He Arawhata He Rārangi Tau
He Arawhata He Rārangi Tau
He Kōwae Ako Pāngarau
He kōwae ako e aro ana ki ngā rautaki tatau hei whakaoti tāpiritana māmā, tangohanga māmā hoki. Ka whakaaturia te hononga ki te marautanga, ngā whāinga ako, ngā rauemi ka whakamahia, te rārangi o ngā kupu matua, me te raupapatanga o ngā mahi ako.
I tēnei kōwae ako ka tūhurangia te rārangi tau haupae me te rārangi tau poutū hei whakatauira i te tatau whakamua me te tatau whakamuri, hei whakaoti hoki i ngā rapanga tāpiri me ngā rapanga tango.
3. Ka whakaoti rapanga e whai wāhi mai ana te tauoti me te hautau māmā, ka whakamārama hoki i te rautaki: rautaki tatau; rautaki whakarōpū; rautaki tohatoha ōrite.
Taumata 1
Te Tau me te Taurangi (Te Mātauranga Tau me ngā Rautaki Tau)
Whāinga Paetae 3:
Ka whakaoti rapanga e whai wāhi mai ana te tauoti me te hautau māmā, ka whakamārama hoki i te rautaki:
- rautaki tatau;
- rautaki whakarōpū;
- rautaki tohatoha ōrite.
Kia mōhio ngā ākonga ki te:
- whakatauira tāpiritanga ki te rārangi tau
- whakamārama i ana whiriwhiringa ki te whakaoti rapanga
- whakaoti tāpiritanga mā te tatau ake
- whakaoti tangohanga mā te tatau iho
Ngā Tikanga Pāngarau o tēnei Kōwae Ako.
He tino whaihua te rārangi tau hei whakatauira rapanga tāpiri, rapanga tango hoki. E toru ngā momo rapanga tāpiri ka āta tirohia i tēnei kōwae ako:
- Te whiriwhiri i te otinga:
I konei, e mōhiotia ana ngā tau tāpiri e rua, ā, e whiriwhirihia ana te otinga o te tāpiritanga. Hei tauira: 4 + 7 = □. Koia nei tētahi horopaki e hāngai ana ki te rārangi tau poutū:
E piki ana a Tīmoti i te ararewa. Ka tū te ararewa i te papa tuawhā, kātahi ka haere tonu kia 7 anō ngā papa. Ka puta ake a Tīmoti i konei. Kei tēhea papa ia? - Te whiriwhiri i te tau e tāpirihia ana:
I tēnei momo rapanga, e mōhiotia ana te tau tīmatanga, me te otinga, ā, e whiriwhirihia ana te tau tāpiri. Hei tauira: 4 + □ = 11. He horopaki hei whakatauira i tēnei momo rapanga ki te rārangi tau poutū:
E piki ana a Aroha i te arawhata, ka tau ia ki te kaupae tuawhā, ka tatari mō te wā poto. Tekau mā tahi katoa ngā kaupae o te arawhata, nō reira e hia atu anō hei piki māna? - Te whiriwhiri i te tau tīmatanga:
I konei, e mōhiotia ana te tau tāpiri me te otinga, engari kāore e mōhiotia ana tetau tīmatanga o te rapanga. Hei tauira: □ + 7 = 11. Hei whakatauira i tēnei momo:
E piki ana a Tīmoti rāua ko Manahi i te ararewa. Ka tū te ararewa i tētahi papa, ā, ka puta ake a Manahi. Kātahi ka haere tonu kia 7 anō ngā papa, ka tae ake ki te papa 11. Ki tēhea papa i puta ake a Manahi?
E tika ana kia whai wāhi ngā ākonga ki ēnei mahi:
- Te whakatauira i te rapanga ki te rārangi tau
- Te whakamārama i ngā whiriwhiringa
- Te tito rapanga pakitau e hāngai ana me te whiriwhiri otinga
- Te tuhi i te tāpiritanga e hāngai ana ki te rapanga ki ā rātou pukapuka
Te Mahere Tau o Te Poutama Tau
Kaupae 3
He tioka hei tuhituhi arawhata/rārangi tau ki te papa tākaro Whārangi Tārua 1
ararewa |
lift/elevator |
|---|---|
huapae |
horizontal |
poutū |
vertical |
rārangi tau |
number line |
tau tāpiri |
addend |
Torohia te pouaka "Mō te rauemi" ki raro nei e kitea ai ngā rauemi hāngai:
- He-Arawata-He-Rārangi-Tau (.pdf)
- He-Arawata-He-Rarangi-Tau-WT1 (.pdf)
He rerekē pea te kounga o ngā whakaahua kei tēnei whārangi nā tō momo pūrere matihiko, heoi anō, ki te tiki ake i ngā whakaahua, ka tika te kounga.
Mō te rauemi
Wāhanga Ako: Pāngarau - Te Tau me te Taurangi
Kohinga Whāiti: He Kōwae Ako Pāngarau
Taumata: Taumata 1
