Te Wharekura 56

Mamaekino

Nā Wiremu Kaa

"He aha kē koe i mahi pēnā ai? Moumou tā māua tukunga i a koe ki te kura. Auē te mamae e! Me aha tātou ināianei?" Kei te riri mai taku matua. Ko taku whaea, kei te tangi hotuhotu. Kei te maringi ngā roimata, kei te patupatu hoki tana manawa. 

Anei taku hara. I heipū atu ahau ki tētahi kāhui tamatāne e haere ana i runga i tētahi motokā tino pakaru nei te āhua. Nā rātou hoki ahau i pōhiri kia kuhu atu ki ō rātou taha. Nō taku pikinga ki roto, kātahi ka rere tere atu te waka rā i runga i te huarahi. Pau katoa te haere kotiti, mai i tētahi taha ki tētahi taha. Nō tō mātou taenga ki te toa ka tū. Rere ana te puehu me te umere haere o te rōpū nei. Kātahi rātou ka tomo atu ki te toa.  

I mahue mai ahau kia tū ki te tapa o te toa. Nā te pakūtanga mai o roto ka pā mai te mataku ki ahau. Tere tonu taku takoto ki raro i runga i taku whakaaro kei taotū ahau. Ko te rōpū nā rātou nei ahau i kahaki, i peke atu ki te waka me te wehe tere atu i te toa. Auahi ana te rere o tō rātou waka. I mahue mai ahau e takoto ana i runga i te oneone. 

Nā ngā pirihimana tonu ahau i uiui, i patapatai mō te wāhi o te mahi nei ki ahau, ā, nāku tonu te kōrero atu mō tāku i mōhio ai. Arā kē ērā o te rōpu nā rātou ahau i kahaki mai ki konā. Arā kē tōku mōhio ki a rātou, i mōhio rā, engari ehara i te mea he hoa tino tata.  

Nā runga o tā rātou whakapono ki ahau, i kawea ahau e ngā pirihimana ki te kāinga ki te kōrero ki aku matua. Taumaha ana taku ngākau. I pā mai hoki te mamaekino ki taku whaea me te whakamā nui ki taku whānau. Ko taku matua kei te kohukohu mai i ahau mō taku uru heahea noa atu ki roto ki tēnei mahi kino. Ko te wahine o te toa i tū i te matā kei te whakahemohemo. Kei te mataku kē ahau tērā a ia e hemo tonu atu, ā, he mate nui mō ērā ki te pērā. 

Nā te nui o taku pōuri kāore ahau i kai. Nō te mutunga o te riri a taku matua ka haere ahau ki taku rūma ki te moe.  

Otirā kāore i moe. He tino taumaha nō aku mahara i te pēhi i taku hinengaro. Kātahi ka puta mai te whakaaro tērā pea me whakamate whakamomori kē ahau i ahau anō. He nui ngā momo tikanga hei whakamate. Me tārore rānei, me peke rānei i te paripari teitei, me kai paitini kē rānei. 

I hoki aku mahara mō tētahi o aku hoa me tana mahi he kai taru kino. He pūhā hikohiko ki ētahi o te whānau. He pēnei tonu te oma haurangi noa o aku mahara. Ka tangi hoki ahau ki a au anō. Tangi kē ana mō taku uru heahea ki te taha o te rōpū nei. Ka roa te wā, ka puta mai te whakaaro me paheke atu ahau ki te kāinga o aku tīpuna. Kātahi ka puta atu ahau ki waho o te whare ka takahi atu mā raro ki te kāinga o aku tīpuna. Teretere ana taku hīkoi i te pōuri kia kore ai au e kitea e te tangata. Nō te whitinga mai o te rā ka heke atu au mā te tapa whakararo o te huarahi haere ai. 

Nō taku taenga ki te whare o aku tīpuna ka auē mai taku kuia me te hopu atu i ahau ki a ia. Ka awhi mai a ia i ahau me tana tangi hotuhotu hoki. Kīhai te kupu i puta mai i tana waha. Ko tana mahi kē he kukuti i ahau me te mirimiri mai i taku rae. Ko taku koroua kei te mapu, kei te noho puku. 

Mōhio tonu ahau kei te pōuri tana ngakau kei te mamaekino hoki. Tino roa te wā e pēnei ana mātou. Kātahi taku koroua ka tū ka kōrero. Kua tae kē mai te kōrero a ōku mātua, kua mōhio kē rāua i te hara o tā rāua mokopuna. Nō te mutunga o tana kōrero ka tahuri taku kuia ki te hora i te tēpu kai mā mātou. Ka mutu tā mātou kai ka kī mai rāua kia haere ahau ki te moe, me tā rāua mihi anō mō taku manawanui ki te haere atu ki a rāua. Kīhai i roa ka riro au i te moe, taumaha ana te hihī o taku ihi. 

Auē! he aha tērā? Kei te moemoeā kē pea ahau? Kāo. Ko te reo kē tērā o taku kuia e auē ana, e tangi ana. Ehara i te moemoeā. I tae mai te kōrero i tahuri te waka kanukanu o te rōpū i kahaki rā i ahau ā, mate katoa rātou. Tawhiti noa te wāhi i rere atu rā rātou. Nā tō rātou mataku pea i te kino i mahia rā e rātou. Ka pā mai hoki te pōuri ki ahau mō rātou me ō rātou mātua. I mōhio hoki aku tīpuna ki ngā kuia me ngā koroua o ngā tamatāne rā. 

E rua rā i muri mai kātahi anō ka tae mai ngā tūpāpaku e toru ki te marae. I whati katoa mai ngā whānau me ngā hapū ki te tangi ki tēnei parekura i pā mai ki tō mātou rohe. 

Ko taku koroua te upoko o te paepae tapu. Kei muri hoki aku mātua e takatū mai ana ki te manaaki i ngā iwi whakaeke. Te mutunga o te nehu ka puta mai te kōrero kua hoki mai te ora ki te wahine o te toa, ā, e kore e roa ka hoki a ia ki tana kāinga. 

I noho atu ahau ki aku tīpuna mō tētahi pō i mua i taku hokinga atu ki taku kāinga. He maha tonu ngā kupu i whakaputaina mai e aku tīpuna ki ahau. He tohutohu, he whakawhitiwhiti kōrero hoki te mahi nui me te mahi pono i waenganui i a mātou. Waimarie ana ahau kīhai ahau i whakamate whakamomori i ahau. Ko ngā whakatūpato katoa i ūhia mai e aku tīpuna hei tiaki tonu i ahau me ētahi atu o aku hoa maha o tōku whakatipuranga. Pōuri ana hoki ahau mō te whakamā nui i pā mai ki taku whānau. 

Nā taku matua tonu ahau i tiki mai, ā, i peka atu māua ki te whare o te wahine o te toa i mua i tō māua haerenga atu ki te kāinga. Ka uru atu māua ka whakawhetai tika tonu atu ahau ki te wahine rā mō ngā mahi kino i mahia rā ki a ia. Kei te kōrerorero māua me tā mātou tangi anō hoki. Roa tonu māua e pēnei ana, me te awhi hoki i a māua anō. Kātahi te wahine rā ka hongi mai ki ahau, me tana kī mai me whakawhetai kē mātou ki te Matua Nui i te rangi mō ngā manaaki. 

Ika nanakia

Nā Wiremu Kaa

Kei te taha moana te kāinga o te hapū o Takimoana. He one pai mō te māngoingoi. He rite tonu te heke o te tini tāngata ki te piu atu i ā rātou aho ki te hopu ika. He tāmure te tino ika engari mau mai ai ngā momo ika katoa, tae atu hoki ki te whai. He maha ngā momo pūrākau kei te kōrerotia e tēnei hapū i ngā huihuinga o te rohe. He nui hoki ngā ture Māori me ngā tohu o te mahi māngoingoi me ērā atu tikanga o te taha moana. He whakatūpato ētahi, he tohu kai ētahi, ā, ko ētahi ko ngā mahi nanakia i waenganui i a rātou. Anei tētahi tikanga pono a te hapū o Takimoana i heke mai rānō i ngā mātua tipuna. He tikanga tēnei kei te tino whakaponotia e tēnei hapū. Me pēnei ake taku whakamārama. 

Nā te mea he Tangaroa te wā, he pō kai hoki mō te ika, kātahi ka heke te tini tangata ki te māngoingoi mā rātou. Kei te tō haere hoki te rā, ā, kei te piki mai te tai. E kore e roa kua whiua atu ngā aho ki tua o ngā ngaru. Pango ana te one moana i te tini tāngata e tūtū atu ana me ngā aho e toro atu rā ki te tai. Nā Rāpata te tāmure tuatahi i tō mai ki tahaki. Tau ana tāna ki uta, kua kai mai hoki ko tā Hemi. Kei te toto tonu a Hēmi, kātahi ka takiri ko te aho a Miritene. 

Ngahau ana te taunga o te ika ki tahaki. Kei te tō ētahi, kei te whiu aho ētahi ki waho moana. Umere ana te iwi i tā rātou mahi. Kua roa noa te ngaronga o te rā, engari nā te pā mai o te rekareka, wareware katoa te haere o te wā. Ahakoa noa ka huke tonu te iwi nei ki te māngoingoi. Nō te kumenga mai o Rāpata i tana aho, ka kite atu a ia kua tāweka kē tana aho ki tā Miritene. Kua mau mai hoki tētahi kahawai ki tana aho. Kāore a Miritene i te mōhio kua tāweka kē tana aho ki tā Rāpata. 

Nā te kaha o te pōuri ka whakaaro a Rāpata me raweketia e ia a Miritene. Ka āta tangohia e ia te kahawai rā i tana aho. Kātahi ka whakamaua e ia te matau a Miritene ki te puku kē o te kahawai rā. Ka kawe hunatia e ia te kahawai rā me tana aho ki ngā ngaru kia pai ai te porowhiu atu ki te moana. Nō te pātaitanga a Miritene he aha kē te mea i mauria atu rā e ia ki te moana ka teka atu a Rāpata he rākau kē. Kāore i roa kua kai mai anō te aho a Rāpata. Kātahi rātou ka tatari, kua takitahi hoki te kai mai a te ika. Roa noa rātou e tatari ana kātahi a Hēmi ka kī, "E hika mā, kua moe kē ngā ika. Nā hoki kua kī kē mai te tai ā, e kore e roa ka huri." 

Kātahi rātou ka toto mai i ā rātou aho ki uta. Nā Miritene te aho i puta wawe mai ki tahaki. Nō te taenga mai ki te taha ka kite atu a ia kua mau mai tētahi ika. Ka koa hoki a Miritene, engari nō tana tuohutanga ki te wete mai i te matau, kātahi ka kite atu a ia kei te mau kē te matau ki te puku o tētahi kahawai. Hinapōuri katoa a Miritene. He mōhio hoki nōna ki ngā tikanga o tana hapū pēnei nā: i te mau tō matau ki te puku o te ika, he tohu tērā kei te raruraru tō whare, arā, kei te pūremu, kei te mahi kino tō hoa. 

Kei te hokihoki rātou ki ō rātou kāinga, engari kei te noho puku a Miritene me te taumaha hoki. Nō tana taenga ki tana whare kei te moemoe katoa tana whānau. Ka whakairia e ia ana ika ki roto ki te whare mīti, kātahi ka kuhu atu ki te whare ki te inu tī i mua i tana haerenga ki te takoto. 

Moata tonu ka patu mai te waea a Miritene. Nō tana pikinga atu ki runga, ka rongo atu a ia i te reo o Rāpata. Kātahi a Rāpata ka pātai atu mēnā he kahawai te parakuihi a Miritene. Nō tana kōrerotanga atu kāore anō kia tuakina āna ika, kātahi a Rāpata ka whāki atu i tana hara. Arā, nāna kē i wero te matau a Miritene ki te puku o te kahawai rā. 

Kātahi a Miritene ka whakaaro, ka menemene, ka kī atu. "E hoa, i pōhēhē tonu ahau i mau mai i ahau tētahi ika i taku hutinga mai i taku aho ki uta. Te whāwhai hoki ō tō hokinga ki te kāinga, kāore koe i kite he rākau kē te mea i mau mai ki taku aho. Engari a Hēmi, i mau i a ia tētahi kahawai. Otirā, kīhai a ia i kōrero mai i mau kē tana matau ki te puku!" 

He whakahōnore pono

Nā Oho Kaa

Tērā tētahi kaiwhakaako i whakaaro me tino whakahōnoretia e ia ngā tauira o tōna karāhe. Ko tana kupu tuatahi he pēnei, "I tēnei ata kei te pīrangi ahau ki te whakahōnore i a koutou katoa." Ka hoatu anō ētahi kupu. "Kia rongo tētahi o koutou i tō ingoa, me haere mai ki mua nei tū ai. E Tamanui, ko koe te mea tuatahi." 

Ka haere atu a Tamanui ki mua o ērā o ngā tauira tū ai.  

"Anei aku kōrero whakahōnore ki a koe. He tama tino pai koe ki te awhina i ngā mahi katoa o tēnei karāhe. Ahakoa he aha te mahi, kei reira koe me ōu ringaringa. Kore rawa koe e whakahokihoki mai ki ahau. Tēnā rawa atu koe e tautoko nei i ahau." 

Ka haere tonu ngā whakahōnore a te kaiwhakaako nei ki ia tauira o tōna karāhe. Kore rawa i wareware i a ia ngā mahi pai a tēnā tauira, a tēnā tauira. Haere hāngai tonu ana whakahōnore ki ngā tauira. 

I te mutunga o tana mahi whakahōnore, ka pinea e ia he rīpene kahurangi ki ia tauira. Ko ngā kupu i runga i te rīpene e kī ana, 'Kia mau ki tōu ake mauri.' 

Kāore i roa i muri mai, ka whakahaeretia e te kaiwhakaako nei he kaupapa mahi mā ana tauira. Ko tana hiahia kia haere ngā tauira ki te iwi whānui i runga i te kaupapa tuku whakahōnore. 

"E hoa mā, mā koutou e whakaaro ake ko wai te tangata kei waho rā hei whakahōnoretanga mā koutou. Ā te mutunga o te wiki ka titiro tātau he aha ngā hua o ā tātau mahi." Ka whakaritea e ia kia toru ngā rīpene ki ia tauira. 

I haere tētahi o ngā tauira nei ki te kaiwhakahaere iti iho ō tētahi kamupene i tō rātau tāone. Ka rere ana mihi whakahōnore atu ki a ia mō ana āwhina i te wā e kimi mahi ana a ia. Ka pinea e ia he rīpene kahurangi ki tōna hāte. 

Kātahi ka hoatu kia rua ngā rīpene kahurangi me tana kī atu, "Kei te whakahaeretia e tō mātau karāhe tētahi kaupapa whakahōnore i tētahi tangata mō ōna painga. Ko tāu mahi ināianei, he whakaaro te tangata hei whakahōnoretanga māu, nā, ka pine atu tētahi o ngā rīpene kahurangi nei ki tōna hāte. Ka mutu, kātahi ka tohutohu atu ki a ia kia kimihia e ia tētahi atu tangata hei whakahōnoretanga māna. Kia oti ēnei āhuatanga me whakaatu mai ki ahau i aha." 

I taua rā tonu ka kuhu atu te kaiwhakahaere iti iho rā ki te tari o tōna pāhi. E mōhiotia ana e ngā kaimahi o te kamupene nei he tino kōhetehete te pāhi nei. Ka tīmata tana whakahōnore atu i taua pāhi mō tōna mātauranga me tōna mōhio ki te whakariterite i ngā āhuatanga whakahaere o te kamupene. 

Tumeke ana te pāhi i ngā kōrero whakahōnore a te kaiwhakahaere iti iho. Kātahi ka rere atu te pātai ki a ia mehemea ka whakaae a ia kia pinea atu he koha, ērā he Te rīpene kahurangi ki tōna koti. Ka kī atu te pāhi rā, "Āe, kei te pai." 

Ka pinea atu te rīpene kahurangi ki tōna koti i runga tonu ake i tōna manawa. Ka mea anō a ia ki te pāhi, "He inoi tāku ki a koe. Ka taea e koe te mau tēnei o ngā rīpene hei koha ki tētahi atu? Kei te whakahaeretia e ngā tauira o te kura tētahi kaupapa whakahōnore tangata. Nā tētahi o ngā tama o te kura i hōmai tēnei rīpene ki ahau. Kei te hiahia rātau ki te mōhio he aha ngā hua ka puta mai i tēnei momo kaupapa." 

I taua pō, ka hoki te pāhi ki tōna kāinga. E noho ana tana tama, tekau mā whā ōna tau. Kātahi ka kī atu te pāhi rā ki tana tama, "I pā mai tētahi āhuatanga tino tipua ki ahau i tēnei rā. I puta mai te kaiwhakahaere iti iho o te kamupene ki taku tari mahi, ka tīmata tana whakahōnore i ahau mō aku mātauranga me taku mōhio ki te whakariterite i ngā āhuatanga whakahaere o te kamupene. E tā! Kātahi ka pinea mai e ia te rīpene nei ki taku koti i runga tonu ake i tōku manawa. Ko ngā kōrero i runga i te rīpene i pēnei nā, 'Kia mau ki tōu ake mauri.' Nā, ka hōmaitia e ia tētahi rīpene hei koha whakahōnore ki tētahi atu. 

"I ahau e taraiwa mai ana ki te kāinga, ka tīmata taku whakaaro ko wai rā hei whakahōnore ake māku. Ka whakaaro ake ahau mōhou. Ko koe te tangata e pīrangi ana ahau ki te whakahōnore. He tika he pōrearea te nuinga o ōku rā, nā kia tae mai ahau ki te kāinga kua kore e tahuri atu ki te whakarongo ake ki a koe. Ko taku mahi he kohete ki a koe i ngā wā e tino hē ana āu mahi o te kura, kua kohete mō te takakino o tō rūma. 

I tēnei pō, ko taku hiahia me noho ahau konei ki te whakahōnore i a koe. Āe, he tino puiaki koe ki ahau. Mai i tō kōkā, ki ahau, ko koe te tangata tino puiaki o tēnei ao katoa. He tama tino pai koe, ā, he tino nui taku aroha ki a koe." 

Te kaha tumeke o te tama i ēnei kōrero whakahōnore, ka tangi. Hotuhotu ana tōna tinana. I te wā e rere tonu ana ōna roimata, ka titiro ia ki tōna pāpā, ka mea atu, "E whakaaro kē ana ahau ki te whakamomori i ahau, e Pā. Pēnei hoki ahau kāore āu aroha mōku. Engari, rongo nei au i te kaha o tō aroha mōku, kua kore taua whakaaro i nāianei." 

Ko Huriana ahau

Nā Oho Kaa

He tamariki whāngai a Huriana rāua ko tana māhanga a Tereia. Ko Māmā Paraone tō rāua māmā whāngai. He horoi taputapu, he hāwini ngā mahi a Māmā Paraone hei oranga mō rātau.  

He tamaiti totoa rawa, he tamaiti hautete a Huriana, ā, pērā tonu ia i te kura. Nō te mutunga o tana kura, ko tana mahi he horoi i ngā wharepaku o te tāone. Ahakoa rā ko tana moemoeā kē, kia noho a ia hei kaituku waiata, arā he DJ i runga reo irirangi. 

I ngā pō, ka haria e ia tana reo irirangi ki tana moenga kia pai ai tana whakarongo ake ki ngā kaituku waiata. Ka hanga whakaarotia e ia tana rūma pakupaku, tīhaehae nei te whāriki, hei rūma teihana reo irirangi māna. Ko ia tēnā e mahi hangarau ana he kaituku waiata a ia, e whakamōhio atu ana ko wai ngā kaiwaiata o ia tēpa. Ko tana uruoro ko tana paraehe makawe. 

Ka rongo tonutia a ia e tōna māmā whāngai rāua ko Tereia, nā te mea he pīrahirahi te pakitara, nā kua haparangi atu ki a ia kia katia tōna waha, ā, me moe. Engari kore rawa a Huriana i rongo i a rāua. Pau katoa ana whakaaro ki tana moemoeā. 

Nō tētahi rā i te wā o te tina, ka haere a Huriana ki te reo irirangi ā-iwi, i te tāone. Ka kōrero atu ki te kaiwhakahaere mō tana hiahia kia noho a ia hei kaituku waiata mō te reo irirangi.  

Kātahi ka titiro atu te kaiwhakahaere ki a Huriana e tū mai ana. Ko te hauhau o te āhua i roto i tana tarau waho me tana pōtae poareare katoa. 

Kātahi ka pātai atu, "Kua kuraina koe mō tēnei mahi?" "Kāore e Tā," tana whakautu. 

"Ā kāti, kāore he mahi i konei māhau." 

Ka pōhēhē te kaiwhakahaere e kore a Huriana e kitea i reira a muri ake. 

Engari kāore a ia i te mōhio he tīmatanga noa iho tērā o te moemoeā a Huriana. Ko tana hiahia kia taea e ia te hoko mai he whare ātaahua mō tōna māmā whāngai. Nā tōna māmā whāngai tonu a ia i whakahau me whai i āna moemoeā, nā reira, i whakaaro tonu ia ka whiwhi ia i tētahi mahi i te reo irirangi ahakoa te kōrero pērā mai o te kaiwhakahaere. 

Nō reira i ia rā, ka hokihoki atu a Huriana ki te teihana ki te pātai atu mehemea he mahi anō i reira māna. I te mutunga, ka whiwhi mahi ia, arā he kaitonotono kāore he utu. I te tīmatanga, he tiki kapu tī, he hari mai ā rātou kai, he mau atu he hapa mā ngā kaituku waiata. Ahakoa he aha te mahi mā Huriana, ka mahia e ia. Nā te kaha whakaawe o tēnei tama ki tāna mahi, ka tonoa a ia ki te tutaki i ngā manuhiri rongo nui i te taunga waka rererangi mā runga i te tekihana. 

I te wā ka tata atu a ia ki ngā kaituku waiata, ka mātakitaki, ka whai atu i ngā tuhi o ō rātau ringa, te whakanekeneke o ngā pātene, me ērā āhuatanga katoa. Nā te hōhā tonu ka ki atu ngā kaituku waiata me hoki a ia ki te kāinga. Nā, hoki hāngai tonu ana ia ki tana rūma ki reira whakatū ai i ngā mahi a ngā kaituku waiata. I mōhio tonu hoki ia tērā te wā ka noho ko ia ki taua tūnga. 

Heipū rawa i tētahi ahiahi Hatarei, i te āhua māuiui te kaituku waiata, nā rā i te kaha rawa o tana whakangahau o te pō Paraire. Ka rutua rā i te moe. Ko Huriana anake tētahi atu i reira. Kua pā kē mai te rekareka ki a ia. Nā te pakōtanga mai o te waea, nāna kē i whakautu. "Kia ora, ko te teihana tēnei." 

"Kia ora," te whakahoki mai. 

Mōhio tonu a Huriana ko te kaiwhakahaere tērā. 

"Huriana, whakarongo mai. E kore pea e taea e te kaituku waiata te whakaoti i tēnei wāhanga o te reo irirangi. Ka taea e koe te waea atu ki tētahi o ngā kaituku waiata kia haere atu?" 

"Āe, kei te pai, māku e waea atu." ko tā Huriana. 

Engari nō tōna hekenga ki raro o te waea, ka kī ia, "Pēnei te kaiwhakahaere he pōrangi ahau!" I waea tonu a ia, engari ehara ki tētahi o ngā kaituku waiata. I waea kē a ia ki tōna māmā whāngai, me tana whaiāipo kia whakatangihia ā rāua reo irirangi nō te mea ākuanei ka rongo rāua i a ia. Tekau mēneti pea ka waea atu a ia ki te kaiwhakahaere. "E Tā, kāore e kitea e au he kaituku waiata." Ka noho puku mai te kaiwhakahaere kātahi ka mea atu, "Huriana, kei te mōhio koe ki te whakanekeneke i ngā pātene?" 

"Āe, e Tā, kei te mōhio ahau!"  

Tere tonu tana oma atu ki te rūma o te kaituku waiata. Āta nekehia atu e ia te kaituku waiata kua warea rā i te moe. Ko ia e noho ana i te tūru. Ko ngā mīhini i mua tonu i a ia. 

Kāwiritia ana te wahahiko, ka kī atu, "Whakarongo mai, whakarongo mai! Ko au tēnei, ko Huriana, tā koutou mōkai, tā koutou tamaiti, tā koutou tino mokopuna o te motu. E kore he mea i mua i ahau, e kore anō hoki he mea i muri ake i ahau. Nā reira, kia mōhio mai koutou ko au anake tēnei, ko au anake. He rangatahi ahau, kei te takakau tonu, he pai ki ahau te whakahoahoa. Kei ahau te tiwhikete mō te whakangata i ō koutou hiahia mai i tēnei teihana. Nō reira, kia tūpato koutou kōtiro mā, ko au tā koutou tino kaituku waiata!" 

Nā te mea kua kaha kē tana hiahia ki tēnei momo mahi, kāore āna āwangawanga. Tino whakamihi ngā kaiwhakarongo me te kaiwhakahaere o te teihana ki a ia. Mai i taua rā, haere whakamua tonu te mahi a Huriana hei kaikōrero, hei reo i runga i te reo tātaki hoki. I tutuki katoa i a ia tēnā o ana moemoeā. 

A – K  

A

ahakoa   noa even so 

 

H

hanake   come 
hara   wrong-doing, crime 
hangarau   pretend 
hautete   jabber, talkative 
heipū   came upon, met up with 
hunatia   conceal, hide or secret 

 

K

kāhui   crowd of people 
kamo   eye 
kāta   horse cart 
kaumātuatanga   advancing age 
kohukohu   reprimand, tell off 
koingo   yearning 
kotiti haere   go off track 
kumenga   pull, a sudden tugging or yanking movement 
kūtete kau   to milk cows, dairying 

M - P

M

māngoingoi   handline fishing, surfcasting 
mapu   sigh 

 

N

nanakia   crafty 

 

P

paheke   pass by, go past, by way of 
paitini   poison 
parekura   disaster 
pīrahirahi   thin 
porowhiu   toss, throw 
puiaki   favourite, very special 
pūremu   adultery 

R - WH

T

tahaki   ashore, to one side 
takiri   jerking movement 
Tangaroa te wā   a fishing term 
taotū   hit, struck (by) 
tapa o te toa   corner of the shop 
tarau waho   overall 
tārore   noose, entrap, to hang oneself 
tauira   encircle, wreathed, bound around 
tāweka   tangle 
tinihanga   cheat 
tiro mākutu   stare 
totoa   hyperactive 
tuaki   gut, disembowel 
tumeke   alarm, startle 
tuohutanga   bend down, to stoop 
tūtei   sentry 

  

U

uru mānuka mānuka   grove 

 

WH

whakahemohemo   dying 
whakahokihoki   answering back; replied 
whakahōnore   to honour, to acknowledge 
whakamomori   commit suicide 
whakaraka   step toward (a goal) 
whakatūpato   caution 
whāngaia   adopted