Te Wharekura 78

PUKAPUKA

Te Wharekura 78

Nā Trevor Shailer rātou ko Paora Tibble, ko Te Whē Phillips, ko Sam Cruickshank, ko Tumatakuru O’Connell.

Nā Photo NewZealand rātou ko Photosport, ko New Zealand Sports Hall of Fame, ko Trevor Shailer, ko Te Whē Phillips, ko Getty images, ko Alexander Turnbull Library, ko New Zealand Olympic Committee ngā whakaahua.

Ko Pania Tahau-Hodges te etita.

Ko Chamblett Design Group Ltd te kaihoahoa.

Ko ngā kohinga kōrero o tēnei putanga o te raupapa Te Wharekura e pā ana ki Ngā Taumāhekeheke o te Herenga ki Ingarangi. E whakarāpopoto ana i ngā kōrero mō te mekemeke me te omanga roa.

Te Wharekura 78

Tonoa he kape o te pukapuka mai i Down the Back of the Chair (MOE10981) ka kitea rānei te rauemi nei ki te ruma rauemi o tō kura.

Ngā pūrākau kei roto i te puka nei:

Kotahi te Kapa, Kotahi te Wairua!
Omangia te Oma Roa
He Tāua Pounamu

Torohia te pouaka "Mō te rauemi" ki raro nei e kite ai ngā rauemi hāngai.

He kupu whakataki

He huinga pukapuka a Te Wharekura i whakatakotoria hei rauemi reo Māori e pā ana ki te ao Māori i roto i te horopaki mō ngā rā o mua, o tēnei wā tonu, me ngā rā e heke mai nei. Ka noho mai he kōrero paki, he kōrero pono anō hoki hei tūāpapa, ā, ko te tikanga, mai i reira ka toro haere ngā ākonga i ngā mahi takitahi, i ngā mahi ā-rōpū, i ngā mahi ā-akomanga rānei i te roanga atu o ngā kōrero.

Kua hora mai a Te Wharekura 78 hei whāwhātanga mā te hunga ako e ako ana i te reo Māori me ōna tikanga.

Te kaupapa matua o Te Wharekura

Ko ngā taumahekeheke o te herenga ki Ingarangi 2006 te kaupapa matua o tēnei pukapuka.

E toru ngā kaupapa whāiti hei rangahautanga mā ngā ākonga.

Te hononga ki ngā marautanga katoa

Ko te tūmanako ka whakauru katoa ngā ākonga i ā rātou mahi ki tā rātou pūataata rorohiko, ko ngā ngohe nei e akiaki ana i te ākonga me te pouako ki te rāwekeweke i ngā taonga hangarau, arā, ko te rorohiko, te pūataata rorohiko, te pūataata ā-reo, ā-pūrere ataata, me ngā momo ataata katoa.

Ka whai wāhi te pouako ki te tango whakaahua, pūrere ataata, rīpene ataata, ataata ā-reo hoki. Ka noho ēnei ataata hei taunakitanga i ngā mahi kua mahia nei e te ākonga, hei taonga aromatawai mā te pouako, mā te whānau hoki.

Kotahi te kapa, kotahi te wairua!

Ngā pūkenga:

Ko te whakaara ake, ko te whakawhitiwhiti mōhio mai i te puna mātauranga whānui.
Ko te whakaputa mōhio e hāngai ana ki te horopaki me te hunga whakarongo.
Ko te whakaputa whakaaro kia āta mārama ai te hunga whakarongo.
Ko te kōrero paki, ko te kōrero whakaahua rānei hei kawe mōhio.

Ngā kawenga:

Ka āta titiro ki ngā mahi a te kaipāho.
Arohaehae i tōna reo.
Ka whiriwhirihia e ngā ākonga tētehi kaupapa hei pāho ake ki tana akomanga (te whakataetae hākinakina, te waka ama, te poi rewa, te aha rānei).

Te aromatawai

Mā te uruparenga (reaction) o te hunga whakarongo ka kitea e te ākonga tana tohungatanga.

Hei mahi mō Tikanga ā-iwi

Pānuihia 'Kotahi te kapa, kotahi te wairua!'
Rangahaua te pōwhiri - He aha te take o te pōwhiri?
Whai whakaaro anō mo te waihangatanga tikanga mo tētehi tauwhāinga o tōu kura, tōu whānau, tōu hapū, tōu hāpori.

Omangia te oma roa

Ngā pūkenga:

Ko te āhukahuka me te whakahiato i ngā tino mōhio o ngā kōrero.
Ko te whai kiko o te pāhekoheko ki ētahi atu tangata.
Ko te mārama atu ki te hononga o te reo ā-waha ki te reo ā-tinana.
Ko te tāutu i ngā waiaro me ngā uara o te kaikōrero.

Ngā kawenga

He mahi ā-rōpū, kia toru, kia whā rānei o ia rōpū.
Ko te huanga o tēnei mahi he whakaaturanga.
Mā te rōpū hei rangahau tētehi o ngā kaupapa whāiti ki te whakawhānui ake i ngā mōhiotanga o ia kaupapa.
Ngā paearu o te rangahautanga:
- Whakatakoto mahere.
- Kia rua ngā hui (me mōhio ngā rōpū ki te tūkanga me ngā tūranga o te hui): kotahi mō te whakarite: (arā, mā wai te aha? He aha ngā kaupapa whāiti anō hei rangahau? He aha te momo whakaaturanga?); tuarua, mō te whakahiato, te whakaemi i ngā mahi rangahau hei whakaaturanga.
- Whakaratoa ngā taunakitanga mō ngā hui (arā, ko ngā miniti) me te mahi rangahau.

Te kaupapa whāiti: Omangia te oma roa
Te roanga: e rua ngā wiki

Ngā mahi:

e rua ngā hui
te rangahau – (whakarārangitia ētehi pātai hei rangahautanga)
te whakahoahoa
te whakaatu.

Ngā kaimahi:

he kaituhi (māna ngā miniti e tuhi)
he kairangahau
he kaiwhakahoahoa
he kaiwhakatika reo
he kaiwhātui

Ngā pukapuka:

Gilmore, G. Arthur Lydiard: Master coach. Auckland: Exile Publishing, 2004.
Romanos, J. Arthur’s boys. Auckland: Moa Beckett, 1994.

Ētehi atu mahi:

Arohaehae i ētehi atu pukapuka kōrero tangata (biography) e pā ana ki tētehi tangata Māori.

Te aromatawai

Mā te rōpū hei whakaatu atu ki te hunga ako āna kitenga i ngā mahi rangahau, arā:

kua whakahiato i ngā whakaaro
kua whakahāngai i tāna whakarongo ki te āhua o te kaupapa me te kōrero
kua mārama te pānga i waenganui i te kōrero ā-tinana me te kōrero ā-waha
kua whakataurite i ngā waiaro me ngā uara o ngā kaikōrero.

Hei mahi anō mō Hauora

Whakaritea he hōtaka hākinakina hei whakapakari i te tinana mō te wāhanga.
Tirohia, whakainea hoki te whakapakaritanga o ngā tinana a te akomanga.

He tāua pounamu

Ngā pūkenga:

Ko te tāutu i ngā tikanga tuhituhi hei whakaniko i te momo tuhinga.

Ngā kawenga

Ka pānuitia e ngā ākonga 'He Tāua Pounamu', ka kōrerotia ngā momo rerenga kōrero me ngā kupu e rangona ai te wairua o te tuhinga nei. Kātahi, ka tuhi ngā ākonga i ā rātou ake pūrakau, pakiwaitara, kōrero tuku iho rānei.

Te aromatawai

Ka whakatauria tana tohungatanga ki te tuhi, kia rangona ai te kaipānui i ngā kare ā-roto i puta mai i te tuhinga.

Hei mahi anō mō Ngā Toi

Kia mahi tētehi o ngā tuhinga hei whakaari.

Ētehi atu mahi

Ngā pūkenga:

Ko te whakataki, ko te whakawhanake, ko te whakaoti i ngā tuhinga, ahakoa te tūmomo tuhinga.
Ko te whakatakoto kupu kia mārama, kia raupapa anō ōna whakaaro.
Ko te tautoko i ngā whakaaro ki ngā taunakitanga.
Ko te whakahāngai i te kōrero ki te pūtake o te tuhituhi, otirā me manako mai anō te kaipānui.
Ko te āta tirotiro me te āta tātari i āna ake tuhinga hei whakatika, hei whakapai ake te whakatakoto kōrero.

Ngā kawenga

He mahi a rōpū (ā-akomanga). Kia rua ngā wiki kia whakaputaina e te akomanga tētehi mōkihi (moheni) mo te wāhanga o te tau. Ko ngā momo tuhinga mo te mōkihi:

he tito rotarota, waiata rānei
he uiuinga i tētehi o ngā whānau (mātua)
he tangata rongonui
he tohutohu ki te tunu kai
he tohutohu ki te hanga taonga
he pānui e pā ana ki ngā mahi a te hapori e heke mai nei
he pakiwaitara poto
ētehi atu tuhinga.

Mā ia ākonga hei kōwhiri te momo tuhinga māna, ko tētehi hei whakahoahoa i te katoa o te mōkihi, ko tētehi hei ētita, mā te katoa hei waihanga i tētehi ingoa mo te mōkihi.

Te aromatawai

Mā te whānau te mōkihi nei, nā reira ko rātou anō ngā kaiaromatawai.

Hei mahi anō mō Hangarau

Whakaputa mōkihi hei tautoko i ngā mahi o te marau Te Reo Māori i roto i te Marautanga o Aotearoa.

Mō te rauemi

Tonoa he kape o te pukapuka mai i Down the Back of the Chair  (MOE10981), ka kitea rānei te rauemi nei ki te ruma rauemi o tō kura.

Taumata: Taumata 6, Taumata 7, Taumata 8
Kaupapa: Rārangi Pukapuka
Kohinga: Te Wharekura

Tāpirihia ki te kete

Tāpirihia ki te kohinga

Tikiake i te rauemi

Ngā rawa kei tēnei rauemi: