Te Wharekura 21
Te Wharekura 21
Nā Roka Paora rāua ko Cathie Penetito ngā kōrero. Nā Cathie Penetito ngā whakaahua. Nā School Publications Branch i whakaputa
This collection explains shares stories about a taniwha who lives in Whangaparāoa.
This resource is no longer in print. You may be able to find it in the resource room in your kura.
Te pūrākau kei roto i te puka nei:
- Te taniwha o Whangaparāoa
See the “About this resource” box below to download resources.
- Te taniwha o Whangaparāoa
Te taniwha o Whangaparāoa
Nā Roka Paora te wāhanga Māori.
Nā Cathie Penetito ngā whakaahua.
Tērā tētahi tamaiti i piki ki te tihi o Tihirau. Ka kite ia i tētahi waka e rere mai ana.
He nui ake i te waka o tōna pāpā, nui ake i te waka o te rangatira, nui ake i ngā waka katoa kua kite ia.
Ka haere ia ki te whakaatu ki tōna pāpā. He pōnānā nōna, ka oma ia ki te kāinga mā tētahi awaawa hōhonu, awaawa pōuri. I taua awaawa tētahi ana hohonu, ana pōuri, Ā, i roto i taua ana e noho ana tētahi Taniwha wehi, Taniwha whakamataku.
I te mataku o te tamaiti nei, ka auē ia. Ka ngōki haere mā mua o te ana o te Taniwha rā.
"Auē...ē! Ai..i!"
Haruru ana te whenua i te ohonga o te Taniwha. I te putanga mai, e rakuraku ana ia i tōna māhunga weriweri mā ōna ringa weriweri. Ka piupiu haere i tōna waero.
Kātahi ka hāparangi, "NĀ WAI AU I WHAKAOHO"
Ka hamumu te tamaiti, "Nāku koe i whakaoho. E hika, kaua au e kainga! Kei te whāwhai au ki te whakaatu ki taku iwi i kite au i tētahi waka tauhou. E hika, kaua au e kainga! Kore, kore, kore rawa au e hoki mai anō."
Ka mea mai te Taniwha, "Kāti, kāore koe e kainga i tēnei rā. Ēngari, ki te whakaoho anō koe i a au, māku koe e katikati hei hapa māku!"
Haruru ana te whenua i te hokinga o te Taniwha ki roto i tōna ana. wiriwiri ana te tamaiti i tōna omanga mā te awaawa hōhonu ki tōna kāinga.
"Auē..ē! Auē..ē! Ai..i, taukuri e!"
Ka tūtaki te tamaiti nei ki tōna pāpā i te taiapa.
"Pāpā, i kite au i tētahi mea tauhou! He waka, e Pā, he waka tauhou. He nui ake i tō waka, e Pā, nui ake i te waka o te rangatira, nui ake i ngā waka katoa kua kite au!"
Haere tonu atu rāua ki te rangatira. Haere tonu atu te rangatira ki ngā toa. Haere tonu atu ngā toa ki te waka tino nui. Rere tonu atu ki te waka tauhou.
Kātahi te mea whakamīharo! Arā te waka tauhou. Arā ngā tāngata tauhou. Arā ngā kākahu tauhou, Ahakoa te mataku, ka hoe tonu ki te waka tauhou; e whātero ana, e pūkana ana, me te hoe atu.
Ka kite a Kāpene Kuki e pūkana ana mai, ka mataku, ka karanga, "Man the cannon!"
"Light the fuse!"
Ka rere te matā, PAKŪ ana!
Ko wai i rongo i te pakū? Āe, ko te Taniwha. Haruru ana te whenua i tōna ohonga ake. Ka rakuraku i tōna mahunga weriweri mā ōna ringa weriweri. Ka piupiu haere i tōna waero.
"NĀ WAI AU I WHAKAOHO ANO?"
Ka tiro iho i te waha o tōna ana. Arā te mata i PAKŪ nei, te PAKŪ i whakaoho nei i a ia. Arā te waka tauhou nō reira te matā e whio mai nei.
"Auē! Ai..i! E kī rā!"
Ka rere iho te Taniwha, ka hopu ki te matā mā ōna ringa weriweri. Haruru ana te whenua i te hāparangitanga o te Taniwha. Ka porowhuia te matā ki te waka tauhou.
"KAUA ANŌ AU E WHAKAOHOTIA!"
Ka kite atu a Kāpene Kuki i te matā e rere mai ana ki tōna waka, ka karanga,
"Hoist the sail!
Row!
Turn about!
RUNAWAY!"
I taua pō, ka tuhia e Kāpene Kuki a Cape Runaway ki runga i tana mapi nui.
Ka tangi te mapu o te Taniwha i a ia e moe ana i roto i tona ana.
Pērā anō te tamaiti, tōna pāpā, te rangatira, ngā toa katoa, i a rātou e moe ana i roto i tō rātou whare i Whangaparāoa.
About this resource
This resource is no longer in print. You may be able to find it in the resource room in your kura.
Taumata: Taumata 6, Taumata 7, Taumata 8
Kaupapa: Rārangi Pukapuka
Kohinga: Te Wharekura
