Te Wharekura 7

Pakō

Nā Kāterina Mataira

Tahi, rua, toru, whā, 
He miro, he tawa, he karaka; 
Rima, ono, whitu, waru, 
He kererū, he kererū; 
Iwa, tekau, 
He tangata. 
Kei hea ngā rākau? 
Kei kō i te ngahere. 

He tangata i roto i te ngahere. 
Kei hea ngā kererū? 
Kei kō i ngā rākau. 
Kei hea te tangata? 
Kei waenganui tātarāmoa. 
Ka kai ngā kererū. 
Āe, te reka. 
Ka kī ngā puku, 
Ka moe. 
Ka tū te tangata. 
Auē. Auē. 
He pū. He pū. He pū. 
PAO! PAO! PAO! PAO! 
Auē. Auē. 
Kei hea ngā kererū? 
Kei runga i te miro? 
Kāo. 
Kei runga i te tawa? 
Kāo. 
Kei runga i te karaka? 
Kāo. 
Kāti. . . 
Kei hea? Kei hea? Kei hea?

Te kaititiro o te pō

Nā Kāterina Mataira

Te pō, te pō, te pō, 
Te pō nui, te pō roa, te pō mārie. 
Kei te moe te whenua. 

Engari ko au ... 
Ko tēnei te wā oho, 

Ko tētahi ruru. 
Ko tēnei te wā titiro, 
Ko tēnei te wā haere. 
Ka tiro au ... 
Arā he kiore e oma ana, 
Arā he tuna e kauhoe ana, 
Arā he poaka puihi e raku ana. 
Ha? 
He aha kē tēnei? 
He taitama. 
Rū-ū-ū-ū. 
Rū-ū-ū-ū. 
Tēnā koe e tama. 
Rū-ū-ū-ū. 
Rū-ū-ū-ū. 
Kei te aha koe? 
Rū-ū-ū-ū. 
Rū-ū-ū-ū. 
He aha tō mahi i te pō? 

Hika ... 
Ka oma kē ia. 
Tūtū ana te puehu. 
Mō te aha rā? 
Rū-ū-ū-ū. 
E mataku ana ki a au? 
Rū-ū-ū-ū. 
Rū-ū-ū-ū. 
Rū-ū-ū-ū. 

Raruraru

Nā Kāterina Mataira

He hōiho tōku, 
He hōiho. 
He tino hōiho. 
Ko ōna tau? 
Ka wareware au. 
Engari... 
He tino koroua ia.

He kurī tāku, 
He tino kurī. 
He kurī ngau, 
He kurī kama. 
Engari... 
He kāpō ia. 

He poaka tāku, 
He poaka. 
He tino poaka. 
He puku kai, 
He puku nui. 
Engari... 
He tipi haere. 

Me au... 
Kua whati te wae. 
Mehemea, 
Ka puta ki waho, 
Te poaka nei. 
Me pēhea? 
Me pēhea? 

Inā... 
Kua whati te wae, 
Kāpō te kuri, 
Koroua rawa te hōiho.

Kāinga

Nā Kāterina Mataira

He whare tō mātou, 
I ērā rā, 
He whare tino paku. 
I te taha, he puna, 
I muri, he ngahere, 
Kō atu, ko te moana. 

Kāhore he peita, 
O tēnei whare. 
He whare kanukanu. 
Kotahi rūma, 
Kotahi tatau, 
Kotahi anō te wini. 

Ka pai te noho 
I tēnei whare, 
He tino pai te noho. 
Ka unu mātou i te puna, 
Ka hianga i te ngahere, 
Ka kohi kai, ka hī ika, 
Ka kauhoe i te moana. 

He whare tō mātou 
Ināianei; 
He whare tino nui, 
I te taha he whare, 
I muri, he whare, 

He whare. 
Kō atu, he whare anō. 

He peita kei runga, 
I tēnei whare. 
He whare tino hou. 
He nui ngā rūma, 
He nui ngā tatau, 
He nui anō ngā wini. 
He pai te noho, 
I tēnei whare, 
He tino pai te noho. 
Ka pai te haere pikitia, 
Ka pai te haere toa, 
Ka hoko kai, ka hoko ika, 
Ka hoko i ngā mea katoa. 

Engari... 
Kia pau ngā moni, 
He kino te noho, 
He tino kino te noho.
He whare kei mua, 
He whare kei muri, 
He whare kei ngā taha. 

Mā reira 
Ka hoki ngā whakaaro, 
Ka hoki ki ērā rā. 
Ki te puna wai, 
Ki te ngahere, 
Ki te moana hoki. 

Ka hoki anō 
Ngā whakaaro, 
Ka hoki ki ērā rā. 
Ki te whare tino pakupaku, 
Te whare mahana. 

Te taniwha

Nā Kāterina Mataira

Ka kī ngā koroua, 
Ka kī ngā kuia, 
"Kaua e haere ki reira; 
He taniwha, he taniwha, 
Kaua e haere ki reira." 

He tuna taua taniwha, 
He mea tino nui: 
E takoto ana, 
E tatari ana, 
I te taha o te awa. 
Ka kata a Hemi Parata, 
Ka kata ia, ka kī. 
"Mehemea he tuna ia, 
Māku e hopu, 
Māku e patu, 
Māku e kai tō taniwha." 

Ka kī ngā koroua, 
Ka kī ngā kuia, 
"Kaua e haere ki reira, 
Ka hopukia, ka patua, 
Ka kainga, ko koe. 
Kaua e haere ki reira." 

Ka kata anō a Hemi, 
Ka haere ki te whare, 
Ka tiki atu i tana hūka, 
Te hūka hopu tuna. 
Ka whakakoia taua hūka, 
Ka herea ki te rākau, 
He hūka nui, he hūka koi, 
He hūka patu tuna. 

Pō ana, haere ana; 
Te kete i te tuarā, 
Te hūka i te ringa, 

Kāhore i kite atu, 
Kāhore i mōhio, 
Kei muri e whai atu ana, 
Ko tana tino tama, 
Ko tana tino tamaiti, 
Ko Hone, 
E whai atu ana. 

Pōuri pōuri, pōuri, 
Kāhore he marama. 
Pōuri, pōuri, pōuri, 
Kāhore he hau. 
He pō tino pai, 
Mō te hopu tuna. 

Tata atu, tata atu, 
Kua tae ki te awa. 
Tata atu, tata atu, 
Kua tae ki ngā repo. 
Tata atu, tata atu, 
Kua tae ki te wai. 
Kei konei, kei konei, 
Te tuna. 

Ko te taniwha. 
Tīhaea te māti, 
Tahuna te rama, 
Hāpainga ki runga. 
Kia mau ki te rama, 
Kia mau ki te hūka, 
Kia tūpato te haere. 
"Kei whea koe, 
Tuna nui? 
Tēnā, puta mai. 
Kei whea koe, 
Taniwha? 
Tēnā haere mai." 

Ka wiriwiri mai 
Ngā repo 
Ka wiriwiri mai 
Te wai. 
Anā te waero, 
Anā te tuarā, 
Anā he tuna nui. 

Pīhukatia. 
Paoatia. 
Anā tō kai. 
Pīhukatia. 
Paoatia. 
Kia mau! Kia mau! 
Kia mau! 

Ka kata a Hemi, 
Ka kata, ka kī, 
"Kua mau koe, tuna nui." 
Ka makaia atu 
Ki waho o te wai, 
Ki waenganui taru, 
Ki tahaki. 

Pōuri, pōuri, pōuri, 
Kāhore he marama. 
Pōuri, pōuri, pōuri, 
Kāhore he hau. 
He pō tino pai, 
Mō te patu tuna. 

Engari . . . 
Kei hea te tuna . . . 
I pīhukatia nei, 
I paoatia nei, 
I makaia nei ki tahaki? 
Kāhore i konei. 

Ehara i te tuna, 
E takoto nei, 
Kei waenganui taru, 
Kei tahaki. 
Ehara i te tuna, 
E takoto nei, 
E takoto nei, 
Kua mate. 
Engari . .. 
He tamaiti paku . . . 

Ko te tino tama, 
Ko te tino tamaiti, 
Ko Hone. 

Ka kī ngā koroua, 
Ka kī ngā kuia, 
"Kaua e haere ki reira, 
He taniwha, he taniwha, 
Kaua e haere ki reira."