka tīmata te āhua pāpāngia tō mātou tupuna a Paki ki te mate, ka hoki ia ki Te Paina. Nō konei, ka tīmata māua ko Napi ki te tiaki i a mātou.

Te mahi a tō mātou matua i runga tima

Ka haere tō mātou matua ki te mahi i runga i te tima, i a Te Rāwhiti.

Ngētehi taima, ka haere mai ki te tiki mai i a mātou, ka haria ki runga i a Te Rāwhiti, ā, ka rakaina mātou ki roto i tana rūma. Iti noiho nei te wāhi, te wini hei tirohanga mā mātou ki waho. Tana wehi, kei taka mātou ki te wai i a ia e mahi ana. Ko tana mahi i tērā wā, he kaitou mō te paera o Te Rāwhiti. Kei te hoki ngake, nā, ka tukua mātou i Tuakau, ka hoki mātou ki tō mātou tupuna, ka haere ia ki Te Paina. Tō mātou matua, tētehi mahi, he mahi iho he tī ki roto te kēna he kai mā mātou, ka whakareri iho ai mātou. Kāre ia e whakaae kia tahu ahi mātou.

Ō mātou nei kākahu, whoianō, nō ngā oruoru. I tērā wā kāre ngā tamariki e whakaaro ake he aha ō rātou e mau ana, whoianō he kākahu e maungia ana, koia tonu tērā.

Ngā mātou nei kori i tērā wā, he pikipiki rākau, he kōretireti i runga i ngā nikau. Pakaru atu ngā nono o ngā tarau o ngāku tungāne, koia tēnei ngā mahi. Mahia tō mātou tupuna he paoro mā mātou ki te harakeke, he winimīre mahia ki te raupo, he hōiho ki te korari, koinei ngā mātou kori i tērā wā.

Te mahi ahuwhenua

Nā Iti Rangihinemutu Rawiri

Nō tō mātou āhua nunuitanga ake, ka hoki mai a Te Puea ki Manaia noho ai. Te taima tēnei i kuhungia ai ngā whenua o reira ki te ahuwhenua. Ā, ka pangangia tō mātou nei whenua, tekau mā whitu eka ki te ahuwhenua.

Ka noho ko māua ko Napi ki te miraka kau. Ka mutu i ngā ahiahi, ka haere māua ko Napi ki te hari miraka ki Manaia mā Te Puea. E kōrerotia mai e ngā tamariki ko tērā wahine, te hē ana te tamariki, ka patua. Tino kino tō mātou nei wehi. Whoianō, ka haere atu ahau ki te rori, ka tatari ki a Napi, ka hoki mai māua me tā māua kēna, waihotia atu te miraka. Koia nei te tīmatatanga o tēnei mahi te miraka kau ki a mātou.

Taku haerenga ki te kura

Ka hoki mātou ki Te Paina noho ai i mua hoki atu te miraka kautanga nei. Māua ko Napi i tīmata i te kura i Te Paina. Kāre au e mōhio ana e whia ō mātou tau i reira, ka hoki mai mātou ki Te Muriwai. Nā, ka haere nei māua ki te kura i Te Kōhanga. I wāka mātou ki te kura i Te Kōhanga. Whoianō, kei ngētehi taima, tae rawa atu ki te kura, ko tekau mā tahi karaka kē. Nā, ka patua e te māhita. Mō te kōrero Māori, kāre mātou i whakaaengia kia kōrero Māori. Ka horoingia ō mātou waha i te hopi. Ko hau nei, he standard four tōku nei mutunga mai i te kura. Ka noho hau i tēnei taima ki te tiaki i ōku tēina. Ko kore rawa tō mātou tupuna e kaha ki te tiaki i a mātou.

Ka moe tāne au

Ā, ka hoki mai ai au, ka haere tahi māua ko taku tāne ki Te Muriwai nei. Ka rongo taku tupuna, ka whakahokia au ki Te Paina, kāre ia e pai kia whai au i a Hōri hei tāne māku. E kī ana ia he rangatira rawa. Nā, ka haere tahi nei māua ko taku hoa, ka kore nei e taku tupuna e pai. Ka nuku au ki Te Paina, e rua wiki pea, ka tae ake anō a Hōri ki reira mahi ai, i te mira tapahi harakeke. Nō reira, ka tohe tonu ai māua ki a māua. Whakahoki iho ki Te Muriwai, taenga mai ki Muriwai, kātahi au ka tonongia, ka whakaaengia, ka karakiangia māua. Koirā tonu tō māua nei mārena. Ka moe māua i a māua.

Te hari tūpāpaku ki Taupiri

Ā māua tamariki

Tekau mā toru ā māua nei tamariki, engari e rua i mate. Tētehi i whoatu ki te tamaiti a Hōri rāua ko te kōtiro a Whitiora mā rāua e tiaki. Te wā i a māua nei e tiaki ana i ā māua tamariki, he taima pakeke ērā. Kāre ahau anake ēnei mea katoa. Ētehi mea, ki ā mātou nei, e mahi ana i te pāmu miraka kau, me a mātou tamariki, ka whakawaha ki runga te tuarā, ā, ka rui manuia mātou ehake te mea ko hau anake, engari ngā wāhine katoa e noho nei ki runga ngā pāmu. Whoianō, i a māua e noho tahi ana, ka titiro māua ki ā māua tamariki, te maha o ā māua tamariki. Engari ka noho māua, koinei ā māua kōrero, "E rangatira ana māua i ā māua tamariki." Ahakoa tō māua kore whiwhi moni, nā ā māua tamariki, ko rangatira māua.

Whēnei i taku kōrero "Nā ā māua tamariki i aroha ki a māua, mai ano ki te taima e ririki ana ko kaumātua nāianei." Kotahi anō te kōrero a te matua ki a ratou me whēnei, na koutou me whērara, whērā tonu atu. Engari ka kōrero anō te matua ki a ratou, ka kōrero anō he aha anō te tikanga. Nō muri iho nei, ka kaumātua haere, haere katoa ki te kura, ahakoa tō māua kore noiho i whiwhi moni. Tino kaha tā māua mea kia eke ā māua tamariki ki te mātauranga. Te mea kaumātua i haere ki Tīpene, haere ki Ākarana kura ai ki te whare wānanga. Tētehi mea ināianeiki, nā mātou tamariki, ko tīmata ki te kimi o ratou whakapapa, ngā āhuatanga katoa o ngā tūpuna.

Ā māua tamariki

Te hari tūpāpaku ki Taupiri

Ka mahara au ki ngā taima e mate ana ngā tūpāpaku ki runga te wai o Waikato. Ko Tai, tāku e mahara ana, engari, e tino tamariki ana hau. Haria ake tērā kaumatua i Tikirahi te matenga, i runga te tima o Te Korotā he whare hoki i runga i taua tima nei. Haere ake mātou i Tikirahi, tae ake ki Tuakau, ka moe i te pō, ka oho ake i te ata, ka haere ake ki Horahora nei. Ka tau anō ka moea i te pō, ka haere ake ki Taupiri, nā, ka tanungia tō mātou tupuna, kātahi mātou ka hoki i runga tō mātou tima ki Tikirahi. E maha atu ngā mea i kite au e hari ana. I a mātou e hao ika ana, ka haere nā, e rongo ana au nei i ngā kaumātua e karanga ana. Tino nui ngā tāngata e noho ana i te taha matau. Koinei pea te kōrero e kīia nei 'he piko, he taniwha.' Ko nga nohonga o nga tūpuna rangatira i te taha matau o Waikato.

Te Kīngitanga - ngā mahi i Ngaruawāhia

Nā Iti Rangihinemutu Rawiri.

Tō māua nei tīmatatanga mai, ko tāku e kōrero ake nei, ko tīmata nō atu a Hōri, ka nuku atu tā māua ura haere ki te kīngitanga. Ka nuku atu te kaha o tō māua nei mōhio, koinei te mea hiahia ana māua ki te whai i te Kīngitanga. Nā reira, i a mātou nei e tamariki ana, e haere ana mātou ki Ngaruawāhia mahi ai mō te Koroneihana i a Koroki, i a Te Rata. E tamariki ana au i tērā wā. I tīmata mai au i a Koroki ngā Koroneihana i Ngaruawāhia.

Kāre au e mahara ana i te taima i Waahi. Engari, i ngērā wā, e mōhio ana au, i haere mātou ki reira purei netipōro ai. Ka tīmata māua ko Hōri ki te haere ki Ngaruawāhia, i ngā Koroneihana. Tāna nei mahi i te 'paera,' rāua ko Tūmōkai. Kia wātea a Tūmōkai, koirā tāna nei mahi. Ko ahau nei, tīmata au nei hei weita, he horoi utauta.

Engari, i te tuatahi rā, he purei netipōro. Nā Te Puea mātou i whakamutu, me hoki mai ki te mahi ngā mahi o te hui. Ka kaumātua haere ake māua neki, taku nei whakaponotanga me te hiahia te tangata kia mōhio mō te Kīngitanga, me haere ki ngā poukai, me haere ki ngā Koroneihana, ahakoa he aha te hui ki Ngaruawāhia nā te ariki, me haere.

Te take, kore koe taea te ako mō tēnei mea mo te Koroneihana, me te Kīngitanga me kōrero noiho. Whakapono tūturu ana au i tēnei kōrero, engari, ko koe anō e haere tonu ki reira. Māu anō hei titiro ngā āhuatanga, kāre kore ka urua mai te wairua raka, ki roto i a koe. Me whēnei tō titiro mō te Kīngitanga.

I mua i tō torotanga ki ngā mahi o roto te Kīngitanga, te kōrero mai o ētehi, ka noho mai koe ki te whakaaro, te mahi au tēnei mahi i te hē, ka hē ko te kaupapa. Te mahi au tēnei mahi i te tika, ka pai mō te kaupapa. Nō reira, ka noho koe ki te whakaaro i te tuatahi, e tika ana rānei, pēwhea rānei. Te kore koe e mōhio, me pātai. Pātai ki ngā mea whakaaro ana koe e mōhio ki te whakautu mai. Te take, ko te Kīngitanga ko Tainui te kaupapa nei, kei te tirohia mai e waho.

Ētahi mahi a Te Puea ki Manaia

Nā Iti Rangihinemutu Rawiri.

Ka hoki tonu au ki a Te Puea i te tīmatatanga i a mātou nei i Manaia. I haere mai ia i Waiuku ki Manaia. Ko te tikanga o tana haere mai, he mahi Te Kaupapa hei āwhina ngā whenua o reira. Te take, kāre he maniua me ngērā mea katoa. Nā, ka mahi a Te Puea ngō mātou whenua, koia tēnei te whakauru ki roto i Te Kaupapa a te Tari Māori. Nā, ka tae mai ia ki reira, kātahi ka hanga whare i reira, kotahi te whare moe mōna anake.

I mahia ki te raupō. Tahi te whare mahia hei kīhini, kotahi anō te whare mahia mō ngā tununga kai. Nā, he moenga mō Momo mā, mō ana tāngata mahi i ngērā wā. Nā ngā mahi anō a Te Puea i tērā wā, i te timatatanga mai o te pakanga, he whakami i a mātou ngā wāhine. I haria mai ngā tiringi hei mahi ngā mea whēnei te kupenga nei, ko ngā mea neki e mahia nei e mātou, hei whakahuna mō ngā hoia. Koirā ngā mea katoa. He natinati pōtae, natinati kāmeta, he natinati karapu. Nā, ka oti mō te haere mai a Te Ripeka Whero, ka tukuna ki tāwāhi. Koia tēnei na ka tuku. Ngētehi mea kohi, e rima tekau mā rima hereni i te whare whāmare, hei painga mō te āhuatanga mō te whawhai. Ngā mea mahi kāri o Pukekohe, he mahi rīwai, ka tukua ki te wāhi whawhaitanga. Koinei katoa ngā mahi a Te Puea i tērā wā.

Te Awamarahi marae

Nā Iti Rangihinemutu Rawiri.

Ka whakatū nei tō mātou marae. Ko te marae nei, te tikanga ka whakatūngia ki tō Tūmōkai whenua, i runga i ō rātou whenua i te pāmu, engari, tāna titiro, kāre e pai hei mahi marae, kātahi ka hoki mai. Nā Te Ata i hōmai te wāhi o tana whenua o Te Awamarahi nei hei tūnga marae. Whoianō, kātahi ka mahi nei a Te Puea he āhuatanga mā ngā wāhine hei whakapai te repo. Kāre au e mōhio e whia eka, engari, he rahi taua wāhi nei. Nā ngā wāhine i mahi ngā parakipere, hei whakapai taua whenua nei, koirā te utu o te marae nei. Pau katoa i a mātou ngā parakipere te mahi, keri rawa nei, ā, pararaungia nei, ka whakatōngia ki te karaehe. Ka haere a Te Puea ki te Tari Māori ka rēhitangia he mahi tēnei a te Pākehā.

He moni pea whakaritengia i tērā mahi, whakahokia hei utu mō te marae nei. Nā, ka tū nei ngā whare. Ko ngā kāmura, ko Te Nuke Katipa tana kāmura nui i a ia. Kāre a ia nei e mahi i tēnei mea i te hoahoa, engari, haere mai a Te Puea poungia atu ana he rākau, kōrero atu ia ki a Te Nuke he aha tana hiahia, kia pēwhea te mahi, ka mahia. Ka oti te whare o Te Awamarahi, he ponga o waho. Ko ngā mea haere ki te mahi ponga, haere ki ngā mutunga wiki, ka moe atu.

Kei ngā wiki ka hoki mai. Ko ngā mahi moni mō te marae i tērā wā, he purei kāri, he kanikani, ko ngā kāwhe o ngā pāmu ka hokona. Engari, mā Whareiti e hoko, ko te take, kāre taea e koe ki te hoko i roto i Te Kaupapa. Tukuna mā Whareiti hei hoko, ngā moni tēnei i tū ai te marae a Te Awamarahi.

Ko ngā whakatauākī o tō mātou nei marae a Te Awamarahi:

Ko Ngāti Amaru te iwi
Ko Te Awamarahi te marae
Ko Puhi Rāwaho te tangata.

Koinei tētehi marae kotahi anō te tangi mai o te reo o Te Puea ko reri atu ngā mea, ahakoa he aha te hiahia a Te Puea.

He mōhio ana au, kei roto katoa o tana waiata ngana whakaaro mō tērā o ngā marae o tō tātou Ariki, te take, koirā ngētehi iwi e tūturu i raro i te Kīngitanga.

Tāku e kōrero ake nei, ahakoa he aha te mea tonongia mai i Ngaruawāhia, kāre he kōrero, mahia tonutia atu, ahakoa he moni, oti tonu atu. Nā, i ngā Koroneihana, i mua, ka haere mai te taraka a Kimiora ki te tiki kai mai, i ngā marae, me ngā whare. Ēwhia nga kiinga kai i te taraka a Kimiora i haria ki Ngaruawāhia mō te Koroneihana i a Koroki e ora ana. He poaka, he kau, he kamokamo, ngēnā kai katoa. Ngā kai katoa e reri ana i ngērā wā. E rua, e toru noa atu, ngā haerenga mai o te taraka a Kimiora ki te kohi ngā kai i reira. Nā, whēnei o mātou nei tūpuna, kāre he kōrero. Tae kau ki te wā, ko tukua mai te taraka, ko mahia atu ēnei kai. Tae mai ki tēnei wā, koinei tonu te āhua o te marae nei, taka iho ki nga tātou nei tamariki.

Mō te poukai

Ka uru atu a māua nei ko Mere ki te hīkoi i haere nei a Tainui i runga i te tereina ki Poneke. Tō mātou haerenga ki Pōneke, whoianō mātou a Huakina, whakanohongia he kāreti mō te rōpū tiaki. Ko mātou nei i haere i runga i tēnā rōpū, moe haere i runga i te tereina, te roa nā, o tērā tereina. Kātahi mātou ka haere, ka hīkoi atu i te teihana ki te whare pāremata i te wāhi o te kōti. Ko ā mātou tamariki i hari tā mātou haki, e whitu tau pea te mea pakeke.

Ka hari tā mātou haki, i mua ratou i ā mātou hīkoi atu i te teihana, ā, ko mātou ko nga kuia i muri mai. Tae noa mātou ki te wāhi i reira, e noho mai ana te iwi, e tatari mai ki te pōwhiri mai i ā mātou i te whare kōti. Ka aroha ana tēnā whakaeke. Mangu tonu i a mātou e haere atu ana. Pōwhiri mai ana ngaua iwi rā, kātahi a mātou tamariki ka ngeri atu, me mātou e karanga ana. Whoianō, ko tēnei tētehi o ngā haere o Tainui. Ka mutu ngā āhuatanga i reira, ka mihi ngā mihi, ka mutu, ka kai mātou.

Kua tīmata tonu te haere ki te whare kōti i ngērā rangi, ka hoki mātou ki tō mātou hōtēra moe ai. Ka hoki mai ki te kōti, engari, koinei tētehi mea, ka haere mātou ki te kōti i ngā ata, ka karakia i roto i te whare kōti. Karakia ai mātou i tō mātou nei hōtēra i ngā ata tonu, i te whitu karaka, ka kai, ka haere mātou ki te whare kōti. Mua i te tīmatatanga o ngā take, ka karakia anō.

Te marae tōpū

Ko tētahi mea i whakatūria ko te marae tōpū. Te tīmatatanga o te whakatū o te marae tōpū, ko ngā kaumātua ngā mea haere ki ngā marae. Ka oti katoa i a rātou te kōrero mō tēnei taonga, ka hoki mai rātou ki Ngaruawāhia kia hui katoa ngā tāngata i reira, i te taima whakaritea ai. Ko te marae tōpū nei, ko ngā marae katoa ka tohungia he tangata e rua, o tēnā marae, o tēnā marae, o tēnā marae. Ko Hōri i eke ki runga i te komiti whakahaere, ko hau nei tētahi o ngā mema uru atu hei mena mō te marae o Te Awamarahi. He tino nui ngā mahi a te marae tōpū i ngera wā, ā, kei tēnei rangi, e haere tonu ana.

A Huakina

Nā Iti Rangihinemutu Rawiri.

I tētehi mea, i uru a Hōri ki roto i te tīmatatanga mai o Huakina. Ko Hōri Forbes, ko taku hoa, ko Bea Kerr, ko Bob Kerr ngā mea i runga i te komiti i te tīmatatanga o Huakina. Whakatūria ai a Huakina he moni i puta mai o te Mira Tira, whēnei te utu hea nei pea. Me kī, he rima mano, hei tīmata, hei āwhina ngā āhuatanga i tēnei wā, mō tō rātou whakatū i tā rātou mira ki konei. Tētehi, he whenua i hōmai hei pāmu. Koia tēnei ngā mahi nei, anā, ka puta nga raruraru, nā, ka hoki mai ngā moni ki Huakina.

Nā, ko ngā mahi a Huakina, he tirotiro ki ngā taha Māori mō te wai, oti ai, kia haere tahi ai ngā mahi Pākehā me ngā mahi Māori. Ko nui ngā mahi i oti i a Huakina. Ngā mahi tuku kia haria mai ngā kino me ngā rāpihi o Ākarana ki Kōpuku nei, kua tāpungia e Huakina. E maha ngā mahi ki te taha ki a tātou. Nā, ko te mahi tahi ki te Kaunihera o Franklin, puta nga āhuatanga ki a rātou, kua haere mai ki a Huakina kia nohotahi, kia kōrero, whakaputangia e rātou ki te taha o te tāone.

Whoianō ko ināianei, ko te mahi i te maina waro ko Glen Corp me CoalCorp i roto i ngā wai e tukua neki i te maina waro, kia heke ki Waikato, kia kore panga ngā paihana ka matemate ngā ika.

Te hīkoi ki Waitangi

Nā Iti Rangihinemutu Rawiri.

I haere tahi ai māua ki te hīkoi ki Waitangi, ka tīmata anō te māuiui o Hōri i tērā wā. Ka haere tonu i taua hīkoi rā. Tīmatangia mātou i Tūrangawaewae, i Māhinārangi. Ngā iwi katoa o te motu i haere ai i Waahi ka moe ngā tāngata. Ka kōrerongia, ka whakaae katoa. Ka hīkoi mātou, haere atu i konei i te ata. Ka kōrero Te Ariki ki a mātou. Aroha ana o ngana kōrero, me te mihi mai, me te tuku mai ki a mātou kia hīkoi i runga te rangimārie, te aroha. Haere atu mātou te hīkoi.

Engari, tino pai hoki te haere, kāre mahi kino, tahuri ngā pirihimana ki te whakataratara i ngā mātou tamariki i reira, engari, ko Hōri rāua ko Pumi ki te karanga atu. Koia tērā he rangimārie kaua e huri atu. Ka haere mātou ki Waiomio ki ngā iwi e pakanga nei ki Waitangi, ā, nō reira, ko kōrero a Pumi me Hōri mā ki ngaua tamariki nei. Ka whakaae rātou, ka haere ake rātou i runga i te rangimārie, me te aroha. E kore rātou e haere pakanga atu ki te marae. Koirā tētehi haere nui aroha. Ngā wāhi katoa i nohotia ai e mātou, he wāhi nui, he wāhi tapu, ka tū mātou i te whakarite, ka haere ai. Māku hei kī he maha ngā mea ko puāwai. Koia tēnei i tērā hīkoi, ko titiro mai te Pākehā ināianei ki ngā āhuatanga.

Ko māua ko Mere, ko Julie, ko Pare Hopa, ko Raiha, ko mātou i haere ki Ngā Tapuwae ki te nohotahi ki ngā Pākehā o te Karauna ki te whakawhiti whakaaro, a Tainui ki ngā Pākehā a te kāwanatanga. Kātahi mātou ka huri ki te kōrero mō te wai o Waikato. Mōhio mātou ngā Pākehā nei, kāre e mōhio ki te āhuatanga o te wai o Waikato. Ka mea atu ai au, me ka taea e mātou te taima ki te hari i a rātou kia kite atu te wai o Waikato, ā, ka whakaaea mai. I tētehi rangi, kātahi ka pātai mai ki a māua he aha ai mātou i kōrero tonu ai mo tēnei mea mō te whenua o Tainui.

Whoianō, ka noho i reira ka whakaaro au, me pēwhea te whakautu. Kātahi ka kī atu au, ko te whenua whēnei anō ki a mātou nei ngā whaea. Ko te whenua rā, ka whakatō koe ngā kai, koirā te mea whāngai i a koe, te wai e haere mai i konei koirā te wai inu. Ā, ka mate koe, hoki atu anō koe ki te whenua. Nāku tērā whakamāramatanga mō ā rātou kōrero. Kātahi ka huri atu au ki a rātou, kua tīmata ngā Pākehā nei ki te āhua pukutangi. Nā, ka tahuri māua ko Mere ki te kōrero i te āhuatanga Māori i a ratou patapatai. Kātahi au ka mea atu, ka pēwhea ngō koutou whakaaro mea ka haere atu mātou te Māori ka tango tō koutou whaea? Ko te tumu kōrero nei te mea i rere ngā roimata, ka kī mai, kāre hoki ia e pai kia tangohia tana whaea i a ia. Kī atu au, nā, whērā anō te whakaaro a te Māori mō te whenua.

Heading

Te hīkoi mā runga tereina ki Poneke

He whakamutunga

Whoianō, kua tae mai nei anō ki Hopuhopu, kia tirohia atu anō, kua whakahokia mai a Hopuhopu ki a Tainui. Waiho ake mā te wā hei titiro me pēwhea rā tēnei o ngā tātou taonga kua whakahokia mai nei. Engari, māku hei kī ki ā tātou tamariki o Tainui nei, kia kaha te titiro ki ēnei āhuatanga. E mōhio ana au, te mutunga ake, kua tūtaki anō ki te wāhi pai, me te rangimārie, te take kua hoki mai ki te kaupapa o te Kīngitanga. Ēnei taonga katoa e whāwhā nei a Tainui, pēwhea te pakeke, kia mau ki te kaupapa kotahi, ko te mutunga, kia puta ki te whai ao, ki te ao mārama.

Ngā Kupu Whakamārama

Ngā kupu whakamārama A – K
Ngā kupu whakamārama M – P
Ngā kupu whakamārama R – WH

A – K

E

ehake, ehara not
ē whia, e hia how many

H

haki banner
hoahoa plan (for house)

K

kaitou stoker
kāreti carriage (of train)
kāri garden, cards
kaupapa scheme
kaunihera council
ke, kia to
korari flower stem of flax

M – P

M

maina waro coal mine
Mira Tira Steel Mill
mutunga wiki weekend

N

natinati to knit, knitting
neki, nei here
nohitia see with own eyes, first-hand expenence

NG

ngake, ake forthwith
ngaku, ko aku my
ngō, ō your

O

oruoru second hand, hand me downs

P

paera boiler
paihana poison
pakeke, uaua difficult
pangangia, pangaia thrown, placed, put pāpāngia prone to
parakipere blackberry
pararaungia ploughed up

R – WH

R

raka that
rarahi haere growing bigger
Rīpeka Whero Red Cross
rōpū tiaki caretakers

T

tāpungia put a stop to, stopped
Tari Māori Maori Affairs
tatatu, whoatu place set aside
tatu arriving at, down to
tiringi string
toimaha, taumaha very sick
tōpū amalgamate
tumu kōrero historian, speaker

U

utauta implements, dishes
utu hea dividend

W

wahauru entrance, entry
wāka walk
winimīre windmill

WH

whakahuna camouflage
whakataratara to taunt
whakawhiti whakaaro to negotiate
whare kōti courthouse
whērārā, pērā that (yonder)
whoianō, hoianō however

About this resource

Kei roto i tēnei putanga he kōrero mō tētahi kuia i a ia e tipu ana i roto i te rohe o Waikato me tōna whai wāhi atu ki te Kīngitanga.

Taumata: Taumata 6, Taumata 7, Taumata 8
Kaupapa: Rārangi Pukapuka
Kohinga: Te Wharekura

Add to kete

Add to collection

Download resources

Materials that come with this resource: