Rapanga Pāhekoheko

He ngohe ēnei hei whakahau i ngā ākonga ki te whakawhitiwhiti kōrero i roto i te rōpū iti, hei whakaoti rapanga pāngarau. Ka whai wāhi mai ko ngā pūkenga nei:

• te pānui;
• te āta whakarongo;
• te whakawhitiwhiti kōrero;
• te mahi tahi me te rōpū;
• te āta whakaaro arorau;
• te whiriwhiri rautaki hei whakaoti rapanga;
• te āta whakaaro ki te tika, te whaitakenga rānei o te otinga.

E hāngai ana ngā ngohe ki tēnā, ki tēnā o ngā whenu o te marautanga, waihoki ki tēnā taumata ki tēnā. He tauira noa iho ēnei rapanga. Māu, mā te kaiako e whakarite āu ake rapanga e hāngai ana ki āu ake ākonga. He māmā anō hoki te huri i ngā tau o roto i ngā rapanga kia uaua ake, kia ngāwari ake rānei mā te rōpū ākonga.

E tino aro ana ēnei ngohe ki te whāinga paetae mō ‘Te Reo Matatini o te Pāngarau’ o ia taumata o te marautanga pāngarau, arā:
Ka whakawhitiwhiti whakaaro, ka āta wānanga te ākonga i āna mahi pāngarau, mā te kupu (ā-waha, ā-tuhi), mā te tohu, me ngā momo whakaahuahanga e hāngai ana. He mea nui tēnei hei tautoko i te whakatutukitanga o ngā whāinga paetae e whai ake nei, e pakari anō ai te whakaaro arorau, te whakaaro arohaehae, te whakaaro whaitake me te auahatanga o te ākonga e hāngai ana ki tēnei taumata.