Te toa mō te hōnore Pei Te Hurinui Jones

I tū tēnei whakataetae a ngā kura mō ngā manu kōrero i roto i te reo, mō te tau 1991, ki Tūrangawaewae. Ko Hinematioro Nohotima te kōtiro i toa ki te hōnore mo ngā māngai kaikōrero wāhine, me te hōnore mo te wāhanga mō te kaupapa hou. Ko ia anō hoki i whiwhi ki te hōnore mō te Pei Te Hurinui Jones, ā, e whai ake nei tana kōrero. 

Nau mai rā e hine wairoto 
E tama kura 
E tipu e rea, e hine kahurangi ariki 
E tama nā tiki waiora 
Hei tiritiri i ō koutou Papatipu 

E tama mā, e hine mā 
Kia rārangi i ō koutou kete tuauri 
Hei amonga mō koutou 
Ki te pūtake o ngā kōrero 

Whakamau tai 
Whakamau o rongo 
Whakamau taketake toitū  

Ko koe tēnei ko Tūhoe Pōtiki e. 

Ko Tūhoe te iwi, Ko Maungapōhatu te maunga, 
Ko Waikaremoana te moana, 
I tupu ake ko au. 
Ko Hinematioro Nohotima taku ingoa, ko Ngāti Porou, ko Ngāti Kahungunu e tū ana i te taha o taku whaea, ko Tūhoe hoki i te taha o taku pāpā. 

E ngākau nui ana taku manawa ki te tū ki konei. Ka hari hoki au ki te tae ora mai ki roto i tēnei whare ki roto hoki i te iwi o Tainui. Pakipaki ana taku manawa ki te tū i mua i a Te Atairangikāhu. Koinei tonu taku hiahia ki te tūtaki ki a ia. Ka hari hoki au ki te tūtaki ki a ia. Kātahi anō au ka kite i tōna kanohi. Kite ai au i tōna kanohi i runga i te pouaka whakaata. 

Tekau mā whitu aku tau. Haere ai au ki Te Kura o Tihipuke. Haere mai ana au ki konei, ko taku mahi he awhi, he ako hoki i tō tātou reo ātaahua kia whai i ngā āhuatanga o ā tātou tīpuna. 

Ko tēnei taku wāhi whakamutunga i te kura, ka haere au ki Te Kura Wānanga o Waikato ki te ako hoki i tō tātou reo ātaahua ki a tātou tamariki mokopuna hoki, kia tū ake tātou ki roto i tēnei ao hurihuri ātaahua, kia pēnei kia kaua hoki te Pākehā e takahi i a tātou, kia mau tonu tātou i tō tātou reo ātaahua. 

Nā, me haere tonu ki runga i taku kōrero, ko taku kaupapa, "He aha e kī ai ko ngā tāne kē ngā rangatira o tēnei ao?" 

Ko ahau tēnei te tamāhine o tōku matua a Tamati. Mōna rā hoki te kaupapa o taku whaikōrero Nā ōku whakaaro me taku hinengaro i tautoko te kaupapa i whakatakotoria mai mō ā mātau whakataetae a motu e tū ki te marae o Tūrangawaewae. He pai ki ahau te mahi o taku matua tāne. Haere hoki ia ki te ruku kina, ki te ruku kuku, ka whakahokia mai ki ahau kia ora ai taku tinana. Ki te kore te kai i hea au e tū ana? Haere anō taku matua pāpā ki te mahi, hei mahi moni hoki mō te pūtea, hei hoko i ēnei kākahu ātaahua e mau mai nei i runga i ahau. Mīharo katoa taku ngākau ki taku matua tāne. Haere hoki ia ki taku marae, ki te whāngai i te hunga, ā, ngā manuhiri hoki e eke mai nei ki taku marae. 

I a au e pakupaku ana, i tīni ai taku pāpā i taku kope. Ki te paruparu mai rā, ka tīni i taku kope. Nā, i konei ka rere taku pātai ki te minenga, ko wai ō koutou mātua tāne e horohoroi, ā, e whakamau i ō koutou kope? 

Ētahi mahi anō, kua haere au ki te tākaro mō te tīma hockey o Niu Tireni. Haere ai au ki te tākaro i te pōro ngāwari hoki, arā, ka whai mai anō taku matua tāne nei, whai mai ana te whatu manawa o taku ngākau. 

Āe, kua tae mai anō taku matua tāne i roto i tēnei whare, kei konei anō ia. Ki te kore ia, kīhai au e tū ana. 

Ko taku hiahia tonu kia mau i ahau taku reo rangatira. Nā taku matua tāne hoki i hōmai ki ahau, kia tū tangata, kia tū wahine i roto i tēnei ao hurihuri. 

Engari, kaua ngā wāhine e wareware. Ko au hoki e mōhio ana i whānau mai te tāne i konei, i puta mai i konei, i puta rawa atu, kua tū. Kia maumahara e tama mā, e hine mā, e te iwi. Mōhio ana ahau he tapu tēnei kōrero, engari me kōrero tika au. Ka ara mai te ure o te tāne i ahau, kātahi anō, ka tū rangatira ahau. Puta noa i ahau te pēpī, anā, kua rangatira ahau. Arā, ko taku tāne, ko ia taku rangatira. Ētahi mahi anō a taku pāpā, he manaaki i ngā mahi o tō mātau wharekura, he āwhina i ngā mātua o ngā tamariki kei roto i ngā tākaro pōro, me te tautoko hoki i a mātau, aku tēina, aku tuākana mo ngā haka, waiata a ringa, me ngā mahi Māori katoa, kia mau tonu ai te reo rangatira me ngā tikanga, ngā karakia, ngā kaupapa Māori hoki. 

Ngā mīharotanga i kite ahau e kore e wareware i au, kei taku matua tētahi ngākau aroha kāore e kitea i roto o te nuinga o te tangata Māori. 

Arā, koinei ōku whakaaro ki te tautoko i te kaupapa o taku kōrero, koinei ngā take ko ngā tāne kē ngā rangatira o tēnei ao. Arā, ko taku kōrero whakamutunga, ka tū te whenua, ka tū taku tū, ka tū taku kupu e whakatau nei. Tēnā koutou katoa. 

Reitū rāua ko Reipae

Nā Rahera Shortland
Nō Te Taitokerau tēnei kōrero

Tērā te rangatira nei, ko Ueoneone tōna ingoa, e noho takakau ana i waenga i tōna iwi o Ngāpuhi. Ka tae te wā, hei tomo māna i tētahi wahine kia puta ai ōna uri. Rapu, rapu kau ana ia, engari kore rawa nei i aro nui atu ki ngā wāhine o tōna iwi, me rātou hoki ki a ia. 

Nā, i tētahi hui, ka rongo ia tērā ngā tokorua nei, ko Reitū rāua ko Reipae, he teina he tuakana, e noho tahi ana ki o rāua whanaunga i te takiwā o Waikato. Ka tonoa e ia tana mōkai, he toroa, ka mea atu, "Haere koe ki roto o Waikato, tīkina a Reitū, a Reipae rānei, ka mau mai ki ahau." Ka rere atu te manu rā, me te mea ki a ia anō, "Me pēwhea rā e rite ai te hiahia o tōku kaitiaki e ahau?" 

Tae atu ana te manu nei ki Waikato. Nā, ko ngā kōtiro nei i waho tākaro tī rākau ana: 

He papa waiari 
Tāku nei mahi 
Tāku nei mahi 
He tuku roimata 
Hei auē 
Ka mate au 
E hine hoki mai rā.

Tau ana, ka kanikani haere te manu nei, me te hora i ōna parirau, hei mātakitaki mā ngā kōtiro rā. Kitea ana tōna tino ātaahua! Ka pararē atu te hunga nei, 'Titiro ki te manu ātaahua e kanikani mai rā. Haere mai, haere mai, titiro, nā!" 

Nōtemea he tipua hoki te mōkai nei, ka mahi ia kia kore ētahi atu e kite i a ia, hei a Reitū rāua ko Reipae anake. Ka kanikani whakamuri haere ia me te huna, ā, ka puta anō me te tūngoungou atu kia whai atu ngā kōtiro nei i a ia. He pēnei te whakawai a te manu i ngā tokorua nei. Ko rāua hoki kei te karanga, "Manu, manu, puta mai kia tākaro tahi ai tātou." Kei te huna kē te manu i raro i nga rahurahu. 

Ka roa te wā ka whai ake nga kōtiro i te manu nei e kanikani ana, e huna ana. Huri rawa ake ngā kōtiro, kua tīmata kē te kākarauri o te ahiahi, kua ngaro te huarahi ki te kāinga. Ka tangi rāua ki a rāua anō. "Auē! Auē taukuri e! Kua ngaro tāua, kua ngaro tāua." 

I taua wā, kua whakatata mai te manu ki mua tonu i a rāua anō. Ka kūpapa me te whakarite i a ia kia kake atu ai nga kōtiro ki tōna tuarā. Kei te kōhimuhimu ngā kōtiro nei, "He aha tēnei momo manu, e Pae?" 

"Haua hoki, engari he tipua tōna āhua. Tērā pea kāhore he hē o te kake ki tōna tuarā, nōtemea he tino rarata ia." 

"Ā tēnā, kake atu. Ko koe ki mua, ko ahau ki muri." 

Noho ana a Reitū rāua ko Reipae ki te tuarā o taua manu, ka maiangi ake ia, ka rere ki te taha raro, ahu atu ana ki Te Taitokerau. E whakatata atu ana te hunga nei ki Manaia, ka rongo te mōkai i a Reipae e whanawhana ana i ōna taha. He tohu kia whakatau iho ia. I a ia e whakatopa iho ana, ka mea mai a Reipae, "E hiahia mimi ana ahau. E kore e roa ka haere anō ai tātou." 

I te hekenga o Reipae, ka maiangi ake te manu rā, whakarērea atu ana a ia ki Manaia. Koia nei a Whangarei, te whangatanga o Reipae. 

I te maiangitanga ake o te mōkai nei, ka rere tika tonu ki Ngāti Manawa i roto o Ngāpuhi, me tana kōrero atu ki a Reitū, "Ka mauria nei koe e ahau hei hoa wahine mō tōku rangatira, te kaitiaki i ahau." 

Āwangawanga tonu te āhua o Reitū, engari i tō rāua taenga atu e tatari mai ana a Ueoneone rātou ko tōna whānau, ko tōna iwi hoki. Ka rere te karanga o te iwi kāinga: 

Haere mai e te wahine tapairu! 
Tēnā koe! 
Nau mai ki roto o Ngāpuhi! 
Haere mai, haere mai, haere mai! 

Kite ana a Reitū i a Ueoneone, ka ngaro katoa te āwangawanga. Tīmata ana te patupatu o tōna manawa, me te tau o ōna kanohi ki ngā kanohi o Ueoneone. Ko Ueoneone hoki tērā e whakaaro ana, "Ākuanei koe ka rongo i te pātuki o tōku manawa ki tōu." 

I taua wā tonu, ka mōhio te tokorua nei, kotahi anake te huarahi e tutuki ai ō rāua wawata. Ko tērā kia moe rawa rāua. I te moenga o te hunga nei, ka puta ā rāua uri. Ka hono hoki ngā kāwai o Ngāpuhi rāua ko Waikato. 

Ueoneone nāna i hari mai 
Te wahine whakakiia 
Nō roto Waikato 
Tū atu nei rā 
Ngāpuhi taniwha rau 
Ngā uri a Reitū e 
Ngā uri a Reitū e. 

Mahara

Nā Rāwinia White

I te wā e tamariki ana ahau, i noho au i raro i te whakaruruhau o ngā pae maunga o Hunua i Tamaki Makaurau ki te tonga. I tupu au i reira. Ko aku wāhi tākaro i taua wā ko te repo me te awa e tata ana ki te whare miraka kau. Ahakoa he nui aku tākaro i tēnei wāhi, kāore au i whai mana i reira. I ōku tungāne kē taua mana. Taetae mai nga tamatāne tokomaha o tērā takiwā ki te wero, ki te whiu kōhatu, ki te whawhai ki ōku tungāne. Ahakoa i whai atu au, ahakoa i noho au i tō rātou taha i a ratou e whawhai ana, he kōtiro noa iho ahau ki a rātou, kāhore hoki ratou e aro mai ki ahau. 

E maumahara ana hoki au ki tōku tuakana, e noho ana ki runga i tētahi rākau, e kōrero Latin ana ki a ia anō mō āna whakamātautau nui o te kura. Ka mōhio tonu au ehara hoki tērā i te huarahi e taea e au te whai atu. Tino mataku rawa au i ahau e whakaaro ana mō tōku haerenga ki te kura tuarua. Me pēhea taku whai atu i taku tuakana me tōna kaha ki te ako i ngā reo me ngā āhuatanga o te ao? 

He wāhi Pākehā taua takiwā, kāore he whakaaro Māori, korekore noa iho ngā tāngata Māori. Ā, ka hipa ngā tau ka tae mai tētahi whānau Māori ki taua takiwā. Ka whakahoahoa mai te whaea o tāua whānau, ko Vicky tōna ingoa, ki tōku whaea. "Ko koe anake e kōrero mai ana ki a au. Kāore ngā Pākehā o konei e whakahoahoa mai ki ahau," ko tā Vicky. Ka pouri tōku māmā, ka whakamā i te mahi a ngā tāngata o reira. 

"Āe, kāore rātou e rata mai ki ngā Māori. He kūare hoki ki ngā tikanga Māori." 

I mua o te taenga mai o Vicky ma, kāore nga kōtiro o taku whānau e haere ki te rapu tuna. Mā ngā tāne anake taua mahi i taua wā. Engari, nō te taenga mai o Vicky mā, ka haere ngā kōtiro katoa i tōna taha ki te rapu tuna. He tino kūare au ki tēnei mahi. Nā Vicky i whakaatu mai ki ahau te whakamau mōunu ki te matau o taku aho. Ka waihotia ko au anake i tētahi wāhi o te awa, ā, ka haere a Vicky mā ki tētahi atu wāhi. 

Ka noho ahau ki te tatari. Tērā pea ka mau i ahau tētahi tuna tino nui. Ka hipa te wā. Nā wai rā, ka kūmea e au taku aho ki uta. Tērā pea kua makere kē te mōunu nātemea horekau tētahi paku timotimo mai. Ka kūmea mai e au taku aho ka titiro ki te matau. Kei te mau tonu te mōunu, engari kāore anō kia timotimotia. Ā, ka meatia he mōunu anō i runga i te mōunu tuatahi. E toru ngā wā i mahi pērātia e ahau, me te noho, me te tatari. 

I te nui o ngā mōunu i whakamaua ki te matau, mā tētahi tuna nui rawa anake hei ngau. Heoi anō ka noho anō ahau, ka tatari. Nā wai rā, ka tōia ohoreretia te aho, ā, ka whawhai tētahi tuna. Ka tū ahau, ka tino mau ki te aho, kāore e roa ka kūmea mai te tuna mangu, te tuna nui rawa atu ki uta. 

Ahakoa taku koakoa, ka paku māharahara ahau. Kāore ngā tāngata o taua takiwā e kai tuna ana. Ahakoa ka rapu tuna ōku tungāne, kāore taku whānau e kai tuna ana. Ka maumahara ki tōku whaea e kōrero ana mō te wā e tamariki ana a ia, ka kai ngā kai Māori katoa. I ahatia taku whānau i noho kūare rawa ai ahau ki ngā kai Māori? 

Hoki rawa mai a Vicky mā, ka koakoa katoa ratou i te kite i te tuna kua mau i ahau. Ka kōrero rātou mō te nui me te pai ki te kai, ā, ka haria e rātou ki tō rātou kāinga. Ka whakawā he aha te taumahatanga o te tuna nei me a rātou kōrero mīharo i te pai o te tuna nāku i hopu. 

E rua rā i muri mai i haere au ki te kāinga o Vicky mā, ā, i te kai ratou i te toenga o te tuna rā. Ka pātai rātou ki ahau, "Kei te hiahia koe ki te kai i tēnei tuna e kōtiro?" Engari i te mea he mahi tauhou tēnei ki ahau, kāore au i kai. 

I roto i aku kimi me aku tirohanga i tēnei wā, ka hoki whakamuri ōku whakaaro mō te wā e noho ana a Vicky mā i tō mātou taha. Ka pāngia hoki au nāianei i te ongeonge, kāore au i rongo ki te tino reka o taua tuna rā, he paku hononga whakamuri ki te wā i noho ai ōku tūpuna i raro i ngā āhuatanga Māori, ā, kei te mamae tonu, kei te ongeonge tonu mai. 

Tute tuatara

Nā Kōhine Mackie

He ruri 

I haere au ki te kimi tuatara 
Kore rawa au i mataku e 
I haere au ki te kimi tuatara 
I roto i tōna ana e 
Toro atu taku ringa ki te hopu tuatara 
Ka ngaua mai e ia taku ringa e 
A. . . haha! 

 
I hoki au ki te kāinga e 
Nā te tino hōhā ōku 
Ki taua tuatara i mau rā ki tōku matimati e 
A. . .haha! 
E whā haora taku tatari e 
Kia tukuna mai taku matimati e 
A. . .haha! 

 
Mehemea ka whakaaro koe 
Ki te hopu tuatara e 
Waiho mō te pō 
Kia puta mai ia 
Ki waho o tōna ana e 
A. . .haha!! 

Ngā hākinakina

Nā Wiremu Kaa i whakamāori te kohi kōrero a Claudette Hauiti ki a Cindy Ngawati, he wahine toa mō Te Tīma Wāhine Whutupōro Whakapā o Aotearoa

"Ki te waimarie koe me rāti whakamua atu, ki te wātea mai hoki, me tō kite atu i te rārangi, oma hāngai atu. Kaua e titiro whakamuri." 

Koia nei tonu ngā kōrero kei roto i te hinengaro o Cindy, e tāngorongoro ana, i a ia e whakatika ana i tāna tū, i te papa tākaro i Te Tīma Wāhine Whutupōro Whakapā o Aotearoa. 

Ahakoa tekau mā waru ōna tau, ko Cindy te mea tamariki o rātou. Engari hoki ahakoa tōna tamariki, ka māia tonu tana whakapau i ōna kaha kia tū ko ia te tino toa mō te tākaro. 

I heke mai a Cindy i ngā kāwai tāngata o Ngāpuhi me Ngāti Whātua. I tīmata mai āna mahi tākaro i te tīma o te whānau. Te tekau mā tahi tonu ōna tau. Ko tōna matua te kaiwhakaako, ā, ko tana māmā te kaitiaki. Kei roto katoa āna tungāne me āna tuāhine i te tīma o te whānau. 

E uru atu ai ia i roto i te tīma o Aotearoa nā tana whakapau kaha, i runga noa atu i te kotahi rau paiheneti i roto i ngā tākaro o te wā kāinga me te rohe pōtae. Pērā anō mō te pupuri kia mau tonu ōna kaha ki ngā tākaro nei, e ono rā i te wiki a ia e whakapakari ana i tana tinana mō tēnei tākaro. 

Mahue mai ana e iti noa iho nei te wā e toe mai mō ngā mahi whakahoahoa, mahi kura, me te āwhina hoki i ngā mahi o te kāinga. Otirā, ngāwari noa iho ki tēnei kōtiro nō mua noa rā i Te Kuranui o Tāmaki Makaurau, te whakawhitiwhiti i ēnei mea katoa. Nā konei hoki a ia i uru atu ai ki te tīma o Aotearoa. 

"Ko ngā mahi whakapakari tinana i muri iho o te kura, ka mutu tēnā ko te tākaro rānei ko te whakatikatika rānei i ngā whakahaere o te tākaro. Ka hoki tika ki te kāinga ki te kai me te āwhina i ngā mahi o te whare (ka raru katoa ngā whakahaere ki te kore au e mahi i ētahi mahi), hei te hauruatanga o te waru ka tahuri ahau ki ngā mahi o te kura." 

Mō te wā o te mahi whakahoahoa, ko te rā kotahi e wātea ai ia, pau katoa ki te taha o te whānau. Ko ngā mahi, he mātakitaki te tākaro rīki, he tirotiro pikitia noa iho rānei. 

Ki tā te kōrero a Cindy, kei te tamariki tonu hoki a ia, ā, kāore ia i te āro atu ki ngā mahi whakahoahoa, nōtemea, nui atu āna mahi. I tērā tau i uru atu ia ki roto ki te tīma o ngā Māori o Aotearoa, me te tīma mō ngā mea i raro mai o te rua tekau mā tahi mō ngā tākaro poitarawhiti. 

I kaingākau ai ia ki te whai i ēnei mea nā te kaha o tana whānau ki te atawhai i a ia, me tō rātou mau ki ngā mahi karaitiana. I runga i te papatākaro, he kaha ia ki te whaiwhai i ngā wāhi ngāwari o te hoa tākaro. Mā te pēhi me te aruaru i te hoariri ka pōnānā ka hēmanawa rātou. Hei konei ka wātea mai te huarahi, ka taea te mau te pōro ki uta kia piro. 

"Kāore he kiko o te tatari mō te waimarie kia puta. Māhau tonu e waihanga. Māhau tonu e hanga te huarahi mōu, e whakawātea te haerenga atu mōu kia taea ai e koe te oma atu ki te rārangi. 

Kia maumahara tonu koe i ngā wā katoa, arā atu o hoa tākaro, he tīma kotahi koutou. Engari kāore he korōria mō ngā mea pōturi. Ki te kume whakamuri koe, pai kē mēna kāore koe i reira." 

Ko tana i kī ai he pērā anō i tana whakahaere i a ia i te ao nei. Ko tana wawata kia tū ia hei kaiako i roto i ngā kura pea, hei kaituhituhi rānei, ki ēnei mea e rua rānei. 

Kei te tino mārama a Cindy ki ngā tākaro o ngā tino tīma, hei te mutunga o ia tākaro ka puta te tohu o tō toa me tō pai ki te tākaro. 

Ahakoa ki ngā pakeke kē tēnei pātai mō te roa ōna e tākaro ana, hoki tika ana tana whakautu, kāore he whakaroaroa. 

"Mēna kei te kaha tonu au ki te omaoma, ka kaha tonu au ki te tākaro." 

A – K 

A 

aho   line (fishing) 
ākene   soon, not long 
akiaki   urge, encourage 
amuamu   mumble, mutter 
ana   cave, hole 
anga   eggshell 
anuhe   caterpillar 
aruaru   chase 

H  

hāmama   shout, open wide 
hauruatanga   half hour 
hēmanawa   exhausted 
horekau   none, nothing 

K  

kaingākau   value, cherish 
kākarauri   dusk 
kāwai   family tree 
kōhatuhatu   small stones 
kōpū   womb 
kūpapa   bend head, to stoop 

M – P  

M 

maiangi   spring up, bound 
matau   hook 
mangu   black 
mitamano   millimetres 
mōunu   bait 

N 

neherā   ancient times 

NG  

ngāngara   insect 
ngārara   lizard 

O 

ohoreretia  suddenly 
ongeonge   scarce, lonely 

P  

pae maunga   mountain range 
paiheneti   percentage 
paku hononga whakamuri   take back (in time) 
paopao   hatch (eggs) 
pararē   exclaim, shout 
pārekareka   pleased, thankful 
parirau   wings 
pātuki   strike 
patupatu   beating 
pēhi   pressure 
pihi   grow, a growth 
piripoho   newborn 
piro   a "try" in touch rugby, rugby, or rugby league 
poitarawhiti   netball 
pōnānā   rushed about, flustered 
pūkei oneone kōhatuhatu  a heap of sand and stones 

R – WH

R  

rahurahu   bracken 
raima   lime, concrete 
rāti   lunge forward 
rapirapihia   scratched 
rīki   league 

T  

tāpuke   a heap, a small mound 
takakau   free of all ties, unmarried 
tāngorongoro   bubbling 
tapairu   honoured woman 
tauhou   strange 
tāwēwē   squeal, cry, yelp 
tīhae   rip or crack 
timotimo   nibbling, pecking 
tīni   tin 
tōia   dragged 
tonga   Wart or skin blemish. Growth on nose of baby tuatara used to break eggshell when hatching. Growth disappears after two weeks.  
toroa   albatross 
tirohanga   view, sight 
tōua   egg yolk 
tūngoungou   nod 
tuwhera   to open 

U 

uta   inland, to shore 
uwha   female 

W  

wāia   memory, recollect 
waihanga   create 
wairangi   excited 
werawera   sweat 
wīhara   weasel 

WH 

whaikinotia   disturb 
whai mana   authority 
whai tikanga   important 
whai utu   seek revenge 
whakahaua   ordered, told 
whakahoahoa   socialise 
whakakiia   it's known or said 
whakamau   fasten 
whakapakari   strengthen, exercise, keep fit 
whakapau   use up, squander 
whakaroaroa   long, waste time 
whakaruruhau   shelter, protection 
whakatopa iho   soar downwards 
whakatūria   tell, explain 
whanawhana   kicking 
whangatanga   waiting place 
whutupōro whakapā   touch rugby