He Kōrero Whakataki ki te Atamai Rorohiko 

He peka te Atamai Rorohiko o te pūtaiao rorohiko e aro ana ki te hanga mīhini ka whai kaha ki te whakatutuki taumahi kia rite ki tā te atamai tangata te pai. Kua roa tēnei rāngai e haere ana, e kitea ana i ngā wāhanga maha o tō tātou ao. Ka kitea ngā hangarau Atamai Rorohiko i roto i ngā taputapu matihiko e mōhio nei tātou pēnei i te kuputuhi aunoa, ngā tūtohu tāpaetanga i te pae pāpori, tae atu ki ētahi taputapu hou e puta haere tonu nei pēnei i ngā motokā kaihautū-kore me ngā pūkaha waihanga whakaahua. He whānui tonu ngā āheinga o ngā taputapu Atamai Rorohiko, engari ka mārama te tangata ki ēnei mā roto i ētahi o ngā kupu e kitea nuitia ana i tēnei rāngai. Kei tēnei pukameka ētahi o ēnei kupu. Mō ētahi atu taipitopito, tauira hoki, tirohia te wāhanga Te Tūhura Haere Tonu i te mutunga o tēnei rauemi.  

Ka kīa ētahi taupānga pūmanawa takitahi he tauira, he pūnaha rānei. Ko te rerekētanga o ngā tauira Atamai Rorohiko e whakamahia nei e tātou me ērā e kitea ana i roto i ngā pakimaero pūtaiao anake ka mārama ki te anga tātou ki ētahi kupu e rua, ko te Atamai Rorohiko ngāwari, me te Atamai Rorohiko mārō. 

• E hāngai ana te Atamai Rorohiko ngāwari ki ngā tauira Atamai Rorohiko katoa e whakamahia nei i ēnei rā. E toro ana te whakamārama nei ki ngā pūnaha i āta hoahoatia ki te āta whakatutuki i tētahi taumahi pēnei i ngā Karetaokōrero, ngā karekōrero, ngā pūnaha tūtohu, me ngā motokā kaihautū-kore. Ka angitu te Atamai Rorohiko ngāwari i roto i ana taumahi motuhake, engari kāore ōna atamaitanga noa. 
• E whakaatu ana te Atamai Rorohiko mārō i ngā tauira Atamai Rorohiko he rite te taumata ki te tangata, he āheinga rānei kei tua o te atamai tangata, me te āheinga hoki ki te whakahāngai ki ngā taumahi huhua. I tēnei wā kāore he Atamai Rorohiko mārō i te ao nei, ā, kei te tautohetohe tonutia mena rānei ka hua mai tēnei āhua i tēnei whakatipuranga. 
• Ko te whakaako mīhini tētahi wehenga whāiti o te Atamai Rorohiko e hāngai ana ki te hanga pūnaha ka taea te urutau, kāore he tino kuhunga mai o te ringa tangata ki roto. Mā te tātari i ngā kohinga raraunga nui, ka taea e ngā pūmanawa akoranga mīhini te tūtohu toronga, hononga hoki ki te matapae, ki te taki urupare rānei. Ko te akoranga hōhonu tētahi momo whakaako mīhini whāiti ka whirinaki ki ngā hononga ioio hangahanga i takea mai i te tauira o te roro tangata. Mā konei ka taea e ngā pūnaha te ako me te whakawhanake i ana wheako, ka iti iho hoki te āta whakarite. 
• Ko tā ngā tauira Atamai Rorohiko waihanga he waihanga tāpaetanga hou mā te whakangungu ki te raraunga mohoa. Ko tā ēnei tauira he whakamahi hātepe hīraurau ki te hanga kuputuhi, whitiata, puoro rānei i runga i ngā tauira kua tūtohutia mā te whakaako mīhini. Kua tīmata te aronui o te ao whānui, te ao pakihi me ngā kāwanatanga ki te Atamai Rorohiko waihanga nā tana āheinga ki te hanga putanga ōrite nei ki ō te tangata whakaputa.  Kua rongo pea koe mō ngā tauira Atamai Rorohiko waihanga pēnei i te ChatGPT, Bard, me DALL-E. 
• Ko tā te Natural Language Processing (NLP) he tukatuka, he whakamārama hoki i te reo tangata ki te rorohiko. Ko tāna he whakawhanake tauira e taea ai e te rorohiko te tukatuka, te whakamārama, te waihanga reo tangata rānei kia whai tikanga, kia whai take hoki – ka whai pāngha tēnei ki ngā taumahi pēnei i te whakawhiti reo, te whakarāpopoto tuhinga, me ngā pūnaha whakautu pātai.    
• Ko ngā pūnaha e kīa nei he Tauira Reo Rahi (Large Language Model-LLM) he pūnaha NLP e whakamahi ana i te akoranga hōhonu hei tukatuka i ngā kohinga raraunga nui. E whāngaia ana ngā Tauira Reo Rahi pēnei i ChatGPT me Bard ki ngā pūranga tuhinga maha kia taea ai te whakautu pātai ōpaki anō nei he tangata. Mā reira e whai huarahi hou ai ki te tūhono ki ngā mīhini: ahakoa kāore e taea e tētahi pūmanawa te hanga kuputuhi, ka taea e tētahi LLM te tukatuka whakautu mā te reo kōrero ōpaki noa. 

Te Mana Raraunga 

He maha ngā tauira Atamai Rorohiko ka whakangungua ki ngā kohinga raraunga nui ā te tangata, ā, kāore he mutunga o ngā whakawhitiwhiti kōrero mō te mana o te tangata ki te whakatau i te whakamahinga o ana raraunga. He mea tino hirahira te whakatau take mō te mana pupuri me te whakamahinga whānui o te raraunga i roto i te ao o te Atamai Rorohiko. I Aotearoa, he mea tino nui ngā mātāpono mana raraunga Māori i raro i Te Tiriti o Waitangi.  E ai ki ēnei mātāpono, me noho ngā raraunga Māori ki raro i te mana whakahaere o te Māori. He mea nui te mahi tahi i waenganui i ngā hapori Māori, te kāwanatanga me te hunga whai pānga hangarau ki te whakatū kauwhata ki te whakaahuru i te mana raraunga Māori, te tiaki i te ahurea, me te kaupare mōreareatanga hoki. 

 

He maha anō ngā peka o te Atamai Rorohiko kāore e kapi i tēnei rauemi. Ka noho ēnei peka hei kia kanorau, kia tūhonohono hoki te kaupapa nei kia mahi tahi ai ki te hanga pūnaha "atamai" me te whakautu i ētahi rapanga matatini. Kei tēnā peka, kei tēnā peka āna anō ritenga mahi, tikanga mahi, wero hoki hei koha ki te ao Atamai Rorohiko whānui. 

 

He āki huritao 

• Ina rongo te tangata i te kupu Atamai Rorohiko, ki a koe, kei te pohewatia tētahi mea rite ki te Atamai Rorohiko ngāwari, mārō rānei? Ka pēhea pea te pānga o tēnei ariā ki ō rātou kare-ā-roto mō te Atamai Rorohiko? 
• He pēhea tō rata ki te whakawhiti whakaaro mō ngā hangarau hou i roto i ō mahi whakaako? Ka whakawhitiwhiti kōrero koe mō te take e whakamahi ai te tangata i ngā hangarau, e kore nei rānei? 

He āheinga ka puta i te Atamai Rorohiko i ngā rāngai katoa o te pāpori. I a koe e tūhura nei, e whakawhiti whakaaro nei mō ēnei āheinga, me mārama ki ōna wero maha hoki. Me whakatairite ēnei mōhiotanga ki te pukameka wero e kitea ai ngā hononga i waenga i ngā mea e rua. 

• Ngā māramatanga i puta i ngā rāraunga Ka taea e ngā tātaritanga pūkaha Atamai Rorohiko te wewete i ngā kohinga raraunga nui ki te whakaputa māramatanga whai hua. Hei tauira, kua whai wāhi atu te Atamai Rorohiko ki te tātari i ngā whakaahua-ā-rangi ki te tautoko i ngā mahi urupare aituā i te Moana-nui-a-Kiwa. Using AI For Good: A New Data Challenge To Use AI To Triage Natural Disaster Aerial Imagery  
• Taumahi whakahaere whāomo Ka taea e te Atamai Rorohiko ngā taumahi whakahaere te whakaaunoa, e wātea ai te wā ki ētahi atu mahi.  
• Pūnaha whakaako atamai  Ka taea e te Atamai Rorohiko te tangata te tautoko i roto i ā rātou akoranga mā te tuku urupare matawā, ārahitanga, tūtohutanga hoki.  
• Te auaha niko me ngā āhuatanga hou Ka taea e ngā taputapu Atamai Rorohiko te penapena i te auahatanga mā te tūhura wawe i ngā whakaaro hou, mā te tuku tirohanga rerekē rānei.  
• Te whāi wāhi ki ngā rauemi Ka taea e ngā rauemi pūkaha Atamai Rorohiko te whakawātea mōhiohio kia ōrite te wātea ki te katoa. Hei tauira, ka taea e ētahi tauira Atamai Rorohiko waihanga te whakaputa hauraro, whakamārama ororongo hoki mō ngā atahanga me ngā whitiata, e taea ai e te tangata te whai wāhi ki ēnei tāpaetanga mā ngā tairongo huhua. How Artificial Intelligence is Improving Digital Accessibility 
• Te whakawhiti reo me te whai wāhitanga Ka taea e ngā taputapu Atamai Rorohiko whakawhiti reo me ngā rauemi whaiwāhi te tūwhiti i ngā taupātanga reo me te whakapai ake i te whaiwāhitanga mōhiohio mo ngā taupori kanorau. Hei tauira, ka taea e te Atamai Rorohiko tukatuka reo māori te whakamāmā i te ara mō ngā taputapu matihiko ki te mārama me te tuku kōrero, kuputuhi hoki i te reo Māori, e whai mana ai tana wāhi i te ao matihiko. Accelerating the revitalisation of te reo Māori with AI
• Te tauutu Hara Tāwar Ka taea e ngā hātepe Atamai Rorohiko te tātari i ngā kohinga raraunga nui, pēnei i ngā rēkoata hokohoko, ngā tauira whanonga kaiwhakamahi rānei, ki te tūhura i ngā mahi hara tāware.  
• Te Matapae Whakatikatika Ka taea e te Atamai Rorohiko ngā raraunga mai i ngā paerongo me ngā taputapu te tātari kia pai ai te matapae i ngā wā ka hiahiatia ngā mahi whakatika taputapu, e tāea ai te whakarite hōtaka whakatika tōmua me te whakaiti hoki i ngā wā wetohanga. 

 

Te Atamai Rorohiko me te ahumahi 

I roto i te tauhokohoko me te ahumahi, ka taea e te Atamai Rorohiko te whakahou tukanga ki te whakakamakama mahi, te whakapiki hoki i te putanga hua. Mā roto i ngā āheinga o ngā pūnaha pūkaha Atamai Rorohiko aunoa ki te tātari i ngā kohinga raraunga nui, ka taea e ngā rōpū whakahaere te whai whakatau i runga i te mōhio, me te hao hoki i ngā māramatanga huanui.  

Nā konei ka taea te kī he pitomata tō ngā hangarau pūkaha Atamai Rorohiko ki te panoni i ngā ahumahi pēnei i te hauora, te kawekawe, me te hanga taputapu, ki te tūtohu māuiuitanga, te whakatāhuhu i ngā mahi kawekawe, me te whakarōnaki hoki i ngā tukanga waihanga taputapu. Kei ēnei ahunga whakamua te āheinga ki te whakapiki ake i ngā ratonga, te whakatupu ōhanga, me te whakapai eke i te noho o te tangata. 

 

Ngā Aramahi i te ao Atamai Rorohiko 

E tika ana te kōrero he nui ngā aramahi pūtaiao o te Atamai Rorohiko, engari kia mārama te tangata kei te piki te pīrangitia o te ngaiotanga Atamai Rorohiko i roto i ngā rāngai mahi huhua. Ka taea e te hunga hīraurau rapanga whai māramatanga ki te Atamai Rorohiko te whai wāhi atu ki te whakawhanake urupare auaha, otiia, me mōhio te hunga hanga kaupapa here, hanga ture hoki ki te Atamai Rorohiko kia pai ai tā rātou whakarite waeture mō ngā awenga matatika, ture hoki. Ko te matapae hei ngā tau e tū mai nei, ka whai wāhi atu te hangarau Atamai Rorohiko ki te nuinga o ngā rāngai ngaio.  

 

Mā te whakawhānui i ngā toronga o te Atamai Rorohiko e tuwhera kē atu ai te huarahi mā ngā ākonga ki ngā aramahi huhua. Mā te whiwhi i ngā pūkenga me ngā mōhiotanga Atamai Rorohiko, ka taea e te tangata te whakahāngai i a rātou anō kia whanake rātou i roto i te ahumahi e tipu tere haere nei. 

 

He āki huritao 

• He wāhi kei ō hōtaka ako ki te whakaaro mō te anamata, me te whakaaro me pēhea te hīraurau rapanga nui? Ka pēhea te whai wāhi atu o te Atamai Rorohiko ki ēnei whakaaro? 
• Ka āta matapakitia ētahi momo aramahi, rāngai rānei i roto i ō akoranga? He aha pea ngā awenga o te Atamai Rorohiko ki ēnei mea? 
• Kua whakaawe, kua whakaawetia hoki te pāpori o Aotearoa e te auahatanga hangarau. He aha ngā hua whaitake nui o ngā hangarau Atamai Rorohiko e tika ana kia hāpaingia e tātou? 

Ko ngā hua o ngā hangarau Atamai Rorohiko he mea haere tahi ki ngā wero huhua me āta urungi e te hunga whakawhanake, whakamahi hoki i ēnei hangarau. Whakaarotia te kore hāngai pea o ētahi o ēnei wero i roto i ētahi whakamahinga o te Atamai Rorohiko, me te hāngai nui pea i roto i ētahi atu. 

• Ngā āwangawanga tūmataiti Ka kohia, ka rokirokitia pea e ngā taputapu Atamai Rorohiko ētahi raraunga whaiaro matatapu, ka noho hei mōreareatanga haumarutanga, tūmataitinga hoki.  
• Ngā mōreatanga tāhae kōrero Ki te whakamahia te Atamai Rorohiko waihanga hei whakaputa tuhinga, atahanga rānei me te kore i whai whakaaetanga, ka kīa pea he tāhae.  
• Te whiwhinga matatika me te whānako ahurea He matarau te tiki raraunga whaimana me te kaupare i te whānako ahurea i te whakamahinga o ngā taputapu Atamai Rorohiko. Ka whakangungua pea ētahi tauira Atamai Rorohiko ki ngā raraunga ā te tangata kāore i tika te torotorohia atu, te whai whakaaetanga, te utua rānei. He take mana raraunga tēnei hei whakaarotanga. Hei tauira, kei ētahi taupānga pūkaha Atamai Rorohiko ētahi hākori whakaahua tīpuna Māori hei whakangahau, he takahi tapu. Te Ao Māori considerations of AI with the dead and personal Data
• Ngā ture whakamahi He maha ngā taputapu Atamai Rorohiko whai kupu here mō te pakeketanga, e tika ana kia whakaarohia ina whakamahia i te taha o te taiohi.  
• Ngā here tautoko kare ā-roto Kāore e taea e te Atamahi Rorohiko te tuku tautoko kare-ā-roto, māramatanga rānei e rite ana te taumata o tō te tangata āheinga.  
• Auahatanga whāitiHe nui ngā taputapu Atamai Rorohiko kāore e taea te waihanga hua i tua o ngā āheinga o ngā raraunga whakangūngū.  
• Mōhiotanga hē He maha ngā tauira Atamai Rorohiko waihanga i hoahoatia i runga i te whāinga matua kia rite ngā putanga ki ō te tangata, kaua ki te tuku mōhiotanga tika.  Nā konā ka hē ngā mōhiotanga ka puta i ōna wā, engari he mea āta whakarite kia whakapono te tangata e tika ana. Hei tauira, kei roto i te Atamai Rorohiko te āheinga mōrearea ki te muku i ngā rangatira Māori mā te panoni kia hē ngā pūrākau me ngā hītori. Ka takahia pea te mana motuhake, te oranga ahurea me te whakarauoratanga o ngā iwi taketake i tēnei. Te Ao Māori considerations of AI with the dead and personal Data
• Te huringa o ngā hiahia o te ao mahi I te taha o ngā momo mahi me ngā hua hou, ka panoni pea ngā whanaketanga hangarau i te āhua o te ao mahi kia take-kore haere ētahi tūranga.  
• Ngā utu tīmata nui He nui te utu pūtea whakangao ki te whakawhanake me te whakaū i ngā taputapu pūkaha Atamai Rorohiko. Ahakoa ngā taputapu Atamai Rorohiko kore-utu, ngāwari noa te utu rānei, i te nuinga o te wā ka pūkahatia e ngā tūmau utu nui.  
• Te toitūtanga He nui te hiko whakahaere i ngā tūmau kaha e whakamahia ana mō ētahi hangarau Atamai Rorohiko, he āhuatanga ka tūkino i te taiao ki te kore e whai rautaki toitūtanga. 

 

Ngā Matatika, te Rītaha me te Whai Tikanga  

He mea nui kia maumahara tātou he mea hanga ngā tauira Atamai Rorohiko nā te tangata. Kei te tangata - ahakoa he mea āta whakaaro, he whakaaro aunoa rānei – ōna rītahatanga ka kitea pea i roto i ngā hangarau ka hangaia e ia.  

Ka puta mai pea taua rītahatanga i roto i ngā raraunga ka whakangungu i te tauira Atamai Rorohiko, i te hātepe rānei ka whakamahia ki te tukatuka i aua raraunga (e mōhiotia nei ko te aukati-ā-hātepe). Ka puta pea i ngā tūmanako-ā-ahurea, ā-pāpori, ā-torowhare rānei. Ko te hua ko ngā whakatau ā ngā rorohiko ka whai panga arokino-ā-pūnaha ki ētahi momo rōpū tāngata. Ko tētahi tauira pea o tēnei ko tētahi tauira tauutu kanohi Atamai Rorohiko kāore i whakangungua ki ngā raraunga kanorau. Nā reira ka nui ake pea te tuautu-hētia o te tauira ka hua mai i te hunga kāore ō rātou āhua i te whai wāhi atu ki aua raraunga whakangungu.  

I ētahi wā ka āta rarangahia atu ngā tikanga tangata ki roto i ngā pūnaha Atamai Rorohiko mā te whakangūngū ki ngā ture whai tikanga. Hei tauira, whakamahia ai ngā hangarau Atamai Rorohiko i ētahi pae pāpori hei āwhina ki te whakaū i ngā kaupapa here whakawā tāpaetanga. Ka taea pea te tauira Atamai Rorohiko te whakangungu ki ngā tāpaetanga pae pāpori hei āwhina kia pai ai tana tauutu i ngā tauira e hāngai ana ki ngā whanonga whakatumatuma. Mā reira ka taea pea te whakamahi ki te whakatāmura, ki te aukati rānei i ngā tāpaetanga e whai ana i aua tauira. Heoi anō, e whakawhirinaki ana ngā ture e whakamahia ana e tētahi tauira Atamai Rorohiko ki ngā tikanga o te tangata nāna te tauira i waihanga: Ka whakangungu pea ngā kamupene pae pāpori rerekē i te Atamai Rorohiko ki te ārai, ki te tuku noa rānei i ngā momo tāpaetanga rerekē. 

Mā te kohikohi māramatanga ki ēnei wero matatika, ka mōhio haere ngā ākonga, ka kaha ake te whakamahi - me te hanga – i ngā taputapu Atamai Rorohiko i runga i te hinengaro arohaehae. 

He āki huritao 

• Ka whakaako koe mō ngā matatika me te rītahatanga? Ka āwhina pea te whakawhiti kōrero mō te Atamai Rorohiko i ēnei akoranga?  
• Me pēhea, ki a koe, tā te tangata, pakihi rānei, arotake i ngā mōreareatanga o te whakamahi i tētahi taputapu Atamai Rorohiko hou?  
• Ka noho rānei ētahi o ēnei wero hei āki panonitanga whai hua? He aha ngā hātepe ka taea pea e te tangata te whai e tutuki ai tēnei? 

He Huatau Wheako Akoranga  

• Me whakamahi ngā ākonga kia whakawhitiwhiti kōrero mō te pānga o te Atamai Rorohiko ki te pāpori. Kōwhiria he wāhanga o te pāpori e hāngai ana ki tō hōtaka ako o te wā. Tonoa ngā ākonga kia whakarite ohia manomano mō ngā whakamahinga ka taea pea e te Atamai Rorohiko i taua wāhanga, me te tūhura hoki i ngā painga me ngā wero whai pānga.  
• Whakawehea ngā ākonga ki ētahi rōpū iti ka tuku ki ia rōpū he taputapu Atamai Rorohiko, tētahi taupānga rānei e wātea tūmatanui ana. Tonoa rātou kia rangahau, kia whakaatu hoki he pēhea te mahi o te taputapu, ōna painga, me ētahi take matatika hei whakaarotanga i tōna whakamahinga. 
• Tonoa ō ākonga kia whakaaro mō te Atamai Rorohiko me ō rātou ake uara. Tukuna he kāpeka ka hua ake pea e whakamahia ai te Atamai Rorohiko, ka tono i ngā ākonga kia whakarārangi i a rātou anō kia hāngai ki te ‘raupapa uara’ mai i te hunga whakapono ki te whakapae "me whakamahi te Atamai Rorohiko" ki te whakapae "kaua e whakamahi Atamai Rorohiko" i roto i taua kāpeka. Tonoa te hunga hiahia kia whakamārama i ngā whakaaro i muri i tō rātou whakatau. 
• Tonoa ngā rōpū ākonga kia tuhi pātai hei whakamātautau i te "Atamai Rorohiko mārō." Tonoa rātou kia whakaaro he aha i rerekē ai te atamai tangata ki ngā āheinga o te mīhini i tēnei wā, ka whakamahi i aua whakaaro hei taunaki i ā rātou pātai. Mena e tāea ana, uia ētahi o ēnei pātai ki tētahi tauira Atamai Rorohiko kōrerorero kia kitea mehemea 'ka eke' ki te karangatanga atamai.  

 

Hei pānui anō 

• Kua whakaputaina e Kit Willett ētahi rauemi Atamai Rorohiko mā te kaiako, ka kitea i tana pae tukutuku: ChatGPT Resources- Kit Willett
• Mō tētahi whakamārama ariā Atamai Rorohiko māmā raupapa ataata, tirohia tēnei whitiata rima meneti mai i te Boston Museum of Science: What is AI? - YouTube  
• Tirohia te whārangi IBM mō te Matatika Atamai Rorohiko ki te ako mō ngā whakawhitinga kōrero o te wā i tēnei kaupapa: AI Ethics - IBM 
• Ki te ako mō te rangatiratanga raraunga Māori, tirohia te paetukutuku o Te Mana Raraunga: Te Mana Raraunga  
• Mō ētahi atu kōrero mō ngā huarahi e whakangungua ai pea ngā tauira Atamai Rorohiko, tirohia te whārangi Akoranga Mīhini nā MIT Sloan: Machine learning, explained - MIT Sloan School   
• He roa te hītori o te kaupapa Atamai Rorohiko. Kua puta i Te Whare Wānanga o Harvard tētahi whakarāpopototanga o tēnei hītori: The History of Artificial Intelligence - Science in the News (harvard.edu)
• Kei te aratohu whakamahi pūtaiao rorohiko a Waitaha ētahi rauemi pāhekoheko mā ngā ākonga kura tuarua e ako ana mō te pūtaiao rorohiko:Computer Science Field Guide (csfieldguide.org.nz)