Tāhei Tau Punarua
Tāhei Tau Punarua
He Kōwae Ako Pāngarau
He kōwae ako e aro ana ki te whakamahinga o te rauemi matihiko nei, te Tāhei Tau Punarua. Ko tā te kōwae ako nei, he tūhura i ngā tauhono punarua o tētahi tau kei waenganui i te 10 me te 30. Ka whakaaturia te hononga ki te marautanga, ngā whāinga ako, ngā rauemi ka whakamahia, te rārangi o ngā kupu matua, tae atu ki te raupapatanga o ngā mahi ako.
E hāngai ana tēnei kōwae ako ki te rauemi matihiko nei, te Tāhei Tau Punarua. Ko tā te Tāhei Tau Punarua he āwhina i ngā ākonga ki te tūhura i ngā tauhono punarua o tētahi tau i waenganui i te 10 me te 30.
Koia nei ētahi tauira o ngā tauhono punarua o te 17: 2 + 15, 15 + 2, 8 + 9, 9 + 8, 12 + 5, 5 + 12 ...
3. Ka whakaoti rapanga e whai wāhi mai ana te tauoti me te hautau māmā, ka whakamārama hoki i te rautaki: rautaki tatau; rautaki whakarōpū; rautaki tohatoha ōrite.
Taumata 1
Te Tau me te Taurangi (Te Mātauranga Tau me ngā Rautaki Tau)
Whāinga Paetae 3:
Ka whakaoti rapanga e whai wāhi mai ana te tauoti me te hautau māmā, ka whakamārama hoki i te rautaki:
- rautaki tatau;
- rautaki whakarōpū;
- rautaki tohatoha ōrite.
Kia mōhio te ākonga ki te:
- tautohu i ngā tauhono punarua o ngā tau mai i te 10 ki te 30
- whakamahi tauhono punarua ki te whakaoti rapanga tāpiri, rapanga tango hoki.
E tino hono ana tēnei kōwae ako ki te Mahere Tau o Aotearoa (tirohia te kaupapa o Te Poutama Tau i te pae tukutuku o nzmaths.co.nz).
E whakaatu ana te wāhanga rautaki o te mahere tau i ngā momo rautaki ka whakamahia e ngā ākonga ki te whakaoti paheko.
Ko te mahi o tēnei kōwae ako hei whakawhanake i ngā ākonga mai i te Kaupae 3 o te mahere ki te Kaupae 4.
Kaupae 3:
Mēnā he rapanga tāpiri, rapanga tango rānei, ka puritia ki te hinengaro ngā mea e tāpirihia ana, ngā mea e tangohia ana rānei, ka tatau ai. Ka āta kitea ngā mea e tatauria ana i te hinengaro, ā, ka tatau i ngā mea katoa mai i te kotahi.
Kaupae 4:
Mō te rapanga tāpiri me te rapanga tango, kāore e tatauria ngā mea katoa e tāpirihia ana, e tangohia ana rānei. Ka tīmata kē te tatau mai i tētahi o ngā tau e mōhiotia ana.
Ko te mātauranga tau tētahi anō wāhanga o te Mahere Tau, arā, ko te mātauranga me matua mōhio te ākonga e tutuki i a ia ngā momo rautaki. Kei roto i tēnei kōwae ako te mātauranga e pā ana ki te whakarōpū tau, ngā meka tāpiritanga matua, ngā rōpū tau o roto i 20 me ngā tau rearua tae atu ki te 30.
tāneke |
slider |
|---|---|
tauhono punarua |
(additive) number pair |
wāwāhi |
partition |
rauemi matihiko |
digital resource |
paheko tau |
number operation |
Torohia te pouaka "Mō te rauemi" ki raro nei e kitea ai ngā rauemi hāngai:
- Tāhei-tau-punarua (.pdf)
He rerekē pea te kounga o ngā whakaahua kei tēnei whārangi nā tō momo pūrere matihiko, heoi anō, ki te tiki ake i ngā whakaahua, ka tika te kounga.
Mō te rauemi
Wāhanga Ako: Pāngarau - Te Tau me te Taurangi
Kohinga Whāiti: He Kōwae Ako Pāngarau
Taumata: Taumata 1
